首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 辯神主論
辯神主論
卷期：第20卷 本次： 日期：1887/2 刊名：臺灣府城教會報 頁數：11
篇名：辯神主論 [ Piān Sîn-chú Lūn ]
作者：
  顯示 : 漢羅 全羅 並列  

辯神主論
1887.02 第二十張 p.11-13
(是葉牧師做--ê。)
(接前張第5面。)


第三段
古早帝王設立神主ê緣故
今古早ê人設立神主，就是beh獻祭祀；因為中國是不止早ê國，對堯帝ê 時已經有祭祀ê法度，就是有祭天地，號做郊社ê禮：看中庸，第十九章有記載，「郊社之禮所以事上帝」ê句。Koh看書經，舜典有「肆類於上帝」ê句。Koh有祭名山大川ê神，號做「柴望秩于山川」；koh 有六宗ê祭，號做「禋于六宗」，就是尊敬ê祭；因為所祭有六項，第一四時，第2祭寒暑，第3祭日，第4祭月，第5祭星辰，第6祭水旱。
Koh有祭百神，號做「遍于群神」，就是祭山頭、墳墓、水邊，佮古早聖賢ê神。
Koh有祭祖宗；看中庸，第十九章，有「宗廟之禮所以祀乎其先也」ê句。Koh看禮記祭法，記載設立祖廟是對堯帝起；總--是hit 時iáu-bē齊備，到周朝周公加添祭禮，才大齊備。Koh後來再koh加添祭祀不止濟；就是對三代以後，凡有設立法度tī 百姓--ê，佮勤勞tī 王事--ê，以及前代ê聖賢，攏著祭；亦有祭雲、虹、雨、灶、中霤，家神，外鬼，算boē了。
稽考周朝ê法度，皇帝有設立7廟、諸侯5廟、大夫3廟、德士2廟、官師一廟、百姓無廟，若有寢室，就是廳堂。án-ni 皇帝會得thang祭祀7代ê祖。諸侯5代，大夫3代，德士兩代，官書，百姓一代，就是thang獻祭伊ê 父，亦boē得thang獻祭伊ê 祖。
皇帝7廟，中央ê廟chhāi始祖ê神主，左爿有三昭ê廟，右爿有杉木ê廟。照次序來稱呼--伊，伊ê 父ê廟號做考廟；伊ê 祖ê廟號做王考廟；曾祖ê廟號做皇考廟；高祖ê廟號做顯考廟；五世祖ê廟號做祖考廟。這五世ê廟tī 五服內，伊ê 親iáu-bē盡；所以逐月一擺祭。到tī 6代7代祖ê廟，號做遠廟，亦稱做祧廟；因為親盡著遷徙，無tī 五廟ê數內，所以一年若有四時ê獻祭tiāⁿ-tiāⁿ。看詩經〈天保定爾〉 ê篇，有「禴祠烝嘗」ê句；春祭，號做祠；夏祭，號做禴；秋祭，號做嘗；冬祭，號做cheng ； 這個四時ê祭，號做孝享，是表明盡孝敬ê心；亦有春秋二祭。
親像án-ni，thang知古早帝王設立神主ê緣故，是beh奉祭祀tiāⁿ-tiāⁿ；所以諸侯、大夫、適士、官師、百姓攏總趁--伊。因為án-ni，中國人第一tuì重--ê就是神主，逐鄉社起祠堂，一年四時獻祭，歷代流傳無煞。Che是古早帝王設立神主ê緣故。
第四段
獻祭神主ê本意
稽考書經舜典記載「有能典朕三禮」hit句，意思是講，有甚物人會治理我ê三禮ah？Hit個三禮，就是祀天神，祭地祇，饗人鬼。因為古早ê人扑算天有天神，地有地神，人死，伊ê 神魂猶原tī-teh會來享受，來鑑納，佮會降福消災，所以才設立這個獻祭ê禮。
今愛議論古早人設立獻祭祖宗ê本意，大略有兩項。第1項ê本意，是beh追念祖宗ê功勞佮德行。所以五帝ê 時，用人做官，著查考hit 個人本身ê好德，koh著稽考伊ê 祖宗ê功勞佮好德；因為有德行ê人會致蔭伊ê 子孫。第2項ê本意，是beh向望祖宗ê神來享受來鑑納，thang降福hō͘ 子孫。
有人講古早帝王設立獻祭ê禮，意思m̄ 是beh向望祖宗會來享受，來鑑納，以及降福消災；獨獨是愛用一點ê孝心來追念祖宗ê功勞德行，thang續接伊ê 心志，傳述伊ê 事誌，表明報本追遠ê意思；因為祖宗tī--teh ê 時會用盡禮來服事--伊，到tī 過往，會用厚禮來埋葬--伊，然後亦著用盡禮來獻祭--伊，才會算是服事父母公媽祖宗ê齊全；是親像孔子講，「生，事之以禮，死，葬之以禮，祭之以禮」；án-ni古早帝王設立這個獻祭，祖宗ê禮，專專是因為beh追念tiāⁿ-tiāⁿ。
就應伊講，m̄ 是án-ni；雖然是講beh追念祖宗，但是大面是beh向望祖宗ê神來享受，來鑑納，thang降福消災。
稽考詩經中有3項ê憑據。第一項ê憑據：看清廟我將我享ê篇，有兩句講，「伊嘏文王既右饗--之」意思是講，會降福氣ê文王，已經降落tī 牛羊ê右爿來享受我ê 祭物。第2項ê憑據：看臣工有瞽ê篇，有兩句講，「肅雝和鳴，先祖是聽」意思是講，樂器ê和聲，親像致到祖宗ê神降--落來聽。第3項ê憑據；看商訟嗟嗟烈祖ê篇，有兩句講，「來kek來饗，降福無疆」；意思是講，祖宗會來享受，來鑑納祭物，亦會降福hō͘子孫。
已經有這3項ê憑據thang知古早帝王設立獻祭祖宗ê禮，m̄ 但是beh表明孝心來追念祖宗ê功勞德行，要緊是beh伊來享受，來鑑納，續降福hō͘ 子孫，是明--lah！
Koh咱現時ê人一年幾若擺獻祭神主，伊ê 意思佮早有各樣；因為m̄ 是beh追念祖宗ê功勞德行，專專是向望伊來享受，來鑑納，thang降福hō͘ 子孫定定。常常看見婦人人，tī 年冬月節佮做忌獻祭神主ê 時，手舉起香，常常是求伊ê祖宗著保庇子孫，造化寺，長歲壽，囡仔頭殼tēng，好育飼，攏m̄ bat聽見伊講beh追念祖宗ê話；有時若抵著家內ê人破病，常常是求伊ê 祖宗hō͘伊緊好。Che是顯明現時ê人ê獻祭祖宗是全然向望祖宗來享受來鑑納，thang降福氣，消災殃，是明lah！
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461