首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 基督教文明史觀
基督教文明史觀
卷期：第575卷 本次： 日期：1933/2 刊名：台灣教會公報 頁數：10
篇名：基督教文明史觀 [ Kì-tok-kàu Bûn-bêng Sú-koan ]
作者：
  顯示 : 漢羅 全羅 並列  

基督教文明史觀
A Historical Review of Christian Civilization
（林茂生）
（接572卷9面）
1933. 02, no. 575, pp. 10-11

　　論文明ê發生kap彼个文明ê創造者ê宇宙觀，以及人生觀不止有關係佇teh；這佇頂站已經有論--過lah。Taⁿ基督教ê文明，第一事先是發生佇歐洲。所以咱著事先看歐洲人ê人生觀kap宇宙觀。Tng佇初代kap中世時代ê歐洲人ê人生觀，以及宇宙觀有受兩个潮流所支配：就是希伯來主義kap希利尼主義這兩个潮流。總是這兩个主義ê人生觀，以及宇宙觀，雖然有幾若項ê共通點，猶久有真顯然對相反ê點佇teh。
　　總講一句，希利年主義ê人生觀，以及宇宙觀，是看重這世間。希利年人ê人生，in ê出力kap理想，是ài這个世間變做真實ê世間，好ê世間，極媠ê世間，來予徛起佇這个世間ê人平平得著幸福。人若看希利年主義所發生ê文化：親像美術、哲學、宗教、文學遮个，就知in ê理想是下佇這世間，看重這世間。換一句話來講：希利年主義是「現世主義」（現世主義）。
　　若是希伯來主義，就是拄拄對反。希伯來主義ê文明，á是基督教ê文明所主張ê人生觀，以及宇宙觀，總講一句，是「來世主義」（來世主義）。請咱看我前所論彼幾項基督教ê精神，從中論罪惡ê觀念，自己否定ê 觀念、中保ê觀念，救-lêng贖罪ê觀念，遮个無毋是teh證明基督教ê人生觀所看重ê是佇「來世」，毋是屬佇這世間。基督教主義teh看這世間是充滿攏總ê罪惡，袂堪得予人徛起來得著福氣。永遠ê福氣是佇別個世間。這个世間人所著出力ê，是干但準備做得著彼个別個世間ê手段若定。保羅ê神學，我佇遮毋免詳細闡明，大家已經攏知影，就是分別「靈」kap「肉」ê二元論。「靈」á是靈魂kap「肉」就是肉體不時相反對，相交戰，來生出人，á是人生種種ê悲劇。屬佇「肉」ê，是罪惡、是失敗、是死。屬佇「靈」ê，是聖潔、是勝利、是永遠活。「肉」是屬佇這世間；「靈」是屬佇彼世間。所以人生ê理想是著對重彼个予人到尾會勝利、會聖潔、會永遠活ê彼个靈ê世間，毋thang chu-chu teh為著這个會敗壞、罪惡滿滿、予人到死ê這个世間來著磨出力。親像這款ê人生觀，自然對這个所建設ê文明，袂免得kap彼个看重這世間ê人生觀所建設ê文明大沉增差。莫怪現時排列佇面頭前遐个古代所發生這兩款對相反ê文明，就是希利年文明kap希伯來文明ê kóe-chí，也大大無相同。
　　對希利尼文明所發生ê音樂，是非宗教tek；對基督教文明所發生ê音樂，是聖歌，是宗教tek。對希利年文明所發生ê美術，是teh禮讚肉體、禮讚氣力；對希伯來文明所發生ê美術，是禮讚靈魂、表現精神ê象徵。對希利尼文明所發生ê文學，是用人生ê現象做主題；對希伯來文明所製造ê文學，是用聖經、宗教tek ê題目來做材料。對希利尼文明所創造ê思想是哲學，是對希伯來文明所創造ê思想是神學，是對重靈魂ê懺悔。對希利尼文明ê建築，人thang看屬佇這世間ê侖奐好看；若是希伯來所發生ê建築，是獻予上帝ê聖堂。這不過是大略講起這兩個文明ê相對照若定。
　　其餘政治法律種種，凡若thang稱呼做文明ê產物ê，無毋thang teh顯出這兩个文明對相反ê所在。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461