Siat-kàu kì-liām kap Tâi-lâm Eńg-lo̍k kàu-hoē
1954. 06, no. 786, pp. 16-17
Chit keng kàu-hoē sī tī Khoàⁿ-sai-ke, hiān-sî kái chò Jîn-ài-ke. Lán sio̍k-gú kóng, "Chia̍h koé-chí pài chhiū thâu, bán koe chhiû tîn." Kin-á-ji̍t hok-im piàn-thoân tī Tâi-oân lâm-pō͘ ta̍k só͘-chāi, hit ê khí-thâu chiū-sī tuì Khoàⁿ-sai-ke thoân khí. án-ni hiān-sî Eńg-lo̍k kàu-hoē sī lán Tâi-oân Ki-tok-kàu ê hoat-siông-tē. Beh siá Tâi-oân Ki-tok-kàu-sú, tek-khak tio̍h tuì chia siá khí ê.
Peh-cha̍p-káu nî chêng ê 6 goe̍h 16 ji̍t khí, lāu Má I-seng kap Tō͘ Ka-tek Bo̍k-su, í-ki̍p Ē-mn̂g 3 ê tâng-kang ê hiaⁿ-tī tī chia khai-sí i-liâu thoân-tō, mê-ji̍t uī Chú chò kang, soan-káng hok-im. In chì sêng ê sim kám-tōng thian, bô kú chiū tit-tio̍h kò͘ Ko Tióng Sian-seⁿ lâi sìn Chú (che sī Ko Kim-seng Bo̍k-su tuì goá kóng--ê). āu-lâi kàu-hoē siū khún-tio̍k, chiah soá-khì Kî-āu. Ko Sian-seⁿ chiū kap in khì Kî-āu pang-chān in. Thang kóng i sī Tâi-oân thâu chi̍t lia̍p ê koé-chí. iū-koh Ē-mn̂g 3 ê tâng-kang kap Má I-seng chò tīn lâi Tâi-oân ê tiong-kan, chi̍t ê miâ N̂g Ka-tì, i ê kiáⁿ-sun hiān-sî tī Khoàⁿ-sai-ke teh chò sū-gia̍p. I thang kóng sī Tâi-oân sìn-gióng 3 tè hoé-chheⁿ ê chi̍t tè.
Taⁿ 6 goe̍h tē 3 lé-pài sī siat-kàu ê kì-liām-ji̍t. Khak-sìn muí keng kàu-hoē lóng beh lâi siàu-liām tng-sî lāu Má I-seng in siū khún-tio̍k kap in chò kang ê khùn-lân, kap in ê hi-seng í-ki̍p in cháiⁿ-iūⁿ jím-khó͘ nāi-lô, thang lâi ke-thiⁿ lán chhiúⁿ-kiù lâng ê lêng-hûn ê jia̍t. Tông-sî goán iā ài kài-siāu hiān-sî kàu-hoē tī chia ê siau-sit, thang chò lán siàu-liām ê phoāⁿ-chhiú.
Chit tiâu ke sī kó͘-chá sè-tiâu ke-lō͘, chē-chē lâng m̄-chai uī, liân chhī-lāi ê lâng ū-ê to͘ lâi chhoē bô pài-tn̂g, hô-hòng goā-uī lâi ê. An Bō͘-lí Bo̍k-su bat lâi chia chò chú-lí, I ū só͘ kám-kak-tio̍h ê kóng, Eńg-lo̍k kàu-hoē ū 3 hāng ê te̍k-sek:- (1) Ta̍k pái teh lé-pài thoân-kàu-chiá ǹg ngó͘-siōng teh soat-kàu, in-uī káng-tâi tuì-bīn ê chhù ū chhāi ngó͘-siōng. (2) Chin nāu-jia̍t, teh lé-pài ê sî siông-siông ū gín-ná chin chē toā sè siaⁿ jiáng-lâi jiáng-khì, bé-bē ê lâng o-lâi kiò-khì; chhia bé khìn-khòng-kiò; si̍t-chāi chin kiáu-jiáu, soat-kàu-chiá siaⁿ-liōng nā khah sè siaⁿ ê, chē āu-piah ê lâng lóng bô thiaⁿ-kìⁿ. (3) Chin joa̍h, pài-tn̂g sī kó͘-chá ê siong-hâng, siang-pêng lóng sī tiàm, bô hoat-tō͘ thang khui thang-á, joa̍h-thiⁿ chi̍t-ē kàu, ná teh piak-pa, lé-pài ê lâng chē-teh to teh lâu koāⁿ, hô-hòng káng-tō-chiá, chhiáⁿ lín sióng-siōng chiū ē chai. Goán í-keng khah koàn-sì, chóng-sī nā goā-uī lâi chia lé-pài, á-sī lâi káng-tō ê, chì-chió beh hō͘ in toà chin nāu-jia̍t kap chin joa̍h ê tán-lō͘ tńg-khì. Kam-tok Thài-pêng-kéng kiàn-tn̂g ê Loā Ki-chhiong Tiúⁿ-ló lâi khoàⁿ liáu chiū kóng, "Lín Eńg-lo̍k ê hiaⁿ-ché chin gâu thun-lún." Láu-si̍t sī chi̍t nî lún koè chi̍t nî, 100 lâng lâi khoàⁿ, 100 lâng í-siōng kóng, Eńg-lo̍k kàu-hoē tio̍h khí. Kīn-lâi ū lâng chai goán ū beh î-choán kiàn-tiok, nā tú-tio̍h, lóng mn̄g kóng, tī-sî beh khí?
Taⁿ kám-siā Chú! Goán tī kuí-nā nî chêng ū kè-e̍k beh î-choán kiàn-tiok. Kàu tī chûn--nî kap kū-nî, Iâ-hô-hoa í-keng ū siúⁿ-sù goán 312 phêⁿ ê tē, goán lóng bé chheng-chhó, koh iā lóng teng-kì lo̍h châi-thoân hoat-jîn liáu; tē kap chhù í-ki̍p it-chhè ê huì-iōng, kiōng-khai 15 bān goā. Tuì tī kū-nî boé chiū chìn-jip7 tī tē-jī kai-toāⁿ, chiū-sī chek-li̍p kiàn-tiok-kim; kàu kin-nî 4 goe̍h boé, í-keng ū 4 bān goā; chit keng kū pài-tn̂g Hô-hoē í-keng thong-koè beh bē, tāi-iok 6 bān, án-ni iok ū 10 bān ê kiàn-tiok-kim lah.
Í-siōng khoàⁿ khí-lâi, Eńg-lo̍k kàu-hoē sī siat-kàu kì-liām lé-pài-tn̂g. Che sī Lâm Tâi Ki-tok-kàu le̍k-sú-siōng thang chò thih-chèng ê, koh Lâm Tāi tēng muí-nî 6 goe̍h tē 3 lé-pài chò siat-kàu kì-liām-ji̍t, sī tuì chia sǹg-khí--ê. Kî-āu lé-pài-tn̂g sī Pa Khek-lé Phok-sū, Tâi-lâm Thài-pêng-kéng sī Má I-seng, hiān-sî Lú-o̍h sin-tiok ê lé-pài-tn̂g sī Tō͘ Ko͘-niû, téng ê kì-liām lé-pài-tn̂g. Lán Eńg-lo̍k sī Lâm Tâi siat-kàu ê kì-liām lé-pài-tn̂g sī bô thang īⁿ-gī--ê. Hiān-sî goán ū só͘ kám-kek ê, chiū-sī tī chhī lāi ū pa̍t keng kàu-hoē ê chit7 ê lāu tiúⁿ-ló, hiān-sî sī 85 hoè, thiaⁿ-kìⁿ Eńg-lok7 kàu-hoē beh î-choán kiàn-tiok, tuì í-chêng chiū chin hoaⁿ-hí chiong I só͘ thàn ê kiong-kèng the̍h-lâi hōng-hiàn hō͘ Chú, í-keng kuí-nā pah, tī 5 goe̍h 3 hō, koh chhin-sin the̍h 100 kho͘, hoaⁿ-hoaⁿ hí-hí lâi hōng-hiàn chò kiàn-tiok-kim, the̍h hō͘ goá, kóng, Che sī Siōng-tè siúⁿ-sù ê, si̍t-chāi chin kám-siā Chú.
Taⁿ goán ū-tēng siāng bān sī mê-nî ê chiaⁿ-goe̍h chiū beh tāng-kang, kiám-chhái khah chá iā bô tek-khak. Lia̍t-uī hiaⁿ-ché, goá khak-sìn lín nā siàu-liām Eńg-lok7 kàu-hoē, chiū ē siūⁿ-tio̍h Chú thiàⁿ lán kàu cháiⁿ-iūⁿ, chhe I tiong-si̍t ê lô͘-po̍k lâi lán Tâi-oân uī Chú phoe-miā. Taⁿ lāu Má I-seng kap Tō͘ Bo̍k-su í-ki̍p hit 3 ê tâng tio̍h-boâ ê, hiān-sî tī thiⁿ-nih chò hûn teh uî lán, lán nā tì-ì thiàⁿ tī in siū khún-tio̍k ê kàu-hoē, sī teh sé in chá-sî ê kiàn-siàu tī chèng-lâng ê bīn-chêng, iū-koh iā ē toā-toā an-uì in chá-sî ê kan-khó͘. In khoàⁿ kàu-hoē tī chia teh chìn-pō͘, iā beh toā hoaⁿ-hí kap khoài-lo̍k; in tek-khak beh pò-kò tī Chú ê bīn-chêng, hō͘ Chú iā bô tiām-tiām. Chú tek-khak beh khiā khí-lâi kóng, Goá í-keng teh tek-sèng tī Khoàⁿ-sai-ke lah.
Chhiáⁿ lia̍t-uī thiàⁿ Chú ê hiaⁿ-ché, toā ǹg-bāng lín khoàⁿ chit keng Eńg-lo̍k kàu-hoē chò chhin-chhiūⁿ lín ka-kī ê; chhiáⁿ lín lâi o̍h hit ê 85 hoè ê lāu tiúⁿ-ló, hoaⁿ-hí saⁿ-kap lâi kiàn-tiok siat-kàu kì-liām lé-pài-tn̂g.
(Lô͘ Sióng).
