皇帝登極
1886.08 第十四張 p.101-102
六月初10中國皇太后出詔通知，講，「因為皇帝坐位ê時較少歲，在朝的確著有人監督，凡若遇著奏章欽點賜封chiah-ê政事，就thang 料理，所以我不得不著垂簾聽政。前有出詔定規準皇帝學習到國政chiâu bat，才thang 本身治國。到今十數年久，聖上已經日日勤苦年年進德，會曉 tit主裁奏章ê是非，批評古今ê義理，判斷政事。所以今仔日太后宣召皇親來諭旨講今年冬節皇帝teh-beh本身祭告天地，也koh諭欽天監擇選明年ê吉日，thang hō͘聖上登極。今我所諭ê旨意lín各省文武官員著遵趁奉行。」
後來皇太后koh出詔講欽天監復奏登極ê吉日已經擇選，就是明年正月15日。
今有聽見這個代誌，屬在中國個福音和會刁持寄一張批，請總教會現時著致意替皇帝祈禱。伊ê批講，「照聖冊教示咱，著替chiah-ê王kap大官祈禱。現時有較要緊ê大事teh-beh起因，咱著一法迫切懇求。趁聖上六月28日成16歲，這時伊ê心思性情關係將來國家ê平治。又兼太后tú仔出詔定著明年正月beh hō͘伊登極。也無偌久beh選正宮，所以咱著迫切祈禱上帝，hō͘皇帝有智慧thang 治國，hō͘伊ê百姓會享太平ê福氣，hō͘伊本身長歲壽，hō͘伊登極了後基督ê福音會愈開闊tī國內，凡若官員百姓愈愛親近道理。」 |
