首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 辯神主論
辯神主論
卷期：第19卷 本次： 日期：1887/1 刊名：臺灣府城教會報 頁數：3
篇名：辯神主論 [ Piān Sîn-chú Lūn ]
作者：
  顯示 : 漢羅 全羅 並列  

辯神主論
1887.01 第十九張 p.3-5
(接前張第135面。)
所以人死，就著買一仙神主，不論男女，攏著照伊ê 名姓來寫tī 神主--ni̍h。譬喻查甫人姓陳，中央著寫，顯考陳公諱某名神主；若是婦人人譬喻姓林，著寫，妣林--氏某名神主。右爿著寫孝男ê名。神主是兩爿來合--ê，內面寫死人ê生時日月，佮過往ê年、月、日、時，葬tī 甚物山，以及分金 字向。
到tī 出葬ê 時將神主chhāi tī 魂亭 --ni̍h，佮棺材扛上山，買一隻白雞角hē tī 棺材頂；若是富貴ê家，就請一個有爵位ê人tī beh進葬ê 時將白雞去刺血，點tī 神主--ni̍h，號做點主，意思是beh hō͘ 死人ê神魂歇tī 這仙神主--ni̍h。
已經點主明白，就將棺材安葬，然後才將魂亭扛倒去in厝，號做返主；到in厝，就排列牲禮獻祭，hō͘ 子孫親戚朋友跪拜，號做安位。到第3日透早，伊ê 子孫舉燈到墓，提一塊墓塗，沿路叫伊倒--來，號做叫墓；將墓塗hē tī 香爐--ni̍h，糊一座靈厝，一仙魂身，早暗排菜飯獻祭、燒紙錢，號做孝飯。散hiong人孝7日就煞，較會得過ê人孝十四日，富貴ê人孝四十九日，然後請和尚來超度，號做拜懺；有人講，做功德，有人講，做功果，有人講，做香華；有ê做半日，有ê做一日，有ê做幾若日，攏無定著，是照伊家事ê有無；到ê昏就燒庫錢，號做繳庫；到半暝，就將冥厝佮魂身一盡燒lio--去，號做除靈；然後只有逐月ê初一十五佮年節孝菜飯定定；到一年滿，就做忌，號做對年；到3年，就將神主請入龕，有ê 請入祖厝。Che是設立神主ê款式。
議論第二段
設立神主ê源流
今這號神主ê源流，真正oh得稽考，因為流傳不止久，常常聽見人講，是對丁蘭設起，但是無冊thang稽考，獨獨「日記故事」有大概記載伊ê 事誌tiāⁿ-tiāⁿ。是講，漢朝丁蘭是河內ê人，細漢ê 時，父母早過世，boē得thang奉養，到大漢數念父母養育深恩，無thang報答，就刻柴做像，服事伊親像活，伊ê 某服事日久，就無敬--伊，看做柴頭，用針鑿伊ê 指頭仔，血水流出。丁蘭看見柴像流血，心大憂悶，流目屎，問伊ê 某得知情由，就離伊ê 某。對án-ni，後來ê人就學--伊，設立神主做父母公媽祖宗來服事。
總是細膩講究，神主的確 m̄ 是對丁蘭設起，因為有3項ê無合。第一項ê無合，丁蘭是小可ê人，無爵位，無好額，thái-thó會hō͘ 眾人攏趁伊ah ？ 設使會hō͘ 眾人趁--伊，亦boē會hō͘ 官府趁--伊；若會hō͘ 官府趁--伊，亦的確boē會hō͘ 皇帝趁--伊。第2項ê無合，丁蘭是漢朝ê人，稽考神主較早就有，m̄ 是對漢朝起頭。第3項ê無合，「日記故事」ê冊，m̄ 是大經典，就是清朝道光年間陳彌光先生所著--ê。雖然有記載二十四孝，其中有項無實，不過是假設愛勸人行孝道定定，beh thái會得thang做憑據ah？親像án-ni，這個設立神主的確是較早。
有人講是對周武王設起，因為史記有記載，紂王無道，殘害百姓，武王beh去伐--伊ê 時，大會諸侯tī 盟津，tī 眾諸侯ê面前發誓，勉勵眾人同心伐紂；所以設立伊ê 老父文王ê神主牌去伐--伊。因為紂王是人君，武王是諸侯，若用人臣伐人君是不忠，設使 m̄ 去伐--伊，出在伊暴虐百姓是殘忍。Koh天下諸侯三分有兩分歸周，che是天命令伊著去伐--伊，所以設立神主牌，用伊ê 老父文王ê名去伐--伊。Che 是設立神主ê源流，總--是亦boē得thang做確實ê憑據。
Koh稽考「書經」，泰誓上ê篇記載武王伐紂ê事誌，就是武王續接伊ê 老父文王侯位ê十三年，正月，大會諸侯tī 盟津，武王發誓ê話，其中有講，商王受無beh服事上帝神奇，無服事伊ê 祖宗，佮我小可人承受伐商ê命令tī 我ê 老父文考ê祖廟。對這幾句thang 知，武王ê代先已經有神主lah，因為武王講伊受命令tī 文王ê祖廟。án-ni神主ê源流 m̄ 是對武王設起，總是oh得明明知是對甚物時起。雖然中國書冊不止濟，亦無thang稽考到準，只有第一早ê冊，就是書經，其中舜典有記載「正月上日受命于文祖」ê句，文祖，是指黃帝ê廟 。Koh大禹謨有記載「正月朔旦，受命于神宗」ê句，神宗指堯帝ê廟。對án-ni thang知，堯帝ê時已經有神主lah，因為有祖廟，就的確有設立神主，扑算這個設立神主的確是對堯帝起頭，總是hit時只有尸主tiāⁿ-tiāⁿ，iáu-bē有木主；到周朝就koh加添設立木主；對án-ni就有兩號ê神主。到漢朝才廢無尸主，獨獨有木主tiāⁿ-tiāⁿ。Che是設立神主ê源流。
(後張beh koh印。)
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461