首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 諫諍迎佛骨ê表。
諫諍迎佛骨ê表。
卷期：第16卷 本次： 日期：1886/10 刊名：臺灣府城教會報 頁數：117
篇名：諫諍迎佛骨ê表。 [ Kàn-chèng ngiâ Pu̍t-kut ê Pió. ]
作者：
  顯示 : 漢羅 全羅 並列  

諫諍迎佛骨ê表。
1886.10 第十六張 P.117-119
阮過來這爿傳道理常常聽見人講是外國教佮in無tī-tāi，有ê 也罵講是番仔教，永愛阻擋人教伊m̄-thang入。Hit號ê話究真是無情理，因為上帝是通天下ê上帝，m̄ 是一國ê上帝，hit號ê話咱m̄-thang聽。又koh hia ê 講ê人家己熱心teh拜佛起廟，攏bē曉想這個佛教其實也是外國教，佮in koh較無干涉。這個話 m̄ 是kan-ta 阮teh參lín辯，就是lín本國ê讀冊人也濟濟人知，lín ê冊也有記載講中國本底是無佛，到漢朝佛教才對印度國來；國王百姓受伊迷惑去趁，iáu-kú從中ta̍uh-ta̍uh有bat 理ê人想teh-beh除。到唐朝憲宗ê皇帝，是主後806-821，hit時有一枝骨hē tī 鳳翔ê所在，流傳講是佛骨，m̄知已經偌久hē tī-hia。因為唐憲宗准hia-ê和尚迎接hit枝骨入皇宮內 ，有gâu ê人臣姓韓名愈刁持做一張表去諫諍伊，奏皇帝著除滅hit個骨，免得hō͘百姓致到久長ê禍患。可惜hit個皇帝無beh聽伊，顛倒kā伊貶去做潮州府。伊tī-hia整頓風俗，教化百姓，名望不止顯揚；逐人稱伊做韓文公，又koh起廟企碑，到今仔日iáu-kú teh數念伊ê 功勞，來祭獻。
這張表記載古文第十一本，阮將hit-ni̍h來解說，這表--ni̍h所講--ê無的確攏會憑信--得；不過是ài hō͘ lín知。
這表--ni̍h所講ê臣--字是指tī 韓文公本身；是人臣ê臣--字，解說做「我」也thang。
臣某名講：扑算這個佛ê事，是外國一個法術niā-niā，對後漢hit時才入中國，起頭boē bat有。在早黃帝坐位到百年，歲壽食一百一十歲。少昊坐位八十年，歲壽食一百歲。顓頊坐位七十九年，歲壽食九十八歲。嚳帝坐位七十年，歲壽食百五歲。堯帝坐位九十八年，歲壽食一百十八歲。舜帝參大禹歲壽攏到百歲。Hit時天下太平，百姓平安快樂長歲壽；但是中國iáu-boē bat有佛。後來殷朝ê湯王也食到百歲；湯ê孫太戊坐位七十五年；武丁坐位五十九年，做史記--ê無講in ê歲壽到佗位，扑算in ê壽數也攏有上百歲。周朝文王ê歲壽九十七歲；武王ê歲壽九十三歲；穆王坐位一百年；這時佛教iáu-boē入中國，m̄是因為服事佛才會得著án-ní-siⁿ。
到漢朝明帝，hit 時今才有佛ê法術；明帝坐位只有十八年niā-niā；hit-tia̍p反亂死失相續，國運無久長。宋、齊、梁、陳、元、魏，以後服祀佛漸漸勤謹，歲壽世代那短。雖然梁武帝坐位四十八年；伊前後三koè捨身敬佛；祭獻宗廟無用牲禮；一日食一koè，指示菜蔬果子niā-niā；了後竟然hō͘ 侯景所迫，餓死tī臺城，國也續滅無；服事佛求福氣反轉有禍患。照án-ne看也就知佛ê bē堪--得hō͘ 人服事。
唐高祖今才接著隋ê天位，就議論teh-beh除hiah-ê佛；可惜當時ê人臣知識無懸，bē會深知先王ê道理，古今ê合宜，相佮闡明聖道用來救這號弊端，就這個除佛ê事誌續放煞--去。臣常常怨恨，獨獨欽仰聖人文武全才ê皇帝萬歲爺你至神至聖英雄勇武，數千百年來無人會比--得，今才坐位就 m̄ 准印度人來做和尚司公 ，koh m̄ 准設廟宇，臣往往扑算高祖ê志氣的確對萬歲爺ê手來做成；現今就是bē 得liâm-piⁿ 做成，敢 thang放hō͘ 伊顛倒盛--mah ？
今聽見萬歲爺hō͘ chiah-ê 和尚去鳳翔迎接佛骨，御駕上樓來看in扛入去內殿；又koh kah chiah-ê 廟寺相輪流迎接，相佮款待--伊；臣雖然極憨，的確知萬歲爺bē會hō͘ 佛迷惑，致到備辦這號尊崇服事來向望福氣；直直是扑算，好年冬人歡喜心，趁百姓ê意思，替京城讀冊人以及百姓設奇觀，做chhit-thô ê器具niā-niā；敢真正有聰明ê仁君肯來信這號ê事--mah？總是百姓愚蠢快受迷惑，難--得曉理；設使看見萬歲爺án-ne，就掠做你是真正實心teh服事佛；攏beh講皇帝大大ê聖人尚且全心敬信，咱百姓是下賤ê人，m̄ 應該比伊較惜性命；驚了致到燒頭殼，燒手指，誠百規群來燒經衣紙錢 ，對早到暗逐家相看樣；又驚了後來老佮嫩浮浮搖搖，放sak本分ê事業艱巨。若 m̄ liâm-piⁿ 禁止迎佛ê人對hiah-ê 廟寺去巡 ，的確有斬手剉身來款待養飼--伊；che 是傷風敗俗傳到四方hō͘ 人笑，m̄ 是小可ê事。
論到佛本是外國ê人，參中國言語無仝，衣裳各樣，嘴無講先王ê法度ê話，身無穿先王法度ê服，也 m̄ 知君臣ê理義，也 m̄-bat父子ê恩情。設使伊ê 身軀到今iáu tī-teh，奉國家ê命來見朝，萬歲爺若beh容允接納--伊，不過宣令一時hō͘ 伊見，行主賓ê禮，賞賜衣裳一套；見了chhoā伊出去境外，莫得hō͘ 伊tiàm境內 迷惑百姓，可以；況兼 伊身軀死已經久，枯礁ê骨，污穢ê氣，敢應該hō͘ 伊入來皇宮內？孔子講，敬鬼神著離開--伊。古早ê諸侯，若beh去國--ni̍h弔喪，尚且著kah司公媽姨代先用桃枝掃除衰颯氣 ，然後才敢去弔喪，今，萬歲爺，你無緣故取污穢ê骨骸，親身臨到去看，也無用司公，也無用桃枝，chiah ê 人臣無講起 m̄ 著，御史也無講起失錯，臣實在見笑。懇求將這個骨發落hō͘ 有司官tàn落去水--ni̍h火--ni̍h，永遠滅絕禍根，絕斷天下僥疑，絕斷後代ê迷惑，hō͘ 天下ê人知大聖人ê所做贏過sim常萬倍，敢 m̄ 興旺快活--mah ？ 佛若是有靈聖，會作祟，會譴責，應該責罰臣ê身軀，天公teh鑑察，臣m̄ 怨恨，m̄ 反悔。
今向望萬歲爺莫得據在臣迫切懇求到極。謹慎拜表hō͘ 萬歲爺看；臣真正驚真正畏。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461