BO̍K-SU Ê KHÓ͘-LO̍K
Tām-po̍h ê kám-sióng
Chhoà Phòng
1965.11.15 P.19
1965.12.01 P.19

Tit-tio̍h Kong-pò-siā ê hò-ì, ài goá siá tām-po̍h siau-sit, só͘-í m̄-káⁿ the-sî chiū tah-èng hó.
Tī chia ài siá tām-po̍h kè-khì ê kám-sióng, lâi piáu kám-siā kap siàu-liām. Goá tī 8 ge̍h té, ū tuì kàu-hoē sin-chhéng sî-jīm kap thé-hiu. In-uī nî-hè í-keng boán-ló, ài niū hō͘ siàu-liân poè ê tâng-kang khì oa̍h-tāng, koh kè-sio̍k chi̍t ê sin oa̍h-miā. Kì-tit só͘ le̍k-kè ê kàu-hoē kiōng ū 8 só͘-chāi: Kè-kau (Ka Tiong), Tāi-lí (Tiong Tiong), Thâu-siā, Siān-hoà, Tiong-chiu, An-sūn, Oân-lí, Sin-chhī téng (Lâm Tiong). Chin kám-siā Siōng-tè ê un-tián kap pang-chān. Beh ta̍h-ji̍p kàu-kài ê tong-chho͘, chin tám-hân, chin khoà-sim, siūⁿ kóng, goá chit khoán chiah-nih teh ham-bān ê lâng, beh cháiⁿ-iūⁿ lâi choè kang, lâi niá-siū chit hō tiōng-tāi ê jīm-bū ah? M̄-chai choè oē thang chiūⁿ 10 nî á boē? Kiat-kó, kàu thè-hiu iok 43 nî ê ji̍t-chí. Si̍t-chāi chin kám-siā Siōng-tè kap kàu-hoē í-ki̍p chin-ài ê kok-uī tâng-kang, chin toā ê thiàⁿ-thàng, pang-chān chiah oē tit án-ni.
oē kì-tit muí pái nā beh khì chiū-jīm; chiū tāi-seng ū chi̍t ê siaⁿ kàu goá ê hī-khang, kóng lí beh khì ê kàu-hoē sī chin léng-tām, hoē-iú sang-soàⁿ, lé-pài bô kuí-ê, keng-chè kàu-ke̍k khùn-lân. Láu-si̍t kóng, boē bián-tit oē hō͘ sim tám-hân, kiaⁿ-hiâⁿ, chóng-sī bî-po̍k sìn-khò Chú oē saⁿ-kap chè kang, chiū hó-táⁿ chìn-chêng, bô lún-neh. Toà liáu hoē iú ū siū chio-ho͘, tāi-ke hô-hia̍p, kàu-hoē chiū jia̍t, hōng-hiàn ióng-io̍k, kàu-se sūn-lī, sim siū an-uì, kang-chok kè-sio̍k, lóng sī Chú ê le̍k-liōng lâi ta̍t-chiâⁿ ê.
Hoê-sióng toà ê só͘-chāi, ū sî beh thàm-hóng hoē-iú, chng-siā khui-khoah, koh chin hn̄g, lō͘-tô͘ khâm-khia̍t, koân-kē, khí-khu, khì-tò kám-kak chin thiám-thâu, chin ià-siān, chóng-sī tuì hoē-iú ê chhin-chhiat, hó bián-lē, khoài siū khó͘-khǹg, phín-hēng khó-chhú, chiū sim hí-lo̍k, soà boē kì-tit it-chhè ê phî-lô sin-khó.
Kì-tit chi̍t pái tī Tāi-lí kàu-hoē ê sî-chūn, goá tē jī ê soè-kiáⁿ, jiám-tio̍h chin giâm-tiōng ê uī-tn̂g-pīⁿ (Làu kap thò͘), iok chiâⁿ lé-pài kú, chia̍h io̍h, chù-siā lóng bô hāu, siūⁿ lóng bô hoat-tō͘ lah, chiū choân-ke ê lâng pek-chhiat tuì Siōng-tè kî-kiû. Keh thiⁿ-kng lé-pài chá-khí, beh phō khì Tâi-tiong hō͘ siáu-jî kho khoàⁿ, hut-jiân tú-tio̍h chi̍t uī m̄ saⁿ-bat ê pêng-iú kài-siāu chi̍t hāng ke̍k chho͘-sio̍k, m̄-chiân mi̍h ê io̍h-hng, chiū tò-tńg lâi pài-tn̂g, chí-ū ēng hit hāng hō͘ i chia̍h, chiū sūn-sū hó khí-lâi, keng-kè nn̄g ji̍t hó lī-lī, che kiám m̄-sī Siōng-tè ê chok-uî kap koân-lêng mah?
3) Bîn-kok 34 nî 3 ge̍h 1 ji̍t hā-ngó͘, tī Oân-lí kàu-hoē ê sî, Bêng-kun lāi-goā khong-si̍p, goá ū chi̍t ê soè-kiáⁿ kap kuí-nā ê Chú-ji̍t-o̍h ha̍k-seng khì Tâi-lâm tha̍k-chheh, tng tī khong-si̍p ê sî, teh khoà-lū, khún-chhiat thoè in kî-tó. Kàu soah, chio nn̄g ê hū-heng beh khì thàm siau-sit, soà chhoā in tńg-lâi. Tú-tú khai-sí chhut-hoat, soà khoàⁿ-kìⁿ in kuí-nā ê tuì Hí-chhiū ê lō͘ ti̍t-ti̍t teh kiâⁿ tò-lâi, chiū moá-sim kám-siā Chú ê kî-biāu ê thiàⁿ-thàng, pó-siú soè-kiáⁿ ê sìⁿ-miā, tī guî-hiám tiong tit-tio̍h an-choân.
Tng tī chiàn-cheng tiong; ta̍k ji̍t to sī chiàn-tò͘-ki lâi teh khong-si̍p, sàu-siā, bî po̍k í-goā, ka-chok lóng so͘-khai khì toà tī Gio̍k-chíⁿ Hong-lí hū-jîn-lâng ê āu-thâu-chhù, goá 3 lé-pài kú liân-liân tī hông-khong-hô khùn, chhù-piⁿ ê lâng hó-ì kó͘-lē goá kóng, tio̍h soà so͘-khai khah hó.
Goá siūⁿ, nā kó chin so͘-khai, pàng kàu-hoē kap hoē iú beh án-choáⁿ? Bî po̍k chiong sin-khu kap lêng-hûn kau-tāi Chú, it-bī thun-lún, ǹg-bāng ū thang an-uì kàu-hoē kap hoē-iú. Put-lūn jû-hô ê kio̍k-sè, nā oē thang êng-iāu Chú ê miâ, it-chhè lóng bô iàu-kín.
Chiàn-cheng beh kiat-sok ê 2, 3 ge̍h ji̍t chêng, ē-po͘-sî, ū chi̍t ê chí-bē sin koân lò-lò, lâi chhē goá chē, chin gâu choè, soà toà 12 lia̍p ê ah-nn̄g lâi sàng goá, soà kā goá kóng, thiaⁿ kóng choē-choē kàu-hoē tio̍h chok-chè hoē-iú ê miâ-chheh kau koan-thiaⁿ, m̄-chai lán chia cháiⁿ-iūⁿ, kau liáu á bē? Nā bē, chhiáⁿ chiong goá ê chhit-khí--lâi! Hit sî thiaⁿ liáu, hō͘ goá ê sim 12 bān hun ê kan-khó͘, goá kah i bo̍h-tit kiaⁿ chí tio̍h sìn. Chhin-ài ê chí-bē ah, Chú kap lán saⁿ-kap tī-teh, nā m̄-sī Chú ê chí-ì, chi̍t ki thâu-mn̂g iā boē tì-kàu phah sit-lo̍h. Nā kó chin tio̍h kàu hit ê ke̍k-pō͘ lâi kóng, lán ê hok-khì sī ke̍k-toā. Lán ê Chú kóng, oē hāi-sí sin-khu, boē hāi-sí lêng-hûn ê, m̄-bián kiaⁿ, thang kiaⁿ ê, sī oē hāi sin-khu kap lêng-hûn lo̍h tē-ge̍k ê. Lí tio̍h siū an-uì, khiā-chāi tī sìn, choè ióng-kiāⁿ, choè tāi-tiōng-hu, hit-sî kap i saⁿ-kap kî-tó, khoàⁿ i ê khoán, chin moá-ì tńg-khì.
Chiàn-āu ê kéng-khì toā piàn-chhian, bu̍t-kè bô an-tēng, ji̍t-ji̍t to sī pho-tōng, chi̍t táu bí kuí-nā chheng kho͘, chi̍t siang oê chiâⁿ chheng kho͘, chhài-soe toā khí-kè, seng-oa̍h toā siū táⁿ-kek; tì-kàu choē-choē Chú ê kang-lâng tio̍h khì kiam-chit kà chheh, á-sī choè pa̍t hāng lâi saⁿ-thiⁿ î-chhî ta̍k ji̍t ê só͘-huì. Bî po̍k hit sî siáⁿ-khoán? Ū chhin-lâng kó͘-bú tio̍h khì toà iû-kio̍k, ū chhin-lâng chhui-chiàn goá tio̍h choè io̍h-siong, kóng chip-chiàu piān-piān thang kai-gia̍p, ū pêng-iú kó͘-lē goá tio̍h khì hî-hâng tàu pang-bâng, thang tit koá keng-chè, thiⁿ thâu thiap bé; in lóng sī tuì goá phāu chin hó-ì, thé-thiap goá ê khùn-khó, goá siá phoe kā in seh-siā. Kám-siā Siōng-tè, chān goá hit sî ê sim-kéng chū-chāi, siūⁿ kóng Chú Iâ-so͘ tī sè-kan ê sî, kè bô khoà thâu-khak ê só͘-chāi ê seng-oa̍h, goá sī I ê ha̍k-seng, koh khah tio̍h kam-sim jím-nāi keng-kè chheng-khó͘ ê seng-oa̍h, m̄-thang tiong-tô͘ suî-piān uī-tio̍h chit-khoán chêng-kéng chiū pàng-soah che pó-kuì kiù lâng ê chi̍t hūn. Só͘-í goá chiū hó-táⁿ bô kiaⁿ-hiâⁿ, choan-chit lâi kiû Chú choè ki̍p-sî ê pang-chān lâi ngiâ-chih thâu-chêng ê lō͘.