首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 林學恭牧師
林學恭牧師
卷期：第994號 本次： 日期：1966/11 刊名：台灣教會公報 頁數：7
篇名：林學恭牧師 [ LÎM HA̍K-KIONG BO̍K-SU ]
作者：蔡愛義 Chhoà ài-gī
  顯示 : 漢羅 全羅 並列  

林學恭牧師
蔡愛義
1966。11。15 P。7-8

第三幕： Ha̍k-kiong牧師80 作壽。牧師客廳。
佈置: Kap 第一幕 sio-siāng，增加椅桌幾塊。
出場人物: Keh Tiâu-sêng， N̂g Bú-tong 兩牧師， Ha̍k-kiong牧師夫婦，順意， 順愛。大囝婿Iûⁿ Chài-sêng， 二囝婿Gô͘ Kok-phoan， 孫 Tong-bō͘， Khé-bûn。
Tong-bō͘:阿公，恭喜生日老康健！ Keh牧師， N̂g牧師平安。阿公，我tuì日本買一su 上好ê羊毛ê內衫褲 轉來hō͘阿公， 寒天穿hō͘ boē 寒。
Ha̍k-kiong: àu-lo̍k-á，你真乖，真可取，真多謝。
Khé-bûn:阿公， 阿媽恭喜老康健！ Keh牧師， N̂g牧師平安。
Ha̍k-kiong: àu-lo̍k-á，你也tò來是莫？你taⁿ tī 台大醫學院幾年lah？
Khé-bûn:已經三年lah， 這-pang得tio̍h 500 kho͘ ê獎學金，所以我買這包禮物來送阿公， 阿媽 hō͘ 恁歡喜。
Ha̍k-kiong: àu-lo̍k-á，你實在真gâu，真可取，真多謝。 Tong-bō͘， Khé-bûn， 恁兩人無久攏 beh做醫生， 恁一生tio̍h ài敬畏上帝，學耶穌ê疼人， 恁 ê醫業， 恁 ê人生的確成功幸福。
Keh Bok-su: Taⁿ咱大家為tio̍h老牧師ê 作壽來感謝禮拜，來吟聖詩62首，老牧師tuì這首詩來得tio̍h道理信耶穌，伊真愛吟這首，請大家來吟(吟了)來看出埃及記 20:3-6節。
Lîm牧師，牧師娘恭喜上帝賞賜Lîm牧師身體健康，精神飽足來迎接80歲，實在真thang恭喜快樂感謝ê所在，上帝賜福賞賜牧師三個千金，三個gâu koh好囝婿，成10 ê孫仔攏是真乖，真gâu讀冊，牧師，牧師娘的確真滿足，歡喜感謝上帝chiah tio̍h。 這幅十條誡是牧師親筆寫--ê，寫了非常suí， thang講是鎮家寶。 第二條誡講疼我，守我ê誡命ê，我施恩hō͘伊到千百 代。上帝ê約束應允絕對無錯。老牧師信主了，雖然hō͘伊ê兄哥講：拍，踢，用鐵鏈鏈 toà桌腳，吊上樹頂5日iáu-kú無死，上帝賞賜伊長歲壽來享受年老ê福氣，實在， hō͘咱thang欣慕thang學ê所在。 Chit-tia̍p ài請N̂g牧師來講老牧師ê事蹟， hō͘咱逐人會thang koh-khah明白， thang hō͘咱永久數念。
N̂g Bú-tong牧師: Lîm牧師，牧師娘恭喜！大家恭喜！
Lîm牧師是我做尊敬第一代考-tio̍h教師ê， tī彰化教會做4年傳道，做16年ê牧師，到70 歲 chiah退休做自由ê傳道人。伊讀神學校4年， 成績最好畢業。伊來聽道理信耶穌是26 歲 ê時，有一擺去教友 Keh Séng 兄 ê厝，看tio̍h桌頂一本養心神詩，一下掀起來看，看tio̍h上帝創造天kap地， 生成萬物逐項畫。看了tio̍h生驚，因為伊所讀ê 四書五經無tàng 揣出這款 ê話，就問Keh Séng 兄 thái有這款冊。 Keh Séng 兄 kā伊講，是耶穌教ê聖詩，牧師聽tio̍h耶穌教三字，就嫌 Séng 兄去落教，也順續beh 招伊去看戲，跋-kiáu，總是Séng 兄 kā伊講， kiáu已經改 lah， m̄敢koh跋lah。原來Lîm牧師是食大酒，跋大kiáu ê人，知影這兩項攏是m̄好ê 代誌， ài beh改正是無法度。 Séng 兄soà顛倒招伊去嘉義禮拜堂揣 Gô͘ Ì傳道師，請教耶穌上帝ê事。禮拜日一下教，果然兩人相招行八里路去嘉義禮拜堂， tú-tú傳道先生講上帝降大火燒死罪惡貫滿ê所多瑪，Ngô͘-mô͘-la̍h兩個城ê人ê事。 Lîm牧師聽了真驚惶，真感激，soà反悔信耶穌。伊雖然信主了後tú-tio̍h家庭ê 綑tio̍k， hō͘人趕出，總是受Gô͘ Ì先生ê好意，介紹beh去嚴前教會教小學， thǹg赤腳teh行路ê時， tú-tio̍h會友Gô͘ Khîm兄， Gô͘ Khîm兄聽了伊ê境遇kap知影伊ê sòng-hiong困苦，隨時將所穿ê鞋thǹg起來hō͘伊穿，也送伊400錢， chiah大家相辭離別， 27 歲 chiah來台南讀神學校，讀到三年ê時，受揀選去做全台 賣聖經ê工作一年。
Iûⁿ Chài-sêng: N̂g牧師，你kiám知影阮阿爸teh 賣聖經福音冊所tú-tio̍h ê 代誌，親像tī 枋寮， Tō͘-kun-eng禮拜堂，鹹水港，清水(牛罵頭)。阿公店溪 hiah-ê 代誌？
N̂g牧師: 恁丈人有一日賣聖經到枋寮，入去一間漢藥店賣，漢藥頭家名做Lîm Jū，真好意將伊所賣 ê冊買了了，錢也算了，到一-ê掀冊起來看，看tio̍h耶穌兩字，隨時將冊攏tìm hiat-ka̍k，冊錢koh搶tò-tńg， 腳掙拳頭直cheng，直踢， 踢出店外， Lîm牧師無kap伊計較，聖經，冊拾拾leh， Hit暝toà tī藥店對面ê 販仔間。無拍算， keh 天光看見藥店內面人哭kah i-o-叫，聽人講昨暝 Lîm Jū無病死蹺蹺， hō͘ 恁丈人真昂愕。 Tī鹹水港佈道賣聖經ê時，也有受tio̍h生份人買聖經，請恁丈人食飯， koh 送 400錢hō͘伊，真感激。
Tī Tō͘-kun-eng禮拜堂過暝 ê時， Hit暝真熱， 褪腹-theh teh 睏，半暝感覺tio̍h胸坎重重teh lè，一-ē摸chiah知影是一尾大蛇kui 蜷 teh tī胸坎， 恁丈人kā掠tìm hiat-ka̍k，平安無代誌。
到tī清水toà 旅館，半暝淫婦偷入來伊ê房間眠床招伊做歹， 恁丈人嚴嚴kā責備，將淫婦趕出去，門閂 lè。不過tī阿公店溪 ê 代誌我m̄知，請Iûⁿ先生你講。
Iûⁿ Chài-sêng:阮丈人有一日落大雨， 漲大水，坐竹排 beh 過阿公店溪 ê時， 竹排直直hō͘溪水teh-beh流出海ê時，阮丈人跪tī 竹排頂祈禱，忽然間起一陣大風，將竹排仔吹來靠溪岸，得tio̍h平安過溪。
Gô͘ Kok-phoan: N̂g牧師，你知阮丈人tuì安平坐船beh去澎湖傳道， kap tuì 澎湖轉來beh去彰化醫館傳道ê時所tú-tio̍h ê事無？
N̂g牧師: 這兩項我攏m̄知，不過我知伊有hō͘日本軍強迫kap日本海軍 tuì布袋嘴上陸來佔領台灣。當時中日戰爭， 清國大敗， 賠償日本一億八千萬兩銀kap割台灣澎湖 hō͘ 日本， Lîm牧師救了真濟咱ê 同胞是事實， 日本軍 司令官真愛 Lîm牧師來幫忙in，總是恁丈人對 日本軍司令官講："我已經終身獻hō͘耶穌，， kui-世人m̄敢違背伊ê恩，"soà後司令官罵ba-kah，就kap 司令官離開轉去澎湖，以外ê事我m̄知。
Gô͘ Kok-phoan:阮丈人kap 司令官相辭ê時， 司令官 10 ê龍銀hō͘伊。伊就tuì 安平坐船beh 轉去澎湖，無拍算tú-tio̍h大風湧，船tī海中10 goā 暝日，也無米，無水， kui船ê人險險死toà海中，總是得tio̍h上帝ê恩典平安到馬公， tī阮ê本所在攏總hoāⁿ三間教會，到梅牧師去澎湖 ê時， kap 梅牧師相kap傳福音。 梅牧師轉來彰化了， chiah tuì台南教士會要求阮丈人tio̍h去彰化醫館傳道。伊tuì 澎湖轉來台南beh去彰化 ê時， kap Liâm牧師以外兩人，雖然得tio̍h 四名ê憲兵保護同行，總是tī半路hō͘土匪圍 teh，將所帶 ê行李搶了了，總是隨時得tio̍h日本兵 帶 40 goā人來救，土匪放sak所搶ê物走了了，後來chiah平安到醫館。
N̂g牧師: Gô͘先生，真多謝， 這 chām ê 代誌無你講我soà m̄知。 Lîm牧師， m̄知你對你ê二兄甚麼款ê心情。
Ha̍k-kiong:我雖然hō͘我ê二兄害無死，總是我為tio̍h我ê二兄祈禱15年，後來我ê二兄也去台南教小學，也反悔信耶穌。伊雖然khah早死，伊beh死ê時有叫伊ê 囝 tio̍h kui-世人信耶穌。
N̂g牧師: Lîm牧師總共為主做工40年，實在是hō͘咱台灣教會真thang 數念ê事。願主祝福老牧師，牧師娘 今後身體健康，精神飽足， 百年偕老是我ê心所願。

請大家來吟詩， 431首。

(閉幕)。 -----完-----
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461