首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 台灣民間宗教中ê傳說（10）
台灣民間宗教中ê傳說（10）
卷期：第984號 本次： 日期：1966/6 刊名：台灣教會公報 頁數：10
篇名：台灣民間宗教中ê傳說（10） [ Tâi-oân Bin-kan Chong-kàu tiong ê Thoân-soat (10) ]
作者：
  顯示 : 漢羅 全羅 並列  

台灣民間宗教中ê傳說（10）

3)是對故事中造出來ê，雖然是漢明帝（漢明帝）ê時真正有派蔡金（蔡金）kap秦景（秦景）去印度ê天竺國請佛骨kap 佛經入來咱中國，總是到清朝有翰林用這個做背景寫一本西遊記ê 小說，當時寫西遊記 ê時，聽講是佛教 kap道教 teh論爭ê時，因為寫西遊記ê記者是屬佛教，所以所寫ê 內容攏是佛祖 khah贏hiah ê 妖道， tī hit個小說中有西王母（西王母），有如來佛（如來佛），有濟天大聖，是猴濟天， koh有二郎神（二郎神），koh有十殿閻羅（十殿閻羅），有靈宮（靈宮），真君（真君），普賢（普賢），文珠菩薩（文珠菩薩）等。 Chiah ê 並m̄是歷史上 ê人物，是小說中ê故事人物，總是後來攏造 chiah ê偶像起來teh拜。
M̄-nā án-ni，也有造封神榜ê 小說中ê故事人物，親像講元始天尊（元始天尊），太乙天尊（太乙天尊），托塔天王李靖（托塔天王李靖），聞太師（聞太師），李羅車（李羅車），金車童子（金車童子）等，明明to是故事中ê人物，也kā in 造做偶像teh崇拜。
Koh有親像何仙姑（何仙姑），呂純陽（呂純陽），漢鐘離（漢鐘離）等，明明是列仙傳（列仙傳）ê故事人物，總是也kā in 造做偶像起來拜，差不多無所不至。
4)以外有擬人化，完全kap清朝時代ê 官場相像派頭，chiah ê例tī前面已經有引過lah，所以tī chia m̄ koh再重複。
5)迷信佛教對印度傳入咱中國已經有2千年ê歷史，tī 這中間留 hō͘咱中國人ê只有一項，就是迷信。
我有一個朋友，tī 光復前伊有過去大陸，伊有bat到一個叫做晉江縣五寶厝（晉江縣五寶厝）ê所在，聽講hit所在正親像雅典一樣，全地頭to是神明偶像滿滿，完全受迷信捆tiâu leh， 幾百年來攏無發展，聽講teh-beh入去hit個所在tio̍h過一條溪， 冬天時人可以行溪底過去，總是到雨季ê時只靠著竹排來過溪，是非常ê不便。我這個朋友bat kap hit地方ê人講：恁thái m̄ 造一個橋， 不但交通會利便，穩當也會khah發達，總是in hiah ê人應講，tī以前幾nā擺有人想beh 造，總是大部分ê人驚了會pāi 地靈， 出來大阻擋，所以到今仔日iáu無辦法theng動工，這是一個真好ê 實例，為著迷信驚了pāi地靈，甘願忍受不便，koh hō͘ 地頭boē發達。
這不但發生tī大陸，tī台灣ê迷信也是非常ê傷重。Tī 民國 47年9月20日ê中華日報，有報著以下一個實事，就是tī 新營鎮， 中山路 217號，有一間鐘錶店叫做Chhàn-êng 鐘錶店， 頭家名做鄭chuí-koan，現時39歲(這是民國 47年)，伊ê婦人人名做林i-muī， 43歲，有兩個後生，4個查某囝，長男鄭Chhàn-êng， 18 歲;長女鄭Siù-eng， 15 歲。 這個代誌是對 15年前開始，就是tī 民國32年3月間， 頭家娘林I-muī身孕有鄭Siù-eng， 到beh 生鄭Siù-eng ê時soà 難產， 送去嘉義ê 某一間病院經過手術， chiah將囡仔the̍h出來，林I-muī 險險為著án-ni來喪失一條ê性命。有一日，林I-muī去一個走江湖ê 相命先生hia 相這個囡仔 ê 命， hit個相命先生看了就kā 鄭I-muī講：這個囡仔ê 命真硬，會剋父仔母， 對 hit時起，就將這個囡仔kā 伊關禁tī樓頂，甚至心中不止怨恨這個親生囝，常常kā 伊虐待，攏無hō͘ 伊落來樓腳， 也無hō͘ 伊讀國民學校，連厝邊隔壁to無人知這個事。是到民國 47年9月19日，hit日，頭家，頭家娘冤家，頭家娘上樓尾頂，想beh 吊-tāu 自殺，去hō͘ 這個 15 歲鄭Siù-eng看見，chiah hoah救人。厝邊隔壁ê人為著beh救這個頭家娘， chiah發覺著這個生份ê 查某囡仔 tī樓頂，而後問了這個祕密chiah 暴露出來。為著迷信，chiah將家己ê親生查某囝關禁起來，你想有可憐無？án-ni， tī今仔日這個台灣ê民間中，有joā-濟人teh受迷信ê 毒害，親像這號ê例實在引boē盡。
對以上來看，thang知tī民間偶像崇拜ê後面有神棍teh作弄，in只有為想beh 趁錢，就想出種種ê迷信kap異端，khiàn損等，來迷惑hiah ê不安ê人。Tī 善化國校ê南pêng邊，有一個個人所設ê 佛壇， hit個顧壇ê人也teh hoāⁿ 桌頭，趁kah 油sé-sé，食kah 油la̍p-la̍p，大家也風聲講hit 身神明joā-nih-á有siàⁿ，甚至有人去下願，koh有人用金牌來kā伊謝願，所以hit身神明掛kah 金tang-tang，也戴純金拍ê 金帽仔，也掛幾nā ê 純金拍ê金牌，總是用鐵枝網，將hit個chhāi 佛 ê 紅檜桌頂圍起來。有一日，我對 hia 過ê時，看著án-ni，想了奇怪，就問in看是怎樣，chiah知講是驚了hit 身佛ê 金帽，金牌hō͘人偷拔去，這kiám m̄是真矛盾。竟然hit 身佛hiah-nih siàⁿ， kiám boē 顧家己所戴ê 金帽kap所掛ê金牌，竟然家己boē會顧金帽，金牌，怎樣會siàⁿ，家己ê 金帽，金牌尚且tio̍h人用鐵枝網來替伊顧，怎樣會保庇人，這是極平常ê常識，iáu-kú因為人ê迷信kap神棍 ê作弄，人完全失去理智。
先知以賽亞講了真對，講鐵匠造斧頭，用火炭鍛鍊，用槌拍伊，致到iau無力。木匠牽繩線;用筆畫伊，用圓尺畫模， 仿人ê型，做親像人ê suí， tiàm tī厝內。伊 chhò pek-hiuⁿ-chiū，koh 取櫟樹kap 橡樹; tī樹林內揀定tio̍h一叢，伊栽種松樹，得著雨ak大叢。這號樹人用來hiâⁿ 火;用伊來烘燒; koh 燒伊來pek餅;亦koh 裝神佛來跪拜; 刻偶像來磕頭拜。用一份燒tī 火--裡;用一份煮肉來食; pek肉來食飽;家己烘燒講：A-hā;我烘燒lah，我見著火lah。 伊用chhun ê 裝一仙神佛，就是雕刻ê偶像; 伊仆落拜伊，祈禱伊講：求你救我，因為你是我ê上帝。 In m̄知，亦boē會想，因為伊糊 in ê目睭，hō͘ in boē看見，塞密in ê心，hō͘ in boē曉悟，無知識，無聰明，......(以賽亞44:12-20)
咱卻m̄是beh攻擊in，咱是beh明白in服祀偶像ê 內容kap心理，也想真辦法thang將主耶穌傳hō͘ in，亦借著 in ê不安kap驚惶chhoā in來hō͘主耶穌拯救。 （完）
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461