首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 辯神主論
辯神主論
卷期：第28卷 本次： 日期：1887/10 刊名：臺灣府城教會報 頁數：75
篇名：辯神主論 [ Piān Sîn-chú Lūn ]
作者：Un Sam-goân Un Sam-goân
  顯示 : 漢羅 全羅 並列  

辯神主論
1887.10 第二十八張 p.75-78
(Un Sam-goân做--ê.)
(接前張第70面。)
2. 照禮法，天子7間廟，服事7代；諸侯5間廟，服事5代；大夫3間廟，服事3代；德士兩間廟，服事兩代；官師一間廟，服事一代，亦續准百姓人祭一代，總是boē得thang有廟。天子、諸侯、大夫，in ê祖公若過7代、5代、3代，就無chhāi tī廟--ni̍h，不過是chhāi
--------------------------------------
*這層ê內面所引起冊--ni̍h 幾若句話，驚了無讀冊ê兄弟看了，bē明白，今beh開拆大略hō͘ lín聽。因為hit-tia̍p列國ê時陣，hià-ê國攏歸一統：一統ê國君叫做天子，其餘hià-ê 來歸ê國，in-ê國君號做諸侯。國內ê官府號做大夫。Boē選出--去做官，上等ê讀冊人號做德士，大概親像現今ê翰林院。庶民家去辦衙門事號做官師，大概親像現時ê房科。

tī 壇--ni̍h、墠--ni̍h；亦無親像tī 廟內ê時，有四時攏祭；到koh較久就埋，攏無koh再祭。Koh一間廟只有一仙神主；早曾子問孔子講，「廟--ni̍h有兩仙木主，che是著mah？」孔子講，「天無兩個日，國無兩個王，廟有兩個主，怎樣是禮我都boē曉--得。」今今仔日百姓人chhāi神主m̄ 但是祭一代、3代、5代、7代nā-tiāⁿ，是有ê chhāi到五六十代ê神主，亦續祭--伊；án-ni是百姓僭天子諸侯ê禮，亦是beh比伊koh較大；m̄ 但án-ni，亦是將幾十身ê神主chāi做一間一塊桌，che 敢m̄ 是違ke̍h孔子ê話，背古早ê禮數mah？
3.論祭ê所在無照古早ê法度。因為早ê法度，百姓人boē得thang有祖廟，不過是祭tī 寢室；今仔日ê人攏無照這個法，所有ê神主枋，攏是hē tī 廳桌頂了了；che 敢m̄ 是 m̄ 著？有人koh較大 m̄ 著，就是起祠堂，門楣頂寫「某姓家廟」。今百姓人都 m̄-thang有廟，怎樣寫廟？設使寫祠堂亦是 m̄ 著，因為百姓人不過是祭 tī 寢室nā-tiāⁿ。有人koh較大 m̄著，就是續祭tī 墓--ni̍h；kiám-chhái有人駁講，祭墓是對早就有，thái-thó m̄ 著？曾子講，「Thâi牛來祭墓 m̄值著趁父母tī--teh，用豬、雞，來服事伊。」孟子講，「Hit 個齊人去東門外chhē塚墓--ni̍h teh祭ê人。」án-ni祭墓自早就有，thái-thó m̄ 著？我講，M̄是án-ni ； 曾子所講ê祭墓，是抵仔去埋hit時來祭，m̄ 是埋了後常常去祭；koh曾子講這句是因為看人tuì重死後ê祭，較要緊生前ê服事，所以講這句；án-ni曾子雖罔無教人 m̄ 使祭墓，iáu-kú明明是講祭墓是無路用。論到孟子所講--ê，著知he m̄ 是假設有hit個人hit個事，不過是實實hit個代誌來鄙駁求富貴利值ê人nā-tiāⁿ；親像伊bat一擺假設一個宋國ê人拔稻仔ê代誌來議論氣ê道理；所以m̄-thang扑算早ê人實在有祭墓。漢朝蔡邕有講，「我聽見早無祭墓ê代誌。」魏文帝講，「骨頭 m̄ 知疼，m̄ 知癢，塚墓 m̄ 是神tiàm ê位，照禮無祭墓。」程夫子講，「好ê禮無tiàm曠野來行，所以生無tiàm曠野合，死無tiàm曠野祭。」漢朝鄭玄注禮記亦講，早無祭墓；設使伊講 m̄ 著，怎樣當時攏無人駁伊ah？早無祭墓第一明ê憑據就是看孔子，禮記檀宮hit篇有講，孔子細漢父死，到後來in老母亦死，孔子意思beh kā in合葬，m̄ 知in老父ê墓tī 佗落，就問郰曼父ê老母才知位，然後合葬tī 防。設使孔子有上山祭墓，thái-thó會 m̄ 知位in老父ê墓？
4.我讀禮記祭義，祭法，祭統chiah ê篇，有講kā查甫人入神主來祭，bē-bat聽見講有kā婦人人立神主來祭；所以天子、諸侯、大夫等，所祭--ê攏是先君、先王、先公、先祖；bē bat聽見有先太后、先夫人、先祖媽、先母親。後代ê人自作聰明，扑算講早聖王聖人iáu無斟酌，祭男無祭女，心beh thái-thó 會平安？對án-ni立先公ê木主，亦立先媽ê木主，扑算智識beh過頭聖人，有孝beh過頭聖人，功勞beh過頭聖人。實在是大大不堪；設使是自早所設亦是有錯，咱中國男女分別真嚴。照禮記講，男女m̄-thang參參the坐，m̄-thang同一個衫仔架，m̄-thang同一條洗身軀ê巾，m̄-thang相倚，m̄-thang相借問；孤姊妹ê查某子已經嫁，倒來做客，兄弟 m̄-thang kap伊同桌食。所禁有ê 雖罔是傷嚴，總是有ê 的確是著趁，同桌食若thang，同床睏的確是boē做得。今ê人立木主，有ê 是男子，有ê 是女子，chhāi內做一堆；譬喻大官死，就chhāi一身大官ê神主tī 桌頂；後來新婦死，亦chhāi一身新婦ê木主tī 桌頂；親像án-ni合禮mah？若講木主是死死ê物boē知，就mih使 chhāi，mih使祭？若講是有知，就男女混雜，暝日做堆，hit tè 桌那眠床，就男女同床；盡在可惡，盡在見笑。做子孫ê人款待祖公án-ni，是凌辱祖公，續凌辱本身，thái-thó是有孝？
5.照禮記祭法hit篇有講起甚物號人才會堪得受祭；伊講，「有好法度施到百姓，才祭--伊；為國出力到死才祭--伊；用著磨hō͘國安定，才祭--伊；會除大災厄，才祭--伊；會抵當大患難，才祭--伊。」Beh受祭的確著有這5項ê一項，若無，就攏boē得thang受祭，所以舜無祖孤亡，無宗瞽叟，反轉祖顓頊來宗堯；án-ni是無宗所親，是宗有德行--ê；經冊攏齊備，查考會知。今ê人m̄-bat法度，不論父母是好人抑是歹人，是君子抑是小人，攏無要緊；不過父母若一下死就立神主來祭--伊；設使父母會堪得受，都無講，設使boē堪得受，亦立神主來祭；án-ni是騙人騙天，害父母患著僭權不義ê罪，做先王ê罪人，深深thang吐氣。
6.照早ê法度人teh-beh祭ê代先著7日戒三日齋；bē祭ê時陣，就已經有一點憂悶，數念，一著ê心；致到teh祭ê 時，儼然有看見父母。今ê人攏無án-ni ； beh祭ê 時，亦無備辦，teh祭亦無敬心，祭了就分物倒--去in兜；有時較有物，就續請朋友來食酒，有時續喝拳，摃洋琴，叫藝旦，將祖公ê錢家己開，開hō͘ 祖公父母坐數。有時父母活teh ê 時陣勤苦粒積，到死後子孫án-ni生開，名是孝祖公，實是孝家己；祖公若tī 陰間會知，的確頓腳tiô地，咬牙切齒，講，我hiah ê錢是勤儉粒積幾十年，lín無保惜放心開，真是不孝子。有ê 家己無錢就四界彎借，到後來人beh討，無thang還--人，對án-ni hō͘人chhoh罵，凌辱父母；án-ni 因為家己ê食害父母見笑，敢是有孝mah？
(後張beh koh印。)
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461