首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 故事：黃金ê鳥
故事：黃金ê鳥
卷期：第988號 本次： 日期：1966/8 刊名：台灣教會公報 頁數：1
篇名：故事：黃金ê鳥 [ KÒ͘-SŪ: N̂g-kim ê chiáu ]
作者：拾穗生
  顯示 : 漢羅 全羅 並列  

故事：黃金ê鳥

古早一個皇帝，王宮ê後壁有真suí ê花園， 埕nih有一叢蘋果樹，所生ê 蘋果是黃金，到成熟(大粒)就過算。隔早起就減一粒，有人將這個代誌kā皇帝講：皇帝吩咐逐暝tio̍h派人tiàm樹腳顧。
皇帝有三個後生，皇帝叫大後生去顧，到半暝真愛睏，無睏tòng boē tiâu，隔早起kā算，又koh減一粒。 第二暗，叫第二ê去顧，無法度，時鐘kòng 12 ē，猶原是睏去，天光又koh 減一粒。 這擺輪到第三個，總是皇帝無信用伊，想講話比伊兩個兄哥khah失敗(害)，總是hō͘伊試看。 第三個就倒tiàm樹腳，目睭金金tìⁿ m̄ hō͘伊睏。 Tân 12點ê時，聽見空中有sà-sà-叫ê聲，月光光，有看著一隻鳥仔飛來歇tī hit叢樹。 Tú-á teh咬蘋果ê時陣，少年人箭就射去，鳥就飛走， m̄-kú箭射著鳥仔翅， 落一隻黃金ê鳥毛落來，少年人將hit隻鳥毛拾起來。隔早起the̍h去見皇帝，將昨暝所看見ê代誌kā講：皇帝就叫人來參詳，無論甚麼人to講這隻鳥毛有全國ê價值，若kah hiah-nih有價值， kan-ta一隻mā無路用，我ài hit隻鳥kui隻掠來，無論怎樣，我ài得著hit隻鳥。長男就出去，想講伊真gâu，會thang得著hit隻黃金ê鳥。行到樹林ê尾溜，看著一隻狐狸tī hia teh行， 清潔起來，就beh kā拍，狐狸大聲喉叫， m̄-thang kā我拍，你若無kā我拍，我beh報你一項好代誌，你是beh來chhe黃金鳥，今暝到有一個庄舍，庄舍ê內面兩間旅館相對，一間火點真光，內面真鬧熱，總是你m̄-thang歇hit間。 Koh 一間，看tio̍h真下等，你tio̍h入去tiàm hit間，王子想講hiah-ê無意無思， he ná有甚麼好代誌，銃就kā拍去，拍bô著，狐狸就走tuì樹林內入去，王子tuì hia直直行去。
日暗，到hit兩間旅館，一間唱歌跳舞，真鬧熱；一間靜chauh-chauh，王子就想， hit間hiah suí hiah鬧熱m̄ toà，來toà這間m̄成物--ê，我ná hiah戇。就入去hit間鬧熱ê所在， tiàm hia lim酒唱歌。鳥仔ê事，老父ê事，以及好ê教示攏boē記得，時間直直過去，長男攏無倒來。 第二ê就出去chhē黃金鳥，次男kap長男相像tú著hit隻狐狸，報伊好消息。次男無beh聽，到兩間旅館ê所在，一間內面hoā-hoā-叫，有真心適，也有真好笑， in兄哥khiā tī窗仔teh叫，次男行boē開腳，就入去； tiàm hia食， hia lim；一日過一日。經過一段ê時間， soah尾ê皇子就想beh出外，看會thang得著好遭遇boē，老父無贊成。老父講:你無路用， beh chhē黃金鳥，你比你ê兄哥khah頇慢，若tú著危險ê事， 抑是行迷路hit tia̍p beh怎樣？王子的確ài去，叫in老父tio̍h hō͘伊去看覓leh！老父就走伊去。到tī樹林ê入口hia， hit隻狐狸koh倚內，狐狸叫王子m̄-thang害伊， koh照hiah-ê好代誌kā伊講。 這個青年是心肝真suí ê人，狐狸兄，請你安心，我無beh kāng你。 狐狸講：若án-ni，你tio̍h khah緊去，你坐tiàm我ê馬nih。王子坐落去，狐狸隨時走， 路無管是好抑是bái，狐狸直直跳去到hit-ê 庄舍，少年人就落來，聽狐狸ê警告，目睭無看別位直直入去hit間bái-bái ê旅館歇。隔早起出去， koh tú著hit隻狐狸，我koh kā你講，無論到tó位tio̍h直直去，路尾會到一個城，城ê頭前有真濟兵倒tī hia睏，總是無要緊，你tuì hit中間直直行入去。城內有真濟間厝，choè你行過到siōng路尾間，黃金ê鳥仔tī 柴ê5鳥籠仔，tiàu tī hit內面， kap伊列排有一個金ê鳥籠仔，空空，你m̄-thang將hit隻黃金ê鳥仔tuì hit kha bái-bái ê鳥籠仔，掠盤過hit kha金sih-sih黃金ê鳥籠仔， tio̍h會記得，若無，你會tú著真悽慘ê事。講án-ni，伊ê馬koh 垂--落來，叫王子koh去坐， 路無論怎樣，伊直直走--去。到城邊仔真正照狐狸所講：到柴ê鳥籠toé黃金ê鳥ê厝內， kap伊吊做伙有一kha黃金ê鳥籠，koh有黃金ê 蘋果3粒tī厝內kō-kō-lìn。王子看著án-ni， chiah suí-ê鳥仔toé tiàm hiah bái ê鳥籠，真無sù配，鳥籠仔門就kā關，掠過來黃金ê鳥籠仔nih，鳥仔隨時哮真大聲， hō͘人ê耳空ki-ki叫， 兵仔攏醒起來，走入內面看，將王子掠去關監。隔早起拖去法庭審判，伊照實講：宣告死刑。王出一個條件，這個少年人若chhoā一隻走比風khah緊ê黃金馬來，你就免死， koh將黃金ê鳥做禮物送你。王子出去，喘一個大氣， taⁿ m̄知beh去tó位chhē一隻黃金馬。 Teh想無路ê時陣，忽然間hit隻熟識ê狐狸來tī路邊， kā伊講，你to m̄聽我ê嘴， chiah會tú著án-ni，總是taⁿ免煩惱，我會kā你設法，我beh kā你講， 按怎chiah會到黃金馬ê所在。 Tuì chia koh直直去到有一個城， 馬tī hit城內ê馬寮。馬寮ê頭前， 飼馬ê tī hia teh睏， 逐ê睏到teh鼾，你ûn-ûn是將馬kā牽出來，一項無注意boē用得ê，就是tio̍h掛hit-ê柴kap皮真粗魯ê馬鞍， tī邊仔有吊一個黃金ê， m̄-thang boē記得，若無會koh tú著真悽慘ê事。狐狸koh申伊ê馬出來，王子就去坐，無論甚麼款，走到風吹著狐狸ê門hiu-hiu-叫，真正照狐狸所講án-ni。王子就入去黃金馬ê馬寮內，想beh kā 掛hit-ê 粗魯ê馬鞍， 這隻馬tio̍h掛hit 副上等ê馬鞍chiah有合適，若無無彩。伊án-ni想，黃金ê馬鞍倚tio̍h hit隻馬ê時， 馬大聲哮到ki-ki叫，飼馬ê人攏醒，將這個青年掠去關tiàm監內。隔早起審判宣告死刑， m̄-kú若是會thang將黃金城皇帝ê suí(查某囝) 王女chhoā來，就免死， koh這隻黃金馬beh送伊，皇帝kap伊約束。
這個青年tàm-chì tàm-chì行出去，真佳哉， koh無偌久看著這隻忠義ê狐狸，伊講，你家己招來ê災厄我無法度，總是你是真thang可憐ê人， koh一擺幫贊你ê困難。黃金城tuì這條路去，日頭暗就會到， 更深四圍恬靜ê時陣，王ê suí 查某囝會去浴間洗浴，落去洗浴ê時，你kā伊chim一下， 王女就會聽你ê嘴，你就會thang chhoā伊出來。你beh chhoā伊出來ê時， m̄-thang hō͘伊去kap伊ê父母相辭，若án-ni，你會tú著悽慘。講到chia，伊ê馬就垂落來hō͘王子坐， peh起腳就走，走真緊，風hiu-hiu-哮，連鞭到黃金ê城。王子等到半暝，草木攏睏恬靜，真suí ê王女出來beh去浴間洗浴，王子就走倚去kā chim。 王女kā王子講：beh kap伊相kap去， beh去ê以前ài kap序大人相辭。王子m̄肯，流目屎直直姑成，王子攏m̄，哮，倒tiàm王子ê腳下，王子不忍心就應--伊。 王女入去in老父ê睏房， in老父tú好目睭thí開，城內ê人攏peh起來，將hit-ê青年掠去關監。 隔天光，皇帝對這個王子講:你無性命。
總是我窗仔ê頭前有山cha̍h-teh， boê tàng看過hit爿，你若會thang將hit-ê山soá走， chiah赦你免死。總是限你8日內， 8日內若會好，我ê 查某囝做賞品送你。伊就趕緊動工掘土，車土；拚7日久chiah挖一孔仔 nā-tiāⁿ，有挖kah ná無挖，真餒志soà絕望。到第7日ê暗時，狐狸恬恬仔sô--來， kā伊講，你真hō͘人boē可憐tit， taⁿ無要緊，你去睏， chiah-ê工課我替你做。到天光，王子目睭peh開，看tuì窗仔出去， hit-ê山連影to無看見。青年真歡喜，趕緊走去見皇帝，講工課攏做好lah！皇帝無論好抑m̄好，只有守約束，無將王女嫁hō͘伊boē用得。兩人相chhoā就出去，無joā久hit隻狐狸來lah，真好ê物擔入手lah。黃金城ê王女， tio̍h ài kah黃金ê馬chiah合適，狐狸án-ni講。青年問， Tio̍h按怎chiah會得著黃金ê馬？狐狸講：我教你， chhoā這個真suí ê王女去黃金城見皇帝，皇帝會真歡喜，你tio̍h kā伊討hit隻黃金馬，家內ê人就會牽到你ê面前，你tio̍h隨時peh去騎。 Beh離開ê時，一個一個kap in 牽手，最後到王女kap伊握手，順續牽起來馬頂坐， tio̍h趕緊走，因為這隻馬走比風 koh-khah緊，無人jip會tio̍h。
Taⁿ萬事攏好了了，王子得著一個真suí ê王妃， koh有黃金馬 thang騎。狐狸tè tiàm尾後teh行，講。我幫贊你來掠黃金鳥，你若到黃金城邊， hō͘ 王妃落來，我chhoā王妃來去匿，你騎這隻黃金馬入去城內開闊ê所在，城內ê人大家看tio̍h會真歡喜， 會the̍h黃金鳥出來，你若koāⁿ tio̍h鳥籠仔tio̍h趕緊來我chia chhoā王妃去，計畫攏好勢。王子beh倒去故鄉ê時，狐狸講：我幫贊你， beh用甚麼禮物來hō͘我？青年人問，你ài甚麼？狐狸講：咱若入來到樹林內，你用銃kā我拍死，我ê頭殼kap 4 隻腳攏kā我斬起來。青年講：Hit款禮物我做boē到。狐狸講：你若m̄，我無kap你離開boē用得， bē離開以前，有兩件事ài kā你講，你tio̍h真注意。
1. M̄-thang買犯人吊死ê肉。
2. M̄-thang坐tiàm水窟邊。
講了就走去。
青年講：真奇怪ê精牲，想kap人無相像ê事。
犯人吊死ê肉甚麼人beh買，坐tiàm水窟邊，連teh想mā無。王子kap真suí ê王妃相kap坐tiàm馬頂直直去。 Tú-tú經過in兩個兄哥tiàm ê鄉舍，庄裡ê人大家chông來chông去， hoā-hoā叫，就問，是發生甚麼代誌？講beh吊死兩個人，行倚去看，就是伊兩個兄哥。 兩ê兄哥做歹代誌，所有ê物攏開了了。王子問， Kiám無甚麼法度thang kā tháu放？你若出錢來贖伊ê身軀就會， chiah-nih歹ê人，你beh出錢kā贖mah？ 庄裡ê人án-ni講，王子攏無想甚麼，就出錢kā贖hit兩人。兩人得著赦免，兄弟仔相kap起身，大家行入éng擺tú著狐狸ê樹林，真秋凊，真爽快。日頭ná焰就ná熱，兩個兄哥請來水窟邊歇睏，食點心kiám m̄好？第三個小弟講：án-ni tō好，大家相kap tiàm hia講話。小弟攏無想，就坐tiàm水窟邊，總是兩個兄哥將小弟chhia 倒siàng-hiàⁿ tuì水窟倒落去，將王女， 馬kap鳥搶--去， 倒去老父hia。講：你看，阮m̄-nā將黃金ê鳥掠--來，黃金ê馬，連黃金城ê王女也soà kā掠--來。 兩ê人án-ni講，城內ê人真歡喜， m̄-kú 馬攏m̄食，鳥攏m̄唱歌， 王女坐teh哮。總是第三個小弟無死真好運， 窟仔水乾去， khê tiàm 青苔ê所在，無著傷， m̄-kú peh攏boē起來。當teh艱苦ê時陣， hit隻盡忠ê狐狸無放sak 這個小弟跳落去，罵講：我kā你講ê話， 按怎boē記得；總是我boē-thang白白看你死。狐狸會thang koh見著天（天），日（日），就kā王子講：你tuì我ê馬khiú tiâu-tiâu，就tuì王子拖起來。你iáu有危險，因為你ê兄哥iáu m̄知你是死抑是活，樹林ê四周圍有派兵teh顧，吩咐若看著你tio̍h kā你拍死。 狐狸koh講：Tī 這個路邊有一個散鄉人，青年人就kap 這個 散鄉人衫褲對換，入去王宮ê內面，無一人會認得伊是王子，總是鳥就啼， 馬也beh食，真suí ê王妃就無哮lah。皇帝真奇怪，就問，這是按怎， thái 會án-ni？ 王女講：m̄知怎樣，我ê悲哀chit tia̍p soà變歡喜， ná親像我實在ê丈夫來。兄哥bat對王女恐嚇，你若漏洩祕密就beh kā伊thâi死， Taⁿ王女將chiah-ê代誌攏kā皇帝講：皇帝命令城內ê人逐人攏tio̍h來見伊。青年穿破爛ê衫褲，親像散鄉人ê款出來， 王妃連鞭認著，對伊ê頷頸khîⁿ-teh，極歹無道ê兄哥掠去受刑， soah尾小弟kap真suí ê王女舉行結婚式，續接皇帝ê位。
總是可憐ê狐狸， taⁿ怎樣？
Tuì這tia̍p起，真久有一個時陣，王子去樹林內， tú著狐狸。狐狸講：你所ài ê物攏入手，無欠一項，我ê不幸攏boē無--去，若beh救我，只有你一人ê力。請你kā我拍死，頭殼kap 4 隻kha斬起來；流目屎懇切拜託。王子照伊講án-ni做， tú-á做了，狐狸變一個人出來， koh m̄是別人，是真suí 王妃ê兄哥。 這個時chiah救伊脫離魔術ê事。大家相kap得tio̍h幸福。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461