首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 辯神主論
辯神主論
卷期：第23卷 本次： 日期：1887/5 刊名：臺灣府城教會報 頁數：35
篇名：辯神主論 [ Piān Sîn-chú Lūn ]
作者：
  顯示 : 漢羅 全羅 並列  

辯神主論
1887.05 第二十三張 p.35-37
(是葉牧師做--ê。)
(接前張第29面。)
第七段
耶穌ê學生著tuì重真孝。
頂面所論服事神主是欺騙祖宗，koh得罪上帝；總是信主ê人已經受聖神ê感化改舊換新，凡事tuì重真，棄絕假，歡喜執守上帝ê戒命，盡心疼上帝，koh疼人親像家己．這個疼人親像家己，著掠疼父母做第一要緊；所以第五條戒講，敬lín-ê父母。án-ni孝敬父母，是做人ê子兒要緊ê本分；大約有三層thang議論。
第一層：論著孝敬父母ê緣故。因為父母生咱、養飼咱、抱咱、照顧咱、教示咱；伊疼子ê心無所m̄ 到，劬勞ê深恩講boē盡。親像詩經蓼莪ê篇有講，「欲報之德，昊天罔極；」親像án-ni，做人ê子兒，就若行孝道到盡，亦m̄ 是稀罕ê事誌，不過是合該tiāⁿ -tiāⁿ。
第二層：論父母生前ê孝敬。今父母iáu tī-teh，著及時孝敬--伊，早暗著服事甘旨，勤儉粒積來奉養--伊，報答父母養育ê深恩；m̄ 但著奉養伊ê身體，koh著奉養伊ê 心志，凡事歡喜順趁--伊，常常hō͘ 伊ê心歡喜。親像孔子講，「父母其順矣--乎。」因為外面既然有恭敬ê禮，內面的確有尊敬ê心。這號順趁父母ê命令，比奉養伊ê 身體是koh較要緊。設使奉養父母hō͘ 伊食穿充足，若無承順得著伊ê 心歡喜，佮養飼狗馬有甚物各樣？親像子由teh問孝，孔子應--伊講，「今ê有孝--ê，是掠做會養飼，到tī 狗馬攏平平會飼，若無敬有甚物分別ah？」可見服事父母的確著掠敬做要緊。
若是父母ê命令有合上帝ê旨意，雖然著磨亦m̄-thang推辭。因為父母疼子，愛伊做有路用ê人，就常常愛hō͘伊著磨；不論士農工商，的確時常教督；親像孔子講，「愛--之能勿勞--乎？án-ni做人ê子兒，應該盡力來行父母所命令，m̄-thang侮慢--伊。」
設使父母所命令是逆上帝ê旨意，就m̄-thang趁--伊。因為父母會錯誤，咱m̄-thang佮伊相同錯誤。總是m̄-thang佮伊做對敵，著遏止受氣，用歡喜ê面色、溫柔ê聲音、婉轉ê話，起敬起孝來苦勸--伊；親像孔子講，「事父母幾諫，見志不從，又敬；不違，勞而不怨；」án-ni向望伊歡喜聽，會改伊ê意思，來趁上帝ê旨意；che才算做「生事之以禮。」
Koh服事父母，著學古早人ê模樣；親像曾子奉養伊ê 老父曾軾，m̄ 但逐日用好ê物養飼伊ê 身軀，koh凡事請問歡喜遵趁伊ê 意思，來養飼伊ê 老父ê心志。所以孟子有講：「事親若曾子可以。」Koh著親像舜ê服事伊ê 老父瞽叟，雖然瞽叟最酷毒ê老父，舜iáu-kú會盡服事父母ê道理，致到hō͘ 伊ê老父瞽叟歡喜。這個是中國稱大孝ê人，咱著學伊ê 款式。
Koh有聖經所記載大孝ê人，咱一發著學--伊；就是約瑟，伊得志ê日，奉養伊ê 老父雅各，hō͘ 伊安然服事上帝到tī 一世人，亦續照顧伊ê 通族。Koh有一人純全有孝--ê，就是救主耶穌；伊齊全遵趁天父ê旨意，奉差臨到世間，來行救人ê事誌，到一世人無一點仔ê欠缺。看約翰十七章，第4節講，「我榮光你tī 世間，你所交代我行--ê，我已經行--伊。」親像án-ni，信主ê人beh行孝道，m̄ 但著學古早稱大孝ê人ê模樣，一發著學救主，才thang講是齊全ê有孝。
第3層：論父母死後ê孝敬。今信主ê人，m̄ 但父母活teh ê時著孝敬，就父母死後亦著孝敬。就是父母死ê 時，著盡哀傷ê情，憂悶啼哭；koh照伊ê氣力備辦棺槨衣衾來葬--伊，來安伊ê 肉體；著企墓牌來做記號；che才算做「死，葬之以禮。」到tī 埋葬了後，就無物thang敬奉，若有守三年ê喪孝，來數念伊十月懷胎3年乳哺ê恩德。論到獻祭ê禮就m̄ 使用，因為屬tī 外皮，m̄ 是真孝，攏無利益父母，反轉得罪上帝，所以m̄-thang行獻祭ê禮。
雖然m̄ 使koh再用物款待父母，亦m̄ 是講孝道行會盡，iáu-kú有thang行；就是翁某著和合，看以弗所第5章22節，28節；兄弟著相疼，來數念同胞ê義；看羅馬12章，10節；che是孝敬父母ê實心。Koh著和好宗族，顯明一本ê親，che是孝敬父母ê實事。Koh著照時巡視父母祖宗ê墳墓來照顧伊ê 骨頭；畫伊ê 大壽抑是肖影thang看伊ê 面貌。Koh著將伊ê好話，好ê品行記tī 冊--ni̍h，thang教示子姪親人；設立族譜，記載父母祖宗ê生辰日月，佮過世ê年、月、日、時，佮葬tī 甚物山，hō͘ 歷代ê後裔有thang稽考；che是孝敬父母ê實用。Koh著立身行和，盡力經營來照顧父母祖宗所留ê業，來榮顯伊ê 名聲；che是孝敬父母ê實德。親像án-ni，才thang講是「報本追遠」、「繼志述事」，盡孝道ê意義。
結尾
論行盡孝的確有大福氣
今孝是做眾項好德ê頭，信主ê人若會行頂面所論ê真孝，的確會得著上帝所應允ê福氣。因為第五條誡有講，「敬lín ê父母，就thang tī 耶和華lín上帝所賞賜ê地方，來享受長歲壽。」看這句所包含--ê是不止闊；因為長歲壽是五福ê頭一條。古早舜會盡服事父母ê道理，得著稱做大孝；看書經堯典講，「克諧以孝；」所以得著上帝所賞賜ê爵位、俸祿、名聲，長歲壽，到老善終。
願咱信主ê人勉勵來行這號真孝ê本分，亦thang向望會得著這號ê福氣。設使boē得著這世間外皮chiah-ê福氣，iáu-kú會得著心肝常常平安，時刻佮上帝相親，較贏tī外皮ê福氣濟濟，到tī 過世ê日，thang享受天堂永遠活無窮盡ê福氣。是我ê心所願。

葉牧師ê辯神主論，今印明白。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461