oā-ke̍k Lîm Ha̍k-kiong Bo̍k-su
993 kî 1966.11 p.13-15
Chhoà ài-gī chok
Tē 1 Bō͘: Lîm Ha̍k-tun siù-châi ê toā thiaⁿ, kiam iōng choè su-o̍h-á kàu-sek.
Pò͘-tì : Pat-sian-toh chi̍t tè, í-liâu 3 liâu, ha̍k-seng iōng ê í-thâu-á kuí-nā liâu,kàu-su iōng ê í toh kok chi̍t liâu. Pán-poe chi̍t ki. Khóng-chú uī-siōng chi̍t tiuⁿ tī piah-nih. Ha̍k-seng tha̍k-chheh siaⁿ-im chin toā siaⁿ. Ha̍k-tun : Tú-chiah kà kè-khì ê, lín bat ì-sù bô? Kó͘ chi io̍k bêng bêng-tek u thian-hā chiá, chiū-sī kóng, kó͘-chá hiah ê ài beh chiong hó ê tō-tek hō͘ thiⁿ-kha-ē ê lâng oē bêng-pe̍k ê tāi-seng, tio̍h ài tī-lí kok-ka hō͘ hó; beh tī-lí kok-ka hō͘ hó, tio̍h tāi-seng chiong ka-kī ê ka-têng kò͘ hō͘ i chéng-choê; nā ài hō͘ ka-têng chéng-choê, tāi-seng tio̍h siu-ióng ka-kī, beh siu-ióng ka-kī; sim-koaⁿ tio̍h ài sì-chiàⁿ; sim-koaⁿ beh ē sì-chiàⁿ, tāi-seng sim-su tio̍h ài sêng-si̍t; sim-su beh sêng-si̍t, tio̍h ài ēng chīn i ê tì-sek;tì-sek nā kàu, it-chhè bān hāng mi̍h ê chêng-lí chiū oē thiat-toé bêng-pe̍k. Chit chām chiū-sī Khóng-chú kong ê hó ê kà-sī. Khóng-chú kong sī lán Tiong-kok ū le̍k-sú í-lâi choè uí-tāi ê gâu-lâng, só͘-í lâng chheng i choè Tāi-sêng Chì-sèng Sian-su Khóng-hu-chú, sī lán Tiong-kok lâng tī sè-kài siōng choè khoa-kháu ê sū. Lín tāi-ke tio̍h ài jīn-chin tha̍k-chheh, chiong-lâi chiah oē choè gâu-lâng. Ū lâng ài beh mn̄g m̄-bat ê só͘-chāi bô ?
Ha̍k-seng : Sian-siⁿ, goán siā-nih kin-á-ji̍t phó͘-tō͘, iā ū choè hì, goán a-bú chhiáⁿ Sian-siⁿ tio̍h lâi hō͘ goán chhiáⁿ.
Ha̍k-kiong : Lín kiám chai-iáⁿ phó͘-tō͘ sī sím-mi̍h ì-sù? Phó͘-tō͘ chiū-sī chi̍t nî chi̍t pái tē-ge̍k mn̂g khui, chheng-chheng bān-bān ê iau-kuí pàng chhut tē-ge̍k khí-lâi iông-kan, iông-kan ê oa̍h lâng ke-ke hō͘-hō͘ lóng tio̍h chú chhiⁿ-chhau, chú kàu chi̍t toh moá-moá lâi chhiáⁿ chiah ê iau-kuí, iā tio̍h kā pài, kiû in pó-pì, si̍t-chāi m̄-sī tha̍k-chheh lâng eng-kai sìn ê tāi-chì. Lán ê Khóng-chú kong kóng, " Hui kî kuí jî chè chi, thiám iá", nā m̄-sī ka-kī ê lâng sí khì choè kuí, lâi kā chè, lâi kā hàu, sī khì phô͘-tháⁿ hiah ê kuí, si̍t-chāi sī kiàn-siàu ê sū.
Ha̍k-tun: Ha̍k-kiong tiām-tiām, hó lah,lí chit ê chia̍h hoan-á-kàu, m̄-sìn kong-má pu̍t-á, lí chiah kā goá khoàⁿ-māi leh.
Ha̍k-seng : Sian-siⁿ, nā sí-liáu tàu-tí sī beh khì tó-uī?
Ha̍k-tun : Ū chi̍t ê ha̍k-seng mn̄g Khóng-chú kong kóng, Sí āu ê tāi-chì cháiⁿ-iūⁿ? Lán ê Khóng-chú kong kóng, Siⁿ chêng ê sū to m̄ chai-iáⁿ, thái-thó oē chai sí-āu ê tāi-chì, só͘-í goá iā m̄-chai.
Ha̍k-kiong : ìn-tō͘ pu̍t-kàu ê su-sióng, sī kóng lâng nā sí, chiàu i siⁿ-chêng só͘ choè lâi pò-èng, choè hó ê lâng chhut-sì choè pu̍t, choè lâng; choè pháiⁿ ê lâng chhut-sì choè gû, bé, cheng-siⁿ. Só͘-í ìn-tō͘ lâng m̄-káⁿ sat-seng, thâi gû, thâi ti, thâi cheng-siⁿ lâi chia̍h, in-uī kiaⁿ-liáu thâi tio̍h in chó͘-kong, chó͘-má, sīm-chì chng gû-iâ, bé-iâ kóng ū sîn lâi pài, lâi ho̍k-sāi, si̍t-chāi sī chin hó-chhiò ê sū. Goân-lâi lán Tiong-kok siōng kó͘-chá sī pài Siōng-tè, chhòng-chō ú-tiū ê chú-cháiⁿ. Lán ê gâu-lâng, lán ê hông-tè chi̍t nî chhun-chhiu nn̄g pái thoè choân kok kok-bîn thâi gû thoè peh-sìⁿ chè-kò, jīn-choē, kiû Siōng-tè sù hok-khì hō͘ thong thiⁿ-kha-ē ê bān bîn, kau siā chi lé, só͘-í sū Siōng-tè iá chiū-sī chit ê ì-sù. Kàu Tông-tiâu ê sî, ìn-tō͘ pu̍t-kàu thoân-ji̍p lán kok-lâng chiah ēng chhiú lâi jio̍k thô͘-ang-á, ēng to-á, chha̍k-á lâi tiau-khek ngó͘-siōng, kóng chiah ê lóng ū sîn lâi pài, lâi ho̍k-sāi, si̍t-chāi sī chin m̄-tio̍h, kóng chiah ê pu̍t-á oē pó-pì lâng, si̍t-chāi sī koh-khah hó chhiò.
Ha̍k-tun: Ha̍k-kiong, lí thài khó-òⁿ, thài káu-koài-à, lí khì chia̍h hoan-á-noā, ji̍p hoan-á-kàu, loān kóng chi̍t tiûⁿ. Lán chó͘-kong 13 tāi lâng liân-liân tiòng chìn-sū, kì-jiân choè toā koaⁿ, lán lāu-pē kap goá kap lín toā hiaⁿ iā lóng chìn siù-châi, lán tāi-tāi lóng sī pài pu̍t, kin-á-ji̍t chhut tio̍h lí chit ê lo̍h kàu sí liáu bô lâng khàu ê ko͘-sîn gia̍t-chú, nā m̄-sī goá teh chhī lí, teh an-uì lāu-bú, lāu-bú uī-tio̍h lí khì lo̍h-kàu, tòng lí bô hoat, í-keng tiàu-tāu sí liáu lah. Kin-á-jit hó-táⁿ-sí koh kóng chiah ê oē, lâi, kā lín pē kuī toà sîn-chú pu̍t-chó͘ ê bīn-chêng jīn-choē, kha̍p-thâu kiò m̄-káⁿ.
Ha̍k-kiong : Jī hiaⁿ, goá choa̍t-tuì bô koh kuī tī sîn-chú kap pu̍t-á ê bīn-chêng lâi pài lah, chhiáⁿ jī hiaⁿ m̄-bián siū khì. (Ha̍k-tun kia̍h khí tek-poe, kiâⁿ kūn Ha̍k-kiong, ti̍t-ti̍t kòng, khí kha ti̍t-ti̍t that, ha̍k-seng kiaⁿ kàu phi̍h-phi̍h chhoah).
Ha̍k-tun: Chhé ! Lí chit ê khó-o͘N3 ê cheng-siⁿ, thài ngī-sim boē kái-pìⁿ. Lán pa-pa iā m̄-sī sí saⁿ tang nn̄g tang, tú-tú kè-sin chi̍t nî, lí chiū khì lo̍h hoan-á-kàu. Lán ê Khóng-hu-chú kóng, Sam liân bû kái û hū chi tō khó uī hàu ì, bô chhái hō͘ lí tha̍k-chheh, lí chit hō kha-siàu í-keng bô lō͘-ēng lah, tuì kin-á-ji̍t khí kā goá chhut-khì, m̄-thang tńg-lâi kap goá jīn choè hiaⁿ-tī lah. ( Ha̍k-tun lâu ba̍k-sái toā khàu, Ha̍k-kiong kiâⁿ chhut mn̂g. Ha̍k-tun hiòng ha̍k-seng kóng). Kin-á-ji̍t kàu chia chiū hó, tāi-ke tńg-khì jīn-chin tha̍k-chheh.
（Pì-Bō͘)
Tē 2 Bō͘ : Ha̍k-kiong Bo̍k-su koán kheh-thiaⁿ.
Thiaⁿ ê chiàⁿ-bīn koà 10 kài, lâng-kheh í 4 ,5 liâu,toh chi̍t tè, (Ha̍k-kiong chē tī lâng-kheh í chhut siaⁿ tha̍k Sèng-keng).
Ha̍k-kiong : Goān Siōng-tè lîn-bín goán,sù hok-khì hō͘ goán, ēng bīn ê êng-kng chiò goán, hō͘ thong sè-kài bat Lí ê tō-lō͘, bān kok chai Lí ê kiù-un, goān bān-bîn o-ló Lí. Gû-gōng ê lâng sim-lāi kóng bô Siōng-tè, in to sī siâ-ok, kiâⁿ khó-o͘N3 ê choē-gia̍t, bô chi̍t ê kiâⁿ hó, liân chi̍t ê hó lâng iā bô. Choē-ok ê kang-chîⁿ sī sí, to̍k-to̍k Siōng-tè chiong to̍k-siⁿ Kiáⁿ siúⁿ-sù sè-kan, hō͘ kìⁿ-nā sìn I ê lâng bián tîm-lûn, oē tit-tio̍h éng-oán oa̍h.
Bo̍k-su-niû : Bo̍k-su, goá kā lí phàu tê lâi--lah! (Tê-koàn khǹg toh-téng). Kin-á-ji̍t lán ài-á pit-gia̍p tē jī ko-lú, m̄-chai oē thang chhin-chhiūⁿ tong-sî pit-gia̍p Lú-o̍h ê sî choè thâu-miâ á boē? Sî-kan í-keng beh 3 tiám lah, hé-chhia liâm-piⁿ oē kàu, tāi-khài liâm-piⁿ oē tò-lâi.
Sūn-ì : A-pa, a-bú.
Bo̍k-su-niû : O͘3! Ì-ah, lí koh tńg-lâi lah.
Sūn-ì : A-pa, a-bú goá koāⁿ chi̍t chiah koe tīm jîn-sam lâi beh hō͘ lín chia̍h, ài-ah siá phoe kā goá kóng kin-á-ji̍t beh tńg-lâi. Kóng i kin-á-ji̍t choè pit-gia̍p-seng ê tāi-piáu, tī pit-gia̍p-sek ê sî kóng siā-sû, si̍t-chāi chin êng-kng. Khó-sioh lán lóng bô lâng khì hù.
Ha̍k-kiong: Goá sim teh siūⁿ ài khì, chóng-sī chi̍t choā lō͘ chiah-nih hn̄g, koh tio̍h ke khai chîⁿ.
Bo̍k-su-niû : Ì-ah, lí m̄-tio̍h m̄-thang put-sî ke khai chîⁿ, koāⁿ koe, ah, hî, bah lâi hō͘ goán chia̍h, si̍t-chāi chin to-siā.
Sūn-ì : A-pa, a-bú, thài ū iàu-kín, kūn-lâi Chài-sêng ah hoān-chiá chin-choē, siu-ji̍p chin hó, khoàⁿ ū sím-mi̍h hó-mi̍h, joā-ni̍h ta̍t-chîⁿ ê, goá mā káⁿ boé lâi hō͘ lín chia̍h, lâi pò-tap lín ê thiàⁿ, iúⁿ-chhī ê un-chêng.
Bo̍k-su: Sè-sio̍k lâng lóng chhiò lán sìn Iâ-so͘ ê lâng kóng, lo̍h-kàu sí liáu bô lâng khàu, kî-si̍t in to m̄-chai, chāi-siⁿ chia̍h chi̍t lia̍p tāu, khah hó sí liáu chia̍h chi̍t ê ti-thâu. Siōng-tè 10 tiâu kài iā sī kiò lâng tio̍h hàu-sūn pē-bú, tī sè-kan beh chia̍h tn̂g hoè-siū. Kiáⁿ-jî nā iú-hàu, ka-têng beh hô-pêng khoài-lo̍k, si̍t-chāi iú-hàu sī chin iàu-kín ê tāi-chì.
Sūn-ài : A-pa, a-bú, jī ché goá tò-lâi lah.
Sūn-ì : ài-ah, kiong-hí ! lí pit-gia̍p lah ,chin kiong-hí, chit pái ū choè thâu-miâ--bô ?
Sūn-ài : Sui-jiân bô choè thâu-miâ,chóng-sī choè tāi-piáu chhut-khì tì-sû. In-uī hāu-tiúⁿ kóng goá ê phín-hēng tē it hó.
Bo̍k-su-niû : ài-ah, si̍t-chāi chin kiong-hí ! Goá soà pò lí chi̍t hāng hó siau-sit, téng-ji̍t Tâi-lâm Khó͘ Khé-hun Sian-siⁿ lâi beh kā lí choè chhin-chiâⁿ, lâm--ê kóng sī Tâi-lâm hit ê bêng-i Gô͘ Chhiu-bî Sian-siⁿ ê sió-tī Gô͘ Kok-phoan, kóng i chin ài lí, chóng-sī lín a-pa to m̄-bat hit ê Kok-phoan ah, só͘-í bô hoat-tō͘ thang kā hoê-tap, thiaⁿ-kìⁿ Khó͘ Sian-siⁿ kóng, lín nn̄g lâng ū sio-bat, tàu-tí Kok-phoan ah siⁿ-choè îⁿ á píⁿ leh?
Sūn-ài: Sím-mi̍h kiò-chò îⁿ á píⁿ leh,a-bú.
Bo̍k-su-niû: ÎN, chiū-sī chi̍t kho͘ toā-toā kho͘, puî lok-lok; píⁿ, chiū-sī siⁿ choè báng-á-kha, sán pi-pa lah. (Tāi-ke ha-ha-chhiò).
Sūn-ài: Kok-phoan siⁿ choè khok-thâu khok-thâu, seng-khu sán-kâu sán-kâu, bīn-māu bô ian-tâu, chóng-sī tha̍k-chheh siong-tong gâu, joā-nih hó-chhiò leh, chiū-sī ta̍k pái in sió-bē nā chio goá khì in tau thit-thô, i chhuì chiū li̍h-leh li̍h-leh, kiâⁿ lâi kap goá kóng-oē.
Bo̍k-su-niû: ài-ah, lí si̍t-chāi chin hó-táⁿ, iā káⁿ kap ta-po͘ lâng kóng-oē, goá thiaⁿ tio̍h chin m̄ koàn-sì.
Ha̍k-kiong: M̄, thái ū lâng chhin-chhiūⁿ lí, 30 nî chêng Liāu Bûn-gē in a-ko͘ khì lín chhù kā lí choè chhin-chiâⁿ ê sî, lí thiaⁿ tio̍h chi̍t-kù, cháu-khì bih 3 ji̍t m̄-káⁿ chhut-lâi chia̍h-pn̄g, si̍t-chāi thài hó-chhiò lah. Sūn-ài: Kin-á-ji̍t goán ê pit-gia̍p-sek, Kok-phoan mā choè in sió-bē ê ka-tiúⁿ tāi-piáu lâi hù sek, choè sek liáu kap goán choè-hoé kiâⁿ chhut ha̍k-hāu mn̂g, hō͘ ha̍k-seng ta̍k ê chhiò kah ha̍h-ha̍h-kiò, hāi goá bīn lóng m̄-káⁿ kia̍h khí-lâi, kiàn-siàu kah bô tàng cháu khì bih.
Ha̍k-kiong: Goá lóng bêng-pe̍k lah, ài-ah, lí tuì chit chân chhin-sū ū kah-ì bô? Kó͘-chá choè chhin lóng sī kun-kù muî-lâng ê oē kap pē-bú ê bēng-lēng chiū sêng, hiān-chāi í-keng bô siāng lah. Lâm lú siang-hong lóng sio-bat, koh tio̍h ū saⁿ ì-ài chiah oē sêng.
Sūn-ì: A-pa, a-bú, goá khoàⁿ ài-ah bô ì-kiàn, lín nn̄g lâng kā phah-sǹg chiū hó.
Ha̍k-kiong: Kám-siā Siōng-tè, chit ê chhin-sū koat-tēng oē sêng lah. án-ni, goá 3 ê cha-bó͘-kiáⁿ lóng kè hō͘ Ki-tok-tô͘ ê i-seng, si̍t-chāi Siōng-tè thiàⁿ goá, thoè goá an-pâi chin hó-sè.
Sūn-ì: ài-ah, kiong-hí! lēng-ji̍t tio̍h siá phoe hō͘ Khok-thâu-á Kok-phoan á, kiò i lâi thit-thô, hō͘ tāi-ke khoàⁿ-khoàⁿ--leh. (Khí-sin kiâⁿ oá toh). Goá koāⁿ chit chiah jîn-sam pó͘-io̍h-chiú koe káⁿ léng-khì lah, lán tāi-ke koáⁿ-kín lâi chia̍h.
