首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 基督教文明史觀
基督教文明史觀
卷期：第574卷 本次： 日期：1933/1 刊名：台灣教會公報 頁數：9
篇名：基督教文明史觀 [ Ki-tok-kàu Bûn-bêng Sú-koan ]
作者：
  顯示 : 漢羅 全羅 並列  

基督教文明史觀
A Historical Review of Christian Civilization
（林茂生）
（接572卷9面）
1933. 01, no.574, pp. 09-10

　　佇頂號已經有論起上帝、人ê罪惡，自己否定中保耶穌，遮个觀念。Taⁿ佇遮欲koh接續來闡明，所賰彼兩項基督教ê根本精神，就是基督徒ê道德美（道德美）kap人類愛這兩个觀念。
　　論基督徒ê道德美，彼个目的是在佇聖潔（聖潔）。對聖潔這兩字，就知基督徒ê道德觀念kap普通ê道德觀念，有大大無相同佇teh。普通ê道德律，無論是講有孝、有大細、莫貪心、莫欺騙、莫偷提種種，遮个誡命，á是律法，不過是指人著盡人ê本份若定。若是基督教ê道德觀是ke深一層，就是著盡天道，然後chiah會盡人道。
　　照基督ê教訓是兩個誡命，就是 (1)著疼主你ê上帝。 (2)著疼人親像家治。將這个道德觀來kap普通ê道德觀比較，就thang知基督教有ke深幾若層：－
　　(1) 基督教有ke一條著疼上帝，若是普通--ê無。
　　(2) 基督教所講：「著疼人親像家治」kap普通所講：「莫得按呢來相比，是非常ê積極tek。
　　(3) 基督教，甚至有將行好、疼人ê源頭，歸佇疼上帝。換一句話來講：就是有疼上帝chiah有疼人。若是普通ê律法，攏無講起這个行好ê原動力，不過小可有講起一个含含糊糊ê兩字，「良心」若定。總講一句，普通是講：「盡人道，就是道德。」若是基督教ê道德，聖潔ê道德，毋是按呢；是著疼上帝，然後chaih會疼人，也這兩項兩兼chiah是聖潔。
　　Koh一項，就是「人類愛」。頂站已經有講起基督教ê人道是「疼人」。總是基督教teh講疼人，kap普通ê道德所講彼个範圍也有大增差佇teh。基督教ê疼人是「博愛」，就是開闊伊所聽ê到佇「普天下」。孔子ê道理teh論疼--字這一字，是用一字「仁」（仁）--字來teh包含伊。毋過孔子所teh講號做「仁」--字，是有差別ê愛，所以講「愛有差等」（愛有差等），就是這个意思。卻韓文公有解說講：「博愛之謂」（博愛之謂仁），總是這是儒教徒中特別ê見解。照我拍算，韓文公也是包含teh講：無講博著博到叼位，開闊著開闊到叼位。若是按呢，「仁」--字ê愛kap基督教ê愛ê範圍是無相同。愛，既然有差等，疼家治kap疼別人就無相同；疼家內ê人kap疼鄉里，就無相同；疼鄉里kap疼國就無相同；疼家治ê國kap疼別國也無相同；連對敵也續著疼伊，這句話佇儒教中就毋捌聽見。若是基督教ê疼是 (1)開闊到佇普天下，甚至到佇對敵； (2)伊ê性質是著疼到親像家治。這是別款ê宗教所無--ê。欲來講siāng第一近倚--ê，或者是佛教。總是基督教ê疼，á是人類愛，是非常有根基佇teh。啥事著「疼人親像家治？」因為人平平對基督ê中保是上帝ê囝。理論整然；原原本本！所以講：「人類愛」是基督教ê根本精神，也是伊ê特質。
　　Taⁿ我已經將基督教ê根本精神大略拆明了。卻毋是講按呢有包含基督教攏總ê道理。不過是指遐个要點又koh有做將來所欲講彼个基督教文明ê原動力ê來大略闡明若定。Koh餾一遍，基督教ê根本精神是 (1)上帝；(2)罪惡；(3)自己否定；(4)中保；(5)道德美； (6)人類愛；遮个是基督教文明ê原動力。Ǹg望讀者各位會記得，thang做後來欲接ê文明史ê伏線。以後是欲直接講起基督教ê文明史。
　　記者請暫時佇遮soah筆，也續共大家恭賀救主誕kap新年。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461