Lūn kiù Siàu-liân lâng
(San Bo̍k-su kì--ê.)
1888.03 TĒ SAN-CHA̍P-SAN TIUN p.13
Hiah-kú ū kuí-nā lâng tì-ì siūⁿ cháiⁿ iūⁿ thang kiù siàu-liân lâng bián-tit phiâu, tó͘, a-phiàn, hì, kap lóng-chóng su-io̍k. Kū nî kî-tó-hoē hit lé-pài iā ū siūⁿ. Kin nî khah siông-sè siūⁿ. Kin nî phah-sǹg thang o̍h Se-kok hoat, lâi kiàn-tì Kiù siàu-liân ê Hoē. Kai-chài, ū Lô Bo̍k-su tuì Tāi-Eng kok lâi, pâi-lia̍t Se-kok ê siau-sit. Ē-mn̂g Tiong-goā ê Bo̍k-su kuí-nā lâng chū-chi̍p, tāi-seng siūⁿ chiah-ê tāi-chì, lio̍h-á phah phe-bô͘ thang hō͘ lâng siūⁿ. āu-lâi, kàu chiaⁿ ge̍h 23 ji̍t, chiū chū-chi̍p tī Kó͘-lōng-sū, tī San Ngá-kok ê chhù, lâi kau-poê, gī-lūn tāi-chì.
Chū-chi̍p ê lâng, ū pún-toē siàu-liân lâng choē-choē. Lāu lâng iā ū. Koh ū goā-kok lâng, chiū-sī bo̍k-su, kap i ê chhin lâng, pêng-iú. Pún-toē lâng ū 80. Goā-kok lâng 18. Tāi-ke tāi-seng chia̍h tê. āu-lâi tâng sim chū-chi̍p ū kî-tó, iā ū gîm-si, iā toâⁿ-khîm, chok ga̍k. Tāi-ke lóng hoaⁿ-hí. āu-lâi, ū lâng piān-lūn siat Kiù siàu-liân lâng ê Hoē. Khí-thâu, ì-sù bē lóng bêng, thèng-hāu tāi-ke saⁿ-kap kóng siông-sè, chiah ū siū kám-tōng. Ū 39 ê siàu-liân lâng chiah khí--lâi, kóng i ài ji̍p chit hō ê hoē. In ê miâ chiū liâm-piⁿ kì tī phō͘--ni̍h. Koh 35 hè í-chiūⁿ, iā ū 10 lâng iā ji̍p. Chit hō lâng chiū-sī ū miâ bô koân, put-kò tàu pang-chān, in-uī tē-it iàu-kín, chiū-sī siàu-liân lâng tio̍h ka-kī tam-tng i ê tāi-chì. Chú-lí chiū-sī Lô Bo̍k-su; Kì-sū nn̄g-ê, Táng-sū la̍k ê. Chiah-ê tng-chit lóng sī ta̍k kàu-hoē ū miâ-siaⁿ ê lâng. Lūn chū-chi̍p ê sî, khí-thâu m̄-káⁿ siat siuⁿ choē pái, só͘-í chí-ū chhiat-iàu kóng nn̄g pái, chiū-sī lé-pài-ji̍t chi̍t pái, lâi káng-kiù lêng-hûn ê tāi-chì; êng ji̍t chi̍t pái, lâi káng-kiù lóng-chóng iú-ek ê tāi; put-kò m̄-thang kha̍p--tio̍h kàu-hoē ê lé-pài, in-uī ì-sù m̄-sī beh hāi kàu-hoē, sī beh ke-thiⁿ lī-ek; chiū-sī siàu-liân lâng tio̍h tián i ê châi-tiāu saⁿ chiàu-kò͘ tek-hēng; koh hia̍p-le̍k kiù goā-bīn lâng.
To̍k-to̍k ta̍k ji̍t e-hng-sî lâng nā ū êng thang kàu tī chū-chi̍p ê só͘-chāi khoàⁿ chheh, á-sī sin-bûn-choá. Chū-chi̍p ê só͘-chāi phah-sǹg tī Thài-san ê lâu-téng, bián-tit kiáu-jiáu. Ū lâng ín $50 thang boé ke-si. Lūn āu-lâi ê só͘-huì siàu-liân kóng, bô oh.
Lūn sím-mi̍h lâng thang ji̍p hoē, bô beh kóng i chêng ê tāi, to̍k-to̍k iàu-kín chit-tia̍p tio̍h li̍p-chì choè chèng-keng ê lâng. Lâng boē thang phah-sǹg oē suî-piān thiàu-ji̍p, thiàu-chhut. Tek-khak tio̍h chai koan-hē. Kàu-sî beh siat-hoat chit-ê tāi-chì kàu chim-chiok, chiū-sī lâng beh ji̍p, tio̍h hoē-lāi ê lâng pó-kú.
