首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 台灣民間宗教中ê傳說(14)
台灣民間宗教中ê傳說(14)
卷期：第995號 本次： 日期：1966/12 刊名：台灣教會公報 頁數：12
篇名：台灣民間宗教中ê傳說(14) [ Tâi-oân Bîn-kan Chong-kàu tiong ê Thoân-soat(14) ]
作者：
  顯示 : 漢羅 全羅 並列  

台灣民間宗教中ê傳說

看風水 ê人去看。
後來講有一個看風水 ê人聽著這個傳說，就poah-工到hit個所在去實地cha看風水，照hit個看風水 ê人所講：hit個所在除了有兩隻石燭以外，也有石桌，石椅， koh有一身對天然ê石所形成ê 觀音佛像khiā tī 溪中，koh tī水尾有石龜 kap石獅khiā相-ǹg， 這個款風水 ê人講：原來這個所在是一個觀音穴，正是hit兩個囡仔所應該得ê 風水，無拍算其中ê一個受人tàn落溪中死，這個穴ê 風水soà khih-角， 到後來第二ê也死，對án-ni 這個 風水soà 敗去。Koh講：若有人koh再埋葬親人tiàm tī 這個 穴中，會koh得著 風水尾。
傳說傳到平地。
這個傳說直直傳到平地ê人入去山間開發ê時，到日據時代，這個全仔社已經變做平地人teh khiā ê所在，hia ê山地山胞也搬去阿里山ê 番界去toà lah， 到hit時這個傳說iáu teh流傳。果然有一個平地ê 同胞， 對平地soá伊ê父公ê骨頭去埋葬，這年tú-tú是民國28年，埋葬無久，雲林縣古坑鄉 掘汞山（雲林縣古坑鄉掘汞山）崩落來變做一個潭，叫做草嶺潭（草嶺潭），所有清水溪 ê 溪頭ê石龜，石獅攏沉tī 潭中，後來草嶺潭岸也崩去，潭內ê水攏ta，所有ê攏埋 tī 沙底，這就是兩隻天然石燭 ê傳說故事，也是有包含風水 ê迷信tī-teh。所以小弟tī開始ê時已經有講過tī台灣ê民間傳說中是boē會脫離迷信。
重陽ê傳說。
Tī台灣ê民間風俗所teh信ê 節（節）是非常濟。這時來講起舊曆9月初 9 重陽 ê故事，因為其中猶原有一個荒唐（荒唐）ê傳說tī-teh。
舊曆 9月初9有兩個俗稱（俗稱），就是重九節（重九節）kap 重陽節（重陽節）。重九節是9月9日，兩個到相tha̍h。 重陽節是講：「日月陽數之極」（日月陽數之極），所以稱做重陽。 Tī咱國 ê 雅士（雅士），詩人（詩人），墨客（墨客）等，若到這日，就備辦菊花，酒kap大紅蟳， peh 上高山痛飲， thit-thô一日，講是teh 避凶（避凶），koh tī 這日裡， 家家戶戶，若是大陸攏有食重陽糕（重陽糕）。重陽糕是用米ê 粉 kap 麥 ê 粉chham 豬肉，抑是羊肉落去炊起來ê 粿， kui-sn̂g kui-sn̂g，每sn̂g 粿 ê頂面插一支有彩色ê 細枝旗仔， 旗仔裡有寫重陽糕3 字。若是tī咱台灣是食麻糬， kap大陸比起來ke真簡單。Taⁿ 這個 重陽節 ê傳說是án-ni:
重陽節 ê 由來。
聽講tī 東漢（東漢）末年（末年），有一個老人，用一支竹仔giauh一個葫蘆，常常出現tī 逐 ê城市裡來teh kā人醫病。伊ê 藥仔真有功效，總是攏無teh kā人收錢，人真尊敬伊，總是人攏m̄知伊ê名，問伊，伊也m̄講：所以人攏稱伊「壺公」（壺公）。這個壺公ná親像也無住所ê款，若到日落ê時，伊就跳入去伊所phāiⁿ leh hit個葫蘆睏， 到天光伊就koh對葫蘆nǹg出來，其實這個葫蘆是細-á kai ê-á，平常人m̄免講beh nǹg入去，總是講這個壺公暝時就nǹg入去睏，天光就koh nǹg出來，照壺公家己kā人講：講tī 葫蘆內有另外一個天地，總是可惜別人無人bat入去。
有一日，這個 壺公來到汝南（汝南）ê所在teh kā人醫病ê時，有一個名做費長房（費長房）ê市掾（市掾），(市掾就是親像現在ê里長)，伊平素不止欽仰壺公 ê 醫術（醫術），就拜壺公做師傅，也tè伊入山苦修（苦修）真濟年，果然伊也親像壺公會醫百病。
當費長房學成以後，beh離別壺公 ê時，壺公送伊一張靈符（靈符）kap一支竹柺仔 hō͘ 伊騎，當費長房騎上竹拐仔ê時，就忽然感覺愛睏， 對án-ni就睏去，到一個所在ê時，費長房忽然醒起來，一下看，伊所騎ê 竹拐已經墮落山頭，變做一隻龍， 費長房看了真歡喜，就將龍尾拖起來，龍就koh變做竹柺仔， 正親像出埃及記 ê摩西。這個 費長房講伊也有對壺公學縮地術（縮地術），會thang tī 3000里內外ê所在同時出現。所以後來人攏叫伊做縮地仙， 聽講伊這個技術是 kap 壺公所hō͘伊ê 竹拐， 靈符有關係，koh講這隻竹拐， 會拍百鬼，也會驅使土地公。總是後來費長房 ê 靈符soà 拍m̄見，所以hit枝竹拐就變做龍飛去，無koh tńg來。因為án-ni， 費長房soà hō͘ 鬼拍死。
這個 費長房 iáu未死以前聽講bat tī伊ê故鄉裡收一個徒弟，名做桓景（桓景）。有一日in兩個師徒teh練道ê時，忽然間費長房對桓景講：「Tī 9月初 9你ê全家beh tú-著大災難。」桓景聽了大驚失色，就跪落去，求費長房來指點in一家ê人攏會thang逃避hit個災難，費長房 chiah講：「等候到hit日，就是9月初9，真早你kap你ê全家大細攏tio̍h用絲襄（絲襄），內面té著茱萸（茱萸），相chhoā 到高山頂， tī hia lim 菊花酒，就會thang避這個災難。」(茱萸是一種ê 藥草)。茱萸聽著 這個話真歡喜，果然到 9月初 9 hit日就照án-ni去準備，也照án-ni全家上山去避難， 到hit-ê-昏全家ê人tńg來到厝，就看見所飼ê雞， 狗，牛，羊等ê 家畜死到歸四界，尚且看見所死ê身屍真歹看，看了攏會起毛管，就隨時去對費長房講chiah ê事。後來這個 傳說直直流傳成做「重陽」ê日若到，大家就去peh山旅行ê風俗。Koh 唐朝時代杜甫（杜甫）kap王維（王維）bat做關係重陽 ê詩， 杜甫ê 詩講："藍色ê水對遠遠天ê 外-pêng流落來，綠色ê山兩粒相排，顯出真koâⁿ ê 款式，明年若koh到這個節相tú-著，就知啥人khah勇健，想著án-ni，就koh the̍h手裡ê 茱萸草起來詳細看（藍水遠縱天外落，玉山高並兩峰寒，明年此會知誰健，手把茱萸仔細看）。王維ê 詩講：「家己一個做生份人客，逐擺過節就加倍想著厝裡 ê至親。遠遠tī chia想著厝裡ê 兄弟koh teh peh 山遠足， m̄-kú the̍h 茱萸草去插ê有減一個人」（獨在他鄉為異客，每逢佳節倍思親，遙知兄弟登高處，遍插茱萸少一人）。對這兩首詩thang知到每一擺 ê重陽節，每一個人攏tio̍h toà一份ê 茱萸上高山。
咱信徒應有ê認識。
列位兄姐，咱對以上關係重陽節ê傳說thang看著民間ê迷信，往往是對某一種ê思想生出來--ê，尚且這也thang講是咱中國人ê一種落伍ê民間思想，koh 這款思想到今仔日iáu teh繼續，甚至變成兒童最歡喜看ê連環圖來teh出現，hit個思想:
1)就是欽仰會行仙術ê 異人，傳說中ê 壺公 kap 費長房等，就是受看做一種行仙術（仙術）ê異人（異人），tī舊年ê新聞bat報告講：有一個國校ê 囡仔， 對看連環圖來生起欣慕學仙法，冊包phāiⁿ-leh， 對山中入去，hō͘ in ê父母四界chhē無囡仔。
2) 上面關係重陽傳說中ê 壺公 kap 費長房等， thang講是屬tī道教ê 道士，in所做ê也是屬tī道教 ê 道術 ê一種，thang講這個傳說是受著道教思想ê影響，對這thang知道教思想，tī無意中成做咱中國ê民族思想，對這個思想生出空想，夢想，後來就成做迷信。
3) 對世間所有ê試煉，災害，無正確ê認識，只有是一味驚， m̄敢正視現實（不敢正視現實），所以只求方法來避難，就生出去抽籤，卜卦，看命， 抑是去補運， 改運等，因為看一切ê試煉，災害做歹運， 衰運， 對chiah ê思想就生出異端，khiàn-損出來，咱beh 對in傳福音，的確tio̍h 先知in ê 這樣心理。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461