Kò͘ Chiu Suī Tiúⁿ-ló
1965.09.01 P26-27

Ko-hiông Sam-bîn kàu-hoē ê tiúⁿ-ló Chiu Suī I-su, put-hēng tī 8 ge̍h chhoe 2 hā-ngó͘ 3 tiám poàⁿ bōng Chú un-tiàm. Thiaⁿ tio̍h chit ê siau-sit ê lâng, tāi-ke chin m̄-kam. I tuì Sam-bîn kàu-hoē chhòng-siat í-lâi chiū tam-jīm tiúⁿ-ló kàu chit chūn, í-keng sī 13 nî lah, í-chêng sī tī iâm-tiâⁿ kàu-hoē choè tiúⁿ-ló. I it-seng ū hiàn 3 keng kàu-hoē ê thó͘-toē. Sio̍k soaⁿ-nih ê, chiū-sī Koan-á-niá kàu-hoē; sio̍k hái-kîⁿ ê, sī Kî-āu kàu-hoē; sio̍k pîⁿ-toē ê, sī Sam-bîn kàu-hoē; hōng-hiàn hō͘ Chú. I tī chhoe 2 ē-po͘ 3 tiám poàⁿ, khì Jîn-bú la̍p toē-sè beh tńg-lâi ê sî, Ko-hiông kheh-ūn ê khì-chhia tú beh hoat, i gia̍h-chhiú beh chē chhia, chóng-sī chhia choè i hoat, chhia khê i ê chhiú soà poa̍h-tó, āu-piah lián suî-sî géng-tio̍h, chiū án-ni suî-sî lī-khui sè-kan. I sī chi̍t 5 phiau-chún ê kiān-khong-chiá, sui-jiân sî 77 hè, chóng-sī chhin-chhiūⁿ 5, 60 hè.
Tī 8 ge̍h chhoe 10 hā-ngó͘ 1 tiám, tī Sam-bîn kàu-hoē lé-pài-tn̂g kú-hêng sēng-tāi ê kàu-hoē chòng. Tān-sī keng-huì ê hong-bīn song-ka m̄-káⁿ hō͘ kàu-hoē khai chit tiâu chîⁿ, in hoan-hí hōng-hiàn choân-pō͘ ê keng-huì. Hit ē-po͘ ū lâi-pin kap hoē-iú, uî-cho̍k, chhin-cho̍k 300 goā lâng chham-ka. Pài-tn̂g lāi-goā lóng chē kàu moá-moá. Sam-bîn kàu-hoē iú-sú í-lâi thâu chi̍t pái ê kàu-hoē-chòng, hui-siông ê sēng-hóng. In-uī kò͘-jîn tuì Sam-bîn kàu-hoē ū chin toā ê kòng-hiàn, só͘-í Sió-hoē ū gī-koat beh kú-hêng kàu-hoē-chòng. Gî-sek ê su-hoē, sī Tông iāu-hui Tiúⁿ-ló; su-khîm, Gô͘ Lîm Gio̍k-hoâ lú-sū; kî-tó, So͘ Thian-bêng Bo̍k-su, tha̍k-keng kap chiok-tó sī Chiu Kim-iāu Bo̍k-su (Hi-pe̍k-lâi 9:23-28), chèng tō sī Chhoà e̍k-sū Bo̍k-su, toê-ba̍k sī "Jîn-seng ê chiong-tiám," tha̍k kò͘-jîn ê lio̍k-le̍k bûn sī Tân Bîn-liông Sian-siⁿ. Tiàu-si pún-hoē sèng-koa-tuī, í-goā ū ka-gī Tang-mn̂g kàu-hoē sèng-koa-tuī, Chiu-ka lāi-goā sun ha̍p-chhiùⁿ kò͘-jîn ài gîm ê si 480 siú,"Goá sim hoaⁿ-hí Chú tiàm goá sin-piⁿ, koh chi̍t uī kò͘-jîn ê tē 6 sim-pū Chiu Ong Lio̍k-phîn lú-sū to̍k-chhiùⁿ "Tī hoe-hn̂g nih," i sī liû-ha̍k ì-tāi-lī ê bêng siaⁿ-ga̍k-ka. Hoē-chiòng choân-thé ū gîm kò͘-jîn só͘ ài gîm ê si 141 siú, "Iâ-so͘ choè lán bo̍k-chiá" saⁿ-kap siàu-liām kò͘-jîn.
Tiàu-sû ū ko-hiông koān-tiúⁿ, ko-hiông koān Khe-cheng-chhù-tiúⁿ, Kok-tāi tāi-piáu Iûⁿ kim-hó͘ Tiúⁿ-ló, iâm-tiâⁿ kàu-hoē tāi-piáu Hô En̂g-bêng Tiúⁿ-ló, Ko-hiông chhī-tiúⁿ tāi-piáu chú-jīm pì-su N̂g Lē-chhoan Sian-siⁿ, chêng ê Sèng-gī-oân kò͘-jîn ê toā-hàn chhin-ke, chhiⁿ-ḿ téng, in-uī sî-kan ê koan-hē boē tàng koh soà lo̍h-khì.
Sek soah, ū nn̄g tâi sió pau-chhia, saⁿ tâi iû-lám-chhiá, chi̍t tâi lêng-chhia, sàng kàu Chiu-ka ka-kī ê bōng-toē.
Tī chia kán-an kài-siāu kò͘-jîn ê lio̍k-le̍k. Kò͘ Chiu Suī Tiúⁿ-ló, tī 1888 nî 10 ge̍h 19 ji̍t chhut-sì, hiān-nî 77 hè. Chó͘-che̍k sī Hok-kiàn séng Huī-an-koān, tuì cheng-chó͘ chiū poaⁿ lâi Tâi-oân. I chiū tha̍k Tiúⁿ-ló-kàu Tiong-ha̍k ê sî niá-soé ji̍p kàu-hoē. Pit-gia̍p āu, phau tio̍h phok-ài kiù-lâng hêng-i thoân-tō ê sim-chêng, chìn-ji̍p Kî-āu kap Tâi-lâm ê I-koán chiap-siū Eng-kok lâng An Lé-sùn, Lân Tāi-pi̍t, Má Ngá-kok téng, 3 toā i-seng só͘ chhòng-pān ê i-su ha̍k-hāu, tē 3 kî pit-gia̍p. Tī Kū-siâⁿ, Táⁿ-káu, A-lian, iàn-châu, Tiong-chiu phak-tiáⁿ-kim, Sam-bîn téng toē khai-gia̍p Tong-sî tuì lân-sán ki̍p goā-kho chhiú-su̍t chin chhut-miâ. Tuì siā-hoē ê kòng-hiàn, bat tng Sam-bîn khu hù khu-tiúⁿ, Sam-bîn Kok-hāu hāu-i, í-ki̍p tiâu-kái uí-oân, su-hoat pó-hō͘-hoē hú-tō-oân, ha̍p-chok-siā lí kàm-sū téng, tuì siā-hoē ū chin toā ê kòng-hiàn. M̄-nā án-ni, tuì tī ka-têng 5 chú-lú ê kàu-io̍k iā chin sêng-kong, 6 ê hāu-siⁿ lóng sī tha̍k Tióng-êng Tiong-ha̍k.
Hiān-chāi saⁿ ê tī Tâi-oân, nn̄g ê I-ha̍k phok-sū, chi̍t ê io̍h-ha̍k-sū kiam Kok-hông I-ha̍k-īⁿ chō͘-kàu, chiū-sī Î-sin, Î-heng, Î-tiong 3 ê tī Bí-kok, Î-sin tha̍k lông-ha̍k. Î-hān sī goā-kho i-seng, Î-hiân tha̍k chèng-tī. Í-goā ū saⁿ ê chhian-kim, kiáⁿ-sài ū io̍h-che-su, i-seng téng. Chi̍t-ke ê lāi-bīn, ū náu sin-keng kho, lāi-kho, goā-kho, hū-sán kho, ní-phīⁿ âu-kho, chō͘-sán-sū, io̍h-che-su, kiáⁿ-jî chiâu-chiâu lóng sêng-kong. Kám-siā Chú, Siōng-tè chiah-nih sù-hok tī i ê ka-têng.