首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 人生最大ê幸福（下）
人生最大ê幸福（下）
卷期：第993號 本次： 日期：1966/11 刊名：台灣教會公報 頁數：11
篇名：人生最大ê幸福（下） [ Jîn-seng choè toā ê hēng-hok（下） ]
作者：
  顯示 : 漢羅 全羅 並列  

人生最大ê幸福（下）

3. 最大事業， 趁大錢。
"我為著家己興起大ê工程，為家己起厝，為家己知葡萄園，為家己修造花園，果子園， tī hí內面栽種逐號ê 果子樹；為家己開水池來灌ak培養發生樹ê樹林。我也買奴僕女婢......也有濟濟牛群，羊群，贏過我以前tī耶路撒冷hiah-ê人所有ê。我為家己積聚金銀， kap列王以及逐聖ê財寶......"(2:4-14)。 這個老教師beh tuì最大事業來得著幸福，就開工去工廠， kap栽種逐項ê果子， kap樹木，也開水池，來灌ak果子樹木，也買奴僕女婢來做工，也設牧場來飼牛， 羊。伊最大事業了後， 也感覺空虛。 "我看我ê手所做一切ê工，以及我所tio̍h磨ê勞碌；看ah，這攏是空虛，攏是掠風， tī日光ê下面攏無利益" (2:11)。 Koh感覺最大事業不但勞碌，也勞心，連暝時to boē睏得。 "因為人tī日光ê下面所勞碌勞心ê，有得著甚麼ah？因為伊一生憂慮，伊ê勞碌成做苦痛，連暝時心也無安歇。這也是空虛"(2:22，23)。 Koh tuì最大事業成功， 趁大錢，也感覺m̄是幸福，也是空虛無利益，因為人ê心不知足。 ‘ài ti̍h銀--ê，無因為銀來知足； ài富有--ê，無因為得利來知足；這也是空虛。貨財加添，食伊ê人也加添，業主有得著甚麼利益ah？不過目睭看見nā-tiāⁿ。勞碌ê人不管食濟食少，真好奮；好額人ê 豐盛hō͘伊boē睏得"(5:10-12)。事業最大，用ê工人ài 濟，因為蟳無腳boē行路，大樹大影，業主好名聲nā-tiān，無幸福，反轉hiah-ê無產 階級 ê勞動者iáu khah幸福，因為in暝時好睏。 這個老教師koh感覺最大事業， 趁大錢；若無善用伊ê錢財，做守錢奴 ê人， m̄是幸福， 是災厄，因為伊所積聚ê錢財，若tú著 天災地變， 抑是時勢ê變遷， chiah ê不測ê時，伊所積聚ê錢財beh無去。 "因為錢財beh親像鷹鳥飛上天" (箴言23:5)實在世間ê錢財靠不住， koh死後也boē-thang帶去， 生不帶來，死不帶去，俗語講：雙腳排齊，家伙攏別人ê。 "我看見日光ê下面，有一件大災厄，就是財主tiāⁿ-tiāⁿ守伊ê錢，來害家己，因為tú著不測ê事， chiah ê錢財就無去； hit ê人若生囝手內，也無這項。伊怎樣tuì老母ê胎出來，也beh親像án-ni thǹg-theh去；伊所勞碌得著 ê，手內boē會/能帶一hô去。伊來ê情形怎樣，伊去也是án-ni，這也是一項ê大災厄；伊為著風來勞碌有甚麼利益ah？ (5:13-16)。 Taⁿ 這個老教師tuì青年時代就beh tuì學問， tuì 享樂， tuì最大事業， 趁大錢來得著幸福， 不但boē-thang得著，反轉失望，感覺無意義，無利益，看凡事攏空虛koh空虛，到尾就追求宗教。
4. 敬畏上帝是人生最大ê幸福。
"敬畏上帝ê，就是tī 伊ê面前敬畏ê人， 到尾beh得著福氣" (8:12， 13)。 "chiah ê事攏已經聽了lah；結尾就是敬畏上帝謹慎守伊ê誡命；這就是人齊備ê本份" (12:13)。上帝是宇宙萬物ê造物主，是世界ê統治者，是聖，公義，仁愛ê上帝，是人類ê天父，伊ê旨意若顯出tī天然，叫做天蹟；若顯出tī人，就叫做人道。 "敬畏上帝，"就是尊敬，尊重，驚畏上帝， ài遵守上帝ê誡命， m̄敢犯著上帝ê誡命， koh服從天蹟 kap人道，親像有孝ê 囝兒服從父母ê款式。咱基督教ê 開祖 Ka-ní-bûn， tī日內瓦城所寫hit本教理問答 ê第一章， teh論信仰ê所在。問， "人生根本ê目的是甚麼？" 應， "是bat上帝？"問，"是按怎？" 應， "是上帝創造咱， hō͘咱toà tī世間，是beh hō͘咱顯明伊ê榮光。上帝是咱生活ê主，所以咱當然著獻咱生活ê一切來榮光上帝。" Koh問， "若án-ni，人至上ê幸福是甚麼？" 應， "也是相款tio̍h bat上帝。"問， "是按怎？" 應， "設使咱若m̄-bat上帝，是比動物koh-khah不幸。" án-ni， Ka-ní-bûn所寫ê教理問答，也是看人生根本ê目的kap最大ê幸福，是bat上帝，榮光上帝， kap傳道 ê 著者老教師相同，敬畏上帝是人生最大ê幸福。
傳道ê 著者 koh教示咱， tio̍h盡本份來勞動做工，來享受上帝所賞賜咱ê物質，歡喜快樂過日，這也是人生ê幸福。 "Choè你去歡喜食你ê飯，用快樂ê心lim酒，因為上帝已經接納你ê所做。你ê衣服tio̍h常常白，你抹頭殼ê油也m̄-thang欠缺。 Tī你一生空虛ê日子，就是上帝賞賜你tī日光ê下面空虛ê日子， tio̍h kap你所疼ê婦人人快樂過日；因為he是你生前， tī日光ê ē面，勞碌ê事所得著 ê福份" (9:7-9)。 "Koh人人也食也lim tī伊一切所勞碌ê來享福，這也是上帝ê恩賜" (3:13)。
人生最大ê幸福， m̄是有學問，也m̄是有thang享樂，也m̄是最大事業， 趁大錢，這攏是空虛ê空虛，攏是親像眠夢，親像放煙火，暫時nā-tiān。耶穌講：人若得著全世界來喪失性命有甚麼利益？" (Má-hài 16:26)。受創造ê全人類攏tio̍h敬畏上帝，因為敬畏上帝是人ê本份。 "見若敬畏耶和華，行tī伊ê路--ê， hit號人有福氣" (詩篇128:1)。人生最大ê幸福，是敬畏上帝。
(完)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461