首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 佇這个比以前閣較緊急的時代中--咱需要較濟的祈禱
佇這个比以前閣較緊急的時代中--咱需要較濟的祈禱
卷期：第829卷 本次： 日期：1958/1 刊名：台灣教會公報 頁數：17
篇名：佇這个比以前閣較緊急的時代中--咱需要較濟的祈禱 [ TĪ CHIT Ê PÍ Í-CHÊNG KOH KHAH KÍN-TIUN Ê SÎ-TĀI TIONG--Lán su-iàu khah-choē ê kî-tó ]
作者：
  顯示 : 漢羅 全羅 並列  

佇這个比以前閣較緊急的時代中--咱需要較濟的祈禱
{蘇佐揚寫}
王南傑譯
1958年1月829期 p.17-20
本篇筆者蘇牧師是主持中華海外宣道會的先生，佇香港也有發刊天人信息報。本篇捌出佇這个報裡，也捌轉載佇台灣新發刊的中文福音報，編者感覺內容真好，特別請Lâm-kia̍t先生譯佇遮，相信欲利益讀者真濟才著。
無論toh-lo̍h一个基督徒攏知影「祈禱是真重要的，」總是每一个基督徒就真容易忽略這款要緊的屬靈生活。
有人掠做踮佇今仔日這个比以前加倍緊張的「原子時代」中，thái-thó猶有時間通去做彼款「清閒」的祈禱ah。總是事實共咱講，就是咱踮佇這个比以前較緊張的時代中，所以咱應該著回復亞伯拉罕彼款「原始時代」佮上帝同行的屬靈的交通。若無，咱欲佇遮爾極緊張的生活中倒壞。
真無閒mah？
閣較需要祈禱！
我捌苦勸一位主內的兄弟祈禱。伊的回答，也是一般基督徒的回答，「我真無閒，揣無時間通祈禱。」是lah，你真無閒，無時間通祈禱。總是啥事無欲將你的祈禱囥佇你「無閒」的日程表的內面？啥事無欲為著祈禱來無閒？
你敢捌聽見一兩位基督徒拒絕別人屬世的招待講，「真失禮，我袂通去，因為我真無閒，我真無閒teh祈禱。」是lah，真少人的按呢回答。總是這是基督徒應該有的回答佮行動。
祈禱毋是「揣期間，」是著「安排時間」，拄拄親像安排時間通食飯共款。咱的確著佇真無閒的中間安排一个祈禱的時間，寧可減看十分鐘的報-紙，á是慢歇睏20分鐘。無論怎樣，咱著安排時間，閣著將祈禱列入佇你「無閒」的生活的內面。
咱時常向望咱的工作有真大的效果，總是毋肯付出遐大的價錢，彼个價錢就是「濟濟的祈禱。」到今無人因為祈禱傷濟來費時失事，反轉為著濟濟的祈禱得著濟濟的福氣。真濟基督徒向望得著聰明智慧通應付伊複雜閣麻煩的工作，通減少頭疼上好的藥仔，就是濟濟的祈禱。
真濟無閒teh辦事的人時常費真濟的時間teh想辦法，總是毋知影彼个像好的辦法是當伊費真濟時間teh祈禱的時所生的。事實真濟上好的辦法主已經事先替咱安排好勢，只有聽候咱佇安排的祈禱中去接受。咱常常費真濟的時間來想出彼个不得已的辦法，甚至失敗的辦法，來失去彼个上好的辦法。這个辦法是向遐的濟濟祈禱的人所顯現的。
愛教會復興mah？
認罪祈禱！
有人向望教會復興特別是遐的老教會，咱袂通講in 「無冷無燒，」咱只有會通講in 「la-lûn仔燒。」遮的la-lûn仔燒的教會切切希望復興，常常用濟濟時間teh研究「別人」冷淡的原因，佮予「別人」復興的方法。總是袂記得這个復興的hoé是對 「家己」懇切認罪祈禱做起點，對 「家己」真劍的檢討來產生。
咱參加佈道會，總是罕得參加祈禱會。咱享受佈道會的靈糧真正豐富，總是真無夠額接受祈禱來消化。
信徒的冷淡佮犯罪袂會因為佈道會中的責備來熱心佮聖潔；貪愛世間的愚戇袂會因為濟濟人的議論來覺醒；愛財如命的歹習慣，袂會為著真濟的批評來改良；教會中真大的困難袂通用想辦法得著解決。遮的攏需要出佇疼心的代禱佮祈求；需要雅各佮天使鬥力彼款熱切的祈禱。只有祈禱是一切改革的原動力。若無祈禱，一切人為的方法攏是空空。
愛工作無費力mah？
著費力去祈禱！
教會的復興，往往是熱心流目屎祈禱的效果；光榮的勝利，常常是痛苦祈禱所產生的鮮花。咱若有痛苦的祈禱，咱的工作就的減少濟濟的苦痛。咱的祈禱若是充滿熱切的目屎，咱的生活就會通避免流濟濟無必要的艱苦的目屎。主耶穌行神跡奇事的時，攏無費力，總是當伊teh祈禱的時，伊就「出力喉叫，閣流目屎，獻祈禱佮懇求(希伯來5：7)。」通知，「你若真費力祈禱，你的工作就攏免費力；你若感覺工作祈禱。」教會欲復興，「需要遐的肯負責費力，忠實，懇切，流目屎，痛苦，祈禱的基督徒。」
祈禱，會通除去失志，祈禱會通產生氣力！
失志，是因為欠缺祈禱，軟弱，是因為忽略祈求。
祈禱就袂犯罪，犯罪是因為袂記得祈禱。
不斷的祈禱是避免中途變志的「預防針」；認罪的祈禱是治療無愛祈禱的病人上好的「補藥」。
祈禱無別的代用品！
只有祈禱！
祈禱無「代用品」，你袂通用別款行動來代替祈禱。
濟濟人佇大會眾的中間真gâu講道，總是佇私生活裡真袂曉祈禱。真濟人真gâu 「服務」教會，總是真袂曉佇私禱中「服事」上帝。真濟人真gâu佇工作中表現主所賞賜伊逐款的恩賜，總是對祈禱的生活親像攏無恩賜。真濟佇一生為主的勞苦中是一位成功的人，總是祈禱的功課內是一位極端的失敗者。
咱真gâu做工，總是無用祈禱支持伊的工，佇主的目睭前只有是無價值的「空空的著磨」咱向望「成功，」總是若無用祈禱來培養，咱只有會通目睭金金看伊歸佇空空。
我閣講，祈禱無代用品：獨獨祈禱可能是其他一切的代用品。
教會需要甚物款人？
祈禱的人！
教會需要「傳道的人」mah？需要！總是閣較需要的是「祈禱的人」；教會需要「牧師」mah？需要！總是閣較需要的是「祭司」-代禱的祭司。
咱教會逐擺舉行佈道會的時，若欠缺祈禱會中祈禱的人的熱切祈禱，就咱的佈道會只有是響的銅器，tân的lā-poa̍h；咱所開的奮興會若欠缺懇求復興的認罪祈禱，就咱的復興欲親像用紙hiâⁿ火，目nih久就過去。
咱聽真濟，總是真少祈禱。咱真歡喜佮疼咱的朋友講規暝長長的話，猶過拒絕佮 上疼咱的主做20 分鐘親密的談話。咱的靈性活命欲枯焦，是因為吸收祈禱所產生的屬靈的雨水傷少，咱的靈肺生肺炎-靈命腐敗，是因為咱拒絕á是忽略彼个屬靈的呼吸-彼个呼吸就是人人知，猶過真快忽略的祈禱。
無祈禱屬靈變做屬零！
有的人明知祈禱是要緊閣有效，也會曉勸別人祈禱，猶過家己無欲實行祈禱；有的人真歡喜看屬靈的冊，聽屬靈的人講道，參加一切屬靈的集會，總是對佇屬靈的祈禱就攏放下佇架仔頂，攏無發生興趣。總是若毋是你用屬靈的祈禱來支持一分屬靈的行動，就遮的一切屬靈的行動攏欲變做「屬零」。
咱有病的時真快揣醫生，有掛慮的時真快揣顧問，經濟困難真gâu想辦法......總是啥事毋予祈禱佇遮的遭遇中佔上重要的地位？啥事無欲佇祈禱的中間追揣安定心靈的妙法佮治療破病，消除掛慮的唯一的藥方？
通祈禱無煞mah？
請照按呢實行！
莫得kan-ta硬性佇早起時起來佮暗時欲睏的時祈禱，著佇日常生活中揣有通祈禱的「空站，」來做簡單短短連紲的祈禱。做事以前，辦公以後，出門前，轉來了，談論別人的艱苦的時，佮好朋友密談了後，寫批以前，收批以後，有甚物困難的時，佇甚物安心以後，攏通做有聲的祈禱。坐--teh，徛--teh，teh行路，teh 聽候，聽別人講話，計畫甚物工作，利用教冊的機會，利用旅行的時間，滿心僥疑的時，決定代誌的時，攏通做無聲的祈求。按呢 「祈禱無停」就通實現，「祈禱的人生。」就袂oh實行。莫得聽候將來才實行，現在隨時就開始！
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461