首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 鄉村ê傳教者
鄉村ê傳教者
卷期：第962號 本次： 日期：1965/7 刊名：台灣教會公報 頁數：8
篇名：鄉村ê傳教者 [ Hiong-chhoan ê Thoân-kàu-chiá ]
作者：
  顯示 : 漢羅 全羅 並列  

鄉村ê傳教者

禮拜ê人數直直減少，聚會漸漸冷淡。
----這間鄉村ê T. M.教會tī成十年前hō͘人看做是會友濟，經濟好，信徒熱心ê教會；若是近來顯然teh衰退lah.
Lîm Tiong-iông傳道歸 tī 拜堂ê 講台前teh祈禱， 教執tī 伊心內ê痛苦thang 對嘴裡 ê吐氣慘慼，甚至流目屎ê 聲表現出來。祈禱soah，親像真厭倦ê款式，入來坐tī讀冊位， chhi̍h桌頂ê日光燈 to̍h，手攬胸，頭殼kia̍h高teh沉思；一幕一幕ê回憶對伊ê 腦內走過去。
兩年前：伊 chhoā婦人人Siok-cheng kap兩個囝兒Kèng-it，Sìn-it來到這間教會赴任。夫婦攏抱著滿懷ê熱情beh 為主做工，事實也án-ni； in有全心拚命 tī所交代ê職份。伊特別有佈道ê恩賜，所以對外ê工作；無論大眾佈道，抑是個人佈道攏盡所會ê teh做。暗時若無聚會，就招會友，長執去逐 庄舍佈道，做幻燈，分佈道單。有時伊家己一個人去kap hiah ê 賣 藥-á ê王祿仙坐，tī街路邊講解福音，招人來得平安藥, hit個熱情無khah 輸 hiah ê人。日時tī路裡，抑是各家庭去kap社會各式，各樣ê未信者接觸談道。伊 án-ni做，就是伊知影這是今á日鄉村教會挽救退步 ê 唯一方法。有影！人雖然硬心無hiah快來信，m̄-kú有做工必定有收成，tī一兩年無厭倦ê 工作下，也得著5戶 ê全家kap 幾-nā個青年來bō͘-tō，有ê也受洗禮，若是án-ni iáu無法度thang應付都市ê 銷路（供不應求）。兩年前伊來赴任 ê時教會有30 戶, taⁿ有加添5 戶，應該是35 戶 chiah 著， m̄-kú實在chiah chhun 20 外戶nā-tiāⁿ，所無去ê人當然攏是受時代ê 急變，工業社會ê影響流出去tī外面lah； 而且 chiah ê人大部分是khah熱心，經濟也比較khah好ê人。親像做醫生ê Lâu長老；最大事業ê Tân長老；做生理ê王執事，抑是公務員Sím Kho-tiúⁿ， Lô͘老師等等，in攏是教會 ê大柱石。In ê離開ná親像一間厝ê 棟樑漸漸受拆走一樣。雖然in tī都市ê教會猶原也繼續in ê熱心，若是田庄 ê教會ná來ná嚴重。禮拜日看見清清（清清）慢慢（慢慢）ê會友teh做禮拜，內面40條椅-á夠額hō͘一人坐一條 koh有chhun。 伊siu-éng文雅ê講道方式，boē thang 刺激 chiah ê老人kap 婦人人ê 消化；有時只有成歲一場ê 催眠曲唱hō͘ in安眠入天國nā-tiāⁿ;會友一片熱誠 ê 匯入來敬拜，反-tńg toà 著一塊冷淡ê 冰 tńg去。In ê信心kiám-chhái就tī 這款ê空氣中冷淡lah.
近來伊知影會友漸漸teh無歡迎伊。這thang對tī祈禱會 in ê祈禱看--出來：
「上帝ah！求你ê聖神充滿你ê工人，hō͘ 伊 gâu做工，hō͘阮ê教會親像以前ê 款式......」
Kim ē-暗是伊最艱苦心，最受刺激 ê一暗，因為祈禱會soah，年老ê Bo̍k長老看著祈禱會 ê 人數少到悽凊，the̍h出伊ê正義感，當伊ê面前無細膩講：
「先生ah！看覓leh， chiah-nih少人teh聚會，你kiám無看著？」
「我知，若是我比恁 khah艱苦心，我並 m̄是無盡我ê氣力，總是m̄知我著怎樣做？」
「我ê要求是：只要你回復親像兩年前ê情形就好。」
「Bo̍k長老，教會衰退ê原因，m̄-thang攏總怪我，這是時代ê現象，今á日ê鄉村教會大部分攏相款ê境遇。教會本來hiah ê大柱攏出去lah，新來ê會友beh 造就到親像hiah ê人，m̄-是真快ê事。」
「這是事實，我m̄敢否認; m̄-kú咱看早時ê傳教者為甚麼會 thang hō͘教會得著興旺，而今á日ê傳道者boē tàng nih？我ê意思，是咱應該著 koh 奮發 chiah tio̍h.」
「多謝，我chiah盡所會ê來拍拚，請恁也kap我合作。」

X X X X X
肅靜ê暗暝直直tò-oá,外面ê 風 hū-hū-哮，若是伊攏無感覺。忽然伊吐一個大氣ê 聲驚醒teh睏ê 婦人人 Siok-cheng.
「ÊN！Tiong-iông，你iáu未睏，現在已經是半暝lah。」Siok-cheng 對眠床peh起來，來坐tī伊ê身邊，koh講：「有甚麼代誌hō͘你失眠？」
「Siok-cheng，我想beh離開傳道ê 工。」
「你m̄-thang為著 Bo̍k長老所講hiah ê話來失志。」Siok-cheng安慰伊講：「Bo̍k長老ê話雖然有khah無客氣，m̄-kú伊所講ê 並 m̄是m̄-tio̍h。 伊是老大人，咱是青年人，伊對咱ê警告，是hō͘咱khah 會謹慎kap激起咱做工ê熱誠，這對咱是有利益ê。」
「我m̄是傷心Bo̍k長老ê話，我是感覺我無夠氣力thang hō͘主用，m̄-thang 空佔土地，不如離開教界來去做別款ê工作。也用咱所做會得到 ê時間kap金錢來奉獻hō͘主，這kap做傳道平平相款，而且對上帝kap人攏khah平安。」
「án-ni,你是m̄甘願kā主做工，beh逃避使命是無？」
「m̄是，我真自覺；願做奴僕著受人褻瀆這句話。」
「你ê話有矛盾。」Siok-cheng笑笑講：「你既然願做奴僕，lim 這個苦杯，為甚麼又koh想beh離開使命去做別款ê 工？」
「因為我感覺boē-thang榮光上帝利益人ah。」
「若是án-ni無要緊，咱ê主是ài問咱有teh做無？伊無問做了按怎， 只要咱tī上帝ê面前無見笑伊ê 工，án-ni就好。總是假使咱若siám-pi 這個使命，一定boē-thang得著祝福。我常常聽講以前半途而廢ê工人，到尾攏hō͘上帝無歡喜，tú-著無好結果。」
「Siok-cheng，你ê 見解有淡薄錯誤，你講若無做傳道，上帝無祝福，我無贊成你這句話。「傳道這兩字 m̄是包含有執照ê 牧師，傳道nā-tiāⁿ。現在咱teh 強調「信徒皆兵」「工業chit-he̍k傳道。」這個意思是講「每一個會友攏是傳道人。」做一個教長，親像廟公主持禮拜，聚會，巡會友nā-tiāⁿ, 其他ê日閒閒無做事。今á日ê信徒應該著 khiā tī家己ê kong-uī上來做光，做鹽ê使命，見證基督。所以我想hiah ê平時tī社會teh服務人群，也siāng-時tī教會teh做工ê信徒chiah是時代ê 傳道者。 若 án-ni beh 按怎講上帝無歡喜，反tńg是hō͘上帝大祝福chiah tio̍h；事實我mā 看這款ê人真正hō͘上帝祝福ê人真濟。不過也有真濟離開教界了後，soà離開上帝ê人，我to m̄敢講。」
「我贊成你成做一個時代ê傳教者，若是無贊成你離開教界，因為我驚了你這款ê理想，到有一日偏重 tī世間來離開上帝也無的確。」
「好！我知你 ê意思，我願背這隻時代ê十字架。」Tiong-iông忽然看見兩個囝兒睏到真suí，續講："M̄-kú咱ê 囝兒將來m̄-thang koh hō͘ in有份這個艱苦，我現在chiah知，為甚麼真濟傳教者 ê子弟真少人繼承這個工作ê原因lah。」
「細囝iáu未大漢，咱m̄知上帝將來如何kā in安排，咱boē-thang講甚麼，不過無論in將來有做傳道者，抑是做別款ê 工，咱tī 這個時攏著好好栽培in 對上帝應該有ê使命感 chiah tio̍h。」
Siok-cheng講了，Tiong-iông 不止感激伊ê信心，對伊ê手牽 leh,兩人就跪 tī眠床頂祈禱。
祈禱soah，看外面ê窗á，對東旁射入一條光線，chiah知天已經光lah.

X X X X X

今á日已經是月底 lah， 會計 羅執事iáu未the̍h 薪津來，照以前攏tī月中就會the̍h--來，雖然boē-thang一定ê日期清楚，iáu-kú boē親像這擺經過beh 10日久lah。早起Siok-cheng beh出去買菜，錢袋-á內péng-來péng-去，chhun 5 角銀nā-tiāⁿ，無法度thang出門； tī內面行來行去，心內也著急，也祈禱兩個囝Kèng-it，Sèng-it直直吵媽媽著趕緊去。
「媽媽，今á日著kā阮買肉tńg來o͘h，阮真久攏無配肉lah，」Kèng-it khiú老母ê衫-á講。
「媽媽，著 kā我買 Tomato tńg來o͘h,」Sèng-it也講。
「好！好！等一下，媽媽一定kā 恁買」
Tiong-iông看著兩個囝teh 吵老母，看了心艱苦，chiah 對 Siok-cheng講：
「我想，著 tńg來kā 爸爸 chhun 長手chiah tio̍h.」
「M̄-kú chhun 5 角銀，beh 按怎坐車 tńg去the̍h.」
「亦無mā 著寫批叫爸爸寄100 箍來。」
「Tī錢iáu未來ê 這兩，三日beh 按怎過。」
「有影to tio̍h.」Tiong-iông頭殼khi-khi teh想無辦法，真久chiah想著。
「Ah! Bêng-jîn 兄平時kap咱真好，你先去kā 伊借20 箍好無？」
「M̄-thang，絕對m̄-thang；做傳教者無論如何boē用得kā會友借錢，會影響咱ê 人格。」
「抑是來去kā同工ê 廖先生借好無？」
「幾日前伊 chiah走來kā咱借無leh,你soà boē記得。」
「羅執事近日得著一個嬰á，大概是無閒到 boē記得。我來去in 兜，一面看伊ê嬰á，一面看伊會順續the̍h hō͘我boē？」
「這個辦法好，總是伊ê厝真遠，去koh tńg來已經過晝 lah,中晝m̄ 著 hō͘ iau？」
「Mā無法度，我chiah騎車 khah 緊 leh，看會 thang tńg來赴晝 boē？」
伊ê 車 tú-á beh騎出去，羅執事也tú-好騎車入來。
「羅執事平安。」
「平安，先生娘平安，」
「平安，請入來坐。」Siok-cheng ná講ná giâ 椅，三個人攏入來坐人客廳。
「真恭喜，感謝主賞賜你koh得著一個公子，我tú-tú be來去kā你拜訪。Taⁿ執事娘 kap嬰á攏平安好？」
「是lah，大概koh兩月日。」
「害 lah，咱教會ê經濟ná來ná bái， 這月日kā你拖過chiah久，實在真歹勢; 是因為khêng無夠thang hō͘你，去對會友ê厝kā in 募款， chiah 慢到今á日。」
「Boē lah， 你 hiah-nih無閒，koh hō͘你著磨，真多謝。」羅執事對紙袋-á piàⁿ出一堆 ê錢，有10 箍--ê 5 箍--ê，一箍--ê, 5 角--ê，也有兩角，一角--ê。
「來，咱來鬥算，chiah ê是定期獻金，禮拜獻金，也對主日學hit 旁借來相添， khêng-khêng leh tú-á好。」
「Ah！ chiah濟錢，媽媽，咱有thang 買菜 lah.」忽然Sèng-it大聲hoah出來，hō͘ Tiong-iông， Siok-cheng ê面攏紅--起來。
「這月日ê 米，一斤是3 箍半， 4 個人160斤， tú-好是560 箍，合本奉550 箍，攏總是1110 箍，你算看有無？」
「m̄免，真多謝。」Tiong-iông 接 hiah ê錢就隨時對 10 箍--ê the̍h 10 張起來，講：「羅執事，這月日ê十份一奉獻，我續hō͘你，真失禮到現在chiah the̍h hō͘你。」然後將hiah ê錢交hō͘ Siok-cheng。
「Ah！好！好！án-ni真tú-好，chiah ê錢thang the̍h來去la̍p本月份 ê 電費， kā人欠幾-nā日，hō͘人來催幾-nā擺。」忽然羅執事ê面變嚴肅起來，親像有話 beh講：m̄敢開嘴，感覺真歹勢ê 款式，真久chiah講。
「林先生，有一項代誌真歹勢講：m̄-kú是受著長執 ê交代，無講也boē用得。」
「無要緊，只要做會得到，我願接受恁 ê意見，請你講。」
「羅執事我先失禮，我著來去買菜，請你hia坐。」Siok-cheng 對椅-á peh起來。
「好！好！請你無閒。」羅執事tàm-頭了後chiah ǹgTiong-iông講：
「Cha 昏真暗，阮幾-nā ê長執 tī Bo̍k 長老 ê 厝參詳教會經濟ê 問題， in攏感覺著教會經濟chiah困難，m̄知你會thang將「辦公費」 hit 條 ê 支出想辦法khah 節省 leh boē？」
「這個意思是按怎，我無甚麼明白。」
「譬喻來講:：宿舍內面ê用電，親像煮飯用電鍋；熱天用電風，暗時ê 燈點真暗，chiah ê看會 thang khah 省 á boē？」
Tiong-iông知影這個意思，若是伊恬恬攏無應， 羅執事koh繼續講：
「In也講：親像一般ê報紙，抑是教會ê XX報, chiah ê咱ê會友攏有人訂閱， chiah麻煩你去in厝看； kan-ta教會公報kap 榮光報就好，因為這兩個刊物是咱長老教會無boē用得ê；若án-ni，一年會 thang 省幾-nā 百箍， m̄知你ê意見按怎？」
忽然內面ê空氣真安靜，真久Tiong-iông chiah真細聲應答。
「暗時ê燈點真暗，是我ê桌頂hit 支 10 w ê日光燈nā-tiāⁿ......我m̄知be 按怎。既然做一個上帝ê奴僕，boē-thang享受我所有ê權利，我也m̄敢加講甚麼。不過恁應該知影，hō͘一個傳教者 boē-thang趕著時代，hit ê喪失m̄-nā伊本身nā-tiāⁿ， 整個教會ê喪失koh-khah大。」這時Tiong-iông真激動， ná來ná大聲，直直講。
「我bat 聽著某長執親身對我講，近來ê先生，牧師是teh傳道， m̄是teh傳道；看伊內面ê 電器設備，穿插......若kap兩千年前ê主耶穌，行洗禮約翰，抑是保羅in比較起來，實在差天到地。 M̄-kú無幾日後這個長執koh看著一個傳道先生穿 kah真簡單，伊mā講：做kah一個傳道，無sêng一個先生扮，伊講道理mā無人 beh聽。你想，beh叫先生是做時代ê 落伍者抑是前鋒？」
這時咱teh 高唱「福音不變，,時代teh變，傳道著變」 ê時代。咱ê長執是ài 我khiā tī甚麼立場？會記得我赴任 ê時，ài 恁 chhoā我來去kap地方ê 各機關首長熟識； 恁講教會m̄-thang kap世間chham-chhap，後來我家己去chhē in， in 逐個to真歡迎我傳福音hō͘ in 聽。我beh請in來講演； 恁講m̄免聽hit款屬事。我beh 招恁出來佈道，恁講事先hō͘教會khah熱心就好。前擺我beh請咱鄉 ê衛生所產婆來對女宣講演家庭「節育」問題， hō͘ hiah ê老人大大反對，講我無信仰。我beh 開幼稚園（幼稚園）； 恁批評我ài beh hō͘先生娘做保母 加趁錢。我beh 開補習班，義務教學生； 恁講我是teh 展膨風， ài名聲，有ê講我是teh做變相 ê 惡性補習趁錢。我講咱教會著關心社會服務社會恁講我teh傳社會福音。我tī講道強調信徒應該著用「疼kap服務來建設上帝國tī 地 ná親像tī 天裡； 恁講我teh講新神學，攏無屬靈ê生活......我m̄知beh 按怎做？」講到chia 伊吐一個氣。
「林先生，請你m̄-thang誤會我； tú-chiah ê話，是我khah 雞婆 kā你轉達 ê， m̄-是我ê意思。」
「我知影，真失禮；請原諒我ê激動。」Siok-cheng tú-á 買菜tńg來，已經11點lah.
「亦無，我khah 失禮，時間無早，著 tńg來去，」羅執事對椅-á peh起來，相辭就tńg去。

X X X X X

hit-ê-晝食飯，兩個囝看著桌頂有肉，真歡喜，細漢ê Sèng-it 拍 pho̍k-á講：
「下晝我beh感謝。」四個人目睭khoeh-khoeh。
「感謝天父，賞賜米糧，koh有肉hō͘阮食， 靠耶穌ê名。A-men。」
兩個囝兒ná親像監囚，食kah真歡喜；若是Tiong-iông 捧hit碗飯起來，看著 Siok-cheng ê腹肚，油然目屎流出來，兩個囡仔攏莫名其妙，四蕊目睭直直kā 伊siòng，大漢ê Kèng-it kā老母講：
「媽媽，你kā 爸爸分siuⁿ少物配 teh哮-à lah.，」hit時Siok-cheng ê目屎也流出來，若是嘴soà ài-笑。
hit-ê-晝無食飯，Tiong-iông騎一點外鐘ê 車來到市內chhē 伊最好ê老師，最會幫贊伊ê李Khí-bêng牧師，見著面開嘴就講：
「李牧師，我無法度thang koh忍受tī 這間教會做工；我決定beh 申請調動。」
「好，真好，請你講：若有一項事比主耶穌所受著 ê khah大，我願意kā你幫忙。」
「你ê意思是無歡喜我換位。」
「會 thang án-ni講。」你牧師tìm-頭，「因為有真濟ê 同學攏親像你來án-ni 對我要求過，若是in承受我ê苦勸，攏koh 倒-tńg去in ê 職位。」
「M̄-kú我相信，我若講hō͘你聽了後，你穩當boē 阻擋我ê要求。」
「請你講看覓。」
Tiong-iông就用激動koh 憤慨 ê話對李牧師直直講：若親像一個受冤屈ê人對 法官 teh分訴一樣，伊按算坐tī面前ê老師會 kap 伊相kap 憤慨；若是李牧師聽了不但無動容，反tńg 哈哈大笑講：
「你iáu 比張Ta̍t-în 同學khah thang感謝，伊 hō͘眾會友beh 趕出去，koh 幾-nā月日ê 薪津無thang hō͘ 伊 lah.」
比上不足，比下有餘（比上不足，比下有餘）。Tiong-iông 家己感覺，án-ni我iáu thang感謝，心chiah淡薄安慰，m̄-kú伊ê心內iáu充滿真濟疑問， 對你牧師講：
「為甚麼做一個工人著 án-ni受苦？為甚麼信徒boē-thang體諒咱kap 咱同心復興教會？為甚麼咱boē-thang享受著時代ê權利？為甚麼咱ê家庭boē-thang kap in平等ê 待遇，為甚麼......」
「請你m̄-thang直直講為甚麼。」你牧師斬斷伊ê為甚麼接來講："Boē用得問上帝，」
為甚麼著對上帝問講：「我著做甚麼？」抑是講：「你kā我下 tī chia是ài我做甚麼？」
Tiong-iông hō͘李牧師講án-ni，刺鑿伊ê心，soà感覺真見笑，李牧師也無細膩繼續講：
「Tiong-iông 君，今á日鄉村教會ê境遇，我非常ê了解kap同情，特別是chiah ê同工，不過我有3點ê建議講hō͘你做參考，請你chiah詳細想看覓。」
1)做一個青年ê傳教者，著事先自覺 chiah ê代誌是一定會 pōng-著 ê 刺-phè. m̄免講到聖經中hiah ê先知，使徒，特別是主耶穌，就是咱現在chiah ê大牧師諸先輩， in ê成功攏是tī 這款ê火燄中忍受成功ê.總是近來ê工人ná親像對這款ê苦難看做boē慣勢，無應該。我jim-uî jú有這款ê苦難jú 會 thang顯明上帝對你ê器重。所謂「悲哀 ê所在就是聖ê地。」你也知影世界出名ê聖歌：
我所是5苦難，無人知影，
------------榮耀Ha-le-lú-iah：
是chiah ê烏人tiàm tī 這款痛苦ê悲哀所唱出勝利ê音樂，所以請你m̄-thang抵抗問題。
2) 教會boē進步，信徒boē-thang了解，經濟ê困難，這是今á日鄉村教會必然 ê 現象，所以m̄免過頭傷心，只要 tī上帝ê 面前真本份去做就好。咱應該著用同情 ê眼光chhè出原因了解in chiah tio̍h。事實上chiah ê信徒 ê信心抑是奉獻，攏無khah 輸 tī初代ê信徒，不過是心有餘 力不足（心餘力拙）nā-tiāⁿ。我看in真濟信徒ê經濟hiah-nih困難，甚至無thang食，無thang穿，若是看in一年ê奉獻ê數字非常ê 驚人，夠額hō͘城市ê信徒見笑，hō͘我非常ê感激，所以咱著有份tī in ê艱苦，也是應該ê。
3)最要緊ê 一項： m̄-thang逃避sù-beng，絕對m̄-thang為著 chiah ê困難來想beh tiāu-tōng， án-ni是顯明咱是聖工上 ê 敗北者（敗北者）。咱teh 鼓舞咱ê信徒 tī 這個時代著學主ê款式; 「對天來到罪惡ê世界做伊拯救人，疼人ê 工，甚至將這支殘忍可怕ê十字架變成榮光燦爛ê記號，所以著 tī一個烏暗ê世間做光，做鹽ê使命。」事實這個責任tú-á是咱tiàm tī鄉村教會上帝所hō͘咱傳教者今日ê 課題。 Beh 按怎重新經營這間教會回復親像以前hiah-nih燦爛ê歷史？Beh 按怎矯正（矯正）信徒ê 舊觀念，相kap tī 新時代同負起主ê國？這chiah是今á日咱著想，著做ê 問題。當然問題 m̄是hiah-nih簡單，也m̄是一時就會thang成功ê，若是這個時代tú-tú是舊 ê beh過去，新 ê teh beh來ê真空狀態（真空狀態）下，正是咱做工ê好機會，咱若會thang突破目前ê 難關， 排 tī面前 ê是勝利kap成功lah。我ê話你聽了會了解boē？
Tiong-iông無應，直直tàm-頭，面露出笑容，thang知伊一片憂鬱，僥疑ê心已經 hō͘牧師ê話衝破。
「牧師，若是án-ni， 目前最要緊ê工作是甚麼？」
「現在最要緊ê工作有兩項： 第1， 對外應該想出妙法「傳道，」tú-tú照理所teh做ê繼續去做，m̄-thang厭倦。第 2，對內，「教育，」信徒ê誤解kap 成見攏是缺乏教育ê原因。」
「M̄-kú 排 tī面前ê生活問題 boē-thang解決，beh叫人按怎忍受？」
「是，這是最大ê 問題，我teh想應該對 3 方面來解決： 第 1，中會應該關心。第 2， 都市教會也請伸出幫贊ê手來。第 3，出外 ê會友應該tī經濟tńg來援助母會 chiah tio̍h.」
「這是真好ê方法，m̄知in願意過來幫贊阮無？」
「我會盡所會 ê來呼籲這個工作。」
「多謝牧師ê指示，taⁿ我無beh逃避主ê 使命，願giâ 這隻十字架，lim 這個苦杯來負起時代ê責任。請牧師常常替我祈禱。」
日頭已經落山，厝內ê電火to̍h起來。暗頓hō͘李牧師請了後，伊就隨時離別牧師。

X X X X X

外面雖然暗，路雖然遠，若是伊騎hit 張破舊 ê 自轉車，充滿著未bat有ê歡喜kap ǹg望，直直ǹg厝teh騎，攏無感覺驚-hiâⁿ。伊ê 腳ná teh踏，嘴ná念伊平時所愛念ê一節詩：
Tī 憂鬱風涼ê樹林內，
無燦爛ê日光teh照;
悽凊ê 烏影歸日teh罩-oá，
性命活潑 ê記號無人看著。

○○○ ○○○ ○○○ ○○○

肅靜ê路邊，生出一蕊嬌軟ê花蕊;
伊m̄驚歹 ê 環境包圍身邊
伊盡所會chhèng出芬芳ê芳味，
也展開美麗ê 顏色；
Hō͘ 過路厭倦ê旅客，
得著溫暖in心靈；
也放輕 in沉重ê腳步。
腳 ná踏ná 緊， 伊 koh想起Dant ê神曲（神曲）開頭ê一句話：
Tī我人生ê旅行中，
Tī 這個烏暗ê樹林內；
我chhē 著我家己。
不知不覺 ê 中間到厝 lah，厝內ê電火to̍h真光；聽見Siok-cheng teh彈琴教兩個囝唱歌。伊 khiā tī門口，恬恬聽到唱了，chiah用伊ê手拍 pho̍k-á出聲講：
「真gâu唱，真好聽。」
兩 個囝，一個聽著老父tńg來，歡喜到極，走出來hō͘ 伊抱，一手抱一個； in也對伊ê頭殼攬-leh，一個嘴phoé直直 kā 伊 chim。真久細囝Sèng-it chiah起頭sai-nai講：
「爸爸！ 媽媽講beh 生一個妹妹 hō͘阮neh，咱來禮拜， kā上帝討khah 緊 hō͘咱。」
「Tio̍h！好！taⁿ坐hō͘好，來做禮拜。」 (完)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461