首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 活命ê火把(完)
活命ê火把(完)
卷期：第990號 本次： 日期：1966/9 刊名：台灣教會公報 頁數：12
篇名：活命ê火把(完) [ Oah-miā ê Hé-pé (oân) ]
作者：
  顯示 : 漢羅 全羅 並列  

活命ê火把

    我koh 引英國文豪Stevenson (金銀島ê作者) ê一生。伊一世人破病咯血（咯血）倒tī床裡，若是伊tuì信仰得著快樂；常常存感謝ê心，伊有一首ê祈禱án-ni講:
    上帝ah，這就是信仰mah？
    前進ê時跋倒，跋倒了koh peh起來。
    Tī崎嶇ê路中看見平坦:
    Tī hu-hoa ê路中發見hun-hiong。
    勇鳥逆風 teh 飛；好魚chhîⁿ水teh流。
    上帝ah，這就是信仰mah？
    "Ná-ná，這就是信仰ê氣力lah。人ê盡頭，就是上帝ê起頭；人ê路若行盡，上帝ê路就開始。你決志 beh敬拜上帝，信靠耶穌抑無？"
    "Beh，我願意將我本身降服tī上帝ê手中，做伊ê 囝兒， hō͘主耶穌改變我ê人生，成做積極樂觀 ê人生。"
    "án-ni好，你願意我替你祈禱無？"
    "我m̄知祈禱甚麼意思？"
    "以後你就會知，現在只要你kap我目睭khoeh-khoeh，頭殼àⁿ-àⁿ聽我ê聲就好。"
    "Ná-ná kap我開始祈禱。我the̍h "天路歷程，" "暗室之后"（天路歷程，暗室之后）kap聖經hō͘伊，特別請伊看約伯記kap福音傳。

-----5-----
    時間經過一年， 黃先生娘 tuì美國轉來，身體已經回復健康， Ná-ná雖然iáu坐tī 輪椅，若是伊ê心情已經轉變。 黃公館每日已經有鋼琴聲kap 獨唱ê聲tuì Ná-ná ê手kap嘴傳出來， Ná-ná已經是充滿快樂ê人lah。伊ê功課進步真緊，實在有音樂kap文學ê天才。
    有一擺我kā Ná-ná講：向望伊會寫一篇作品。伊果然寫lah， 3日後the̍h hō͘我，我發覺伊有寫作ê才能， koh tī文字中充滿著對上帝ê信心。我改好， kā伊寄hō͘報社，特別對編輯先生講Ná-ná ê情形。幾日後，伊ê文章刊出來。 Hit暗，我the̍h去hō͘ in全家ê人看， 黃先生歡喜到boē顧得， tuì Ná-ná直直chim。 Ná-ná in非常快樂， kā老父講：
    "我beh koh繼續寫，我beh用我ê雙手來彌補這雙腳ê缺陷。"
    果然伊ê文章直直刊出來，一篇一篇進步。我koh-khah歡喜ê，是伊已經tuì上帝得著hit-ê氣力。

    聖誕節beh到lah，我為著伊準備兩個節目，一個獨唱，一個鋼琴獨奏。伊不止拍拚練習，總是到慶祝會ê進前暗，伊忽然kā阮講m̄去參加。
    "為甚麼？" 黃先生tio̍h驚問伊。
    "我真見笑，人若看著我，一定會笑我，"伊àⁿ頭講：
    "我kā你保證，人不但boē笑你，反轉beh感激你ê成功，而且beh激起濟濟人對人生khah會曉奮鬥，做一個有意義ê人。"伊聽我chiah-ê話chiah歡喜答應。
    聖誕暝，全世界攏teh慶祝救主ê降生。平時真稀微 ê C 村也變做非常ê鬧熱， 天氣雖然真寒，人也挨挨陣陣入來禮拜堂， hō͘ kui間拜堂內不但boē 寒，而且攏燒烙起來。
    七點半，慶祝會開始，我khiā tī 講台頂， teh-beh宣佈ê時， 黃先生夫婦sak著 Ná-ná tuì大門koeh入來。我看Ná-ná 穿白衫， 宛然親像天使，非常ê 高雅美麗，全體觀眾看著這個地方要人 kap千金忽然ê光臨，攏真興奮， khiā 起來， 拍pho̍k仔讓 hō͘ in 過。 Ná-ná ê 輪椅真順利來到頭前。 節目開始，我將Ná-ná兩個節目排做夥。 第一ê 節目到第五ê 節目是教會幼稚園ê遊藝會。 第六節目輪到Ná-ná ê鋼琴獨奏， 曲名"少女ê祈禱"（少女的祈禱）。 黃先生夫婦慢慢將Ná-ná sak起來講台頂， hō͘伊坐tī鋼琴位， 整個會場非常安靜， ná親像內面無半人，只有時鐘滴答滴答ê聲nā-tiāⁿ。 Ná-ná坐tī鋼琴前，事先親像teh祈禱ê款，然後伊將手khǹg tī 鍵盤，一陣美妙ê音韻tuì hit兩支親像跳舞ê手傳出來，大家攏陶醉tī 少女tuì上帝祈禱ê境界（境界）。 奏soah，拍pho̍k仔 ê聲振動起來，甚至攏khiā起來，表示對Ná-ná ê感激。 Ná-ná向觀眾ti̍t-ti̍t tàm頭說多謝，看著觀眾iáu-kú 拍boē soah，伊兩隻手也kia̍h起來ti̍t-ti̍t搖動。 這個振動ê聲，約有五分鐘久，大家chiah koh安靜坐落去，無joā久伊有koh變做真安靜lah。 Ná-ná用伊hit隻手家己sak 輪椅來khah頭前面，面向觀眾， beh接soà伊第二ê 節目-獨唱。 Tī iáu未開始以前，我出來khiā tī伊身邊， 對群眾先說明Ná-ná beh 獨唱這塊曲ê 內容。 "這首曲是聖詩347首，作者是H. G. Spafford，伊出世tī New York州，是一個律師，當伊tī Chicago teh做教授ê時，因為芝加哥發生大火災，伊ê大部分財產攏hō͘火燒去，非常ê痛心，經過無joā久，伊ê婦人人kap幾個囝兒坐船teh 遊世界ê時，伊有tú著船沉落海底， 某囝攏死tī海裡。 Tú著這個大打擊，倒tī眠床流目屎。佳哉伊有堅決tuì上帝ê信仰， hō͘伊peh以來，來寫這首充滿著平安ê詩。 這個tú-tú親像Ná-ná所遭遇ê不幸，若是Ná-ná也親像這個，得著耶穌ê信心lah。請大家用同款ê心情來欣賞Ná-ná ê獨唱。"我講soah，來坐tī鋼琴kā Ná-ná 伴奏。 Na-ná坐tī 輪椅手合倚，用感激kap確信， tuì心底一句一句真明唱出來:
    有時咱經過美麗清靜河kîⁿ，
    樹木真青翠ê路邊，
    有時咱tú著大憂悶流目屎，
    Ná經過大風湧ê 苦海。
    免煩惱，心平安，
    倚靠主免煩惱，心平安。
    唱了， ná-ná兩蕊目睭kâm著熱情ê目屎五色ê燈一下照著伊ê面，人攏看是兩粒會發光ê珍珠lìn來lìn去，無一個人拍pho̍k仔，空氣真安靜， tī遠遠有聽著幾ê婦人人chhihN8-chhńg ê聲。我kap黃先生夫婦boē禁得也流出目屎，這是歡喜kap感動ê目屎。
    慶祝會 soah，黃先生特別入來我ê 宿舍kā我說多謝。當伊看著禮拜堂chiah-nih舊ê時， kā我講：
    "禮拜堂應該tio̍h重起， siuⁿ 舊koh siuⁿ狹，親像ē昏人chiah-nih 濟， kah無險險倒落去。"
    "阮真久就計畫beh起，若是經濟boē-thang容允， chiah勉強使用。"我應
    "Lín ê計畫是按算beh joā 濟錢ê？"伊koh問。
    "阮ê估計tio̍h ài 10萬箍chiah有法度。"
    "若án-ni， lín已經有joā 濟基金？"
    "基金是無lah，若是全信徒有捐募ê結果， 大概是4 萬箍nā-tiāⁿ，所以無法度thang動工。"
    "我想， lín thang 動落去， hiah-ê無夠ê由我負責。"
    "黃先生，你ê意思是beh獻6萬箍？"我聽一下， ná親像m̄相信我ê耳孔，將hit-ê 6萬箍講大聲，表示僥疑。
    "是， 6萬箍"伊堅決回答。
    感謝上帝，真正是一個有意義ê聖誕節。

    新年ê頭一禮拜， 10點ê禮拜beh開始。 黃先生夫婦sak著Ná-ná頭一擺入來禮拜堂做禮拜。我kap全體信徒充滿感謝kap歡喜，我將起禮拜堂ê好消息chhiàng hō͘眾會友知， kui ê會堂親像五旬節ê神臨到，大家大聲o-ló上帝。
    兩禮拜後禮拜堂正式動工，受難節起好， koh活節hit日阮搬入新聖殿做禮拜。 Hit日小會義長Keh牧師來舉行洗禮， 10 goā ê人入聖會做會員，其中三個，就是黃先生夫婦kap Ná-ná。最hō͘我感激ê，是Ná-ná守聖餐後對牧師kap我講：
    "我ê腳雖然boē行路， 今後我beh用這雙手kap嘴來獻hō͘上帝，做伊ê器具；利用寫作，演奏kap 演唱來見證上帝，服務人群。"
    我知我已經有盡到使命lah。 Hit年8月，我離開thang流戀ê C教會。
                                                                                                      （完）
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461