首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 台灣民間宗教中ê傳說（8）
台灣民間宗教中ê傳說（8）
卷期：第981號 本次： 日期：1966/5 刊名：台灣教會公報 頁數：6
篇名：台灣民間宗教中ê傳說（8） [ Tâi-oân Bin-kan Chong-kàu tiong ê Thoân-soat (8) ]
作者：
  顯示 : 漢羅 全羅 並列  

台灣民間宗教中ê傳說（8）

神明官場ê 組織。
除了18 司以外，koh有設兩個判官;兩個判官是分做文 kap 武， koh有4 爺，就是牛爺， 馬爺， 枷爺（枷爺），鎖爺（鎖爺），也有二將軍，就是謝必安（謝必安），因為伊排 ti第七ê，所以俗稱七爺; 范無咎（范無咎），因為伊排tī 第八--ê，所以俗稱八爺， án-ni 二判官kap 司爺 kap 二將軍合做夥稱做八爺。
以外36 部將是紀仙姑（紀仙姑），連聖者（連聖者），五龍官（五龍官），鎖大將（鎖大將），金舍人（金舍人），倒淘大將（倒淘大將）。李仙姑（李仙姑），馬龍官（馬龍官），劉聖者（劉聖者），枷大將，（枷大將），唐舍人（唐舍人），移山大將（移山大將），趙元帥（趙元帥），殷元帥（殷元帥），岳元帥（岳元帥），王孫元帥（王孫元帥），辛元帥（辛元帥），必大將（必大將），康元帥（康元帥），溫元帥（溫元帥），咒水真人（咒水真人），鄧元帥（鄧元帥），李元帥（李元帥），高元帥（高元帥），勸仙姑（勸仙姑），張醒者（張醒者），拿大將（拿大將），江仙姑（江仙姑），虎加羅（虎加羅），食鬼大將（食鬼大將），何仙姑（何仙姑），蕭聖者（蕭聖者），捉大將（捉大將），紅化官（紅化官），馬加羅（馬加羅），吞精大將（吞精大將），共36 個部眾。
án-ni，現在台北ê 霞海城隍廟裡除了主神霞海城隍 kap 城隍夫人，以外從神（從神），有劍童（劍童），印童（印童），文武判官，牛，馬， 金（金），山（山），謝， 范等將軍，koh有引童童子（引童童子），福德正神就是土地公， koh有黑虎將軍（黑虎將軍），侍女（侍女）。Chiah ê以外，iáu有配神（配神）ê 36 部眾 等。
咱看以上所講霞海城隍廟中這樣官場派頭部屬等，宛然親像清朝時代陽間 官場ê派頭相像，這正是清朝時代有寡 bat tī 官場出入ê人，用現實中ê事例（事例）做藍本（藍本）所編出來ê "擬人化"（擬人化）ê偶像崇拜方式。
Tī chia順soà講：tī 霞海城隍廟ê 配神（配神）中也有服祀一個義勇公（義勇公），聽講這個義勇公就是紀念tī咸豐（咸豐）3年，tī 艋舺地方有發生大冤家相-thâi（頂下郊拚）ê時，為著 beh保護神像突破包圍ê時，殉難來死ê人所封立ê。 Koh 這間霞海城隍廟是tī 咸豐（咸豐）9年3月1日起 ê， koh tī傳說中講霞海城隍廟中hit兩身謝將軍kap 范將軍，有人bat看著in tī半暝nih the̍h鎖鍊tiàm街路nih teh 巡邏，因為án-ni講hit地方攏無賊仔。以上是為beh證明擬人化ê偶像ê傳說故事。對這個thang知台灣民間宗教ê 幼稚思想。
幾個迷信ê小風俗
1) 放營. Tī台灣各地 ê廟宇若做佛生日抑是做醮ê時，就tī廟ê 附近，或是樹腳，或是路邊，或是橋頭ê所在將兩枝 抑是三枝小竹仔，一koe̍h chhāi tī土內，留尺goā長thóng起來tī土-面，koh用紅布仔縛tī thó͘起來tī土面ê 竹仔 nih，咱穩當bat看著這號物，這叫做"放營"（放營）。在tī大陸nih是叫做「神營」（神營），抑是「鬼帳」（鬼帳）
照傳說是講：所有ê神明攏有伊ê部屬（部屬），抑是臣將（臣將），特別jú有神通廣大（神通廣大）ê就伊ê 部屬，抑是臣將 ê中間也有真濟神通廣大 ê鬼神。Chiah ê 部屬，抑是臣將一下濟，就tī廟內toà無夠，另外tio̍h 放營 tī hit 間廟ê 附近。所以若做佛生日，抑是做醮ê時，"in" (就是hit 地方參加做佛生日，拜偶像ê人)，就tio̍h siāng-時舉行犒將（犒將），賞兵（賞兵），這正親像古代 tī sio-thâi得勝tńg來ê時tio̍h ài辦筵席來犒賞三軍（犒賞三軍）一樣。
Koh講這款放營，是kap咱中國古代三軍teh紮營ê方式相像，就是有分做東西南北，中5營。所以若發現著tī一所在有插這號放營ê 竹仔，就tī hit 附近有廟，抑是相像這號放營ê所在。Koh講chiah ê 放營ê臣將若有神通廣大，也會互相爭取地位。總講這號放營ê所在，雖然無廟，總是kap廟同樣有鬼神tī hit個所在teh khiā起，莫怪hiah ê拜偶像ê人，不時teh 驚討著， 煞著，也驚犯著無主家神，天羅夫人，心內不安，驚惶，koh tī 破病問佛 ê時，常常講是犯著 tó 一項，就是攏犯著chiah ê。列位，咱beh怎樣來幫贊chiah ê人來hō͘主耶穌拯救？
2) 慶讚中元（慶讚中元）。慶讚中元ê土名叫做普渡，照佛教ê言詞是講盂蘭盆會（盂蘭盆會），tī 這幾年來，因為有咱賢明 ê政府ê 開導， 這款鋪張浪費ê 普渡已經漸漸khah少去lah。 這個普渡照例是tī每年ê中元，中元是「赦罪地官清府大帝（赦罪地官清府大帝）鑑察人間罪惡ê日(就是舊曆 7月15日)，tī 各大寺廟nih舉行。辨理負責這個祭祀ê人稱做"爐主"（爐主），爐主是對當地大字生ê 逐年輪流， 這個輪流 ê方式是tī hit 間廟ê偶像面前poa̍h-杯來得著 ê， koh做爐主 ê人自認講是榮光。爐主若已經決定，就對舊曆ê正月開始向hit地方ê人tê-iân， hit個方法有ê是用"丁"（丁）做單位， "丁" ê意思就是ta-po͘ 丁。
後來到6月30日，就tio̍h tī廟前chhāi一支3，4 丈koân ê 燈篙（燈篙），頂面吊一kha圓 ê 燈籠（燈籠），寫著 "慶讚中原" 4字， 這支燈篙是為著beh招集鬼魂來ê路用。照傳說是信講舊曆ê 6月30日是「開地獄門」（開地獄門），所以chiah khiā起燈篙來招集chiah ê鬼神來。因為án-ni，講燈篙若khiā jú koân看ná遠，聚集來ê 鬼魂也ná濟。燈篙若khiā好就hō͘ 和尚去念經，請地藏王開鬼門關， thang放hiah ê 孤魂， 野鬼出來，án-ni， 對hit日起，一年一擺ê普渡就正式開始lah。
六月30日ê黃昏，家家戶戶就開始接待對地獄中所放出來ê 鬼魂， 家家戶戶tio̍h tī年錢ē nih， 吊一個圓ê紙燈，一面寫著 「陰光普照」（陰光普照），一面寫路燈，另外有最濟細膩ê寫講「地主某某敬點」。這個燈是beh kā hiah ê 鬼魂chhoā路ê， 這個燈ê火， 對6月30日起到7月尾為止， tio̍h 逐暝繼續點，每一個家庭就是tī 6月30日下晡kap 7月初一下晡，7月15日下晡kap 7月尾日下晡，tī 這4 ê下晡備辦魚，肉，雞鴨 kap 紅龜粿等來孝敬hiah ê 鬼魂， 並稱hiah ê 鬼魂做好兄弟仔。其他ê日子是照一日幾條街， 抑是幾個里開始聯合普渡。 Chiah ê也是對各家庭負責幾碗，碗盤是用面桶，下面té 粗糠，頂面chiah 排物件，是排tàu好，tàu suí，會用得講是植物ê展覽。
照看， in ná親像真歡喜招待chiah ê 鬼魂 ê款，其實m̄是，in只有是半喜，半驚teh做，一面是為著beh 達成普濟孤魂ê善願（普濟孤魂的善願），總是無人願意引鬼入宅來加添家己ê麻煩，所以一方面teh接待，一方面是teh想方法 "避邪"（避邪）。Hit個 避邪 ê方法是tī廟埕hē一個米斗，內面 té白米，頂面khǹg一個古銅鏡，一支古劍，一個細 ê 秤（秤），koh一支涼傘（涼傘），koh有鉸刀 kap 尺， koh一盞油燈;每一個米斗是代表一里（里），抑是一個社團（社團），用án-ni teh舉行in ê 避邪。 (待續)
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461