首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 烏鴉toà餅kap肉來養飼我
烏鴉toà餅kap肉來養飼我
卷期：第970號 本次： 日期：1965/11 刊名：台灣教會公報 頁數：20
篇名：烏鴉toà餅kap肉來養飼我 [ O͘-a toà piáⁿ kap bah lâi iúⁿ-chhī goá ]
作者：
  顯示 : 漢羅 全羅 並列  

烏鴉toà餅kap肉來養飼我

日前敬職本社編輯室 ê 批, ài我寫幾字來見證上帝ê恩典。我一心真歡喜，thang koh一擺來回想主ê疼;是嘴舌oh得講明ê.也thang hō͘大家相信上帝ê話是確實，永遠無boē記得伊ê百姓來救恩.確實信烏鴉帶餅kap肉來飼先知以利阿 ê故事，m̄是神話（神話），是真實。
但是請原諒我，是時代ê落伍者;又koh 筆真鈍, m̄做主。雖然是án-ni,願榮光歸tī主。
時代ná文明，科學ná進步，可惜罪惡也ná加添。常常bat聽人吐氣講：「罪惡淪亡,人心不古」（罪惡淪亡，人心不古）。
咱生存tī 這中間，boē免得會 tú-著濟濟ê 打擊;或是肉體ê病疼,經濟ê困難，kia̍h目無親,致到信心搖動;掠做上帝m̄-聽咱。四面看無路ê時，soà親像約伯ê 某 kā約伯講：「你iáu-kú執守你ê純全mah? 著棄絕上帝來死」(約伯記2:9)。當 tī 這個時陣,濟濟人boē得著安慰，反tńg棄sak上帝，離開上帝。有時反tńg去行所m̄應該行ê路，做所m̄應該做ê事，koh-khah得罪上帝，謗瀆上帝ê 聖名。
請咱著會記得，主tī boē受害 ê事先，對學生講：「我無beh放恁做無父ê 囝」 (約翰14:18)。猶27節，「我用平安留teh hō͘ 恁,我將我ê平安賞賜恁;我teh hō͘ 恁, m̄是親像世間teh hō͘人ê款，恁 ê心莫得擘腹，莫得驚惶.」約翰16:33「我已經將chiah ê kā 恁講：hō͘ 恁 tiàm tī我有平安。Tī世間恁有苦難;獨獨恁 thang放心:我已經khah贏世間。」
感謝主，當咱tī四面看無路ê時，主有這款安慰kap勉勵 ê話，夠額做咱及時ê幫贊kap勉勵.
但是kiám-chhái有人想，這kiám會信得，致到僥疑，掠做是神話（神話）。著知信仰是對經驗--ê, ná經驗ná 會確信，主是負責任來對咱講ê.
請大家著常常吟這首詩, 會 ná加添咱ê安慰kap氣力。
1. Tú-著 試煉,災禍，圍你真艱苦，
致到餒志，失望，四面看無路;
你所得ê恩賜，逐項想來記,
穩當滿心感謝上帝大慈悲。
和 主ê恩賜你著算，著siàu,
主ê恩賜你敢算boē了;
主ê恩賜逐項算來記,
穩當滿心感謝上帝大慈悲。
2.有時掛慮，煩惱，致到心亂亂，
僥疑上帝疼痛，pe 十架 m̄願;
你所得ê恩賜，koh 再想來記,
僥疑就會無-去，日日ài吟詩。
3.所以經過試煉，不論大小事，
莫得餒志，失望，上帝永做主;
你所得ê恩賜，照kū想來講：
主會安慰，幫贊，引chhoā 到天堂。
這首詩真正會做咱大ê幫贊。
Taⁿ我tī chia beh來講起一個真大ê見證，有人讀伊王 17:1-7,就是當以色列王A-hap chhoā 外邦 ê 西頓王 Iat-pa-le̍k ê 查某囝Iâ-sè-piat做某了後，受引誘soà去服事in ê神佛Pa-le̍k來拜伊。Soà誘惑大小ê官員，國民離開上帝，大半攏去服事Pa-le̍k.這夠額做咱信徒kap屬人嫁娶ê大鑑戒。
為著 án-ni,上帝差伊ê先知以利亞當面去責備A-hap王講：「我暨永活耶和華以色列ê上帝，就是我khiā tī伊ê面前ê來講：只幾年，beh降刑罰hō͘ 恁, m̄-nā無落雨，也beh無落露水。」án-ni, hit個飢荒m̄是小寡, hō͘全國飢荒無thang食，hō͘ in tī艱苦中，ǹg望會反悔，來koh除去假 ê 神明,來復到in 祖先 ê上帝耶和華。
當hit時上帝命令先知以利亞走去匿 tī Ki-li̍p-khoe邊，上帝差烏鴉來飼伊.先知信上帝ê話，照án-ni行，烏鴉果然逐早起，逐ē-昏咬餅kap肉來飼伊;嘴乾ê時lim溪水，到溪水乾,上帝koh命令伊去西頓 ê Sat-le̍k-hoat,上帝命令一個守寡人來飼伊, hō͘ 伊瓶內ê 油 boē 乾,桶內ê麵粉boē減少。上帝講了，先知確信，照án-ni行。先知負責到真安全，到3年滿，攏無欠。
論這個故事，kiám-chhái有人m̄敢信，掠做是神話（神話）。烏鴉thái 會有肉kap餅，koh m̄是一半擺, koh是繼續飼伊; 王 to無thang食，飢荒到極，peh-信無m̄叫苦連天. 王差人beh去chhē先知來thâi 伊,何況是烏鴉，守寡人thài會有thang chhē 伊 leh? 對 chia thang看出上帝5權能kap疼心;早án-ni,今á日也是án-ni, 到永遠無變換.
上帝早飼以利亞，這是事實。今á日也koh一擺顯出伊奇妙ê疼痛來疼我，養飼我，真正 ná想ná出奇, ná講也ná好聽, ná感激。
Taⁿ我來講hit個經過，來證明上帝早tī-teh,今á日猶原tī-teh,也永遠ti-teh; hō͘咱信伊,免僥疑。
第二次世界大戰beh oá 尾期,我因為囝兒濟，6 男 5 女, 一家共18人。大囝tī日本東京醫大beh畢業lah! 第 2, 3, 4 tī 省立台南一中teh讀冊，交通真不便，也無thang 買自轉車hō͘ in騎。所以我時新化教會ê任了後，局有幾若位 beh來請我;但是我m̄敢接受in ê好意。因為我想，我應該為著chiah ê囝來犧牲我家己, m̄-thang hō͘我chiah ê 囝,為著我來犧牲in ê將來。
因為若著 通學 khah遠，抑是著 toà 宿舍, 抑是貼人食，toà,我就無力thang維持。若是傳耶穌ê拯救，牧師kap傳道是相像.所以我對南中ê 當局請講, 「恁若無嫌我toà tī 南中做工，請恁 hō͘我揀教會按怎？感謝上帝kap 南中ê好意，有准我揀，我就揀大灣教會。這間是真久ê教會，是台南太平景ê會老boē大ê 支會. hit時iáu有淡薄teh 鬥關心援助.我thái 會揀這間?因為離 台南一中第一近;用行--ê差不多30-40分鐘就會到, koh有伴，hō͘我khah安心。
戰爭ná激烈，外援無來，市民真濟疏開去市外, 抑是山間,教會就隨人顧家己lah.攏是傳教者 kap教會來家己teh維持。Soà借一張紙面對大灣教會ê現址說謝，甘願kap我同心來歷過chit-ê lân-koan;求主ciok-hok in.
我ê食bí phoè-kip,起頭是kah--ê,後-alî為著我m̄-ài kái sìⁿ-名ê緣故，受濟-濟ê刁難;致到所phoè-kip ê, hō͘ gín-ná toà piān-tong to無夠leh.大人kap平常攏著食蕃薯簽干（蕃薯簽干）。想到chia, boē禁得感謝天父ê安排，感謝主。
日本ê 野戰部隊（日本野戰部隊）臨時分院來大灣 ê國民學校。Hiah ê 常兵 khah好ê有出來四界thit-thô;soà來我chia, khah 熟似 ê時，看我有飼 3, 4 隻 鵝-á,叫我著一隻賣 in, beh toà我hia thâi去食，錢 beh出在我講。我因為是國民，koh是牧師，khiā tī指導ê地位，自然m̄敢犯法，koh我驚兒真濟，配給 ê物無夠，所以beh thang家己享受。
In soà nga̍uh-nga̍uh-念講：阮為國, 為民來胚命,來犧牲，來著傷，身體lám, koh無得著人ê同情，真m̄-值.我聽了講：我真感激恁, 為國來保護百姓來著傷。但是叫我做犯法ê事，我m̄. Taⁿ我請恁, m̄免買. In講：有影無？我講：我是牧師，恁 chiah無信用我mah？ 看恁tī-時beh來？幾個beh來？In講：阮5 ê就好，明-á ê-晝 2點外,阮的確來。我就設法請in; in十分歡喜. tńg去了，我ê 囡仔去收碗ê時，chiah看著 in用銀票 teh tī碗下.我叫in 緊 the̍h去還 in, jip beh到病院，in攏停腳kā我ê 囡仔講：恁 án-ni 追, hō͘ kam-tok ê人看見，會掠做阮出去lām-sám做，chia 會 hō͘人teh 追;阮就會受罰,為著án-ni,常常有破病兵來thit-thô.
隔無joā久，有衛生兵也來thit-thô;破病兵,就m̄敢koh來lah.衛生兵soà ná來ná-大，連部隊長也來，大尉,中尉 chiah ê khah大ê 醫官,小兵就m̄敢koh來lah.
有一日，一個醫官問我thài種hiah大棚 ê 菜瓜,有甚麼路用。我講：可惜無油,無肉，若有，煮了真好食，無拍算，明-á早起the̍h 5, 6 斤豬肉kap別物來hō͘我;我就煮請in,食了真歡喜, 對 hit日以後，常常the̍h 豬肉，牛-肉，魚，罐頭kap別物來送我，以後我就khah無欠缺cha̍ih-物lah.感謝主，這kiám m̄是差烏鴉kā餅kap肉來養飼我mah?感謝主。
M̄-nā án-ni,有一個晝,阮tī 灶腳 teh 食飯,又koh來lah!為著熟似, in就家己入灶腳來the̍h 火去食薰;忽然看著阮食蕃薯簽干ê 飯,問我講：thài食án-ni?我應講，無辦法。論食米ê 配給,事先我是配給kah--ê, ná來ná少，現時所配給ê 米,無夠thang hō͘ chiah ê 囡仔 toà 飯包. Beh 買烏市ê米,我猶 m̄敢，因為我是牧師，koh-khah 著守規矩。也無錢thang 買烏市ê物。In笑笑講：thài攏無聽你講。我應講，kā 恁講mā無法度。無拍算，hit暗 the̍h兩大斗 ê白米來hō͘我，續koh講：做恁安心食，以後我會koh the̍h--來。感謝主ê安排，到光復ê日，hō͘我無欠缺。這真正是上帝差烏鴉帶餅kap肉來養飼我mah? Ná想ná boē禁得著感謝主，著 o-ló主。
不但 an-ni,有一日，內子（內子）tú-著真嚴重ê破病，熱到 40 外度. Hit時ê醫生真濟無藥,也無tàng 買冰來ù, hiah ê 軍醫聽著,本身來看,叫兵仔the̍h真濟兵（冰）來，暝日無làng,不時來注射, 注血漿,葡萄糖, 應有盡有，無所欠缺，到好攏無錢。這kiám m̄是上帝ê恩典，若無早早就死lah!所以ná想ná出奇, ná講也ná 好聽，施落恩典tī我小寡卑微ê人，感謝主，o-lo主。
光復後，iáu-bē來接管 ê時，有20 外 ê 韓國兵 kā 我講：in名是日本兵,其實受無平等ê 待遇,非常m̄願，in已經決意，的確beh報一個冤仇。我苦勸in m̄-thang,因為權攏tī日人 ê手，恁寡不敵眾, in講：阮韓國ê人相拍無輸日本人，阮ê頭殼thài好用lah.
最後我看 in m̄受苦勸，脫離日本ê管制，也阮台灣beh歸祖國有無？In攏真歡喜講：有。我講：雖是歡喜，iáu有koh-khah歡喜ê,就是有hit號勇敢愛國 ê青年起來負起保衛國家kap百姓ê.我勸恁 著有這款勇敢ê精神kap有用ê身體，來貢獻tī beh來ê國家,國家不止teh期待恁.我勸恁著保守恁 ê身體，倒去見恁 ê父母，貢獻tī未來ê國家,這正是忠孝兩全，恁 著深想正好。的確m̄-thang因為一時ê義憤,來對國不忠, 對 父母不孝.感謝主，in聽了流目屎，來受苦勸。
當 in beh 轉去ê時，有規定一個人siōng濟會 thang toà joā-濟錢轉去nā-tiān.所以有真濟兵the̍h錢來寄我，也有日本兵來寄。In 倒去m̄知到tó位，聽著 taⁿ 會 使得the̍h lah,就koh來大灣chhē我the̍h. Suî來suî beh koh去坐車.我kā in 恭喜,攏koh 還 in. In真歡喜,寄別人ê khah濟無thang討。因為若講借人去lah,抑是寄tī cho͘-ha̍p，明-á載 chiah領還你。án-ni, in也無時間thang等。
Taⁿ我寫chiah ê,一項是hō͘我thang koh回想主ê恩典。Koh一項thang hō͘我ê 囡仔 thang koh想著過去ê困難。主按怎引chhoā,保護ê恩典，m̄-thang boē記得感謝ê心。
保羅講：「因為基督ê疼痛催逼阮，是阮想一人替眾人死，就是眾人死; koh 伊替眾人死，是beh hō͘ chiah ê活ê 人以後無為著家己來活，是為著替in死來koh活ê.」II 哥林多 5:14, 15也thang hō͘讀ê人kap阮同心感謝上帝，疼惜我這個卑微小寡 ê人到 án-ni.
也thang確信聖經中ê話，對信就看到真明，是咱ê信無夠，m̄是上帝無能力thang實現伊所應允ê.
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461