Siàu-liām só͘ chun-kèng ê lāu-su Dr. Copland
Gô͘ Tek-goân
1965.12.15 P.9

Goá 13 hè tī Bîn-kok 17 nî (1928 nî) 4 ge̍h 16 ji̍t, ji̍p Tâi-lâm Tiúⁿ-ló-kàu Tiong-o̍h it nî. Goá ê lāu-pē kā goá kóng, chit ê ha̍k-hāu sī Eng-gú choè chún-khak ê ha̍k-hāu. Goá ū it-ti̍t tha̍k 5 nî kàu pit-gia̍p, in-uī āu-lâi thang koh ji̍p Sîn-ha̍k-hāu. Tng-sî ê hāu-tiúⁿ sī Bān En̂g-hoâ Bo̍k-su.
Tng-sî ê kàu-thâu Ji̍t-jîn Siōng-chhoan It-jîn, sī kà goán Eng-gú tho̍k-pún, Lîm Têng-chó Sian-siⁿ sī kà goán hù tho̍k-pún, Lîm Bō͘-seng Phok-sū bat kà goán tē 3 tho̍k-pún, Bān Hāu-tiúⁿ kà goán Eng-gú ê chok-bûn, Hāu-tiúⁿ-niû kà goán hoē-oē.
oē kì-tit tē jī, tē saⁿ nî-kip 2 nî kú, ū hō͘ chi̍t ê soan-kàu-su kà Eng-gú hoē-oē, chêng bat tī tāi-lio̍k chi̍t chām. Hit chhù i sī sin kiat-hun bô joā-kú lâi Tâi-oân, kóng sī bô kú beh koh khì Tāi-lio̍k Hô-lâm-séng choè soan-kàu-su, hāu-tiúⁿ kiàu-siāu i ê miâ kiò-choè Copland. I ê miâ bô hó kiò, só͘-í bô lé-māu ê ha̍k-seng ū kiò i khok-khuh-báng, chiū-sī o͘-pang ê ì-sù. I kà goán Eng-gú ê hoē-oē, khí-thâu chin huì-khì, iā bô chheh, iā bô lâng choè thong-e̍k.
Ū-sî thiaⁿ bô chheng-chhó, gî-būn iā boē-hiáu mn̄g, hoā-hoā kiò, só͘-í chit ê lāu-su tio̍h siá tī o͘-pang kóng, "Be quiet" á-sī "Keep quiet!" Chin chia̍p siá chit kú, ǹg-bāng goán an-chēng, chit ê eng-chùn, bí-koan, iu-ngá ê lāu-su chīn it-chhè ê thun-lún, gâu kà goán kàu oē thong, oē kóng koá oē.
Goá pún-sin iáu oē kì-tit 4 hān:
1. 1929 nî Christmas Tiong-o̍h, Lú-o̍h liân-ha̍p tī káng-tn̂g ū khèng-chiok Sèng-tàn. I bat kà goán liām "A dog in the manger," che sī chi̍t phiⁿ kò͘-sū, kóng chi̍t chiah káu-á chiàm gû-á ê chia̍h chháu ê chô. Gû ko͘-put-chiong niū káu-á.
M̄-chai cháiⁿ-iūⁿ, lāu-su kah ì goá liām, oē kì-tit kà goá chin-choē piàn, hui-siông teng-lêng iū chhin-chhiat.
2. 1929 nî 10 ge̍h, lāu-su kó͘-lē goá siá "good-will Day" ê kán-tan ê Eng-bûn-sìn hō͘ i Ka-ná-tāi ê pêng-iú. āu-lâi i hit ê pêng-iú sàng goá 2 tiuⁿ ū ang-á-tô͘ ê bêng-sìn-phìⁿ. Chi̍t tiuⁿ sī lâng teh kóng golf(ゴルフ) ê tô͘, koh chi̍t tiuⁿ sī lâng teh ku̍t peng ê tô͘. Goá siu-khǹg kàu 1943 nî, Ji̍t-pún hiàn-peng ū teh kā goán Kî-āu Khó͘ Chuí-lō͘ Bo̍k-su chhiau-chhē soan-kàu-su ê siòng-phìⁿ, gō͘-hoē i choè Eng-kok, Bí-kok ê kan-tia̍p, goá ū hit 2 tiuⁿ pó-poè ê khah-phìⁿ, iā soà kā sio-sio--khì, chin bô chhái.
3. Copland Lāu-su 2 nî kú kà goán Eng-gú, choè chia̍p-chia̍p khó àm-siá (dictation).
Muí pái goá ū tit-tio̍h 100 hun, siōng bái iā ū 90 hun. I teh khàu hun-sò͘ sī chin giâm, chi̍t jī m̄-tio̍h, chi̍t ê tiám bô siá sī khàu 3 hun. Bat chi̍t ê tông-o̍h, i sī the̍h lêng tiám í-hā kiám 50 hun. Goá soè-hàn tuì Eng-gú àm-siá chin hèng-chhù, iā chin ló͘-le̍k. Lāu-su chin thiàⁿ goá, goá iā chin chun-kèng lāu-su, goá tuì siá Eng-gú (spell) jīn-chin, sī lāu-su hē hó ê ki-chhó͘.
4. Tng-sî Tâi-oân sin-hun hu-hū nā kiâⁿ-lō͘ m̄-káⁿ sio-oá kiâⁿ. Tiōng-hu nā choè chêng-kiâⁿ, hū-jîn-lâng lóng tio̍h lī oá it jī cha̍p kong-chhiok hn̄g kiâⁿ. Lóng sī lī ū siong-tong ê kū-lī.
Goán tng-sî bat khoàⁿ Copland Lāu-su hu-hū kuí pái tuì Sîn-lâu beh lâi Bān Hāu-tiúⁿ hia; beh hông-hun ê sî, in sī kiâⁿ sio-oá, ū sî kau-chhiú kiâⁿ-lō͘.
Che hong-sio̍k sī ke̍k sin-kî. Ha̍k-seng nā ū khoàⁿ-tio̍h ê, sio pò-sio-lò, khoàⁿ in sin-hun bô joā-kú ê chhin-ài chêng-kéng, khoàⁿ kah chin ji̍p-sîn, koh chin him-soān. Lāu-su oa̍t-thâu kè-lâi, kî-biāu teh siūⁿ, ha̍k-seng uî hiah choē ê, in sī teh chhiò sím-mi̍h, siūⁿ iā siūⁿ boē bêng-pe̍k sī siáⁿ tāi-chì.