甘牧師遭難紀念碑
1954. 06, no. 786, pp. 14-15
1875年，甘為霖牧師佇台南縣白水溪教會予Gô͘-á-chhiûⁿ放火燒無死的遭難事蹟，是一个真大的神蹟，也是甘牧師真出名的功蹟。這个事蹟毋若佇台灣受人數念，連佇母會英國也不止teh數念。
十九年前，台灣南部教會設教70週年記念ê時，有徛紀念碑佇彼个所在，予閣較濟人通看著來數念(請看記念寫真帖)。可惜當時所徛的紀念碑毋是真堅固，所以到現在已經歹--去，無通閣看著。
光陰親像流水，今年是甘牧師遭難80週年，所以閣一擺數念上帝的盡忠工人為主苦戰的情境。今嘉義中會感覺有需要重建立一个真堅固，就是用鐵筋khōng-ku-lí的，通永遠做記念的碑。這个計畫有得著濟濟人的贊成，特別總幹事N̂g Bú-tong牧師真關心，因為伊出國中常常予人問這个遭難事蹟。
這pang嘉義中會為著愛赴甘牧師遭難80週年記念。有託中委積極的進行，閣派小組實地調查，濟濟擺研究計劃的結果，有設計真理想閣實際的。彼个形差不多真像舊的款；總是比舊的是加真壯觀閣媠。預算是4000箍，這條錢有請嘉義中會內的各教會佇5月第5禮拜為這獻金。不足的額愛向望對濟濟有關心的有志者鬥援助。所以向望各教會恁盡量鼓舞，閣大拜託看報濟濟的關心者鬥幫贊，(請愛saⁿ-kap有份的人才寄去予朴子吳iāu-bêng長老)。
若趕緊有錢通動工，就佇無久會通舉行落成式佮遭難80週年記念禮拜。因為土地在地的會友已經獻便便，閣也歡喜欲獻工。
願上帝聖別這个工事。閣以後對這个紀念碑會予濟濟後輩的人回憶甘牧師。閣學伊為主盡忠，佮主受苦。 |
