首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 新約書序說
新約書序說
卷期：第574卷 本次： 日期：1933/1 刊名：台灣教會公報 頁數：12
篇名：新約書序說 [ Sin-iok-su Sū-soat ]
作者：梁秀德 Niû Siù-tek
  顯示 : 漢羅 全羅 並列  

新約書序說
梁秀德
1933. 01, no. 574, pp. 12-14

第二章：新約書ê起源
　　咱現時ê新約書，佇彼內面攏總是27卷ê文書，這是咱逐人所知。總是遮个文書毋是一个人來舉筆，也毋是聖神牽人ê手來寫--ê。咱信聖冊是上帝ê話；總是也著知有人ê意思來寫：因為若無人ê意思佇彼裡，對佇人是無價值。不過是上帝用伊ê神來感動，合佇彼時，合佇所有ê目的，合佇所欠缺--ê，對早時遐个聖徒來表出上帝ê疼痛，公義，拯救kap目的。既然是按呢，就咱來研究這个新約書，實在有大大ê必要佇teh。
　　論著作來講：這27卷ê內面，無一本是耶穌家治舉筆來寫；又koh伊也無吩咐伊ê學生著寫。若欲講耶穌本身有寫啥物，只有thang看佇約翰8:7，講：伊就àⁿ腰，用掌頭á寫字佇土腳。伊干但捌命令伊ê學生講：著耶穌有叫in著照伊所傳ê去舉筆來寫。
　　直到耶穌上天了後，伊ê學生只有彼一百外人佇彼个樓頂teh聚集，嘛無人提起著寫冊來傳述耶穌ê事。到五旬節了後，教會有振動，in也是干但一味傳福音若定。啥物因端in彼時無家己想ài beh寫耶穌ê生涯kap教訓，照看有幾若項ê原因佇teh。
(a) 因為當時ê信徒信基督ê koh來kap世間ê soah尾，是連鞭到；對按呢感覺這世代是連鞭過去；所以無心世代是連鞭過去；所以無心thang想ài著冊來傳述佇後世代。
(b) 因為當時in用舊約做耶穌ê出世kap生涯ê預言冊，所以見若ài知伊ê經典，總是彼時猶太教ê經典，總是彼時in是看做假若基督教ê文書。對按呢，無想著koh寫啥物基督教ê冊。
(c) 因為當時ê信徒，濟濟捌親身聽著耶穌ê教示，kap看著耶穌所做ê事，彼時若欲來想，iáu是新新；koh是親像講：阮捌親目看見，親手摸著，彼款ê活活ê干證。又koh猶太人照in ê習慣是掠用喙傳--ê，比用冊來發表--ê khah對重。所以無想ài欲寫甚物來留佇後世代。
　　佇這个原始基督教，起頭幾十年攏是用喙傳--ê，無有啥物文書。這个時代叫做「前文書時代」。總是道理ná傳ná開闊，代誌ná生就ná濟；又koh有拄著困著ê因端，就雖然無調工，也是對事情ê傾向，自然生出文書ê著作走出來。這个時代是koh一个時代，叫做「文書時代」。會成這个文書時代，有幾若項ê因端：－
1. 因為基督ê福音ná傳ná廣闊，就自然有濟濟新聽道理--ê kap求道者。對按呢著想ài寫拄好合用ê冊thang做in ê路用。
2. 因為遐个捌親身聽著耶穌ê教示ê人，taⁿ漸漸teh過世lah，就是遐个活活ê眾人ná久ná減少。對按呢遐个聽道理ê人，要求ài in用in所傳關係耶穌ê教示kap生涯，寫冊來予in thang讀。
3. 因為所建設ê教會，佇教會來有發生濟濟ê問題；對按呢著寫批指導in，á是替in解決，矯正濟濟項。
4. 因為教會拄著困著，致到有ê信仰搖動、冷心，所以遮个傳福音--ê，就寫批著冊來安慰in；對按呢就生出有文書佇世間。
5. 因為教會ê內面á是外面有發生異端ê思想；所以佇姑不將ê因端著舉筆來辯明á是警戒。
6. 因為教會ná開闊，人額ná濟，若無秩序，會混亂；對按呢就教示in關係教會ê組織kap政治ê事。á是傳教者對佇教會ê打擊，生出餒志，就著寫批安慰，指導，奮勵in。
　　對遮个濟濟原因，chiah有留濟濟冊下teh予咱thang留研究；這實在著感謝。Taⁿ對新約書中這27卷ê起源，照彼个大概ê年代順來看。第一事先寫--ê，就是保羅ê批。保羅這个人，伊是一个真面目ê傳道者。伊毋是恬恬坐佇伊ê冊聽來想，來研究chiah來寫。伊是親像伊家治講：若無傳福音，我就有災禍（Ⅰ林9 : 16）。是這款ê精神來東奔西走ê人。佇這款ê生活中，旅行中來寫--ê。又koh所寫ê，有ê是自筆，有ê是用喙講：叫別人代筆--ê。又koh伊所寫ê，毋是干但ài發表伊ê信仰，á是思想，實在是佇伊所傳ê教會有發生問題，就用彼个欠缺kap要求來教示、警戒、勉勵，是佇無閒中倉倉磅磅來舉筆--ê。佇伊所ê 13張批，頭一張就是加拉太人書（佇近來研究ê發表是按呢講）。
　　論加拉太是保羅第一chōa傳道所巡迴ê比西底ê安提阿、以哥念、路士德、 德畢遮个城。保羅經過遮个城來傳道旅行了後，轉去敘利亞ê安提阿。過幾月日後，佇所設ê教會中，有發生反保羅ê運動，關係佇割禮ê問題kap猶太人ê律法tek信仰問題，來搖動遐个信徒。為著這个因端，保羅就寫加拉太ê批來責備，辯明。了後，保羅就去赴耶路撒冷ê會議。後來第2 chōa傳道，有寫帖撒羅尼迦前後書。為著帖撒羅尼迦教會有誤信基督再臨ê事。第3 chōa傳道ê時，佇以弗所3年久，佇彼中間有寫哥林多前書。袂寫前書ê以前，穩當猶原有寫一張；彼張現時無tàng找，只有thang知是關係「淫亂ê人」ê事，叫in著細膩（Ⅰ林5 : 9）。後來有寫後書（10章到13章事先寫--ê）。這chōa傳道行到哥林多ê時有寫羅馬ê批。雖然羅馬伊猶未捌去，總是也是做伊打算欲去ê準備工程ê批。佇這个哥林多ê時，kiám-chhái也有寫一張，女執事菲比ê紹介批，就是現時接做羅馬批ê第16章彼張。
　　Koh過去，就是獄中ê批信（菲利文、高羅西、以弗所、菲立比）kap牧會ê批信仰，kap教示in做基督徒所著行做ê事。也有關係教會ê治理kap佇會內ê 施設種種ê問題，猶原是合佇欠缺kap要求來成ê批信（論牧會ê批信，近來有人講是保羅全集ê一部，是保羅了後ê人寫--ê）。按呢總講：保羅是對實際tek ê要求來寫，無關係彼个文是怎樣，也攏無修辭，不過直直照所欠用來排列，實在thang看出保羅chhiah-lō͘ ê人格kap率直ê根本tek確信，咱真正著抱恭敬ê心來識--伊。
　　親像保羅所寫ê批，攏無修辭，是干但照所欠缺來直直講；也無啥物參考書下佇邊á來著作，這个時代叫做「前文學時代。」對保羅了後ê，叫做「文學時代。」佇遮叫做「文學」這兩日，毋是屬佇世界tek文學，也毋是為著欲完成舊約ê正經文學；是應初代基督教ê社會組織來寫ê通俗文學（Deissmaⁿ : The New testament in the Light of Modern Research P.P. 41, 42）。佇這个文學時代有彼得前書，這个彼得佇伊年老ê時，有去羅馬。彼時拄著尼羅皇帝困著教會，彼个困著毋若佇羅馬，有及到佇地方ê信徒；所以彼得就寫批寄予小亞西亞遮个教會。Biáu-例in講：基督徒拄著苦難，毋thang掠做見笑，著反轉為著這个名來榮光上帝。倚佇彼時，koh有馬可福音傳（彼得傳述，予馬可來寫--ê）。Koh落去，有希伯來、路加、馬太、行傳、啟示錄、約翰福音傳、希伯來ê批，是新約中ê大論文，真有修辭。路加福音傳，照看伊teh寫ê時，穩當有別物ê參考書，這號材料叫做Proto-Luke。馬太有另外得著耶穌ê語集（Quelle），叫做Q。路加寫傳記了後，有寫行傳，thang講是原始ê基督教師。到佇多米甸皇帝困著教會ê時，有約翰ê啟示錄，表明基督kap撒旦ê鬥爭，到路尾基督有得勝，將這款ê意思來安慰受困著ê基督徒。
　　總是佇教會內有異端ê攪吵（就是Gnostics），非認基督ê受肉身，所以有koh寫約翰福音傳來拍破異端ê風說（這本福音傳，有人講是以弗所ê長老約翰寫--ê，毋是使徒約翰）。以外koh有Ⅰ.Ⅱ.Ⅲ.約翰，雅各，猶大kap Ⅱ彼得。雅各ê批，是主張實行tek ê基督教；猶大ê批是表明實際生活，著有規則，有秩序事ê必要。後書彼得猶原是kap猶大ê批大概siāng款ê意思，以及提倡基督再臨ê信仰。
　　這張批大概是後代ê人，用彼得ê名來寫--ê。牧會ê批信，大概也倚佇這个時寫--ê，因為異端ê攪擾，教會無秩予，就有人用保羅ê名來寫--ê。
　　總講一句，是對實際tek ê要求來成--ê；所以毋是超自然tek對天ka-la̍uh落來ê冊。
　　實在是對佇地上，人子ê煩惱kap要求，以及人類ê欠缺kap渴望；通過這個，佇時代來生出ê冊。
　　對這個，來予人得著對天來ê光，豐富ê充滿。
　　是天kap地ê結婚，活命kap恩典ê結晶來成ê新約書lah！
（後號koh續接）。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461