首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 婚姻ê悲劇（上）
婚姻ê悲劇（上）
卷期：第985號 本次： 日期：1966/7 刊名：台灣教會公報 頁數：15
篇名：婚姻ê悲劇（上） [ Hun-in ê pi-ke̍k (Siōng) ]
作者：
  顯示 : 漢羅 全羅 並列  

短篇小說
婚姻ê悲劇（上）

"牧師有tī-teh無？"我聽見一個婦人人ê聲tī外面teh問，即時走出來。
"我就是，有甚麼貴事？"是一個中年婦人，約30歲，中等身材，穿一su士林布ê洋裝，一對小小ê鳳眼，鼻樑真高，面貌清秀， nā m̄是帶著憂悶ê面相(腔)kap 幾nā日無梳頭真膨鬆ê頭毛，看起來一定是不止suí ê 查某人。我請伊入來坐，入去內面phâng一杯茶出來hō͘伊，伊khiā起來接受，直直講多謝，伊lim一嘴了後chiah講。
"牧師，我有一項要緊ê事beh來拜託你， m̄知你願意幫忙我無？"
"只要我做會到，無問題。請講。"
"我是咱教會李再傳（李再傳）長老ê查某囝，名叫月琴（月琴）， 自5年前離開家庭了後，攏m̄-bat轉來，我也無面thang 轉來。 M̄-kú到chia來無轉來也是boē用得，所以麻煩牧師你chhoā我入去，替我對序大人求情。"講到chia，伊ê嚨喉親像that-leh，講boē出來lah。
"Ah！我bat聽人講：李長老有一個查某囝為著愛情偷走出去，原來就是你o͘h！"
伊tàm頭，頭殼àⁿ-àⁿ，親像真見笑ê款，目屎tuì兩蕊目睭流出來， ná講ná teh哮。 "我無拍算會tú-tio̍h chiah-nih不幸，這一定是上帝對我ê譴責。我已經行到進無步，退無路ê地步，今仔日我chiah深深感覺著我ê罪過真重，只有轉來求父母ê赦免nā-tiāⁿ。"
忽然伊開聲大哭，這真正是哀傷koh懺悔ê聲調。
"你m̄-thang傷心，我會替你設法，請你khah冷靜，詳細講你ê經過hō͘我聽，好無？"
伊用手巾擦目屎，無koh哮，頭殼kia̍h起來，開始伊ê回憶（回憶），伊ê嘴親像一台ê 放映機，一幕一幕ê往事放映tī我ê面前。時間倒退行到10年前。

1. 選擇對象。
Tī我ê印象中，真少有家庭親像我ê家庭hiah-nih美滿快樂，這是熱心敬拜上帝ê人， hō͘主祝福ê結果。
我ê家庭8 ê人：父母，兄哥，兄嫂，我kap一個小妹，兩個小弟。 爸爸tī本S. K. 村開百貨店， 生理真好。 阿兄tī S. M.中學做教員； in兩個父囝攏tī教會任職。 爸爸做長老， 阿兄做執事。全家熱心服事主，每暗做家庭禮拜，禮拜日攏關門，大細全守聖日， hō͘當時ê劉牧師稱讚阮是"挪亞ê家庭，" "模範ê基督化家庭。"我tī教會也做T. K. C. ê書記，主日學教員， koh是聖歌隊女高音ê人物。 Hit時我20歲， tuì 高中畢業已經是亭亭玉立（亭亭玉立）ê少女， 大概是我ê生做boē bái，所以人攏稱我是本地"C. K.村之花"（C. K.村之花）。 這個雅號，我也真滿意，我成做本村ê新聞人物。
為著án-ni，一日到暗媒人婆行出行入；甚麼村長ê公子lah， 農會推廣股長ê少爺lah......我ê老父若聽著m̄是會友， khah好ê條件to一概謝絕。伊ê條件是án-ni：第一，熱心ê基督徒；第二，身體健康；第三，有正當ê事業(是作穡， 抑是做工，學歷是國校抑是初中ê攏無要緊)。若是我有一個真要緊ê條件，伊攏無kā我考慮在內，我自信，親像我有好生做，好環境， koh有好ê程度（學歷）beh chhē一個市內ê對象一定無問題。近來ê人攏想盡辦法beh離開鄉村，跳到古井外ê都市，求安樂ê生活，何況一個女子，為著伊ê終身大事koh-khah tio̍h有這款ê遠見chiah會用得。 M̄-kú我ê老父伊無掠這個做要緊，若是我堅持這個意見，所以本教會有幾nā ê青年不止盡情teh愛我，對我， 對in chiah-ê我攏無khǹg tī我ê眼內，所以攏攻我boē 倒，其中有一個青年名叫郭豐盛（郭豐盛）非常意愛我； 央陳長老對我一日講到暗。 劉牧師也幾nā擺苦勸我tio̍h答應； koh-khah害ê，是我ê老父非常贊成這個婚事，常常用好嘴勸我講。
"月琴，我食到60 goā歲lah，我ê目睭看會出這個青年是一個有為有前途ê人，雖然環境現時不比咱， iáu-kú將來一定tī事業上會真成功......"
我斟酌想：有！ 這個青年是真熱心服事主， koh有報負m̄-kú伊只有kap我同等學歷，經濟比我khah bái， tī 這個村落（村落）做一個半文半武ê 村幹事（村幹事）有甚麼前途，伊kiám有辦法轉去市內？ Boē！伊永遠是一個草地紳士nā-tiāⁿ。我ê對象kiám kan-ta 這款資格？想來想去，我boē-thang屈低我ê理想。
就是án-ni，我kap老父ê意見boē合，致到無情ê光陰，一年，兩年， 5年過去。
2. 世情ê箭。
我已經25歲lah。 這個年齡bē出嫁ê女子， tī鄉村人看-來是真嚴重ê事，我ê父母非常ê著急，我也淡薄掛慮起來， m̄-kú我iáu m̄願降低我ê條件。
事情就發生tī 這年ê聖誕節；有一支愛情ê箭（箭）射入我ê心內， 這支箭m̄-nā 射thàng我ê心，也射透我ê全身軀，全生涯。
Hit ê-昏教會真鬧熱teh舉行聖誕慶祝會，阮團契演"天路歷程"（天路歷程）ê聖劇，我辦做天使， tiâu工去soè一領新娘衫。當我khiā tī 舞台頂看落去ê時，有兩蕊真大koh真光親像貓ê目睭tuì頭前排ê椅仔射來，直直相攏無khoeh。我beh落台腳ê時，我tiâu工oa̍t頭kā伊偷看，這時四蕊目睭成一直線，我ná親像hō͘雷電觸著， kui ê心頭pho̍k-pho̍k-chhéng。當我行入牧師館ê時，伊tuì 群眾ê中間強強nǹg出來chhē我， kā我講：
"李小姐， 今仔日你m̄-nā gâu演劇， koh特別suí。"奇怪！伊thái會bat我？我tìⁿ m̄-chhap伊，事實內心hō͘伊hit-ê phiau-phiat ê 儀表吸引lah，致到甚至kui頭殼oa̍t過去kap伊講話， tī暗暗ê外面，我看出伊是一個軍官，穿一su整齊ê綠色軍服，領仔掛一條金條（少尉），面色真白koh真ian-tâu，特別hit兩蕊會發射ê目睭是最吸引我ê所在。我為著beh保持少女ê風度，無kap伊講濟濟話，只有用微微仔笑來多謝伊ê o-ló。我發見伊m̄是一個草地人。
以後逐禮拜攏有看見伊入來禮拜，若是tuì hit兩蕊目睭知影伊無心teh做禮拜，攏是向聖歌隊ê所在teh金金相我，我知影伊是來teh敬拜我。奇怪！我也siāng款， 對禮拜心不在焉（心不在焉），常常oa̍t對伊hia去，我以前m̄-bat an-ni，我知影我已經墮落情網lah。
我開始kap伊約會，知影伊是台北人名叫莊文傑（莊文傑），舊年B. H.專校畢業， tī本地附近ê營房服役預備軍官， koh兩個月就beh退伍，伊ke我一歲，家庭tī台北ê 民生路開百貨店，聽講經濟真好，按算退伍轉去beh tī市內ê一所在做生理，因為伊是讀商科（商科）。可惜伊m̄是基督徒，也無意思beh做基督徒，伊講信仰會束縛人ê自由，人應該生活tī現實ê享樂中過日就好，伊ê話真有理。我感覺除去信仰無siāng以外，所有ê條件非常適合我所夢想ê對象：大專畢業； tiàm tī都市，伊生做英俊；家庭經濟好， chia ê好條件已經夠額hō͘我m̄免考慮信仰ê 問題lah，我也相信父母會為著chiah-ê條件願意放棄宗教ê事。我好膽對in講這層事，無拍算in堅定ê信仰boē-thang除去hit-ê第一條件"Tio̍h基督徒" ê固執。 Tī一暗ê家庭禮拜，我ê老父親像真氣，伊責備我講：
"月琴，咱是基督徒，莫得kap m̄信ê人插雜， tio̍h知無同信仰ê婚姻boē幸福。上帝無歡喜，你m̄-thang看這做小事， m̄是上帝旨意ê結婚，主boē祝福，你tio̍h好好想看覓。"
"假使我若會thang引chhoā伊來歸主kiám也m̄是上帝ê旨意？真濟 ta-po͘人本來無信主，若是kap基督徒ê女子結婚後， hō͘婦人人引chhoā來成做熱心ê人ê例boē少，親像王長老，就是tuì長老娘引chhoā ê。"我無細膩，真受氣對老父反駁。 (待續)
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461