首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 新約書序說
新約書序說
卷期：第575卷 本次： 日期：1933/2 刊名：台灣教會公報 頁數：12
篇名：新約書序說 [ Sin-iok-su Sū-soat ]
作者：梁秀德 Niû Siù-tek
  顯示 : 漢羅 全羅 並列  

新約書序說
(梁秀德)
1933. 02, no. 575, pp. 12-14

　　第3章：新約書ê編成。
　　佇第2章，我已經有講起新約書ê起源，是對實際tek來生出ê文書；又koh舉筆來寫ê人，也是真濟人。照這个27卷ê文書來看，總算遐个著者嘛無幾個若定。總是事實上，當時ê文書毋若遐个，也寫ê人毋若彼幾人，以外猶有濟濟。若是按呢，啥事kā伊刪除--去，無算做新約書？彼个因端、彼个經過ê歷史，kap 彼个成做今á日ê新約書ê傾向，kap重視ê理由，這就是佇這章咱所ài來講--ê。
　　現行ê新約書，對經典這面來講：是叫做Canon（正典）。這个意思是準繩。這句ê原意是起頭用做木工ê繩線，á是標準彼款ê用語。總是後來有用對國語、美術、宗教這面來。新約書予人叫做Canon，是teh表明這27卷ê文書，是做信仰ê標準、行為ê準繩。總是佇當時所寫ê，有ê無合佇做信仰ê標準ê，攏kā伊另外拾做堆，彼个叫做外典（apocrypha）。論外典ê代誌，ǹg望佇後來chiah來講：這時直直ài來講起正典編成ê事。
　　新約書彼27卷，原來是文書若定，有文學tek ê性質佇teh，是kap平常ê冊無各樣。總是會成做神聖不可侵犯ê正典，是佇主後幾若百年ê代誌，毋是寫ê時就做正典。對這項予我研究新約書ê中間，ná知上主有用歷史來表現伊ê旨意，也ná信聖冊ê價值大到怎樣；願大家讀聖冊無厭倦，這是我寫這个新約書序說所抱ê希望。
　　論怎樣會想欲編成新約書ê代誌，佇這个有濟濟ê動機kap原因佇teh；我這時毋免講siuⁿ濟，干但講起幾項khah要緊ê就夠額。
　　1. 佇初代ê信徒，攏無掠啥物文書做有權位；連佇對以前就做經典，所掠做神聖ê舊約書，in to kā伊批評。In所掠做有權位ê，就是「主」，就是耶穌基督ê人格kap伊ê教訓；佇逐項ê事件，攏是用主ê話來解決。因為若講著是主ê話，攏無人辯駁，á是躊躇。所以保羅拄著教會ê難題ê時，隨時用主ê話來講。佇Ⅰ帖4:15講：「因為阮奉主ê命令，用這个kā恁講」；I林7:10講：「我命令已經嫁娶ê，其實毋是我，是主命令。」佇遮雖然講in對重主ê話，毋是有另外啥物文書記主ê話來予in thang尊重，反轉是攏用喙傳ê若定。親像行傳20:35講。「予人ê，比對人提ê，khah有福氣。」這句佇逐位ê文書攏無；所以thang知是喙傳--ê。
　　時代teh經過，干但喙傳--ê，teh欲袂用得；因為到逐所在猶太教ê人攏欲做in ê對敵。又koh逐擺若kap in辯駁ê時，猶太到ê人，攏欲用舊約書來講起。這時in雖然掠主ê話做要緊，毋過是無文書ê根據。基督教雖然是kap猶太到有密切ê關係；總是一个另外ê宗教。舊約書雖然是in提來teh用；總是窮真是猶太到ê正經典。對按呢，in就想猶太到既然有一本絕對權威ê標準ê舊約書，就基督到的確毋thang無。所以就生出ài對所有ê基督教ê文書中來編成一本正典。這是勢面所定著ê原因。
　　2. 初代ê信徒，若欲chhiau找啥物教示，攏著對舊約來提；連佇信仰上ê事，有時也是對舊約書來學習；毋過siāng佇這時，in有掠主ê話做真有價值。親像佇第一項所講：關係教會ê難題，常常是用主ê命令做根本。對按呢，就自然ài chhōe彼號文書來做in ê路用。佇遮ài注意一項，就是in尊重主，彼个念頭毋若是指耶穌基督若定，有連伊ê學生也是平平尊重。In對重主ê命令，也是平平對重使徒ê話。是ná親像馬太10:40講：「接納恁ê，就是接納我。」羅馬ê Kek-liû-bián (Clement)講：彼得kap保羅是對天降落。初代ê教務I-ngá-tiû (Ignatius)講：主kap使徒ê命令恁著趁。這攏是證明in掠使徒kap主平平要緊。對按呢就毋若ài找主ê話來做in ê標準若定，就使徒ê話，in也掠做是金科玉條ê教示，猶原ài集彼號文書來做in ê經典。第一項是對外界ê刺激來生出ê原因；這項是對內心ê念頭來喚起ê理由。總是毋是集作伙，就是經典，he猶有濟濟時間ê經過。
　　3. 當時猶太kâng佇安歇日ê集會，khah常是讀律例ê冊，á是先知ê冊。咱若看路加4:17，咱就知耶穌佇伊ê本鄉拿撒力，tng安歇日入會堂教示ê時，是讀先知以賽亞ê冊。因為in掠律例kap先知ê冊是真要緊。到保羅寫批予伊所設ê教會ê時，彼間接著批ê教會，就毋若beh讀律例kap先知ê冊，也真要緊讀保羅所寫ê批；或是指示in所著做ê，或是解決in所oh--得ê問題，這in攏看做要緊。所以in teh禮拜ê時，有讀舊約ê律例kap先知ê冊，就siāng時也是將這款ê文書佇禮拜ê時來讀，也續做勉勵ê路用。卻彼時佇一个教會，無遐个攏總ê文書，猶久有chih著叼落一張，彼个教會就將彼張來讀佇會眾ê中間。佇保羅ê批，也捌命令叫教會著讀佇會眾ê面前（Ⅰ帖5 : 26尾；哥羅西4 : 16）。照Iû-tīn（Justin Martyr）ê話，講：先知ê冊有kap使徒ê記錄（就是指福音書）平平用佇會眾ê中間。按呢thang知佇第2世紀半，這个新約書已經予濟濟人看做真重lah！這个是編成ê第3原因。
　　4. 基督教拄chiah發芽ê時，毋若有猶太教ê人做in ê對敵 ；猶有真濟ê異端教，或是用話、或是用冊來kap in辯駁。若讀基督到ê初代史就會發見--著。雖然遐个濟濟ê文書，猶久袂成正典，毋過彼時ê異端者若欲攻擊，常常引起彼中間ê話句來辯駁。對按呢，欲應答ê信徒，自然也著引佇遐个文書中ê話來辯明。雖然予異端者事先掠做要緊有根據ê冊來辯駁，猶久這个事是拄拄teh促進正典編成ê一大原因；這是第4項。
　　5. Koh一項，就是第2世紀ê頭á，這27卷ê中間，濟濟已經有予學者翻譯做拉丁話kap敘利亞ê言語。彼个欲翻譯ê人，自然著聚集伊家治掠做要緊ê文書來翻譯。既然翻譯了，就予拉丁kap敘利亞ê人，一面識基督教ê道理，koh一面知有這款ê文書佇teh。這个翻譯，拄是teh刺激聖冊編成ê事業；予信徒知若無趕緊著手來選拔鑑定袂用--得lah！
　　6. 起頭ê教會，卻無拄好有設啥物學校；猶久若有教會佇遐，就常常有佇彼所在續施設宗教教育。每擺設宗教教育ê時，就有對遮个基督教ê文書中，揀幾本來做教科書。對這个因端，就ná久欲ná看所揀ê文書做要緊ê冊。按呢也是拄拄teh促進編成ê工程。
　　7. 教會ná設ná濟，信徒ná久就ná加添；總是教會所發生ê議論，也ná久ná複雜。對按呢，著用定著ê規矩來判斷、解決；若無就會紛亂。所以一般佇教會內若有夠理ê爭論，á是施設教會ê戒規，á是道德方面ê議論ê時，常常ài引起遮个文書ê話，á是掠叼一本做標準來解決。對這个原因，就自然著編成新約書。這是第7項ê原因。
（這章猶未完，後號欲koh接）。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461