Siàu-liam kò͘-jîn KEH MÁ-SE BO̍K-SU
1966.08.01 P.13-14

Thiaⁿ tio̍h Keh Má-se Bo̍k-su kè-sin, hō͘ goá put-chí siong-sim. Keh Bo̍k-su sui-jiân m̄-bat goá, chóng-sī I ê só͘ kiân só͘ choè, bû-hêng tiong chhim-khek kám-èng goá, só͘-í tī chia put-tek-put kia̍h pit siá tām-po̍h kap tāi-ke saⁿ-kap hoâi-liām i.
Cha̍p nî chêng, gī Tâi-pak tha̍k Sèng-keng ha̍k-īⁿ ê sî, ū chi̍t ê lé-pài-àm kap 5,6 ê tông-o̍h; ū ê sī Sîn-ha̍k-seng, sio-chio khì Tiong-san kàu-hoē ( Keh Bo̍k-su ê kàu-hoē) choè lé-pài. Lé-pài soah, Keh Bo̍k-su khoàⁿ-tio̍h chiah-nih choē ha̍k-seng lâi, chin hoaⁿ-hí kap goán ak-chhiú. I khoàⁿ sî-kan iáu-bē chin àm, chiū chio goán beh khì hū-kūn ê só͘-chāi pò͘-tō, goán kā I kóng, m̄-kú goán lóng bô chún-pī, beh kóng sím-mi̍h? I kóng, bô iàu-kín; chiong lí só͘ ài ê Sèng-keng liām hō͘ lâng thiaⁿ koh kán-tan koé-she, chi̍t lâng m̄-bián chhiau-kè 3 hun-cheng chiū hó. I suî-sî ji̍p-khì chún-pī iōng-kū, goán muí chi̍t lâng the̍h chi̍t hāng, kî-tó chhut-hoat. Keh Bo̍k-su ka-kī giâ hit tâi siōng tāng ê khok-seng-ki. Kàu chi̍t ê goán m̄-bat ê só͘-chāi, sū-si̍t-siōng sî-kan í-keng 9 tiám lah, lâng tāi-khài lóng chún-pī beh khùn lah, chiū tī chi̍t tiâu sió hāng ê só͘-chāi, Keh Bo̍k-su siò goán chiong Speaker tàu-khí tiān-thiāu téng, I ji̍p-khì chi̍t ê sìn-tô͘ ê ka-têng, chiong tiān-soàⁿ chiap chhut-lâi, chiū khai-sí pò͘-tō. Goán khai-sí gîm-si, chóng-sī bô poàⁿ ê lâng chhut-lâi beh thiaⁿ, Keh Bo̍k-su chai-iáⁿ goán ê sim-ì, chiū chhiò-chhiò kóng, m̄-sī beh kiò in lâi thiaⁿ, chí-iàu lán chiong Chú ê oē sàng kàu muí chi̍t keng chhù, ji̍p in ê hī-khang chiū hó. Keh Bo̍k-su khai-sí tha̍k Sèng-keng pò͘-tō, jiân-āu lûn kàu goán chi̍t-ê chi̍t-ê kóng 2,3 hun-cheng; goán kám-kak ná chhin-chhiūⁿ teh tuì khong-khì kóng-oē, nā-sī Keh Bo̍k-su kám-kak chin hoaⁿ-hí. Tāi-iok bô poàⁿ tiám cheng chiū soah, tńg-lâi lé-pài-tn̂g kî-tó liáu-āu, ū chi̍t ê tông-o̍h mn̄g Keh Bo̍k-su kóng, "Bo̍k-su, lí án-ni choè kiám boē hō͘ lâng kā lí kiám-kú, kóng lí hông-hāi tī-an?" I ìn kóng, "Bat, goá siông-siông hō͘ lâng thoa khì Kéng-chhat-kio̍k; m̄-kú mā ū lâng lâi kā goá kóng, I thiaⁿ tio̍h goá teh pò͘-tō kám-kak chin hó ê, só͘-í lán uī-tio̍h Chú ê miâ put-koán hiah ê sū, chí-ū thoân hok-im."
Goán tńg-lâi tī lō͘-nih, chi̍t ê Sîn-ha̍k-seng chiah teh kóng, Keh Bo̍k-su in-uī siông-siông án-ni pò͘-tō, hō͘ kéng-chhat lia̍h khì sím-mn̄g, nā-sī i muí pái kàu gê-mn̂g lóng seng chio hiah ê kéng-chhat kî-tó, liáu-āu chiah kap in kóng-oē. Kéng-chhat khoàⁿ i ná chhin-chhiūⁿ sîn-keng--ê, tuì i bû-khó nāu-hô, chhiò-chhiò kā i kóng, "Lí ê miâ kiò-choè Má-se; chin-chiàⁿ má-se má-se to tio̍h." Koh ū ci̍t ê tông-o̍h kóng, Keh Bo̍k-su tī Bí-kok liû-ha̍k ê sî, nā khoàⁿ tio̍h Bí-kok lâng á-sī sū-peng teh chiú-chhuì hòng-tōng, chiū tng bīn chek-pī i kóng, "Lí kiám m̄-chai lí ê lāu-bú tī chhù-nih teh lâu ba̍k-sái uī lí pek-chhiat kî-tó?" Hiah ê Bí-kok lâng hui-siông khim-gióng i.
Liông-tiân kàu-hoē ū chi̍t ê goā-séng sìn-tô͘, sìⁿ Lū（呂）,hiān-chāi tī kàu-hoē teh choè tiúⁿ-ló; hui-siông jia̍t-sim, i kā goá kóng, i oē sìn Chú ê goân-in, sī tuì chi̍t ê lāu bo̍k-su ê thiàⁿ kám-hoà lâi--ê, chit ê lāu bo̍k-su m̄-chai sī sím-mi̍h lâng, i chin kú chiah chai-iáⁿ. Goân-lâi tī chiâⁿ cha̍p nî chêng, i tī Liông-tiân kok-hāu teh choè kàu-oân ê sî, hō͘ lâng hiâm-gî sī âng-sek hūn-chú, lia̍h-khì koaiⁿ tī Tâi-pak, i sui-jiân chhoā chi̍t ê jia̍t-sim ê sìn tô͘ uî chhe, nā-sī i kian-koat m̄ sìn. Tng i koaiⁿ tī kaⁿ-nih ê sî, só͘ ū ê chhin-lâng pêng-iú lóng lī-khui i, kiaⁿ kah beh sí; choa̍t-tuì m̄-káⁿ khì khoàⁿ i, bô phah-sǹg, ū chi̍t ji̍t, chit ê lāu bo̍k-su lâi lâm-pō͘ pò͘-tō, lâi kàu Liông-tiân thiaⁿ i ê ka-jîn kóng khí chit ê tāi-chì, lāu bo̍k-su tńg-khì Tâi-pak liáu-āu, suî-sî the̍h chi̍t pún Sèng-keng khì kaⁿ-ga̍k thàm i, an-uì i, thoè i kî-tó, koh chiong Sèng-keng sàng i thang tī lāi-bīn gián-kiù, tng só͘ ū ê lâng m̄-káⁿ chhin-kūn i, lī-khui i hn̄g-hn̄g ê sî, khoàⁿ tio̍h chit ê lāu bo̍k-su chit khoán ê thiàⁿ, m̄-kiaⁿ lâng hiâm-gî, tiâu-kang lâi thàm i, it-sî lâu-chhut kám-kek ê ba̍k-sái, tuì hit-tia̍p khí koat-sim sìn Chú. Tháu-pàng tńg-lâi liáu-āu, kó-jiân jia̍t-sim ho̍k-sāi Siōng-tè, iā tit-tio̍h Chú ê chiok-hok, ka-têng hoat-tián. I put-sî teh tiān-cha ài beh chai-iáⁿ chit ê bo̍k-su sī sím-mi̍h lâng. Goá kun-kù i ê ìn-siōng kap kàu-hoē le̍k-sú ê kì-lio̍k, siông-sè tiāu-cha ê kiat-kó, chit ê lāu bo̍k-su bô pa̍t lâng-chiū-sī Keh Má-se Bo̍k-su.
Kin-nî ê Chóng-hoē tī Tām-chuí khui-hoē, goá tiâu-kang chiong chit hāng tāi-chì pò-kò hō͘ Keh Bo̍k-su chai-iáⁿ, i í-keng bô sím-mi̍h ìn-siōng, chí-ū ēng hoaⁿ-hí ê sim kap goá saⁿ-kap hoaⁿ-hí kám-siā Siōng-tè, i kā goá kóng, koan ū chit khoán sū put-sî hoat-seng, ū lâng siá phoe lâi, ū lâng chhin-sin lâi kā i seh to-siā. Chiah ê lâng lóng sī kè-khì Keh bo̍k-su tī kaⁿ-ni̍h, tī chhia-nih, tī lú-koán...só͘ iā ê ké-chí, bû-hêng-tiong tióng-sêng kiat ê ké-chí. Goá thiaⁿ liáu hui-siông ê kám-kek, i tī tek-sî pû-tek-sî uī Chú só͘ choè ê kang lóng bô lo̍k-khong, chhin-chhiūⁿ Sèng-keng só͘ kóng:
Tuì chiah ê tit-tio̍h kan-chèng i sī gī, Siōng-tè khoàⁿ i ê lé-mi̍h lâi choè kan-chèng; i sí-liáu iáu teh kóng-oē(Lâi 11:4).
ēng hoâi-liām kap kám-kek ê sim, siá chiah ê lâi saⁿ-kap siàu-liām Keh Má-se Bo̍k-su ê bí-tek.