Pò͘-tō-só͘ ê hó Siau-si̍t
(Ia̍p Kim-bo̍k)
1933. 02, no. 575, pp. 27
Siang-khoe-kháu lī Toā-khu-hn̂g ū 3 lí goā, chit só͘ chāi sī Lâm-khàm So͘ Jîn-chheng Tiúⁿ-ló-niû ê goā-ke ê só͘-chāi, So͘ Tiúⁿ-ló uī-tio̍h chit ê só͘-chāi chin khoà-lū, in-uī in lī-khui Lâm-khàm kap Thô-hn̂g lóng sī chin hn̄g, ū kuí-nā phò͘-lō͘, tī nn̄g nî chêng, So͘ Tiúⁿ-ló ū kap Thô-hn̂g-tuī ê pò͘-tō-tuī chham-siông, tio̍h khì hia pò͘-tō khoàⁿ-bāi, ǹg-bāng oē tit-tio̍h hó ê kiat-kó.
Tī 1931 nî, Thô-hn̂g-tuī kó-jiân ū khì hia khui Pò͘-tō-hoē nn̄g pái, ta̍k pái kuí-nā ji̍t, ū tit-tio̍h So͘ Tiúⁿ-ló kap in saⁿ-kap chhut-la̍t tī-hia pò͘-tō, ta̍k pái chin choē lâng lâi thiaⁿ, in ū chàn-sêng chit ê tō-lí chin hó, soà kóng nā tī-hia siat-kàu, in tek-khak beh sìn tō-lí, āu-lâi Thoân-tō-kio̍k ū phài Thô-hn̂g Chhoà Tiông-gī Thoân-tō, kap Lâm-khàm Phoaⁿ Mô͘-lí Thoân-tō lûn-liû lé-pài khì hia pò͘-tō.
Kàu 1932 nî, lú Soan-tō-hoē ū phài Soan-tō-hū, Chhî Thoân-tō-niû khì hia pò͘-tō, soà kà-sī in bat tō-lí, tuì án-ni chin-choē lâng ū sìn, soà koat ì ài beh niá Soé-lé, chiū tī 12 ge̍h 19 ji̍t ē-po͘, goá ū tī-hia chū chi̍p Tok-hoē, mn̄g tō-lí, ū 13 ê toā-lâng, ta̍k ê tō-lí chin-se̍k,chin koat-sim, kàu hit àm ū tú-tio̍h lo̍h-hō͘ chin toā, kî-tiong chi̍t ê boē-tit lâi hù, chiū kā 12 ê toā lâng, 3 ê gín-ná kiâⁿ Soé-lé, hit àm ū 18 lâng siú Sèng-chhan, ū 50 chó-iū lâng lé-pài, thiⁿ-kng goá ū kap Chhoà Thoân-tō, Phoaⁿ Thoân-tō, So͘ Tiúⁿ-ló khì thàm ta̍k ke ê hoē iú, sui-jiân hō͘ chin toā, lō͘ phàiⁿ kiâⁿ iáu-kú tāi-ke chin hoaⁿ-hí, ū kā nn̄g ke ê lâng siu ngó͘-siōng, in tāi-ke iau-kiû nā ū koh phài soan-tō hū koh chiap-soà tī-hia choè kang, kàu kin-nî ún-tàng ū koh 20 lâng í-siōng thang niá Soé-lé, in-uī iáu ū chin-choē kiû-tō-chiá. In ka-kī ū pī-pān chi̍t keng chhù beh choè Káng-gī-só͘, chit-tia̍p teh choè chū-chi̍p ê só͘-chāi, chi̍t pêng chū-hoē ê só͘-chāi, chi̍t pêng hō͘ soan-tō-hū thang toà, in ū koat-tēng thok Tok-hoē tuì Thoân-tō-kio̍k ji̍p-pín chhéng siat Káng-gī-só͘, si̍t-chāi thang kám-siā Siōng-tè, kéng-tiàu chit khoán ke̍k phian-phiah ê só͘-chāi, oē tit-tio̍h chin-lí ê kng lâi chiò, hō͘ choē-choē lâng hoán-hoé choē lâi sìn Hok-im.
Goān Siōng-chú chiok-hok chit ê kàu-hoē tit-tio̍h sêng-kong, koh tit-tio̍h jia̍t-sim ê soan-tō-hū kap chit nn̄g uī ê thoân-tō-su chiap-soà choè kang, sī sim só͘ goān.
