首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 故李Ta̍t-chong博士
故李Ta̍t-chong博士
卷期：第967號 本次： 日期：1965/10 刊名：台灣教會公報 頁數：19
篇名：故李Ta̍t-chong博士 [ KÒ͘ LÍ TA̍T-CHONG PHOK-SŪ ]
作者：
  顯示 : 漢羅 全羅 並列  

故李Ta̍t-chong博士

故李長老Ta̍t-chong博士，tī A. D. 1889年2月20日，出世tī 屏東縣 東港 鎮， 故李Hoai peh ê 令長男。李長老ê 天資聰明，和氣。Tī 東港國校成績優良， 第 1名畢業，就考tiâu台北醫專 (現時ê 台大醫學院)。畢業後，受聘做淡水馬偕病院ê 醫師，在任中幫贊宋雅各醫生來台北建設馬偕病院。在任兩年，然後倒去故鄉東港， 開業Ta̍t-chong 醫院 20 外年。開業中有發出10000 張 ê 施療券， 施療宋鄉患者，大家真o-ló伊ê 醫德 高明 kap慈心。患者日日濟，ná 華陀再世，內外風評真好。
李長老tī 東港教會，擔任主日學ê校長kap長老20 外年久。幫贊牧長興起教會，出工，出錢，信德可嘉，全家熱心敬畏上帝。伊也做大，中會 ê 代議長老真久，忠誠盡職，協助大，中會，興起聖國， 功績真大。
李長老開業中，熱心研究醫學，受杜聰明博士ê指導下， tī 1943年得著醫學博士ê 學位。感謝主，照俗語所講：「天幫贊家己幫贊ê人。」
李博士tī 1945年光復初初受北部大會 ê 委託，極力 對日軍接收破壞ê 馬偕病院。受北大聘任做馬偕病院院長， 前後幾若任做院長兼 Ngāu-san-oân thái-ko病院院長。在任中，歡喜獻錢起一間nāi-pēng 患者 ê 宿舍，獻hō͘病院。
伊一生為馬偕病院kap Ngāu-san-oân病院，盡心，盡力，奉獻金錢kap心神來經營。實在伊ê貢獻真偉大。伊在任中，對患者親切，對症下藥。 對同工和睦，對社會有信用， koh好名聲。對國家服務，對大，中會協助，所以內外和平真好。
伊 勇退後，tī 關仔嶺，熱心研究聖經兼醫療傳道，真少開業醫 tè伊會著。後來倒來台北市三張犁家己ê厝，開設三張犁教會(就是大安教會)，後來做東門教會的支會。做醫生來設教會，也是真少人tè 會著。總講：伊是一個敬畏上帝兼疼世人ê 模範者。
李博士，tī 1960年，身體欠安，入台大病院治療。然後倒去三張犁choán-toē 療養，共5年久。無拍算，tī 1965年6月21日，中午 12點25 分受主揀召歸天，享壽76 歲。 伊歸天 ê時，李長老娘 kap家族大細攏tī伊ê身邊，祈禱吟詩。李長老無煩無惱，面笑容，安然歸天府。大家流 m̄-kam ê目屎。送這位上帝偉大ê忠僕，辭塵歸帝鄉，離世升天堂（辭塵歸帝鄉，離世升天堂）。
李博士ê入墓禮拜，tī 6月22日下晡5點舉行，遺族李夫人 Lē-chu 女士，kap兩男 7 女， 女婿，內外孫， 孫女， kap 親友，會友等，圍纍tī身邊，隆重舉行。
李博士ê告別式禮拜，tī 6月28日下晡兩點起， tī雙連禮拜堂舉行，到時總會，北大， 星中，北中，馬偕病院等 ê 代表， kap 各教會，機關團體ê 牧長，兄姐，來賓，共有300 外人出席。儀式隆重 舉行。 吳 Thian-pó教師司儀， 周 Khèng-ian先生奏樂。 張 Hông-chhiong牧師讀詩篇116篇，林 Pó-siông牧師祈禱，許Chuí-lō͘牧師講故人略歷。 陳 Khoe-chùn牧師用「寶貴ê死」做題講道。然後總會代表黃總幹事Bú-tong牧師，北大議長黃La̍k-tiám牧師，星中議長兼馬偕病院ê 董事長 許 Gông-bô͘牧師，北中議長 陳 Huī-chhiong牧師，高雄醫學院院長杜聰明博士，kap 馬偕病院羅總務主任 等 代表總會， 大會，中會，學院，病院來講悼詞。 褒獎李長老Ta̍t-chong博士ê信德，忠誠盡職kap gâu做人，真濟好事，thang做咱ê模樣kap安慰遺族。為著時間ê 制限， iáu有真濟來賓 kap真友soà無時間thang講悼詞，真遺憾。許 Pin-se̍k牧師讀悼電，後來馬偕病院，雙連教會，中正教會等 ê聖歌隊ê悼歌，然後會眾起立默禱兩分鐘追念李長老。許Chuí-lō͘牧師代表遺族講謝辭，最後請89 歲 Ia̍p Kim-bo̍k牧師祝禱閉會。隨時護送靈柩到台北縣 ê 觀音山 公塚安葬。
李長老Ta̍t-chong博士，uî-hè 3 男 7 女， 7 女婿 kap 46名ê內外孫 kap ka-ná-孫。 伊得主ê賜福，多壽，多才， 多子孫。
李長老ê大公子故 Khé-hui 君，畢業東京日本大學法科。次男 Tek-hui 君，畢業日本京都工業大學，服務順天堂製藥廠。三男 Tong-hui 君，畢業東京日本大學經濟科，經營汽車補習班（中英汽車補習班）。令嬡Kím-lân 桑，Kiok-hun桑，Chhái-bî桑，攏畢業省立台南一高女， Gio̍k-sian桑，畢業日本昭和女子 藥專， Sò͘-sian桑，oán-sian桑，Poē-sian桑等，畢業淡江女中高中部。
李長老Ta̍t-chong博士ê七個女婿， 逐個 to 大專畢業。大女婿 吳Lâi-sêng 法學士，畢業日本中央 大學法科，奉職 tī彰化銀行做經理。第2 女婿林Chài-heng醫學士，畢業台大學院，tī 楠梓開業，tī 楠梓教會做長老， 林長老娘 Kiok-hun桑，也是楠梓教會ê長老，真熱心，歡喜獻工，獻錢。第三女婿 洪 kim-lêng醫學士，畢業台大醫學院，tī Bān-hêng 開業，洪太太 Chhái-bî桑做Bān-hêng教會ê執事，夫婦攏熱心，歡喜獻工 kap獻錢。大女婿 吳Lâi-sêng 經理kap太太攏真熱心信主，對教會歡喜獻工 kap獻錢。
女婿劉 Khek-chiau醫學士，畢業台大醫學院，家己開業tī台北，夫婦攏熱心信主，服務教會。女婿 林 Sek-sî，畢業東京農業大學(農學院)，現任 糧食局稽正。女婿 張 Kiam-hong先生，畢業參謀大學，現任中-chò（中校），團管區ê 課長。 女婿陳 Chheng-hong先生畢業高商， 自己營商 (做生理)。
李長老ê內外孫，攏共46名，其中三個tī 台大醫學院，其他 tī 大專， 高中，初中，國校在學中。願主施恩賜福遺族身，心，靈得健康。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461