首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 台灣民間宗教中ê傳說(13)
台灣民間宗教中ê傳說(13)
卷期：第994號 本次： 日期：1966/11 刊名：台灣教會公報 頁數：11
篇名：台灣民間宗教中ê傳說(13) [ Tâi-oân Bîn-kan Chong-kàu tiong ê Thoân-soat(13) ]
作者：
  顯示 : 漢羅 全羅 並列  

台灣民間宗教中ê傳說

Beh toà學校埕起廟。
Tī最近ê中華日報有報，講tī 雲林縣口湖鄉海墘ê 台子村，有一間台興國民學校，講這間學校ê 家長ê 90%以上是討魚人，生活水準kē，知識水準也真kē。講chiah ê人tī頂月尾 (民國55年ê 9月尾)，台子村ê 村民代表 幾nā人來到學校，講：「因為有神明指點，講著tī學校ê運動埕中央起一間廟，chiah會thang保庇全村ê平安，」講了就即時動工起廟，因為校長先生阻擋in無法得，就呈報上級有關ê機關處理。隔-tńg-日ê報紙地方論壇裡即時講：Tī今仔日ê科學時代，iáu-kú發生這款ê迷信，甚至chiàm學校ê地beh 起廟，這款侵佔教育ê 行為是一件ê「荒唐怪事」（荒唐怪事），尚且看hit個做法 kap動機，穩當m̄是一個普通ê迷信事件。請有關係ê當局tio̍h徹底調查，看是m̄是有神棍 tī後面teh作弄。
對以上ê 實例來講：thang知迷信是未開化， 未文明ê人ê心理，án-ni，迷信m̄-nā基督教 teh反對，也是受科學時代ê文明，文化所反對。雖然是án-ni，人iáu-kú不斷tī teh製造迷信，其中對風水ê迷信也相當深。
王得祿ê傳說。
Tī 清朝 ê時，台灣若提起王得祿（王得祿）是無人m̄-bat--ê。當時伊ê 官銜是: "欽命提督浙江全省水陸軍 門世襲伯爵功五級晉封太子太師" （欽命提督浙江全省水陸軍 門世襲伯爵功五級晉封太子太師），這是王得祿幾nā擺替清朝政府剿滅海賊「蔡牽」（蔡牽）有功，最後chiah kā 伊封到hit個官銜.
伊出世tī現時ê 台南縣白河鎮虎山里（臺南縣白河鎮虎山里），就是虎子墓（虎子墓）ê 吳家（吳家）。這個吳--家ê 家境是非常散鄉， bat kā Tiàm-á-kháu，就是現時ê 白河ê一個姓王ê 生理人借錢，雖然王--家ê 生理人常常來kā 伊討錢，總是吳--家因為無錢thang 還， hō͘ 王--家ê 生理人真無歡喜。有一日，王--家 ê 生理人koh來kā in討錢，討無，就對吳--家講：你印信講看tī-時會 thang 還我，m̄免hō͘我行chiah-nih濟choā攏空行。吳--家真不得已就指伊ê婦人人講：「你看，我ê 婦人人koh一個月就會生， hit時就有錢thang還你。」
Taⁿ經過一月日後，王--家 ê 生理人koh來lah， hit時吳--家 ê婦人人正 teh生產，無久就生一個ta-po͘ 囡仔。 王--家 ê 生理人知吳--家實在是無錢thang 還伊，所以向吳--家講：不如將這個囡仔hō͘我收養，我就m̄免koh kā你討錢。吳--家 tī真無法度ê中間，將這個嬰仔 hō͘ 王--家收養， 這個嬰仔就是後來ê王得祿。
賢慧ê 兄嫂。
王--家收養這個囡仔無久，王--家 ê夫婦就相續離開世間lah，佳哉王得祿有一個兄嫂不止賢慧，款待伊親像家己ê 囝， kā 伊養育到大漢，王得祿 ê 兄嫂soà tī嘉慶（嘉慶）29年離開世間，hit時王得祿因為siàu-念伊ê 兄嫂養育ê恩情，就kā 伊埋葬tī 大仙岩 ê頭前。Tī無拍算ê中間，所埋葬ê 地是一個仙穴 ê 風水，以後有人講tī早暗hit個墓會發出紅光出來，王得祿也對án-ni直直成功，到尾chiah 進封到太子太師（太子太師）ê 官銜。聽講王得祿做官了後，為著siàu念埋葬in 兄嫂ê好風水，就送tī 大仙岩附近ê大仙寺一塊寫著 「大發慈悲」ê 匾仔， 對án-ni 大仙寺也為著王得祿khiā一塊碌碑（碌碑）。(註:為著死人khiā ê叫做神主牌，為著活人khiā ê叫做碌碑)。對 hit霎以後，大仙寺若早暗摃鐘鼓ê時，就攏會響動到王府去。hit時ê王府已經soá去tī 諸羅 ê 溝尾莊（諸羅的溝尾莊），就是現時ê 太保庄。 Koh講：Nā 大仙寺早暗ê 鐘鼓響到王府ê時，全庄社ê 雞boē啼，狗也boē puī，這正是一段迷信風水ê傳說。以下iáu有一段迷信風水ê傳說故事。
兩隻天然石燭。
Tī 乾隆ê年代，嘉義縣kap 雲林縣 ê交界中，有一個深山斷崖ê絕壁（深山斷崖的絕壁），m̄知對tī tang-時起有兩隻蠟條型ê石柱。這兩隻石燭（石燭）正是tī清水溪 ê上流 kap磅溪（磅溪）合流 ê溪邊，兩隻石燭相離開約略有100 公尺掠相排， 對遠遠就thang看見，這兩隻講是天然ê石燭， m̄是人工做ê，聽講hit個時陣， 嘉義，雲林兩縣 ê山村攏是iáu未bat有人行到ê。 Tī清水溪ê 上流有一個叫-做全仔社（全仔社），就是阿里山ê山胞做事先搬來平地khiā ê所在，人口大約有600人，這個全仔社現在是屬-tī嘉義縣梅山鄉太和村（嘉義縣梅山鄉太和村）ê所在，現時已經有開發一條阿里山煤礦公路。
Taⁿ來講hit兩隻天然ê石燭， 對雲林縣古坑鄉ê草嶺村（辰林縣古坑鄉的草嶺村），kap嘉義縣梅山鄉太和村柑子宅（嘉義縣梅山鄉太和村柑子宅）看過去，實在是一個奇觀（奇觀），傳說講tī乾隆（乾隆）23年，這對石燭到日暗就發出火光，正親像蠟條點火一樣，尚且hit個光照到全仔社（全仔社）雲林， 嘉義兩縣 ê交界中ê一座一座 ê山，hō͘來這山中拍獵ê 平地ê 漢人（漢人）感覺非常ê奇怪。起初掠做hiah ê山地ê山胞m̄知teh變甚麼báng，總是後來chiah知m̄是山胞去點火 ê，因為不論是風颱，大雨ê中間to繼續teh to̍h，未bat hoa--去。
石燭to̍h 起來。
後來聽講tī石燭 to̍h起來hit一年，tī全仔社 ê山胞中，有一個婦人人生一胎ê雙生仔，兩個攏是ta-po͘--ê，不過兩個ê肉色無仝款，一個肉色是東洋人ê肉色， koh一個ê肉色是烏--ê， 烏 kah親像烏目。 山胞在來就已經看雙生中ê一個是妖精 ê迷信，taⁿ koh看著其中ê一個烏kah親像烏目， koh-khah信講這個就是妖精，就逼hit個婦人人將伊tīn死，若m̄敢，也tio̍h將伊hiat落溪中hō͘水流去。可憐這個烏肉ê嬰仔受帶到溪邊，hō͘人hiat 對水中流去。對這時以後，這兩隻石燭中，tò-pêng hit 隻火就hoa--去，無koh發光，只chhun 正-pêng hit 隻石燭繼續teh to̍h，這ná親像hit兩個嬰仔ê性命kap 這兩隻石燭有關係，正-pêng 這隻石燭有關係，正-pêng 這隻石燭繼續to̍h 幾nā年久，hit個囡仔已經5 歲 lah。有一日，這個囡仔問in老母講：「我ê 哥哥是去tó位？」In老母忽然聽伊問這句真tio̍h-驚， iⁿ-iⁿ ngh-ngh kā伊講，"恁哥哥tī 出世hit兩日仔人講伊是妖精，所以kā tàn 對溪裡落去，已經死lah。 這個5歲 ê 囡仔聽了後就流目屎，哮到boē出聲，對這時以後，這個囡仔就精神變成失常，經過無久也就死去lah， tú-tú 伊死，hit 隻iáu teh to̍h ê石燭也hoa去lah。後來經過幾nā年後，正-pêng hit ki石燭soà hō͘ 雷電摃歹去，只chhun tò-pêng hit隻， 聽講到現在iáu tī-teh， chiah ê代誌就流傳tī山地ê山胞中。

（待續）
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461