首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 辯神主論
辯神主論
卷期：第18卷 本次： 日期：1886/12 刊名：臺灣府城教會報 頁數：132
篇名：辯神主論 [ Piān Sîn-chú Lūn ]
作者：
  顯示 : 漢羅 全羅 並列  

辯神主論
1886.12 第十八張 p.132-134
今有接著廈門來ê批，前ê木主論已經批評定著。今照次序排列tī 下底：-
1.葉漢章，小溪。
2.盧三元，鼓浪嶼。
3.李超然，廈門。
4.李記際，廈門。
5.蔡天賞，泉州。
阮看chiah-ê論真大路用thang利益人，向望別日beh將頭幾若篇印規本。現時請將頭名ê論印tī 下底。
做論ê因端
舊年尾，有接--著台灣牧師一個題目，吩咐唐山台灣教會內ê先生，以及會友，著做一篇論來辯明神主ê意義。我是淺學ê人，詳細想這個事誌不止oh得推考到明，本然m̄ 敢做論，總是這個事誌盡在要緊，因為中國人，對古早就hō͘ 這號服事神主ê風俗所縛，那久那深，若無辯明，驚了教會內ê人hō͘ 世俗人嫌伊無祖無公，就無話thang應--伊；hiah ê外面人來聽道理，雖然o-ló道理好，總--是固執hit號服事神主ê風俗，m̄ 肯放離來服事上帝；所以我就無見笑我ê 無學問，大略做幾句來議論服事神主ê m̄ 著，佮信主ê人著怎樣來顯明真孝ê款式，向望thang做辨明孝道ê小可幫贊。若是其中有項無明，請列位ê牧師刪改，指示，是我ê 心所大大向望。
頭序
解明神主兩字ê意思。
今神主兩字，有人講木主，che是較無合意思，因為木--字解說是柴，主--字，解說是所歇ê位，的確著稱神主較合。因為神--字，是指死人ê神魂，主--字，是指神魂所歇ê位。因為中國對早有經起三教九流，用濟邪術異端譴損 迷惑人。其中有釋教，造出輪迴ê道理，引誘眾人。伊講人稟受天地陰陽二氣交感出世成做人，所以人ê身軀有三魂七魄；魂是陽氣，魄是陰氣；看『淮南子說山訓註』有講，魂是陽神，魄是陰神；魂指人ê智慧，魄指人ê精英。
釋教講人死ê 時，魂昇上懸，魄降落地；三魂，一條歸墓，一條歇tī 神主--ni̍h，一條入陰間，後來koh再出世，若是生前食菜，奉佛，誦經，禮懺，收心行好，就chhoā到西天清淨ê所在，成仙，成佛，若是做歹ê人，神魂入陰間，著經過十八重地獄，後--來koh再出世，有ê 做禽鳥、有ê 做走獸、有ê 做六畜。這號真正是異端，大陷害中國人，m̄但平常ê人受伊ê 迷惑，就尊貴博學ê人亦受伊ê 迷惑，那久那深，不止oh得曉悟。今beh辯明這號服事神主ê m̄ 著，向望hō͘ 人緊猛 放sak --伊，來服事上帝，thang行真孝，會享受上帝所應允ê長歲壽。Che是做頭序。
開拆
分做七段
第1段，論設立神主ê款式。第2段，論設立神主ê源流。第3段，論古早帝王獻祭神主ê緣故。第4段，論設立神主ê本意。第5段，論設立神主ê m̄著。第6段，論獻祭神主ê m̄ 著。第7段，論耶穌ê學生著tuì重真孝。
第一段
設立神主ê款式
中國人ê設立神主，伊ê 款式無相同，總--是伊ê 意思大概相同。因為中國不止大，共有十八省，逐省無一盡有神主。第一tuì重神主--ê，就是福建廣東兩省；tī 只兩省ê中間，所設立ê神主亦無一盡相同。有所在無逐家有服事神主，只有伊ê 社裡有起祠堂，內面設1個公牌。若是前程家，抑是家長，以及有錢ê人過往，伊ê 子孫就將伊ê 名字寫tī公牌--ni̍h。若是平常人過往，就boē得thang寫tī 公牌，只有設一本家譜，記載過往ê人ê事誌tiāⁿ-tiāⁿ。
論福建省，獨獨漳泉兩府盡在tuì重神主；所以逐鄉社有起祠堂，設立公正ê神主，koh逐家亦有設立私khia ê神主。
這個神主牌，古早是用桑仔柴來做，有ê 是用栗柴來做，稱做祖宗來服事，是beh表明報本追遠ê意思。稽考『公羊傳』有講，虞子用桑柴，是取伊仁惠ê意思；周子用栗柴，是取伊堅定佮表明尊敬ê意思。
(後張beh koh印。)
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461