首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 我ê上帝
我ê上帝
卷期：第576卷 本次： 日期：1933/3 刊名：台灣教會公報 頁數：12
篇名：我ê上帝 [ Goá ê Siōng-tè ]
作者：
  顯示 : 漢羅 全羅 並列  

我ê上帝
（嘉義Y. M. C. A.張Êng-tia̍t）
1933. 03, no. 576, pp. 12-14

　　我ê上帝，ōaⁿ ōe來講：也是列位ê上帝;就是世間人ê上帝。
　　佇300年前，英國有一個世界ê大科學者，叫做紐頓（按：牛頓）。伊有用一款三角形ê玻璃，來分散太陽ê光。有發見彼內有七色。這个色叫做Spectrum.伊發見這個，有做後代ê材料，就是對這个有發見烏線、赤外線、紫外線；以外也有濟濟款ê光線來利益世間人。下昏也學這个款式，用「我ê上帝」做光來kā伊分節，看內面到底有啥物款ê 色佇teh。換話來講：是上帝kap世間人有啥物密切ê關係佇teh。這是趣味ê問題，也是重大ê事。若是欲予神學者來講：穩當有thang對濟濟方面來講：也kiám-chhái欲對哲學tek方面來論起。總是下昏也無彼號時間，也我對這个經驗是真少、真淺薄，也無彼號智識thang來說明。佇遮只有將我所感覺著幾項來講起就好。
　　1. 我ê上帝，就是永遠ê上帝。意思是無起頭、無soah尾ê上帝。世界ê總人數約略18億外，佇這中間有出真濟科學家，親像紐頓、Lîna-to-gián、Pa-sū-ka-ní、Gā-lī-lió、Tô-lí-che-lí，以外猶有濟濟。遮个科學者有發見，宇宙濟濟款ê奧妙。毋過這中間無一个知thang講起，日常kap in無相離ê地球ê起頭kap路尾。對這个予咱thang知，上帝ê權能是無限量，予咱有限ê頭腦袂測度得。是予咱會使靠--得ê上帝。所以我ài講我ê上帝是無起頭、無路尾ê上帝，是永遠ê上帝。
　　2. 我ê上帝，就是大恩ê上帝、慈悲ê上帝、疼ê上帝。
　　對始祖犯罪，違逆上帝ê命令以來，人類應該著ài沉淪滅無；親像一群媠媠ê羊，無人thang照顧保護，佇山間漂流真危險。咱世間人拄拄是親像這款。毋久慈悲ê上帝不忍世間人沉淪，有將伊獨生ê囝耶穌賞賜咱，屬咱ê罪過，予咱thang得著永遠ê路，這kiám毋是咱應該著感謝mah？以外上帝知咱肉體ê欠缺，有備辦逐項予咱食、穿、用攏夠額。也知咱精神ê欠缺，有用好聽ê洋絃予咱聽，thang消無咱一切ê憂悶。上帝有這款極大ê疼，予咱無論靈魂、精神、肉體攏thang快樂。所以我ài講我ê上帝是大恩、慈悲、疼痛ê上帝。
　　3. 我ê上帝，就是除我罪惡ê上帝。
　　咱世間人，拄是親像有病--ê，ài得著完全，總是無法度；獨獨著倚靠醫生chiah有法--得。佇大正12年，東京大震災ê時；佇袂振動ê 5分前，逐項攏活動順序teh運轉；毋過5分後，變做一場大悲哀ê慘境走--出來。魔鬼知咱肉體ê軟弱，親像吼獅四界行，ài予咱陷落罪過。這咱著常常警醒，著ài倚靠上帝ê氣力來掃除魔鬼ê厲害。咱常常捌聽人講：某物人得著道理了後，有除去伊ê罪罣，變做善良ê人。這款ê事實，是對倚靠除我罪惡ê上帝chiah會。這是第一大ê證明。佇詩裡有講：「上帝除我罪惡，ná東離西ê遠。」所以我ài講我ê上帝，是除我罪惡ê上帝。
　　Soah尾ài kā咱講ê，就是咱ê上帝已經是永遠ê上帝，是慈悲疼痛ê上帝，是除我罪惡ê上帝，就咱應該著呵咾敬拜伊。佇詩篇103篇講：我ê神魂ah，你著呵咾耶和華，心內所有ê，著呵咾伊ê聖名，koh講：我ê神魂ah，你著呵咾耶和華，毋thang袂記得伊一盡ê恩賜。這句詩是短短，若是意思是真闊。是teh表明伊疼咱到怎樣，咱著用啥物款ê心來數念呵咾伊。咱捌看見媠媠ê紅玉入佇手指做裝飾ê路用。若設使一粒紅玉kā伊摃破，就欲失落伊ê價值。咱ê心肝是親像按呢。應該是做呵咾、敬拜上帝ê心。若是咱反轉kā摃破，就毋若袂做路用--得，teh欲失落伊ê價值。所以基督徒ê人，若知上帝是永遠ê、疼痛ê、除我罪惡ê，就著歡喜來呵咾敬拜伊。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461