Gio̍k-san sîn-ha̍k su-īⁿ kì-liām chú-ji̍t choan-noâ
1959年5月845期 p.7-9
Pún Chóng-hoē tē 6 kài thong-siông gī-hoē tī 2 goe̍h tiàu-khai ê sî, ū gī-koat chiong 5 goe̍h tē 1 Chú-ji̍t chò Gio̍k-san Sîn-ha̍k su-īⁿ kì-liām Chú-ji̍t, chhiáⁿ Chóng-hoē lāi choân kàu-hoē chèng sìn-tô͘ siàu-liām san-tē thoân-tō jîn-oân ióng-sêng ê tiōng-iàu, tī hit ji̍t uī chit ê su-īⁿ kî-tó kap hōng-hiàn. Koh chiong hiàn-kim ti̍t-chiap kià kau 臺灣劃撥儲金 239號 玉山神學書院
Chóng-hoē Gī-tiúⁿ: So͘ Thian-bêng.
Su: Tīⁿ Liân-tek.
Phian-chiá chù:
Kin-nî ê Chóng-hoē ū tēng 5 goe̍h ê tē 1 lé-pài-ji̍t chò Gio̍k-san Sîn-ha̍k su-īⁿ ê kì-liām Chú-ji̍t. Sui-jiân kì-liām Chú-ji̍t, tī kok hong-biān ū teh kiám-thó kóng sī m̄-sī siūⁿ chē, iáu-kú tāi-ke thiaⁿ tio̍h Gio̍k-san Sîn-ha̍k su-īⁿ ài siat kì-liām Chú-ji̍t, chiū koh hùn-hoat cheng-sîn koat-tēng thong-koè. Taⁿ in ê hiān-chōng siáⁿ khoán? Ko Chùn-bêng ĪN-tiúⁿ siàu-chòng iú-uî, ēng i jia̍t-chhiat chhêng-sûn ê sìn-gióng kap phāu-hū, chioh si-koa ê thé thò͘-lō͘ tī chia ê, ún-tàng beh hoàn-khí kok hong-biān ê hióng-èng kap chia̍p-chō͘(sic.) chiah tio̍h.
1. Soaⁿ-toē ê Ai-ko
Sím-mi̍h lâng chai
Goā-bīn ê êng-hoâ bô pó-chiòng.
Lāi-bīn ê hēng-hok ah?
Sím-mi̍h lâng chai
Goā-bīn ê hoat-tián bô pó-chiòng,
Lāi-bīn ê kiān-choân ah?
Lí khoàⁿ-kìⁿ suí-suí ê soaⁿ-niá mah?
Lí khoàⁿ-kìⁿ chheng-chēng ê khoe-chuí,
chhiⁿ-chhuì ê chhiū-ba̍k.
iu-bí ê phang-hoe mah?
Lí beh khoàⁿ-kìⁿ 350 keng ê kàu-hoē,
8,9 bān sìn-tô͘,
cheng-chòng ê thoân-kàu-chiá mah?
Chóng-sī chī-chuī chai
Goán ê pi-ai
Goán ê thó͘-khuì,
Goan(sic.) ê ba̍k-sái?
Khó-lîn ê toā-soaⁿ,
Pi-chhám ê sió-soaⁿ ah!
Lín tio̍h chhiùⁿ, chhiùⁿ chhut lín ê Ai-ko,
Lín toà phoà-chhù ê sū,
Lín m̄-bián kóng;
Lín chia̍h han-chû ê sū,
Lín iā m̄-bián kóng;
Tī 10 ê tiong-kan ū 6 ê hì-pīⁿ ê sū,
Lín iû-goân m̄-bián kóng;
Chí-ū tio̍h kóng,
Lín tī choē-ok tiong ê
Pi-chhám kap ai-khó͘,
Chhiⁿ-chhám lah!
Goán ê hoān-choē chiâⁿ choè-to̍k-choâ,
sô tī piàn toē.
Chhiⁿ-chhám lah!
Goán ê hú-pāi chiâⁿ-choè toā-puî,
iā tī chhù-lāi.
Chhiⁿ-chhám lah!
Goán ê tuī-lo̍h,
Goán ê chêng-io̍k,
Chiâⁿ-choè chhim-ian,
Chiâⁿ-choè hoé-soaⁿ.
Siak-phoà goá ê liông-sim,
Khip-chīn goá ê oa̍h-miā,
Phò-hoāi goá ê sìn-gióng.
An-lo̍k ê lâng ah, tio̍h chai goán teh pi-ai.
Teh chhiò ê lâng ah, tio̍h chai goán teh thî-khàu,
Tit-kiù ê lâng ah, tio̍h chai goán teh bia̍t-bô.
2.Pún-īⁿ ê bêng-sióng
Kiám boē tàng hō͘ chhâi-lông pìⁿ choè iûⁿ-ko?
Hō͘ chhiⁿ-thâng pìⁿ choè ô͘-tia̍p?
Kiám boē tàng hō͘ soa-bô͘ pìⁿ choè chuí-chhân?
Hō͘ hong-po͘ pìⁿ choè hoe-hn̂g?
Kiám boē tàng hō͘ tuī-lo̍h pìⁿ choè hiòng-siōng?
Hō͘ sí-bông pìⁿ choè koh-oa̍h?
Mô͘-kuí kóng, "Boē tàng!"
Chóng-sī Sèng Sîn kóng, "oē tàng!"
Khì! Khì ló͘-le̍k!
Khì! Khì khai-khún!
Khì! Khì kî-tó!
Sī!
Tī thàu-chá goán beh ló͘-le̍k,
Tī ē-po͘ goán beh khai-khún,
Tī àm-mî goán beh kî-tó.
Goān chin-lí chiâⁿ-choè goán ê chia̍h-mi̍h,
Goān chū-li̍p chiâⁿ-choè goán ê cheng-sîn,
Goān sìn-gióng chiâⁿ-choè goán ê seng-oa̍h,
Goán ê oa̍h-miā.
3.Pún-īⁿ ê piàn-chhiān.
Cha̍p-saⁿ nî ê phiau-liû,
La̍k uī ê chhian-soá;
Tī hit sî goán bô ǹg-bāng,
Goán bô an-uì.
Ū sî siū khì-sak,
Ū sî siū koáⁿ-tio̍k,
Chhin-chhiūⁿ lō͘-piⁿ ê khit-chia̍h,
Á-sī siū siong ê iá-káu.
Chóng-sī kám-siá(sic.) Chú,
I siu-liû goán,
Tī Siū-lān-cheh hit ji̍t,
I chhoā goán kàu tī Lí-hî-thâm,
Chiū-sī goán ê sin hāu-chí,
Goán ê Ka-lâm toē,
Tī I ê siū siong,
Goán tit-tio̍h i-tī;
Tī I ê sí-bông,
Goán tit-tio̍h koh-oa̍h.
Goán ài 15 kah ê thó͘-toē,
Chóng-sī I só͘ hō͘ goán ê sī 28 kah.
Goán ài 100 bān ê chîⁿ,
Chóng-sī I só͘ iok-sok goán ê sī 240 bān.
Si̍t-chāi ah!
I beh hō͘ lâu ba̍k-sái iā chéng-chí ê
Chhut hoaⁿ-hí ê siaⁿ siu-koah,
I beh hō͘ hit ê
Lâu ba̍k-sái toà chéng-chí chhut-khì
Tek-khak toà i ê tiū-pé.
Hoaⁿ-hoaⁿ hí-hí tńg-lâi.
Goān goán bô giâu-gî I ê chû-ài.
Tī it-chhè beh lâi ê toā hoān-lān tiong
Tit kàu éng-oán.
4.Pún-īⁿ ê pêng-iú.
An-lo̍k ê pêng-iú sī hu-ké,
Hi-hoa ê pêng-iú iā sī khang-khang,
Chí-ū hoān-lān ê pêng-iú chin-si̍t.
To-siā Lâm-kiaⁿ ki-kim Táng-sū-hoē,
To-siā Eng-kok Kàu-sū-hoē,
To-siā Ka-ná-tāi Kàu-sū-hoē,
To-siā Khèng-hong Ki-tok Kàu-hoē,
To-siā tī Tâi-oân ê choē-choē
Bô-miâ ê thiⁿ-sài,
In-uī lín tī goán chhuì-ta ê sî
Ū hō͘ goán lim,
Tī goán iau-gō ê sî ū hō͘ poán(sic.) chia̍h,
Tī goán phoà-pīⁿ ê tî(sic.) ū hō͘ goán hioh,
Tī goán bô chhù ê sî ū hō͘ goán toà,
Goān goán tī beh lâi ê ū chi̍t-ji̍t
iā oē tàng thiàⁿ lâng, chhin-chhiūⁿ lín thiàⁿ
iā oē tàng pang-chān lâng, [goán,
Chhin-chhiūⁿ lín pang-chān goán.
In-uī lâng beh tuì tī
I só͘ sit-lo̍h ê lâi tit-tio̍h,
I só͘ sià-bián ê lâi siū sià-bián,
I só͘ hi-seng ê lâi siū chiok-hok.
5.Pò-kò.
(1) To-siā Khèng-hong kàu-hoē tī koè-khì ū bô tiâu-kiāⁿ hō͘ goán toà chi̍t nî poàⁿ kú.
(2) To-siā Lâm-kiaⁿ ki-kim Táng-sū-hoē, ū iok-sok beh 120 bān hō͘ goán.
(3) To-siā Eng-kok Kàu-sū-hoē ū koat-tēng beh 80 bān hō͘ goán.
(4) To-siā Ka-ná-tāi Kàu-sū-hoē ū koat-tēng beh 60 bān hō͘ goán.
(5) To-siā lán ê Chóng-hoē , ū ún-chún goán tuì Tâi-oân kàu-hoē thiàⁿ Chú ê hiaⁿ-chí bō͘-koan 30 bān.
(6) Í-siōng kiōng 240 bān, chiū-sī beh choè pún-īⁿ heng-kiàn éng-oán ê hāu-sià ê lō͘-ēng.
(7) Cháiⁿ-iūⁿ tio̍h ēng hiah choē chîⁿ? In-uī Hoa-liân sī toā hong-thai kap toā toē-tāng ê chhut-sán toē. Só͘-í beh siu-iông 100 miâ ê ha̍k-seng ê pún-īⁿ , tek-khak tio̍h ài khí hō͘ i chin kian-kò͘.
(8) Hiān-chāi goán ê ha̍k-seng sī 35 miâ, kàu-oân 2 miâ, lóng toà tī 4 tòng ê tek-long-á chhù.
6.ǹg-bāng.
(1) ǹg-bāng chu-uī thiàⁿ Chú ê hiaⁿ-ché, oē tàng ióng-io̍k ū hūn tī heng-khí Gio̍k-san Sîn-ha̍k su-īⁿ ê kang, lâi oân-sêng lán tuì soaⁿ-toē thoân-tō sù-bēng.
(2) Beh pang-chān pún-īⁿ ê hong-hoat.
a) Kin-nî ê 5 goe̍h tē 1 lé-pài ê hiàn-kim sī beh choè pún-īⁿ ê lō͘-ēng.
b) Put-koán-sî lóng thang te̍k-pia̍t hiàn-kim.
c) Kè-sio̍k ê hiàn-kim muí kháu sī 10 kho͘, chhiáⁿ muí goe̍h ji̍t kià lâi hō͘ goán,(chi̍t nî hūn sī 120 kho͘).
d) Chióng-ha̍k-kim muí kháu sī 120 kho͘, iû-goân muí goe̍h ji̍t kià lâi hō͘ goán,(chi̍t nî hūn sī 1,440 kho.).
(3) Chhiáⁿ lī-iōng pún-īⁿ ê kháu-chō
臺灣劃撥儲金239號 玉山神學院
Pún-īⁿ ê sin toē-chí.
花蓮縣壽豐鄉鯉魚潭 玉山神學院
I-siōng ĪN-tiúⁿ Ko Chùn-bêng kì.
