首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 台灣民間宗教中ê傳說(4)
台灣民間宗教中ê傳說(4)
卷期：第976號 本次： 日期：1966/2 刊名：台灣教會公報 頁數：14
篇名：台灣民間宗教中ê傳說(4) [ Tâi-oân Bîn-kan Chong-kàu tiong ê Thoân-soat (4) ]
作者：
  顯示 : 漢羅 全羅 並列  

台灣民間宗教中ê傳說

五府千歲 ê傳說
台灣ê風俗真迷信，因為án-ni，廟寺特別濟。Tī 民國 19年12月，日本人有調查全台灣寺廟ê所額，計共有3661間，照所記錄伊ê 分類親像下面:服祀福德正神（福德正神），就是土地公ê有674 間， kan-ta 台南縣ē已經有258間。服祀王爺ê王爺廟(就是服祀五府千歲ê廟)，有534間。服祀天上聖母（天上聖母）就是媽祖ê廟，有300 goā 間。 Chiah ê 統計數字雖然有khah 舊 lah，總是真確實。光復後民間宗教有大興起，到現時iáu bē有新ê全盤-tek ê 統計， 只知影tī 民國53年7月15日以前，tuì 台南市政府所登記ê寺廟，kan-ta 台南市內已經有167 間。
Tī chiah ê全省寺廟ê 數量中除了土地公廟第一濟，以外第 2濟ê就是王爺廟，也就是這擺所beh講ê 五府千歲 ê廟，其中台南縣內有beh kah 100 間 ê濟，第 3濟就是媽祖婆 ê廟，保安宮排tī第8， 祖師廟chiah 排 tī 第 10 位 ê濟。Tī 雲林台南兩縣沿海ê 居民攏teh服祀五府千歲，尚且每一間五府千歲廟ê 香火 to不止興。親像台南縣北門鄉蚵寮村南鯤鯓廟（台南縣北門鄉蚵寮村南鯤鯓廟），抑是麻豆ê代天府（麻豆的代天府），攏是屬tī 五府千歲 ê 行宮 (簡稱王爺廟)。王爺廟所服祀ê神，伊ê 姓各間廟攏無像。有人講總共有136 姓，也有人講是36 姓，其中所服祀ê是「李，池，吳，范，朱」 （李，池，吳，范，朱）。這五姓 ê做第一濟，尚且稱做"五位一體，」也稱做"五王爺，」抑是"五府千歲。」總是其中也有只服祀一兩位 ê王爺 ê廟也boē少，這種ê廟大概稱做「某王爺廟」，抑是"二王爺廟，」親像 tuì 台南 beh去永康ê途中有一間叫做"二王廟，」連hit個所在也叫做二王。 台南市成功路大道公廟，西pêng面ê一條巷仔內，也有一間"三爺宮"（三爺宮）等，這攏是王爺廟。
王爺廟故事ê開始
關係王爺廟ê故事kap傳說是án-ni:講tī 宋朝（宋朝），有人講是唐朝（唐朝）ê時代，tī福建ê地方有「李，池， 吳， 范， 周" 等， 5 位 ê青年，因為in大家情投意合，所以就結盟做生死之交，其中hit個姓李ê是khah濟歲，就排tī第一ê， in 5人相勉勵，相kap研究。到 "大比" （大比）ê年(是khó-kàu ê年)，五個人攏中tio̍h 進士，tī 京城做官。 koh講：kap in siāng-時有260名中進士，這也成做260 ê王爺 ê原因，(這個數字有矛盾，因為tī中國ê歷史上未bat有tī一擺thâi死360 ê 新進士ê皇帝，koh大概每擺所會 thang 錄取 ê 進士只是2，30人nā-tiāⁿ， thái 會有360 ê人siāng-時中著進士ê理氣)。In to攏是非常ê盡忠，因為án-ni， in就受hiah ê 危害國家民族ê 奸臣做眼中釘， chiah ê 奸臣就想辦法，beh來陷害in。就奏皇帝，講in teh thong 敵國， tio̍h趕緊將in剪除，國家chiah會太平。當時ê皇帝因為是昏君，就聽chiah ê 奸臣ê話beh將in 斬死，佳哉朝廷中ê 大臣苦苦保奏， chiah 赦in免死，kā in關tī土牢 ê內面。總是hiah ê 奸臣驚了後來若hō͘ in出監， 會對in不利，就買通獄官引河水入土牢，將in攏總淹死tī土牢 ê內面。後來皇帝chiah知chiah ê 進士是盡忠ê，只是受奸臣ê陷害ê，就真後悔，將害 in ê 奸黨處決，後來就封 chiah ê 進士ê官位。
五王受派轉來本所在
以下ê傳說不止荒唐，講chiah ê 進士死了，in ê 怨氣上到天庭， 玉皇大帝 hia-nih， tuì án-ni 玉皇大帝就kā in分別封王，順續命令in落來凡間保國， 衛民， 代天巡狩（代天巡狩），tī每年in ngiâ媽祖抑是甚麼鬧熱ê時，咱會thang看著寫"代天巡狩" ê大hoâiⁿ旗，這講是玉皇上帝封in ê官銜，就是講替天巡視，顧守ê意思。用án-ni來teh替玉皇上帝監察民間善惡。其中這五個姓「李，池， 吳， 范， 周" ê王爺受派轉來tī福建省，擔任除知滅號ê工作，同時也thang受萬百姓ê崇拜。Tuì án-ni， 福建省逐所在to有in ê廟，因為台灣也是福建管內ê一個島嶼，koh台灣ê百姓濟濟攏是tuì 福建省來ê，所以濟濟攏teh拜chiah ê王爺。
送王船ê 由來
Taⁿ關係台南縣轄北門嶼ê鯤鯓廟，是台灣chiah ê王爺廟中最早ê，是建立tī 康熙（康熙）ê年間，也是全省規模最大，歷史最久ê。台灣ê王爺廟，原來是叫做瘟神廟（瘟神廟），hit個原因是每隔三年對面岸 ê泉州（泉洲），漳州（漳洲）tio̍h送趕逐瘟疫ê王船一擺，這叫做送王船（送王船），chiah ê王船流來kha̍h tī台灣西岸ê所在，因為船內有王爺 ê偶像，所以見若kha̍h-tio̍h ê所在，hit地方就為著 hit 身王爺起廟。
麻豆代天府廟ê荒唐故事
關係麻豆 ê 代天府廟ê 建設有一段荒唐故事，就是講五府王爺想著台灣是伊ê 管區， koh早時ê台灣也稱做"蓬萊仙島。」山明水秀人傑地靈（人傑地靈），就想beh來tiàm台灣。In就變做五個老人來到台灣，一面想beh查察台灣ê 善惡， koh一面是想beh chhē一個好風水地， thang建立王爺廟。In五個人直直chhē 到麻豆ê港口，看講hit個地ê 風水真好，就決意beh tī hia-nih toà落去。In就tī一個真暗ê落雨暝，入去一間土人teh閃避野獸ê草寮內，beh kā hit個主人借歇一暝，hit個主人看in五個人ê 像貌真有仙氣（仙氣），就好禮款待in。 到keh早起，主人真早就想beh起來接納in ê時，已經無看見人，只有看見五身王爺 ê偶像tī 桌裡， 斟酌看覓，講kap hit五個老人ê面真相像，就將這個事tuì地方ê人講：就發動起廟服sāi五府千歲，以後每年ê 3，4月ê時就大舉行祭典。
神棍造成ê悲哀
我想以上這個荒唐故事，穩當是神棍為著beh 趁錢所生起ê謠言，hit個事實雖然無tàng稽考，總是tuì現在神棍為著趁錢chiah傳出謠言ê事實來推測，的確是神棍 ê謠言無m̄-tio̍h。我引起一個咱記憶iáu 新 ê一個事實做例。Tī 民國 48年7月2日，有一台大卡車載 40 goā ê男女beh去kā "張玉姑" 進香， 車到南投縣鹿谷鄉Làm-á-溪橋péng車，死20 goā個， chhun ê 20 goā 個攏tio̍h重傷，其中有一個71 歲 ê老阿婆，名做林陳臉，伊平時m̄-bat出門一腳步， taⁿ為著 beh去kā "張玉姑" 進香，可憐死tī車ē。 對這個車禍政府chiah 注目關係"張玉姑" ê事，最後chiah知"張玉姑"正是神棍所造出來ê謠言，原因也是為著 beh 趁錢ê。
編造"張玉姑" ê事實
關係為著 beh 趁錢，神棍chiah 造出這個 "張玉姑顯聖」ê謠言，伊ê 內幕是án-ni: Tī彰化縣新港鄉溪底村有一個保安林（保安林），這個保安林是tī大肚溪 ê 南岸下流，因為大肚溪ê 砂流來積 tī hia成做一片ê 溪坪，若到冬天時chiah ê 沙滿天飛。 不但新港鄉 ê 溪底村，就是連和美鎮ê土厝村也受著威脅，tuì án-ni，政府有造林tī 這個所在，變成綠色成蔭（綠色成蔭）ê 溪床年久月深，hō͘ 溪床變遷，tuì án-ni tī保安林邊soah成做一條ê河道，因為án-ni，每擺若有水災就有水流屍（水流屍）流來kha̍h tī 這個保安林邊。Taⁿ代誌tò-頭講到民國23年，tī 這個所在bat kha̍h-tio̍h一個水流屍，當時ê保正柯祥（柯祥）kap警察會同去驗屍， hit個水流屍是有查某人ê頭毛，總是穿查埔人藍布ê長衫。所以驗屍 ê人m̄知是ta-bo͘， 抑是查某， 到將伊ê衫褪開 chiah知是查某ê。原來是台中市發生水災，這個查某人tī危急ê時穿m̄-tio̍h相逃避，後來走無lī hō͘水淹死。Taⁿ 這個 kap警察會同驗屍 ê保證，m̄知屍 hō͘臭爛 ê死屍 ê去激著 抑 m̄是，soah破病boē起床，經過幾日後soah死去。Tuì án-ni， 這個保安林soah傳出真濟ê 鬼話，直到民國 44年ê 8月間， tī新港鄉溪底村162號ê 住民劉全，有一個ta-po͘ 囝仔名做劉國山，患著急病，就請一個童乩名做陳清枝來問佛。 這個童乩是台中縣龍井ê人，是kap 劉全siāng故鄉ê人。童乩一下發，講伊是張玉姑，假使若beh kā 伊起一間廟kā 伊服祀，就beh hō͘伊ê 囝連鞭好--去。劉全果然下願講beh kā 伊起廟，這個囝chiah好--去。這個傳說原來就是劉全kap 陳清枝鬥空來傳出謠言。Koh向地方toê 3000 goā 箍起張玉姑ê廟，一方面陳清枝chiah koh去鬥台中市西屯區水窟頭ê 張連-tî出來講：伊一個小妹名叫張金花， tī 民國 42年跋落水淹死，最近來kā伊託夢講：beh 轉去省親，尚且講這個張玉姑就是張金花。 張連-tî chiah來到保安林 ê 張玉姑廟，講伊ê小妹張金花有去kā 伊託夢，所以beh請hit 身金身轉去拜3日。
Tuì以上ê謠言，hō͘濟濟可憐ê戇人掠做"張玉姑"真正teh有siàⁿ，致到hō͘ hit個保安林鬧熱起來。劉全chiah tī廟邊賣金香紙chek，聽hiah ê人teh講：一日足足thang 趁 5，6 百箍。 陳清枝 kap其他ê人chiah tī廟中teh kā人畫符仔趁錢，hit個數目是非常ê 可觀，這是tuì當時ê新聞報導出來ê， 正tī 這個時陣發生卡車 ê 車禍。後來咱賢明 ê政府有kā 伊取締，假使若無án-ni， m̄知beh koh發生幾擺 ê 車禍，可見神棍是掠人迷信ê心理來teh想辦法趁錢，咱台灣ê教會就是tī 這樣可憐ê人中間，到底咱有甚麼使命感。
迷信造成ê原因。
關係tī 台南縣北門鄉蚵寮村ê 南鯤鯓廟ê建立，也有荒唐ê故事，穩當也是tuì神棍生出來ê謠言，就是講鯤鯓海墘ê人有一擺看著王船the流--來，尚且tuì 船中聽著真好聽優美仙樂（仙樂）ê 聲， in就聚集tī海墘來迎接王船。 到船oá岸 ê時，內面並無人，只有五身王爺 ê偶像nā-tiāⁿ， in就開始toê錢起hit 間南鯤鯓廟，宗教家講人類精神上 ê不安，正是造成「迷信」ê大原因。親像粵， 閩（粵，閩）兩省是咱中國ê南pêng， 開發有khah慢。 Koh南pêng常常有瘟疫kap海上ê危險，生存上有khah困難，因為án-ni，人就khah快「迷信。」台灣ê 開發koh-khah 慢; koh台灣ê 居民大部分是tuì 福建來。所以粵， 閩 ê迷信就傳tuì台灣來，一面也是證明in是無正式ê宗教常識。Taⁿ 這個根深蒂固ê迷信正是今仔日ê 宣教工作。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461