首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 台灣民間宗教ê傳說（7）
台灣民間宗教ê傳說（7）
卷期：第980號 本次： 日期：1966/4 刊名：台灣教會公報 頁數：12
篇名：台灣民間宗教ê傳說（7） [ Tâu-oân Bîn-kan Chong-kàu tiong ê thoân-soat（7） ]
作者：
  顯示 : 漢羅 全羅 並列  

台灣民間宗教ê傳說（7）

擬人化 ê偶像崇拜。
當我teh研究「台灣民間宗教」ê時，hō͘我發見著這個擬人化（擬人化）ê偶像思想，tī民間偶像崇拜ê中間，常常照人家己ê生活方式做偶像崇拜ê 標準，親像講"Pu̍t siⁿ-i̍t" lah， 抑是親像「東嶽廟」（東獄廟）ê 嶽帝爺 kap 城隍廟（城隍廟）ê 城隍爺等。照傳說，in是teh執掌陰間（冥司）ê事，總是in廟中ê排設kap 內容ê組織， 正kap 陽間 ê衙門相像，也有判官，也有司屬（司屬）等，花色真濟。
郭聖王 chhoā某。
咱tī以前bat講到"大道公 kap媽祖婆 ê戀愛史，」以及「上帝公 (是指玄天上帝 玄天上帝) kā 保安大帝借寶劍」等，攏是"擬人化"ê故事。Taⁿ 這時來講神明chhoā 某 ê 擬人化故事。
廣澤尊王（廣澤尊王），也稱做郭聖王（郭聖王），抑是保安尊王（保安尊王），伊ê本姓姓郭（郭），名做洪福（洪福），是泉州府南安縣（泉州府南安縣） ê人所teh敬拜ê偶像，因為台灣ê 住民大部分是對泉州來ê。所以tī台灣裡也有真濟郭聖王 ê廟。
照傳說講：當伊成佛做神明以後，bat看見安溪司公（安溪司公，是神明中ê一個）ê 查某囝， m̄-kú安溪司公ê 查某囝已經做人了lah， 郭聖王就當等這個查某囡仔beh結婚hit日，用法術將hit 頂坐新娘ê花轎搶來伊ê廟，強迫伊成親， 對án-ni引起安溪司公kap 郭聖王 ê一場ê大鬥法。照傳說中講：安溪司公ê 法力也不止大，總是到結局郭聖王得勝，因為án-ni， 服祀郭聖王ê廟裡tio̍h ke 刻一身郭聖王夫人ê偶像，尚且koh講這身郭聖王夫人常常tī 天界裡生囝。所以郭聖王廟中若聽見有嬰仔teh哭ê 聲， 郭聖王廟前ê土地就phòng起來，人就將hiah ê土落去裝一身郭聖王ê 囝 ê偶像，就kā 伊叫做第一太保，後來koh每年ke一身，照這個方式，攏總有ke 4 身， koh稱做第一太保， 第二太保，第三太保，第四太保等。 這款戀愛kiù婚， kap chhoā某生囝， 完全無出人現實生活ê範圍。
天公出告示。
Koh有一個擬人化ê故事，就是tī 民國13年（民國十三年）出版ê台灣風俗誌裡， 有出著台南天公廟ê 天公所發出ê一張佈告（佈告），我將伊ê 內容寫一部分tī下面hō͘大家做參考。「敕封靈公，駐鎮全臺，白龍庵瘟部主宰，糾察爵閣部堂張，為出示曉諭事，照得本爵閣部堂恭奉簡命，駐鎮臺疆，分別善惡，年例代天巡狩，設醮造舟，驅瘟逐疫出海，以保闔郡黎民安泰。時屆夏令，應行舉辦事宜，茲擇于......」以下是命令「採造龍舟」kap「開堂視事」ê日期，若將這張佈告（佈告）中有關係陰陽（陰陽）ê字眼若kā 伊改動一下，就thang變成千代福建總督，抑是台灣巡武ê 佈告文（佈告文）。Tú-tú照清朝時代ê 公文方式，cháiⁿ-iūn連神明也teh用清朝官場ê 公文方式發出佈告文?實在擬人化到有徹底。
Koh tī中華全國風俗誌（中華全國風俗誌）裡有講：當時迎鬧熱ê時各廟寺ê神明ê 轎出來tī-teh出巡 ê時，萬一若tī 街頭路尾相遇 ê時，tio̍h 按照hit個神明ê 官階（官階）行參謁（參謁）kap 避道（避道）ê禮數，這款ê禮數kok有規定，完全kap 清朝時代ê官員tī路中相遇 ê禮數相像，攏無一點仔差錯，實在真心適。
神明 ê 官場組織。
以下koh再來講一個有官場派頭擬人化ê例。Tī本省ê中間攏總有30 goā 間 ê 城隍廟（城隍廟），其中最第一大間 ê， thang講是台北市大稻埕ê霞海城隍廟（霞海城隍廟）。霞海城隍廟ê 祭典是tī每年舊曆 ê 5月13日，總是對 5月初一日就陸續teh開始鬧熱lah。來hia參加看鬧熱ê人，照過去記錄，最多 bat超過50 萬人ê濟，koh tī hit幾日中，所開ê錢，超過一千萬箍以上ê 新台幣， 這個數字不止可觀。
Tī傳說中講：早時beh去khó-kàu ê人攏一定會去城隍廟燒香求金榜題名，甚至tī 今仔日iáu有家長 tī 囝仔 teh-beh 升學考試 ê時，也會chhoā 囝仔去燒香祈願（祈願）。
Taⁿ 這個城隍爺講是冥界（冥界），抑是講幽界（幽界）ê官員，總是也有kap 陽間 ê地方官一樣ê排設，親像講有18 司（十八司），有四爺（四爺），二將軍（二將軍）kap 36 ê 部眾，以外iáu有真濟部屬分別teh擔任管區 ê內司法（司法），kap警察（警察）方面ê事務。
所teh講ê十八司（十八司），就是衡文司（衡文司），富順司（富順司），錄善司（錄善司），癉惡司（癉惡司），介壽司（介壽司），財帛司（財帛司），考功司（考功司），威鎮司（威鎮司），子孫司（子孫司），速報司（速報司），命祿司（命祿司），掌儀司（掌儀司），採訪司（採訪司），宣發司（宣發司），贊政司（贊政司），圖籍司（圖籍司），福祿司（福祿司），啟達司（啟達司）等，共18 司。總是也有比較-tek khah 細ê 城隍廟只有設 6 ê 司，就是: 陰陽司（陰陽司），速報司（速報司），罰惡司（罰惡司），延壽司（延壽司），增祿司（增祿司），獎善司（獎善司）等，以外也有所在設 12 司，也有所在設 16 司，其中台北ê 霞海城隍廟是設 18 司 ê （待續）。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461