首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 模範母親列傳
模範母親列傳
卷期：第845號 本次： 日期：1959/5 刊名：台灣教會公報 頁數：25
篇名：模範母親列傳 [ Bô͘-hoān bú-chhin lia̍t-toān ]
作者：
  顯示 : 漢羅 全羅 並列  

模範母親列傳
1959年5月845期 p.25-26
莊林春桂女士（莊林春桂）
屬南中安平教會，今年54歲。三十年前佮國民教育家莊Péng-tông先生結婚。細漢有宣教師到安平傳教ê時接受道理，就歸主。一直當主日學教員，到結婚後猶原熱心服侍主。用這款精神來治家教囝。佮厝邊和睦，歡喜幫贊人，熱心佇公益事業。丈夫擔當教育ê工已經40年，前捌做國民學校長，現時服務佇台南市立圖書館。女士因為家庭無甚物業產，本身著佇家庭圖謀濟濟副業來幫贊家計，栽培子女。
囝兒共有3男4女，大囝婿做醫生，大後生畢業醫學院在學中，第二查某囝畢業師範teh教國民學校，其餘攏teh讀中學，成績攏真好，閣攏是熱心服侍主ê青年。
伊ê家庭佇民國45年捌受選做模範家庭，受表彰。伊現時當安平教會ê執事佮青年團契ê顧問。佇社會裡也有擔當婦女會ê監事，為婦女界鬥圖謀利益。閣佇第44屆婦女節ê時捌受表彰做模範婦女。這pang當選台南市模範母親，欲受省政府ê表彰。實在真通恭喜佮佩服。
蘇陳惜女士（蘇陳惜）
屬高中Thài-iâ教會。今年60歲。佇民國45、46、47，3年久連紲當選湖內鄉ê模範母親。所以今年閣受高雄縣政府ê表彰。做人溫柔，好款待人，閣熱心服侍主，是一个好ê基督徒，予內外欽仰。丈夫蘇Kî-chèng長老，原屬海埔教會，到舊年出頭圖謀來開設Thài-iâ佈道所。夫婦兩人對教會不時都是向前出力。In有4男3女，長男就職佇軍部，次男現時佇金門當兵，三男舊年畢業成功大學。
蘇賴月女士（蘇櫃月）68歲
伊是鳳山教會忠實ê姊妹，熱心ê基督徒。丈夫蘇Kiû先生佇鳳山開業獸醫病院，佇社會不止有大人望。蘇夫人gâu盡力幫贊伊，紲佇教會婦人會，佇祈禱會，佇探訪大大著磨。
伊用基督耶穌ê信仰盡力培養伊ê囝兒。大公子醫師Iok-châi現時高雄市立病院內科主任，二男Io̍k-lîm是獸醫佮老父協力佇獸醫病院ê工作，三男Iok-bêng成功大學四年，專攻礦物系，四男Iok-sêng高雄市中高三在學中。
遮个囝兒若毋是對賢德閣熱心ê老母，就袂通看見這款基督化美滿ê家庭。伊佇1957，5:12受省政府選出做模範母親。
許王朱鶯女士（許王朱鶯）54歲
伊是鳳山教會現任ê長老以及幼稚園ê園長，是熱心ê基督徒。
許長老是西螺鎮名醫王大衛先生ê次女，父母佮6个兄弟，4个姊妹攏是熱心ê基督徒美麗ê家庭。
伊18歲畢業台北第3高女了後，進入東京帝國女子藥學專門學校深造。有佮北港求道者醫師許Chhùn-kim先生結婚。In猶未來鳳山以前，盡力佇媽祖發祥地北港佮牧師協力，掃除迷信，興起教會，建設新ê拜堂。
現時許先生佇鳳山開業信安堂醫院。家庭有5男1女，完全對許長老1支手來培養熱心ê基督化家庭。
伊不但培養丈夫入聖會，全家無1个信仰ê落伍者。長男Tek-chong畢業淡工英專，現時信安汽車工廠ê經理／二男Pin-se̍k，師範大學畢業後，進入研究。三男Bûn-hông國防醫學院深造中。四男Hi-tia̍t成功大學四年，專攻建築系。五男Bêng-gān佇高雄醫學院ê醫科。長女Hun-ngô͘現時高雄省女初三在學中，大家攏是成績優秀。
因為許長老有好ê才德佮好ê信心，所以今日會通看見美滿ê家庭。伊佇舊年5月12日予省政府揀做模範母親。
Gô͘ Gân Lēng Lú-sū（吳顏令）
佇民國47年予溪州鄉選著模範母親，受屏東縣政府表彰。伊今年65歲，是高中溪州教會ê元老吳Iú-hok長老ê婦jîn人。伊本身是助產士，有生5男3女，逐个囝兒都攏有受教育。是真gâu刻苦耐勞，gâu幫贊丈夫教示囝兒，是1个賢妻良母。第5囝台北工專畢業當兵了拄退伍，其餘4个後生攏娶某了，也攏就職佇相當ê職務，3个查某囝攏出嫁了，囝婿兩个是長老，1个是傳教家，就是謝Ha̍k-liông先生。孫仔有ê佇大學，有ê佇高中teh讀冊。
伊佇溪州教會歷任長執有37年久，佇守禮拜、祈禱會、家庭禮拜毋捌缺席。到每拜6就去巡會友，若有聽著會友有破病á是甚物困難ê事，就去安慰佮祈禱。也鼓勵囝兒新婦著熱心服務教會，閣真gâu聽傳教家，也gâu憐憫散鄉人，有錢是獻金佮暗靜做好事，閣是正手所做ê無予倒手知。真有教養，gâu敬大疼細，毋捌講人ê是非。所以予會內會外ê人攏總呵咾，伊ê信仰生活通知人ê好模範。通講上帝有賜禮佇伊ê家庭。
周怨女士（周怨）
伊是屬高中東港教會ê林Sù長老娘，69歲。出世佇東港鎮調家ê第3查某囝。家庭散赤，老父早死，頂無兄下無弟，舉目無親，佇十外歲老母佮姊妹全家5口ê生活，就只有靠伊做工維持，閣收養族內孤獨ê五嬸婆，三頓oh過，貧寒到極。
到佇18歲，拄好姨表兄林Sù長老父母早死，兄妹兩人無依倚，才招伊做丈夫。彼時林Sù長老身軀衰lám，常常破病，拄仔信道理。伊就小心照顧，予伊身軀ná勇健。後來佇就職生活，待遇稀薄，囝兒襤褸ê時，伊就替人做衫褲，趁錢鬥幫贊。佇做事業失利了錢ê時，攏無怨言，反轉用好話溫純勉勵伊。夫妻結婚48年久相敬相愛，毋捌吵喙。
對佇囝兒真注重宗教教育，閣佇50年前就予大查某囝讀國民學校。閣本身當甲長、鄰長22年久，予厝邊社會真欽仰。
今感謝上帝有福氣佇伊ê家族，雖然佇3年前林Sù長老離開世間，猶久有予伊生軀勇健，家庭經濟毋是富裕，總是可以過，伊有3男4女，大囝Bêng-in服務屏東縣政府，捌當東港教會ê長執。二囝Bêng-tián就職東港中學，現任東港教會長老。三囝Bêng-keng佇萬丹經營五金店。大查某囝Siù-eng嫁萬丹教會張Siông-tiān長老。二查某囝嫁萬丹教會吳Thoân teh做生理。三查某囝Hiân-khîm嫁屏東楊Chheng-hui執事。四查某囝Bū-moá嫁關廟Sin-hong教會董Gio̍k-bêng宣道師。內外孫佮曾孫有30外个。向望所有ê榮耀攏歸予主。
吳林專女士（吳林專）
伊是現時總會財務處長，也是高中財務部長，神學院總務主任，長榮中學常任董事，楠梓教會主日學校長吳Thian-sek長老ê夫人。本身淡水女學出身，現時約60歲。現任楠梓教會ê長老。
吳長老過去佇官界服務久久，閣現時擔當教會職務遮爾濟，猶久因為有這仲賢內助，予伊實在無家庭煩惱ê拖累。女士對教會也是真熱心，為著主日學，婦人祈禱會，救濟品處理，調解委員等等，也是貢獻無少。
特別是養育兒女真成功，大查某囝Chio-lân女士高女畢業，是陳聰明醫生娘，真gâu幫贊教會。長男大學畢業，服務港務局人事室。次男師範畢業，夫婦攏當教育ê工。第二查某囝高女中畢業，丈夫也佇港務局。
按呢通講做基督徒婦女，做內助，做老母攏真成功。實在無見笑做楠梓教會出身ê模範母親。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461