Tui-liām kò͘ Hā Lé-bûn ĪN-tiúⁿ hu-jîn
1966.04.01 P24

Chêng Má-kai kì-liām Pīⁿ-iⁿ ĪN-tiúⁿ Hā Lé-bûn hu-jîn(Mrs. C. H. Holle-men), tī 3 ge̍h chhe 5 hā-ngó͘ 5 tiám 10 hun bông Chú un tiàu, hióng-siū 74 hè. thiaⁿ tio̍h chit ê siau-sit ê lâng, tāi-ke chin m̄-kam.
Hā hu-jîn tī 1892 nî 9 ge̍h 10 ji̍t chhut-sì tī Bī-kok Overisel ê só͘-chāi. I tī 1918 nî 6 ge̍h kap Hā Lé-bûn I-seng kiat-hun, tē jī nî chiū choè soan-kàu-su lâi Tiong-kok choè i-liâu thoân-tō ê kang-chok, thâu bé 32 nî kú. Hā I-seng bat tī E-mn̂g, 龍巖，鼓浪嶼ê kiù-sè pīⁿ-iⁿ tam-jīm īⁿ-tiúⁿ ê chit-bū. Hā hu-jîn iā chin jia̍t-sim pang-chān pīⁿ-lâng kái-koat khùn-lân ê bûn-toê, iā pò-thoân Ki-tok ê hok-im hō͘ in, muí lé-pài-ji̍t I lóng pang-chān thoân-kàu-chiá chú-chhî lé-pài kap Y. W. C. A. ê kang. Tng Tāi-lio̍k lûn-hām liáu, in ū tńg-khì Bí-kok. Kàu 1957 nî, Hā ĪN-tiúⁿ hu-hū siū Pak-pō͘ Tâi-oân Ki-tok Tiúⁿ-ló Kàu-hoē ê phèng-chhiáⁿ, lâi kàu Tâi-oân choè pīⁿ-iⁿ ê kang. In chīn choè toā ê ló͘-le̍k, chiong Má-kai kì-liām pīⁿ-iⁿ ta̍k hong-bīn chéng-tùn kàu chin hó-sè, Hā ju-jîn chin gâu an-uì pīⁿ-lâng, gâu thoân hok-im, koh hū-chek hō͘-sū ha̍k-hāu ê Eng-gú kàu-ha̍k, iā chú-chhî cha-keng-pan, ti̍t-kàu 1960 nî chiah thoè-hiu.
In hoê-kok í-āu, iû-goân chin koan-sim pīⁿ-iⁿ ê chìn-tián, í-ki̍p i-seng, hō͘-sū, chit-oân lêng-sèng ê chìn-pō͘, in chin thiàⁿ-sioh saⁿ liân-lo̍k. Thiaⁿ tio̍h chit ê siau-sit, hō͘ goán piⁿ-iⁿ choân-thé ê oân-kang lóng chin kan-khó͘-sim.
Kò-pia̍t lé-pài tī 3 ge̍h 10 ji̍t hā-ngó͘ chi̍t tiám poàⁿ, í-keng tī Bí-kok 託盧(Todd) kè-liām lé-pài-tn̂g kú-hêng liáu, ū bo̍k-su, pêng-iú chin-choē chham-ka.
Má-kai kì-liām pīⁿ-iⁿ tī 3 ge̍h 30 ji̍t (Pài 3) hā-ngó͘ 3 tiám, tī jī lâu ê lé-pài-thiaⁿ kú-hêng tui-su lé-pài, lâi kì-liām chit uī it-seng hōng-sū Chú koh hia̍p-chō͘ i-liâu thoân-tō ê Hā ĪN-tiúⁿ hu-jîn. Goán pún-iⁿ ū koat-tēng beh chiong kok kài the̍h lâi ê tiàu-uì kim choè Hā Lé-bûn ju-jîn kì-liām pīⁿ-chhn̂g ki-kim, thang lâi choè pang-chām pîn-khó͘ hoān-chiá ê lō͘-iōng.