首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 台灣民間宗教中ê傳說（6）
台灣民間宗教中ê傳說（6）
卷期：第978號 本次： 日期：1966/3 刊名：台灣教會公報 頁數：16
篇名：台灣民間宗教中ê傳說（6） [ Tâi-oân Bîn-kan Chong-kàu tiong ê thoân-soat (6) ]
作者：
  顯示 : 漢羅 全羅 並列  

台灣民間宗教中ê傳說（6）

論灶君 ê傳說。
台灣民間若到每年舊曆 ê 12月24日就稱做送神ê日。照in ê傳說講：tī 這日地面上ê神明攏beh 上天庭去見玉皇上帝，順續去報告人所做ê好歹。所以tī 這日tio̍h備辦三牲酒禮來送所有神明上天。Chiah ê神明上天去以後，in chiah thang隨便將佛像遷soah位， 抑是請來洗（洗）。Chiah ê神明上天去以後，tio̍h 到舊曆ê正月初五chiah有koh 倒轉來。所以這中間連廟寺ê門亦攏關起來，koh用封條封起--來，到正月初五就稱做chih-神（接神）ê日，猶原備辦三牲酒禮來chih接hiah ê神。
Taⁿ in teh送神ê中間最關心ê，就是灶神，亦稱做灶君， 抑是灶君公等。關係送灶神ê事，thang講是民間風俗中ê大事。當然民間宗教ê風俗是不利迷信ê， in tī beh送灶神ê時，除了用三牲酒禮以外，tio̍h koh 燒用乾稻草chat成ê 馬，抑是用紙ka ê紙馬（紙馬），這是beh hō͘ 灶君騎上天去ê。照án-ni來看，chiah ê「草馬」 抑是「紙馬」soah 比灶君 khah厲害，這thang看出in ê荒唐kap迷信。In tio̍h koh用灶君 ê像，(通常是in tī 紅紙裡， tī銀紙店， 抑是kám-á-店有teh 賣，有ê kan-ta 印灶君，有ê是kap 灶君娘娘印做夥 ê)，將這貼 tī灶孔前，就開始祭灶lah。
Taⁿ關係祭灶 ê意義。我來in離開咱現時已經有七八百年前，宋朝時代ê一首詩， hit個詩裡講: 古傳腊月二十四（古傳腊月二十四），灶君朝天欲言事（灶君朝天欲言事），雲車風馬小留連（雲車風馬小留連），家有杯盤豐典祀（家有杯盤豐典祀），豬頭爛熟雙魚鮮（豬頭爛熟雙魚鮮），豆沙甘鬆粉餌圓（豆沙甘鬆粉餌圓），男兒酌獻女兒邀（男兒酌獻女兒邀），酉守酒錢灶君喜（酉守酒錢灶君喜）。婢子闘爭君莫聞（婢子闘爭君莫聞），貓犬觸穢君莫嗔（貓犬觸穢君莫嗔），送君醉飽登天門（送君醉飽登天門），杓長杓短勿復云（杓長杓短勿復云），乞取利市歸來兮（乞取利市歸來兮）。
這首詩內容 ê意思是講：「古傳腊月二十四，」對古早所傳來ê 12月24日(是指舊曆)，「灶君朝天欲言事，」灶君 tī這日beh朝見玉皇上帝，報告凡間 ê事。「雲車風馬小留連」taⁿ有雲 ê 車 kap 風 ê 馬， beh 載你去，請你m̄-thang koh iân-chiân。「家有杯盤豐典祀，」阮厝裡有備辦真chhiⁿ-chhau beh祭祀你。「豬頭爛熟雙魚鮮。」豬頭ê牲禮煮到真爛，魚ê牲禮也真chhiⁿ。「豆沙乾鬆粉餌圓，」koh有豆沙真甜 koh 鬆，也有包肉ê 圓仔。「男兒酌獻女兒邀，」請你看阮ta-po͘人thîn-酒獻hō͘你，也查某人用誠意teh 留你。「酉守酒燒錢灶君喜，」用燒酒請你，koh kā你燒銀紙，請你歡喜接納。「婢子闘爭君莫聞，」阮翁仔某 tī相 拍冤家ê時所講ê 歹話，請你m̄-thang聽。「貓犬觸穢君莫嗔，」若tú著貓仔放屎 tī火灰內，抑是狗仔 choāⁿ尿 tī 灶邊，請你m̄-thang受氣。「送君醉飽登天門，」向望你lim hō͘ 伊醉，食hō͘ 伊飽，阮thang 送你上 天門。「杓長杓短勿復云，」阮ê 歹聽話無論是長短，請你m̄-thang講。「乞取利市歸來兮，」請你將阮kah有利益好聽 ê話講講leh， thang 轉來。這詩宋吳縣（宋吳縣）范成大（范成大）所做邨田樂府（邨田樂府）祭灶詞（祭灶詞）中ê一首。
當然關係祭灶 ê si是真濟，總是我只是將其中ê一首祭灶 ê意義最明瞭ê 詩 引出來nā-tiāⁿ， 換話來講khah明， 就是in怎樣beh 祭灶 nih?
照傳說所講：灶君是玉皇大帝所派來tiàm tī家家戶戶 teh掌管"善" kap "惡"ê 特使。 每年若到年尾ê 12月24日就上天，將hit家庭一家ê人所做ê好事，歹事，綜合起來報告玉皇大帝， 因為án-ni， 家家戶戶若到這日就備辦chhiⁿ-chhau來祭灶， 講是beh 糊灶君 ê嘴，hō͘ 伊上到天庭ê時，會thang掩蓋hit 家人ê 歹，來講寡好話，這正親像人teh送禮hō͘上司一樣。 灶君亦親像hiah ê 貪官污吏ê上司一般，這完全teh證明偶像是對人ê思想所生出來--ê。
Taⁿ關係灶君 ê傳說，是真濟款，tī 淮南子裡（淮南子）是講："黃帝做灶，死了就變做灶神。」Koh tī五經異義（五經異義）裡是講：灶神姓 "蘇"（蘇），名做吉利（吉利），伊ê 某是姓 "王"（王），名做"搏類"（搏類），這個名不止奇巧，照傳說講：灶君真驚某， 灶君娘娘也常常好m̄好就會拍灶君。 聽講因為án-ni，人chiah稱伊做「搏類。」
Koh tī 周禮記（周禮記）裡是講顓頊氏（顓頊氏）有一個囝名"黎"（黎），後來hō͘人服祀做灶神。Koh tī 春秋左傳（春秋左傳）裡講："灶君 能平九土" （灶君能平九土）。所以講灶君亦稱做"九天司命"（九天司命），九天ê意思，就是東西南北稱做「四正天」（四正天），koh東南，東北， 西南， 西北稱做「四隅天，」（四隅天），這8 個天 koh另外ka「正中」（正中）ê「中央天」（中央天），合做夥就是「九天，」司命（司命）是官中ê小神。本來是天頂ê一粒星ê爺， 就是屬 tī 文昌座（文昌座）ê第四粒星， 灶神受稱九天司命（九天司命），原因是講伊teh掌管家家戶戶ê煙火， 因為人若無煙火就boē會食熟 ê物，無食熟 ê物，就boē會活，tī 這個"民以食為天"（民以食為天）ê世界裡講I是第一要緊，連孔子也講："與其媚於奧，無寧媚於灶"（與其媚於奧，無寧媚於灶），奧（奧）ê 意思就是一間厝ê神，téng tī一個機關ê首長， 灶神是親像一個機關首長 ê 配屬直接kap 這家ê人khah有關係，所以beh敬一間厝ê神，不如敬hit個iap這家ê人khah有關係，所以beh敬一間厝ê神，不如敬hit個 kap 這家ê人khah有關係ê 灶神ê意思。以外tī "癸巳稿類"（癸巳稿類）裡講灶神是一個富家（富家）ê 女子，伊有侍女（侍女）共36 ê。平時攏是穿黃色ê衣服，總是若受氣起來就換穿紅衫，親像án-ni，有ê講灶神是ta-po͘ ê，有ê是講灶神是查某ê， 各無相同。
總講一句，灶神也kap別個偶像一樣，是tuì人ê思想所想出來ê 擬人化 ê故事，成做傳說，人攏無去kā 伊稽考，只有循傳統 teh拜，teh 祭而已，攏m̄知in所拜ê是甚麼。所以咱稱in做迷信，人攏需要宗教ê，總是咱beh怎樣來指導in，幫贊in認識真實ê宗教？這是咱基督徒ê責任。(待續)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461