Tē-jī hoê ji̍p Kaⁿ-ga̍k
(Koeh Tiâu-sêng)
1933. 02, no. 575, pp. 17-18

Lia̍t-uī hiaⁿ-ché, thiaⁿ-tio̍h phí-jîn tē-jī hoê ji̍p kaⁿ-ga̍k (Hêng-bū-só͘) káⁿ kiaⁿ chi̍t-tiô hòⁿ? Chhiáⁿ an-sim, sī ji̍p-khì sûn-sī koh chhut-lâi.
Kū-nî hā-kuì(1931), Tâi-oân Lâm-pak Thoân-kàu-su Chóng-hoē, chū-chi̍p tī Tām Tiong, Kàu pì-hoē ê ji̍t, chiū khì chham-koan Chóng-tok-hú, Tâi-pak Hêng-bū-só͘. Si̍t-chāi thang chò it-seng ê kì-liām, kàu chit chūn bô bē kì-tit. Chóng-sī hit-sî chin giâm-siok, tio̍h siú kui-kí, m̄-thang kóng-oē, m̄-thang chhiò, m̄-thang phuì-noā, nn̄g lâng chi̍t pâi, tuì gîm-chîⁿ kha ti̍t kiâⁿ, khoàⁿ jī-cha̍p goā ê kang-tiûⁿ, hoān-lâng chheng-goā, tāi-ke in-khîn chò kang, siat-pī iā chiu-chì, sǹg-sī Tâi-oân it-téng ê Hêng-bū-só͘.
Kin-nî Lâm-tâu kūn, uī-tio̍h beh pó-hō͘ chhut kaⁿ ê lâng, chiū siat chi̍t-ê Kong-bêng-hoē, kūn-siù chò hoē-tiúⁿ. 4 ê ke chng-tiúⁿ chò Phêng-gī-oân. Siat chi̍t ê chú-sū, chi̍t ke-chng soán chi̍t miâ chò chiok-thok. Phí-jîn tit-tio̍h chng-tiúⁿ, chō͘-ia̍h ê hó-ì, soán chò chiok-thok, tāi-seng kā I the-sî, I chiū kóng, "Ki-tok-kàu sī phok-ài, ū kiù lâng ê cheng-sîn. Hoān-choē ê lâng sī kiaⁿ kéng-chhat-koaⁿ, m̄-sī si̍t-sim hâng-ho̍k i. Tio̍h ēng chong-kàu ê cheng-sîn hō͘ in si̍t-sim ê hâng-ho̍k, lí sūn-soà ēng Ki-tok ê tō-lí kiù-chè in, hō͘ in chò siān-liông-bîn. Koh chit hō kang tio̍h jîn-keh-chiá, chiàⁿ ē ēng-tit." Thiaⁿ kàu chia, ko͘-put-chiong ín i.
Oah-o̍h! Kang chin chē, ta̍k goe̍h chi̍t pái, tio̍h khì tiâu-cha sek-hòng-chiá ê hêng-chōng, an-uì, khó͘-khǹg, hùn-sī. Hoān-lâng nā beh chhut-kaⁿ, tio̍h khì kaⁿ-ga̍k chhoā i tńg-lâi.
Tī 11 goe̍h 9 hō, khì Tâi-tiong kaⁿ-ga̍k chhoā chi̍t lâng. Tit-tio̍h Chóng-tok-hú Kàu-hoè-su í-lé siong-thāi, chin sī te̍k-pia̍t ê ngá-ì, káⁿ-sī ū Bo̍k-su ê chu-keh.
Chiū chhoā khì khoàⁿ Hêng-bū-só͘ lāi ê pēⁿ-sek, kap kang-tiûⁿ, m̄-sī tī goā-bīn kiâⁿ, sī ji̍p khì hoān-lâng teh chò kang ê lāi-bīn, kàu ta̍k keng, hoān-lâng, khàn-siú lóng tio̍h kèng-lé i hit ki só-sî, kàu ta̍k ê mn̂g chi̍t-ē choān chiū khui, chin sī thian-hā-tông ê só-sî. Chiàⁿ siūⁿ-tio̍h Kiù-chú, chiong hit ki Thian-kok ê só-sî kau Pí-tek. iā kàu hoān-lâng ê chhím-sek, chhēng-ê kiâⁿ tī in teh khùn ê pang-téng. Phó͘-thong hoān-lâng khùn pang; iu-liông ê hoān-lâng ū bîn-chhn̂g, tiān-teng, tha̍k-chheh, siá-jī lóng ē ēng-tit, chin hó-sè, sī iâⁿ-koè bo̍k-su pâng. He sī bô chū-iû ê só͘-chāi, chhiáⁿ tāi-ke m̄-thang him-bō͘.
Tú-tio̍h chi̍t ê Hu̍t-kàu ê Pò͘-kàu-sài ô͘ kun kóng, "Chin kám-sim, lín Ki-tok-kàu ê lâng iā chin lí-kái, hoaⁿ-hí chò chit hō siā-hoē sū-gia̍p." Goá kóng, thong sè-kài siā-hoē chû-siān ê sū-gia̍p, sī Ki-tok-kàu ê kàu-su, Ki-tok-tô͘ teh chò. Siat-sú tong-kio̍k nā ū liōng-kái, goán iā hoaⁿ-hí soat-kàu hō͘ chiòng hoān-lâng thiaⁿ.
I chiū kóng, kīn-lâi hoān-choē ê chin chē, Tâi-tiong Hêng-bū-só͘ tēng-oân sī 5 pah, taⁿ í-keng 7 pah. Sin-tek tēng-oân 3 pah, taⁿ í-keng 5 pah. Tâi-pak tēng-oân 1300, taⁿ í-keng 1800 lâng.
ǹg-bāng lia̍t-uī, uī kok-ka, uī tông-pâu chhut-la̍t soan-thoân Ki-tok ê phok-ài, hō͘ lâng ē thoat-lī jio̍k-thé ê hêng-bū-só͘, iā thang thoat-lī lêng-hûn ê hêng-bū-só͘.
Chiàu tiâu-cha ê thóng-kè, Ki-tok-tô͘ hoān-choē ê , siāng-chió. Kám-siā Siōng-tè, hō͘ I ê lô͘-po̍k só͘ chò ê kang, ū tām-po̍h kong-hāu. Chhim bāng lia̍t-uī hiaⁿ-ché, lán tio̍h siú kok-hoat, lán tio̍h siú thian-hoat, lâi chiâⁿ-chò chin-si̍t ê Ki-tok-tô͘.