Sèng-koa-tuī sī sím-mi̍h?
(Chiap chêng goe̍h hō tē 16 bīn)
Tân Sù-tī
1959年10月850期 14-15

3) Sèng-hoà sìn-gióng
Chiàu lán Sin-kàu ê sìn-gióng , Sèng-koa-tuī í-keng m̄-sī khiā tī Siōng-tè hit pêng lâi teh tuì chham-ka lé-pài ê hoē-chiòng chhiùⁿ, sī tāi-piáu hoē-chiòng á-sī kap hoē-chiòng saⁿ-kap lâi teh tuì Siōng-tè chhiùⁿ. Só͘-í tī Sèng-koa-tuī só͘ gîm ê si ê tiong-kan , hit ê loē-iông put-chí tiōng-iàu. Chhin-chhiūⁿ lán ê i ê loē-iông ū-ê sī kî-tó ,ū-ê sī kám-siā , ū-ê sī tāi-ke saⁿ bián-lē, Sèng-koa-tuī ê jīm-bū ê tē-saⁿ hāng chiū-sī thoè hoē-chiòng, á-sī kap hoē-chiòng saⁿ-kap tuì Siōng-tè lâi kî-tó, kám-siā kap sìn-tô͘ hō-siong bián-lē. Hit ê oē-sû tio̍h ha̍h tī lán kàu-hoē ê sìn-gióng kò-pe̍k kap ū kiàn-li̍p tek-hēng ê loē-iông Lán teh gîm ê lâng tio̍h ū kap lé-pài saⁿ ha̍p gî ê sìn-gióng cheng-sîn chiah oē ēng-tit.
uī-tio̍h beh hoat-hui chit ê tē saⁿ ê jīm-bū, goá siūⁿ nā-sī Sèng-koa-tuī só͘ beh îm ê si ê koa-sû oē tāi-seng siá hō͘ bo̍k-su á-sī su-sek-chiá, tī Sèng-koa-tuī teh beh gîm ê tāi-seng chhiáⁿ i seng tha̍k chi̍t piàn, hō͘ hoē-chiòng khah oē bêng-pe̍k hit ê ì-sù, chiū ún-tàng oē choè chin toā ê pang-chān. Á-sī kiám-chhái Sèng-koa-tuī choân-thé ēng humming chhiùⁿ chi̍t chat, iā ēng siaⁿ-im hiáng-liāng ê tuī-oân lâi tha̍k hit ê oē-sû (Kán-lio̍k ê iā hó), chiū goá siūⁿ ún-tàng oē pang-chān thiaⁿ ê hoē-chiòng liáu-kái hit ê ì-gī kap oē hō͘ in saⁿ-kap ēng Sèng-koa-tuī só͘ gîm ê si-koa ê cheng-sîn lâi lé-pài.
Só͘-í tī te̍k-pia̍t ê tiûⁿ-ha̍p tio̍h kéng te̍k-pia̍t ê si-koa lâi sèng-pia̍t hit ê te̍k-pia̍t lé-pài, chit ê sī chin chū-jiân koh ū hāu-kó ê sū. In-uī án-ni, chí-hui-chiá khiàm-ēng chin kóng-khoah ê Sèng-si siông-sek kap hùn-liān. iā goá chin ǹg-bāng lán Tâi-oân ê kàu-hoē ū te̍k-pia̍t ê jîn-châi chhut-lâi tuì tī Sèng-koa-tuī só͘ beh gîm ê si-koa(Anthem) lâi choè chún-pī, thang hō͘ Sèng-koa-tuī-oân khah ū hó ê chhâi-liāu lâi oân-sêng in ê jīm-bū, iā soà hō͘ lé-pài ê loē-iông khah chhiong-si̍t.
(4)Kuí hāng kū-thé-tek ê būn-tê
a. Tuī-oân ê lâi-goân. goá siūⁿ bô-lūn to͘-hoē á-sī chháu-tē ê Sèng-koa-tuī ê chí-tō-chiá só͘ lia̍h choè á-sī só͘ keng-giām-tio̍h ê tē-it toā ê khùn-lân kap thâu-thiàⁿ ê, chiū-sī tuī-oân ê khoat-hoa̍t kap lâi-goân. Tuī-oân chhut-chhut ji̍p-ji̍p, chi̍t ê kū--ê cháu-khì, koh chi̍t ê sìn--ê ji̍p-lâi. Bô-lūn jīm-hô lí-iû, tuī-oân lóng ū chū-iû thang beh lâi chiū lâi, m̄ lâi chiū m̄ lâi!
Chit ê m̄-nā kan-ta kóng sī chi̍t ê kî-kan beh lâi, m̄ lâi nā-tiāⁿ, chiū sīm-chì liān-si̍p ê "pài-la̍k" àm beh lâi, chin-si̍t beh chhiùⁿ ê lé-pài chá-khí chiū m̄ lâi, che iā sī i ê chū-iû! Chí-hui-chiá m̄-nā bô koân thang chí-chek i, liân kóng-khí to soà m̄-káⁿ, kiaⁿ-liáu kek i siū-khì, soà lóng bô-beh lâi chiū koh-khah lī-hāi! Chhin-chhiūⁿ chit khoán ê chêng-hêng ê ē-bīn, Sèng-koa-tuī ê chûn-chāi chiū-sī sui-bóng oāⁿ tī Sió-hoē ê koán-hat ê ē-bīn, goá siūⁿ iā sī chin sêng būn-toê. Goá chin ǹg-bāng Sió-hoē ê gī-tiúⁿ kap gī-oân oē tàu pang-chān lâi kái-koat chit ê būn-toê, hō͘ lín ê Sèng-koa-tuī ê chí-hui-chiá kéng-jiân í-keng hōng-hiàn in ê cheng-sîn, châi-lêng kap sî-kan, m̄-thang koh hō͘ in tan-sin lâi hū-tam chit ê thâu-thiàⁿ ê tāng-tàⁿ.
Koh-chài goá ǹg-bāng hiān-chāi ê tuī-oân iā tio̍h chai lín ê kang-chok sī kong-êng ê te̍k-koân, siâng-sî iā sī tuì Chú só͘ niá-siū ê sù-bēng. iā chit ê sù-bēng sī bô siū liân-lêng á-sī khoân-kéng ê piàn-hoà ê éng-hióng, eng-kai tio̍h chīn-tiong kàu bé chiah tio̍h.
b. Si-koa ê kéng-soán. Goá ǹg-bāng chīn-liōng m̄-thang tiāⁿ-tiāⁿ tuì hiān-chāi ê Sèng-si lâi kéng sī hō͘ lí ê Sèng-koa-tuī chhiùⁿ. án-ni oē hō͘ tuī-oân sit-lo̍h hèng-chhù kap oē éng-hióng tio̍h hoē-chiòng tuì Sèng-koa-tuī só͘ phāu-hū ê kî-thāi sim-lí. Sui-bóng hiān-chāi Tâi-oân chin chió si-koa, iáu-kú tio̍h chīn-liōng choè chún-pī, m̄-thang kàu sī chiah suî-piān kéng chi̍t siú Sèng-si lâi èng-hù chit ê liān-si̍p ê sî-kan. Siat-sú nā-sī put-tek-í tio̍h ēng Sèng-si, iā tio̍h chīn-liōng siūⁿ pān-hoat koé-oāⁿ hit ê chhiùⁿ-hoat, á-sī tuì oē-sû lâi ê toā-soè siaⁿ ê hun-piat, m̄-thang siuⁿ sí-pán.
c. oē-sû chīn-liōng tio̍h ēng Tâi-oân oē á-sī Kok-gú. Koh-chài tio̍h chhiùⁿ chin bêng kàu hō͘ hoē-chiòng thiaⁿ ū lín só͘ teh gîm ê sím-mi̍h ì-sù. Só͘-í ta̍k jī êphian-im ê khí-thâu kap lō͘-bé ê jī lóng tio̍h chhiùⁿ chin bêng. Phì-jū chhin-chhiūⁿ b, g,j,k,kh,m,n,ng,p,ph,s kap t, chiah ê. In-uī Tâi-gú nā chhiùⁿ ê sî, só͘ ū ê pat-im lóng bô--khì, só͘-í tû-khí(sic.) nā m̄-sī chhiùⁿ chin bêng, chiū hit ê ì-sù chin oh-tit thiaⁿ oē chhut. Nā beh chhiùⁿ Eng-gú ê sî tek-khak tio̍h chin ū pá-ak chiah thang...... bô-lūn hit ê hoat-im á-sī ì-gī.
d. Tû-khí(sic.) tuì-tiōng si-koa hùn-liān í-goā, iā tio̍h tì-ì tī tuī-oân ê chhin-bo̍k oa̍h-tāng kap lêng-sèng ê poê-iúⁿ. In-uī siông-siông tuì tī kám-chêng ê būn-toê lâi éng-hióng tio̍h Sèng-koa-tuī ê khì-hun, sīm-chì éng-hióng tio̍h Sèng-koa-tuī ê cheng-sîn kap kang-chok.
e. Chí-hui-chiá pún-sin tio̍h tì-ì i ka-kī ê lêng-sèng seng-oa̍h kap im-ga̍k tì-sek ê chìn-pō͘. Koh goá ǹg-bāng nā-sī Sió-hoē beh gī-lūn koan-hē Sèng-koa-tuī ê sî, tek-khak tio̍h soà chhiáⁿ Sèng-koa-tuī ê chí-hui-chiá lâi chham-ka thó-lūn, chīn-liōng chham-khó i ê ì-kiàn kap hō͘ i liōng-kái, soà thang tit-tio̍h i ê hia̍p-le̍k.
f. Lūn ho̍k-chong ê sū, choè hó sī ū gown, chóng-sī nā bô ê sî tek-khak tio̍h phok-sò͘, chéng-choê kap chheng-khì. Lú-chú m̄-thang ū hoe-hiat, hu-hoa kap kè-thâu ê chng-thāⁿ, lâm-chú m̄-thang siuⁿ suî-piān......chhēng té-khò͘, thâu-sàm , saⁿ-làm kap bô thé-thóng ê sū lóng tio̍h kín-sīn.
Í-siōng sī goá hiān-chāi só͘ kám-kak tio̍h ê, siá tī chia lâi hō͘ tāi-ke choè chham-khó. Goá ǹg-bāng lán tī Tâi-oân ê Sèng-koa-tuī oē ji̍t-ji̍t ná chìn-pō͘, tit-tio̍h Chú ê chiok-hok, chu-uī sian-poè ê léng-tō kap hiō-poè ê chīn-la̍t hùn-hoat, bô kú ê chiong-lâi oē chìn-pō͘ kàu tī oē kham-tit kap tī goā-kok ê Sèng-koa-tuī saⁿ-pí-tit ê thêng-tō͘. Só͘ kóng nā ū put-sek-ha̍p ê só͘-chāi , chhiáⁿ to-to chí-kàu chiū-sī.
Í-siōng.