首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 看伊ê做人(故楊Tì-siong長老)
看伊ê做人(故楊Tì-siong長老)
卷期：第976號 本次： 日期：1966/2 刊名：台灣教會公報 頁數：8
篇名：看伊ê做人(故楊Tì-siong長老) [ Khoàⁿ I ê choè lâng (Kò͘ Iûⁿ Tì-siong Tiúⁿ-ló) ]
作者：呂春長 Lū Chhun-tiông
  顯示 : 漢羅 全羅 並列  

看伊ê做人(故楊Tì-siong長老)
呂春長
1966。02。15 P。8-9
1966。03。01 P。15-16、20

   現在我用沉重 ê心kap 數念ê前，來寫淡薄咱所敬疼，值得人數念kap效法ê 故 Iûⁿ Tì-siông長老ê 履歷，以及伊ê做人。
   Kò͘ Tì-siông長老， 享年66 歲。伊tī 民國前12年2月13日出世 tī台南縣 仁德鄉。 自 幼 hù-聖liông-liān，聰明，孝順母親，尊敬兄哥。
    國校5年ê時，就考上師範學校(當時稱做國語學校)。在學中敬大疼細，幫贊同學 koà 蠓罩kap 折被， 這個事hō͘伊ê老同學 Chu Bān-sêng先生(省議員) tī伊ê追思禮拜中iáu teh大大數念。因為伊ê 品學兼優，畢業後就受派tī台南市附屬小學服務，是一個循循善誘， 以身作則 ê好教員 (老-事)。
    總是故 Iûⁿ長老少年ê時，心懷大志，所以一年後伊就東渡日本，準備報考醫學院。 M̄-kú，因為義務職教ê期間未滿，soà phoe召回台灣， 改派tī 車路墘國校做教務主任兼代校長。
    到民國 14年1月17日，就kap中部社頭ê 望族，也是主內ê姊妹Ông Ná-pó女士結婚。 民國 15年就辭教育界 ê職，準備再度上京(東京留學深造。無拍算，忽然間tio̍h重病， 不省人事， boē講話，佳哉tī Kî-後靜養，有挽回性命，總是日本之行就soà 罷論。
以後就到彰化 經商，一面做生理，一面傳道理，熱心服務教會， 為主做工。 兩年後遷回台南，經營信神商店， 顧名思義，信而成知，有信chiah會成功， 乃故 Iûⁿ長老畢生一貫 ê信念。伊ê信是純真ê，伊ê成是成全上帝ê旨意。
Tī台南市 經商 ê年間， Sòng Siōng-chiat博士來台奮興，信徒大受感動，就紛紛 組織佈道隊， 鼓舞十字架三角旗，到處為主做見證，每禮拜至少一擺， 風雨無阻，出外為主傳福音。
    hit時太平景教會佈道隊 kui十， 隊員 kui百，是當時全省佈道隊最chòng-旺，最活動ê教會。 故 Iûⁿ長老任總隊長，凡事sut siān suî-hoān， 任勞任怨，深得教會ê器重kap大家ê敬重。伊有做教會ê長執 kap青年之間ê 橋梁， 使上下合作 無間，得tio̍h 濟濟人歸主。
    伊不但做太平景教會佈道隊 總隊長，伊也做主日學教員，執事，以後任長老濟濟年， tuì教會ê貢獻不少。
    Tú-tú照伊ê名Tì-siông， 和氣至上。伊不但家己和平，伊也會幫贊人和平。 筆者 hit時猶原是太平景教會ê佈道隊員，是iûn長老所統轄ê部下，受伊ê 人格感化真正大。會記得有一個拜4暗，是應該tio̍h出去野外佈道ê日。總是hit暗天寒地冷，趕狗 m̄出門。所以濟濟 青年主張臨時中止，總是也有人ko-tiau， "sui出洋風湧oh tu， tio̍h 進前是主吩咐。"議論結果，分做兩旁， hō͘人笑是戇中派ê就祈禱，出發去鹽埕佈道，無拍算hit暗成績 boē bái。感謝上帝，就洋洋得意tò-轉來教會， hiah-ê 自稱做識時務ê， in無參加佈道，soà kiu tiàm主日學教室thit-thô iûⁿ-牌。 Hit暗Si牧師kap長執感心阮ê勇敢，m̄驚寒，出門為主做工，就為tio̍h阮準備燒 koh芳，真好食ê 糜 (點心) beh 慰勞阮，阮真歡喜，感覺為主做工無落空。總是到beh食點心ê時， hiah-ê tī厝內teh ī 牌仔 ê 逃兵，也真大面神提碗箸 beh參加，阮chiah-ê屬血氣ê青年，就擋 boē tiâu， nga̍uh-nga̍uh念講："無做工koh敢食。"佳哉Iûⁿ長老苦勸阮m̄-thang siàu-去，伊講出去佈道ê tio̍h食， tī室內teh代禱ê也tio̍h食，事實上hiah-ê人ná有teh祈禱？總是故 Iûⁿ長老做人和平，凡事必求善解。伊不時拚命做工，但是m̄-bat 誇耀家己， 批評別人， 這款性質非常難得。
    故 Iûⁿ長老不但能說能行，伊ê特色，就是不說而實行。伊不論tī家庭， tī教會， tī社會，是一個無瑕可擊ê人；莫怪濟濟人稱伊做聖人。伊雖然無讀神學院，總是伊早年就獻身hō͘主，伊雖然經商，總是伊無想發財。伊超然 物欲，萬事知足，只有掠傳福音，搶救人ê靈魂做家己ê責任。伊費盡精神，肯盡全力， 為主拚命。伊m̄驚生理無趁， m̄驚損害健康， m̄驚日本警憲無理ê壓迫。 Bat一擺，因為佈道隊 ê 標語寫一句聖經講：: 人若得tio̍h全世界來喪失伊ê性命有甚麼利益？"日本警憲為tio̍h 這句起疑心，講是基督教teh譏刺大東亞戰爭。就召故 îⁿ長老去問， hit時伊得tio̍h聖神幫贊，勇敢無驚， khiā tī 作威作福 ê官府面前， 解釋聖經ê真理，佳哉後來無代誌。雖然傳福音不得時，但是伊無失志， chu-chu求上帝ê國kap上帝ê義。伊是一個不怕窮， 不怕苦， 只怕人生無耶穌； 不求名， 不求利，只求耶穌在一起 ê聖徒。伊tī太平景任職工作是到第二次世界大戰， 政府命令百姓疏散為止。
    大戰中故 Iûⁿ長老ê全家疏開去故鄉中洲。 Tī hit時伊ê老母別式，伊ê老母是一個敬虔ê女徒，真疼主， koh真疼囝孫。 故 Iûⁿ長老是一個侍母 至孝ê人，一生m̄-bat hō͘老母受氣煩惱；照Chu Bān-sêng議員ê干證，講in tī 國語學校teh讀冊ê時， bat一擺 Tì-siông長老kap 同學約某時beh去某所在thit-thô，若是到時，無看tio̍h伊來，大家真奇怪，因為伊將來m̄-bat無守約。到後來chiah知影，就是hit日伊ê老母頭殼疼，伊tī厝-nih照顧伊ê老母，可見伊怎樣孝順序大人。所以伊tuì老母ê 別式非常哀悼， koh 疏散前tī台南伊有一個真伶俐 koh可愛 ê 千金名eng-jî， 8 歲離開世間， jû-kim所敬愛ê老母伊有別式， chiah-ê事hō͘ 故 Iûⁿ長老ná 看破世間ê空虛，也ná看透添加ê可愛， tuì án-ni， hō͘伊ná更加疼主。所以tī 光復後，雖然得tio̍h 桑梓 ê 父老 敦請伊出來做中洲國校ê校長兩年；若是投機取巧勢利之徒，大大有升官發財ê機會。總是Tì-siông長老卻是人醉生 我獨醒，人馬虎 我獨認真， tī 學極其嚴謹，甚至積勞成疾，就辭去校長ê職， 轉去台南養病。
    身體恢復健康，就去鶯歌做風源煤炭 公司ê 會計 主任，因為伊是股東，時間不止自由。所以tī 鶯歌約10年久ê中間，伊不分日也為教會擔憂辛苦。 Tuì無求到有， tuì sè厝做講義所到成立教會起聖殿，伊ê出力，伊ê鼓舞， hit-ê功勞永遠boē-thang 磨滅。今仔日鶯歌教會ê信徒kap bat tī hia做工ê傳道人無m̄大大teh 數念。 (待續)

    了後故 Iûⁿ長老有結束北部 ê事業，接受聘請到埔里基督教診療所對患者傳道。另外一面，伊有獻工 tī 無牧 ê牛困山教會。伊親像巴拿巴是好人， hō͘聖神充滿， gâu安慰病人， koh用刻苦耐勞ê精神協助軟弱無牧 ê牛困山教會。 這間山間 ê教會離埔里街仔不止遠，總是伊m̄甘坐三輪車， 乃是以歩代 ku，用所節儉ê錢來奉獻教會，soà減輕教會ê負擔，你看伊疼主，疼教會到怎樣？不幸tī 埔里工作ê時，發見tio̍h身體有嚴重ê病症，就轉去台南靜養治療。但是伊為主決斷boē-thang恬恬坐teh， tī台南南門教會猶原是當主日學教員， koh教會無論大小聚會，伊攏奮勇參加， chhoā人祈禱， 主理查經， 幫贊牧者，造就感化濟濟信徒。 Tī南門教會，伊早早當選長老，總是為tio̍h身體ê緣故，驚了辜負所託， m̄敢就任。總是伊逐項事工照做無差。到舊年，無法度推辭chiah就任做長老， 濟濟少年人講：這m̄ chiah是真正ê長老。
    試想， 故 Iûⁿ長老怎樣， 不過身體衰弱， 拖病為主服務？就是因為伊感覺人生短促，機會不再 ê緣故；若無及時做工， 驚了無機會。
    故 Iûⁿ長老所tì ê病， 常人 只可活一年半載，總是伊竟然活8年goā，包括初期iáu未發見，可能10年以上，這是對伊ê lêng-heng hiân ti̍t，以及某囝 gâu照顧kap伊倚靠信心來活ê大神跡。
    Tī台南養病中， 故 Iûⁿ長老也bat到中部山間 ê風國轉地療養 tī chia有一間tuì霧峰 母會來新設ê教會。伊tī hia每主日主持講道， chhoā信徒研究聖經， hō͘ hia ê信徒得tio̍h 濟濟靈性上ê幫贊；到taⁿ iáu teh 數念無soah。 In聽tio̍h Iûⁿ長老別式 ê消息，真濟人提到流目屎。
    Lîm Chong-iàu牧師回顧伊早年做神學生， bat受派去鶯歌教會做工， tuì Tì-siông長老ê印象講："Iûⁿ長老款待我親像伊家己ê 囝兒。" Iûⁿ長老為tio̍h教會tio̍h磨，圖謀無khah su一個專任 ê傳教者， Iûⁿ長老ê疼心kap做人hō͘我得tio̍h真濟 ê學習，我一生數念Iûⁿ長老，聽tio̍h伊ê死， hō͘我ê心真苦悶。相信m̄-nā Lîm牧師一人án-ni想，有真c濟 bat Tì-siông長老ê傳道人也攏是án-ni感覺。
    Taⁿ 故 Iûⁿ長老ê做人kap工作ê 原動力是tuì tá落來？就是伊tī隱密中靈修， tuì主所支取ê，伊tī厝內經常手真罕得離聖經，伊逐日真早就起來靈修， 為人代禱，伊ê 妻兒 對 這項ê印象極深，就用一句話來結論伊。伊完全是一個信仰ê人。
    到民國 54年9月底， 故 Iûⁿ長老有去台北台大附屬醫院 thong-īⁿ治療， 這時也bat 轉來台中查某囝 ê所在。 這時iáu-kú念念不忘台南ê工作kap家己做長老ê責任，伊迫切希望會 thang趕回台南參加長執 ê就任典禮。
    總是不幸這時tī台中犯了惡性ê 感冒，就tī 11月6日(1965) 再度入台大醫院。雖然經過真濟ê名醫細心診治，以及妻子， 兒女， 兄哥，兄嫂周到ê 看護， 親朋同道同心迫切ê祈禱；若是上主ê旨意已經定tio̍h，結局無法度thang挽回伊肉體有限ê性命，到了12月2日清早就對長老娘講："我boē-thang 過今仔日lah，免koh為tio̍h我祈禱lah，這是上帝ê旨意， ài我khah早轉去。"就tī當日10點半安然辭世， soah了世間ê 著磨，凱旋來安歇tī 恩主ê 懷抱，對咱真m̄甘，對伊心所願。 故 Iûⁿ長老身後有留長老娘， koh有長男 tong-ga̍k 君，成功大學畢業，現時任職 tī信中製藥廠， kap Bûn-û女士結婚，已經有兩男一女， 囝孫真有孝。長女 Gio̍k-jî 高女畢業，匹配成大畢業ê Âng Pek-iông 君， 現任台中公路局保養場長，也是忠孝路教會一個真忠實可取ê執事，已經有兩男兩女，家庭美滿，有好見證。
    故 Iûⁿ長老ê內外孫個個聰明， 乖巧，攏是長老所心愛ê，相信chiah-ê 囝孫攏會thang跟tè 先人美好信心ê腳跡，來安慰序大人在天之靈。親像約翰sam-su 4節講："我聽見我ê 囝兒tī真理teh行，我ê歡喜無khah大tī 這個。"
    我知故 Iûⁿ長老對tī 囝孫ê期望: 第一，就是tio̍h敬畏上帝。第二，就是tio̍h孝順父母。第三，就是兄弟姊妹ài相疼。因為這三項是伊家己以身作則所行ê路。 IuN長老怎樣敬畏上帝，怎樣有孝老母，這已經講了，伊怎樣對待兄弟，伊ê 胞兄 Iûⁿ Hûn-liông先生tī 數念小弟ê時陣， 聲淚俱下， 使會chòng-者大受感激。伊講， "伊ê小弟Tì-siông尊敬伊親像序大人， 66年久做兄弟m̄-bat忤逆伊一擺，也m̄-bat 加話一擺，每事to kap伊參詳，伊tuì兄哥ê牽成kap栽培時時數念。" In兄弟實在thang做人ê 好模樣。
    故 Iûⁿ長老不但尊敬兄哥兄嫂，伊也真疼兄哥ê 囝兒(姪仔)， 濟濟直-lú流目屎數念好ê 阿叔。有ê (Khêng-chu女士) tuì美國寫批來安慰阿嬸。 批內怎樣數念阿叔，講阿叔是好ê 阿叔，有信仰kap疼心ê 阿叔，笑容溫柔ê 阿叔是好ê阿叔， gâu 教主日學，感化影響伊ê阿叔， iáu活tī伊心中ê 阿叔，相信現在tī上帝身邊ê阿叔。 Tuì chiah-ê動人 ê情辭 thang知影Iûⁿ長老ê做人。
    故 Iûⁿ長老不但敬畏上帝，孝順父母，尊敬兄哥， 愛惜敵人；伊對人人攏真好，伊言行一致， m̄-bat 口是心非，所以人人由心欽仰。 Tī告別 ê追思禮拜，南門教會坐滿了會chòng-者， chiah-ê人kap普通一般人情世事， 禮尚往來ê siong應付無siāng款，所以hit ê 會場ê空氣也無siāng款。 Hit日hiah-ê人攏是tuì 人格 ê 感召，真正為tio̍h 數念Tì-siông Tiúⁿ-ló 而來ê。因為是數念這個實在ê人，所以hit日人teh o-ló Iûⁿ長老也攏講實在ê話。有時咱o-ló人(包括死人)良心無平安，因為hit-ê人無影hiah好。 Koh有時咱teh o-ló人(包括死人)邊á ê人teh bih-嘴，心內teh冷笑，因為hit人並無hiah-nih好，甚至sek-tek kî-hoán。獨獨hit日人teh o-ló Iûⁿ長老，人人點頭表示同感， thang知伊ê做人。
    故人講："以銅為鏡， 可以正衣冠。 以古為鏡， 可以 知興替。 以人為鏡， 可以 明得失。咱若用故 Iûⁿ長老為鏡，就thang省察咱ê信仰kap做人。
    最後我tī主ê名對 Iûⁿ長老ê 遺族講幾項:
    1) Tio̍h感謝上帝， hō͘ 恁有chiah好ê序大人。箴言20: 7 "照正直來行ê義人，伊ê後裔有福氣。" tio̍h知恁是有福氣ê 囝孫。
    2) Tio̍h 追隨先人 ê腳步，來效法伊行代誌 kap做人ê 美點。
    3) Tio̍h親像先人敬畏上帝，熱心服務tī主ê教會。
    4)老父已經無tī世間，所以tio̍h加倍孝順老母，來承接上帝ê賜福。
    5)兄弟姊妹ài更加相疼來實現老父ê願望。
    故 Iûⁿ長老已經爭戰好ê爭戰，盡跑走ê路站，守所信ê道理； taⁿ安然過世去tuì主領受公義永活ê冕旒，咱tio̍h為tio̍h伊ê得勝來感謝主， 向望無久kap伊相見tī天家。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461