首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 婚姻ê悲劇(下)
婚姻ê悲劇(下)
卷期：第986號 本次： 日期：1966/7 刊名：台灣教會公報 頁數：13
篇名：婚姻ê悲劇(下) [ Hun-in ê pi-ke̍k (Hā) ]
作者：
  顯示 : 漢羅 全羅 並列  

婚姻ê悲劇（下）

"你講án-ni也有影，總是我詳細kā統計， 這款ê例真少，十個無一個，其他ê 9個， m̄-nā boē引chhoā丈夫，連伊家己ê信仰to tè伊去，你kiám會確信你有法度thang引chhoā伊。若無自信，絕對m̄-thang beh試主你ê上帝。"老父也無歡喜， án-ni應我。
這時我chiah感覺，有影宗教會束縛人， tú-tú照文傑所講ê。我m̄聽父母ê話，決心beh愛伊。阮ê交陪經過兩月日，愛情ê溫度達到沸點（沸點）。 文傑是一個老實ê青年， 至少tī我ê印象中是thang倚靠ê人。
就tī伊beh退伍ê前日，阮約束tī國校ê教室見面， hit暗伊對我求婚講：若轉去， 連鞭beh來chhoā我，我為著beh對伊表示盡情，我無拒絕伊對我ê無禮，事實我也享受著未bat有ê愛情，我失去理智；信仰，父母攏boē記得lah。我將女子做寶貝beh獻hō͘丈夫ê禮物tī 這時完全獻hō͘文傑。
3. 偷走出去結婚。
一月日後，我發覺著我ê身軀有各樣，知影腹肚內一定ke一個活命出來，非常ê著急，寫批通知文傑知影，伊回批講：因為父母無贊成伊chhoā草地女子，所以hō͘伊m̄知beh按怎拍算。我看了強強beh 昏落去，到chia來若無趕緊來去chhē伊，伊穩當beh放soah去，看我到時beh按怎見人，做一個未出嫁ê老母sià著祖公，教會，家庭ê面體皮， 會見笑死，父母iáu m̄知這個事，若知！穩當kòng死我。 Tio̍h！我唯一ê路是來去chhē伊。
hit暗，我偷準備行李kap平時所積聚ê錢約有5000箍， chū án-ni tī in睏去ê暗暝偷走出來坐夜快車到台北。 Chhē著文傑， hō͘伊著一驚， o-ló我ê勇敢，若是伊ê父母反對， 姑不將阮另外sè厝tī別位家己khiā。
一月日後，阮正式tī法院舉行公正結婚， tī 結婚證書有蓋章koh翕相，hit日只有請幾個朋友，以外攏無甚麼鬧熱。
結婚後阮ê生活過得真快樂。 文傑為著做生理常常出外，甚至去香港（香港）， m̄-kú攏有寫批寄錢轉來，伊若轉來， 會為著我買香港ê禮物hō͘我歡喜，非常ê體貼我，我逐日無事做，就去看電影抑是市內逐所在thit-thô， 過著城市享受ê生活。 Hit時我有寫批轉來厝裡報告阮ê幸福生活hō͘父母安心，若是in攏無kā我回批， in m̄知joā nih憤慨我ê所做，自kap文傑結婚後，我攏失去以前ê信仰，我體驗著人若平安過日子就好， m̄免多此一舉（多此一舉）來束縛家己，現在阮無上帝也siāng款過著幸福ê生活，我無後悔這層事。文傑已經hō͘我夠額ê快樂lah，我何必tio̍h麻煩上帝來攪吵阮ê美夢（美夢）。
4. 慘lah。
總是天有不測風雲， 人有旦夕禍福，做夢也想boē到，就tī我生產ê hit月日， 文傑開始放sak我，我月內攏無轉來kā我看，聽厝主講：伊tī香港有交著一個貿易商（貿易商）ê 查某囝，而且有帶轉來hō͘父母看，伊ê父母不止歡喜這個有錢ê 千金小姐，就唆使伊想辦法kap我離婚， thang kap hit-ê女子結婚。滿月後ê一暗，伊忽然轉來，我雖然真受氣， m̄-kú用笑容代替我ê 生氣，抱阮愛情ê 結晶（結晶）。面真sêng伊ê ta-po͘嬰仔hō͘伊看，看伊會為著這個清秀ê 囝兒來後悔boē？無拍算，無良心ê禽獸竟然問我這個嬰仔ê老父是甚麼人？我忍boē-tiâu 放聲大哭，真久伊chiah好禮kā我講：事情到chia來，為著beh孝順父母kap生理ê緣故， 向望我諒情kap伊離婚。 天啊！伊攏無考慮我為著伊怎樣犧牲； 放sak父母......伊koh講：我若好好答應離婚，每月日beh 500箍做贍養費（贍養費）hō͘我用，若m̄答應，以後攏m̄ chhap我，看我家己有辦法無？
我考慮3日，好！ 離婚，親像這款絕情ê男性有甚麼留戀。一禮拜後，阮正式tī 法院辦離婚手續，伊the̍h 6000箍 hō͘我做一年ê費用。
Tuì hit日起，我過著痛心空虛ê生活，我無埋怨甚麼人，我知影家己作孽，家己受罪， 只恨家己目睭青瞑，失去理智，貪愛奢華ê緣故。 Taⁿ唯一ê向望是這個細囝做我真大ê安慰nā-tiāⁿ。
半年後， hit隻禽獸kap hit-ê 妖精（妖精）正式結婚，儀式請台北市長福證，聽講請百goā桌，轟動全市，報紙也有刊in兩人ê像出來。
日子teh過親像龜teh sô，一年過去， hit 對野鴛鴦（野鴛鴦）去香港，每月500箍 ê 贍養費也soà boē記得lah！我又koh受騙lah，想beh去法院告訴，若是我一時糊塗無寫契約書，無法伊ta-oâ；假使有也無錢請律師，俗語講："衙門八字開，有理無錢m̄免來"（衙門八字開，有理無錢莫進來） Taⁿ我beh按怎過日，若án-ni落去做工， m̄-kú人面無熟，無tàng應，而且厝主來beh the̍h厝稅，我kā伊ān koh ān， 後來伊soà 起phuì面， beh叫警察來逼我搬走。 這時我chiah 感覺我是一個浪子離開家庭， chiah tú-tio̍h chiah-nih悽慘ê結局，我tio̍h 轉來厝裡，若無我會死。 Boē用得，我是偷走出來結婚ê，今仔日hō͘丈夫放sak， 罪有應得，若轉去kiám m̄是hō͘人恥笑死。
厝主真正叫警察來lah，我目屎流滿面，跪tī警察ê面前，將我ê苦情哀求hō͘伊聽，無拍算伊聽了不止同情，就kā我介紹去伊ê上司蘇局長ê厝kā in 煮飯。阮母囝暫時有寄託，日子也khah好過。
5. 禍不單行。
細囝名叫懷仁（懷仁），已經5歲 lah，生做真清秀，得人疼，我唯一ê 向望kap安慰就是培養這個囝到大漢。若是災禍偏偏beh kap我做對敵，當我得著淡薄安慰ê時，最大ê不幸又臨到我。 懷仁破病真傷重，醫生講是急性ê 腦膜炎（腦膜炎）tio̍h即時入院，我抱去馬偕病院（馬偕醫院）入院，將幾年來粒積ê錢用了了， koh 變賣兩kha金手指， 幾領好ê衫仔褲也無法度挽回細囝 ê性命，伊第5日就離開世間。我攬細囝連續哮一日，暈去5擺， m̄願hō͘人kā我抱去埋葬，若m̄是教會ê姊妹用心苦勸，我tī hit日就已經kap 細囝做夥去lah。一禮拜久我無食無lim， the̍h hit張伊3 歲翕ê相片ná哮ná叫"懷仁，懷仁-"我變做siáu人，精神失去， 逐日cha̍uh-cha̍uh念，倒tī病院一月日久。 馬偕病院ê林牧師kap姊妹逐日來替我祈禱，安慰我，就tī 這時我chiah chhē著拍m̄見5年久ê信仰。
6. 浪子回頭
我深深體驗著一個無上帝ê人所做ê罪惡joā-nih可怕。一個離開上帝ê人所受著ê痛苦何等悲哀，我koh感覺世間做寶貝ê物件是"愛，" 真正 ê 愛只有tī上帝ê內面chiah會得著；我ê家庭，我ê教會，我ê上帝chiah有這個愛 ê存在，其他ê 愛攏是假--ê。
我ná親像夢見一個惡夢， 這個惡夢教示我，督責我， hō͘我看透世間， tú-tú 親像所羅門ê一生到tī年老ê時所講ê講：
空虛ê空虛，空虛ê空虛；凡事攏是空虛， tī日光ê下面一切ê事，看ah，攏是空虛，攏是掠風。
--獨獨敬畏上帝，謹慎守伊ê誡命；這是人齊備ê本份(傳道1:3， 12:13)。
Taⁿ我tio̍h tuì惡夢醒起來，當我出院hit日，疼主ê姊妹為我聖別，唱聖詩245首。
我前ná 羊失迷，
Tiâu外lām-sám去se̍h；
牧者ê 聲我無beh聽，
無ài tè伊去行；
我前ná 囝放縱，
無ài khiā起家中；
天父ê聲我無ài聽，
ài得四界去行。
是lah，我是一個浪子， taⁿ我tio̍h做ê，是轉來親近老父求伊ê赦免。早起真早，我tuì台北坐車轉來， 離別這間教會kap家庭tú-tú 5年久。
我看伊ê手巾攏tâm lah，兩蕊目睭哭kah 紅kòng-kòng，我也tè伊流 boē少ê目屎。
我就chhoā伊轉去， 路經過一間工廠， tī hit支大支煙筒有寫"豐盛食品加工廠"（豐盛食品加工廠）ê字，伊chù伊看ê時，我kā伊講，
"這間工廠ê老闆就是你當時所無愛hit-ê青年郭豐盛君ê，專門teh做松茸（香姑）罐頭銷外國，不止趁錢，伊現在是教會ê執事，也是鄉公所ê 民政課長，也老闆娘就是月英 (月英)姊--你ê小妹"
-(完)-
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461