Châi tēng jîn phín
1892.01 81 koàn p.6-7
Si-phian kóng, "Pháiⁿ-lâng chioh gîn bô beh hêng, hó-lâng khǹg jîn-ài sio-khoán-thāi". Si 37:27. Hó-pháiⁿ ê hun-pia̍t kì tī Sèng-chheh m̄-nā chi̍t bān kù, kim-sì ê chûn-sim, só͘ kóng-chhut ê giân-gí, só͘ kiâⁿ-chò ê tāi-chì, lóng bô saⁿ-tâng, lâi-sì só͘ siū ê pò-èng iā kok ū koh-iūⁿ; chin chē kù-oē iā kóng bē chīn. To̍k-to̍k chit phiⁿ ê si sī Tāi-pi̍t-ông choan ēng chi̍t-hāng lâi lūn chit-nn̄g-téng ê lâng, m̄-bián ke kóng pa̍t-hāng, chiū chit-hāng khai-chîⁿ ê hoat-tō͘ iā hun-pia̍t ē chhut.
Chhiáⁿ ēng pháiⁿ-lâng chioh gîn bô beh hêng lâi lūn. Hoān kā lâng chioh chîⁿ pún m̄-sī tú-hó ê tē-pō͘, goá ū èng-tit ê chîⁿ chū-jiân tio̍h siūⁿ loā-chē só͘-ji̍p, ē-kham--tit khai loā-chē chhut khì; hô-pit tio̍h kā lâng chioh? Só͘-lô-bûn kóng, ‘Chioh-gîn--ê tek-khak chò chè-chú ê lô͘-po̍k'. Chim 2:7, chit-kù-oē chin-chiàⁿ ū iáⁿ. In-uī chè-chú tek-khak biáu-sī pîn-kiông ê lâng, khek-po̍k khiàm-chè ê lâng, he̍k-sī tng chèng-lâng ê bīn-chêng mē--i, hō͘ i bô thé-biān, he̍k-sī tī ke-chhī phah--i lâi lêng-jio̍k i-ê sin-khu, á-sī tui-pek chin-kín, kah i khì chhoē put-gī ê châi-lī lâi hêng khiàm-hāng. Sui-jiân chè-chú ê chò lâng pún bô hó thang chun-kèng, iā tio̍h uí-khiok lâi sūn i-ê bēng, m̄-káⁿ ge̍k--i, ná-chún lô͘-po̍k chi̍t iūⁿ! Khó-sioh jîn-kiông sè-pek, ū-sî bô-ta-oâ tio̍h kā lâng chioh chîⁿ, chóng-sī tio̍h siūⁿ beh chiàu sím-mi̍h hoat-tō͘ lâi chioh, chiah m̄-bián hoān-choē lâi sit-lo̍h Siōng-tè ê hoaⁿ-hí.
1. Tek-khak tio̍h seng siūⁿ choáⁿ-iūⁿ ū thang hêng, jiân-āu chiàⁿ kā lâng chioh, nā phah-sǹg bô-hoat thang hêng, iáu-kú beh kā lâng chioh, che kap chûn-sim m̄-hêng ū sím-mi̍h hun-pia̍t? án-ni chiū sī thau-the̍h, piān sī hoān-tio̍h Thiⁿ-pē tē-peh-tiâu ê sèng-kài. Só͘-í hoān beh kā lâng chioh châi-bu̍t ê lâng tio̍h tāi-seng siūⁿ, ū siáⁿ hoè-mi̍h thang bē, ū siáⁿ kū-siàu thang siu, lâi tí chit khoáⁿ khiàm-hāng. iū tio̍h siūⁿ chè-chú ê pún chîⁿ chin-chiàⁿ sī iàu-kín, chiū só͘ bêng-iok ê ji̍t-kî iā m̄-thang bô tì-ì, in-uī chè-chú kiám-chhái teh ǹg chè gîn khì hêng pa̍t lâng. Nā chi̍t-ē koè-kî chiū m̄-nā chū-kí bô sìn-si̍t, kiaⁿ-liáu iû-goân iā luī-tio̍h chè-chú kap lâng sit-iok. Só͘-í beh chioh ê sî tēng-kî tio̍h kín-sīn, m̄-thang siuⁿ chá, kiaⁿ-liáu pī-pān bē lâi, tì-kàu chū-kí pe̍h-chha̍t, piān sī hoān-tio̍h Thiⁿ-pē tē-káu-tiâu ê sèng-kài. Sèng-chheh koh kóng, "Lām-sám kóng ê lâng tek-khak siū-khó͘ tī liû-n̂g ê hoé-kheⁿ", che kiám m̄-tio̍h kiaⁿ mah?
2. Tek-khak tio̍h kín-kip ê sî si̍t-chāi bô-ta-oâ chiàⁿ kā lâng chioh, m̄-thang in-uī ài chia̍h-hó chhēng-hó, kap pêng-sî bô iàu-kín ê sū lâi kā lâng chioh. Nā in-uī bô tiuⁿ-tî chai-hō hut-jiân lâi, chhin-chhiūⁿ ke-lāi ê lâng tio̍h tāng-pēⁿ khiàm-gîn i-tī, chhin-lâng sí-sit khiàm-gîn bâi-chòng, ko͘-put-chiong tio̍h khoàⁿ só͘-ji̍p loā-chē chiàⁿ khai chhut, siat-sú só͘-ji̍p nā chió, chiū chho͘-pò͘ i-chiûⁿ suî-piān chhài-pn̄g iā thang tō͘-oa̍h. Lán sìn ê lâng bat Thiⁿ-pē sī chû-pi ê Chú, chai lán só͘ khiàm-khoeh; Kiù-chú Iâ-so͘ iā kà-sī lán kiû ji̍t-ji̍t só͘ khiàm ê bí-niû, koh kóng, lín nā tāi-seng kiû Siōng-tè ê kok kap gī, chiū jio̍k-sin só͘ khiàm ê mi̍h tek-khak siúⁿ-sù lín, in-uī Thiⁿ-pē kì-jiân seⁿ lán, thiàⁿ lán, tek-khak bô hō͘ lán siū iau koâⁿ.
iū siông-siông khoàⁿ-kìⁿ jîn-ke muí-pái in-uī bô tè thang chioh, chiū siūⁿ khioh-lân chū-chóng ê kè, sì-kè chio chhin-chiâⁿ pêng-iú kiat-liân chi̍t-tīn-hoē, muí-goe̍h khui chi̍t pái, á-sī kuí-nā goe̍h iô chi̍t pái, chò hoē-thâu--ê m̄-bián lī-ek, tit-tio̍h chē-chē lâng pang-chō͘, chò hoē-kha--ê í-keng iô--tio̍h í-āu thang lân-san thoaⁿ hêng; khiok iā kín-kip siong-thong, lióng-pêng lī-piān, nā sī chò hoē-kha--ê gîn siu-liáu bô koh khui, chiū liân-luī chē-chē lâng liáu-pún-gîn.
3. Chò hoē-kha--ê iô-liâu bē ē koh la̍p, chiū luī-tio̍h hoē-thâu thè i tāi-poê, chit tiong-kan siū khek-khui kan-khó͘ ê lâng sǹg bē liáu; chit hō iā sī kap chioh bô beh hêng bô koh iūⁿ, sìn tō-lí ê lâng koh-khah tio̍h kìm-kài.
Nā-sī ū chioh tek-khak tio̍h lóng hêng, Sèng-chheh kóng, Chí ū pháiⁿ-lâng chioh bô beh hêng. Só͘-í hoān ū kā lâng chioh bô beh hêng lóng sī pháiⁿ-lâng, tek-khak chhiok-hoān Siōng-tè ê siū-khì, in-uī Thiⁿ-pē pún-sī chì-kong chì-gī ê Chú, hoān chò put-kong put-gī ê lâng tek-khak bē tit-tio̍h I chiok-hok. In-uī bu̍t kok iú chú, choáⁿ-iūⁿ kóng kong-gī, chiū sī chiong goân-mi̍h kui goân-chú; hit-hō khiàm lâng ê chîⁿ--ê, i só͘ chhēng ê saⁿ, só͘ chia̍h ê pn̄g, só͘ ēng ê khì-khū, lóng m̄-sī ka-tī ê, it-khài sī pa̍t lâng ê mi̍h; tāi-khài pa̍t lâng ê mi̍h nā m̄-sī lâng sàng goá, iā m̄-sī kam-goān chhut chāi goá ēng kú-kú, goá iû-goân bián-kióng teh ēng, piān sī bô chiàu kong-gī khoán-thāi lâng, án-ni kiám ē tuì chè-chú bô kiàn-siàu ê bīn mah?
Chiàu che khoán lâi kiâⁿ, m̄-sī tek-choē lâng, iā sī ka-tī hām-lo̍h choē, chhì khoàⁿ khiàm chè ê ke ta̍k-ji̍t kóng pe̍h-chha̍t-oē, ta̍k-ji̍t kek lâng siū-khì, chū-kí sim-lāi iā bē pêng-an; ū-sî tiàm chhù-lāi thiaⁿ-kìⁿ lâng phah-mn̂g, chiū gî sī beh lâi thó siàu, ū-sî tī ke-chhī thiaⁿ-kìⁿ lâng teh kiò, chiū kiaⁿ-liáu gū-tio̍h chè-chú, ū-sî khiàm chē oh-hêng tio̍h cháu khì hn̄g-hn̄g ê só͘-chāi, tì-kàu pē-bó bó͘-kiáⁿ bē-tit sio-kìⁿ. M̄-nā án-ni hoān sìn Chú ê lâng kuī pài Thiⁿ-pē ê sî chai chū-kí ū hoān-tio̍h chit hō choē, kiaⁿ ē siū Thiⁿ-pē chek-hoa̍t, m̄-káⁿ kiû i chiok-hok, tuì án-ni soà hán-tit kî-tó, kì-jiân lī-khui Siōng-tè hn̄g-hn̄g, chiū khoài-khoài kīn Mô͘-kuí, kiám m̄ sī put-chí guî-hiám?
Nā-sī gī ê lâng chiū m̄-nā kong-tō hêng khiàm-hāng, iā beh chû-pi pang-chō͘ pa̍t lâng. Hoān chò gī ê lâng tek-khak m̄ chhin-chhiūⁿ biō-lāi ê hoê-siūⁿ tō-sū, chīn pàng-sak seⁿ-chêng ê sū-bū, m̄ kò͘ sè-chiūⁿ ê chîⁿ-châi, siat-sú bô tit-tio̍h siáⁿ-mi̍h lâi iúⁿ-chhī i-ê seng-khu, thài-thó ū thang si-in lâi chín-chè sè-kan. Sèng-chheh kóng, "Lūn in-khîn chiū bo̍h-tit pîn-toāⁿ". Lô 12:11. Pó-lô koh kóng, Choan-bū thiâm-chēng, iàu-kín ka-tī ê tāi-chì, pún-sin ka-tī chò kang, it-chīn chiàu goá ê bēng-lēng, kiâⁿ só͘ tio̍h kiâⁿ-ê lâi khoán-thāi hoē-goā ê lâng, chū-kí bô khiàm-khoeh. I Ka 4:11, 12. Koh kóng, ‘Lâng m̄ chò-kang bo̍h-tit hō͘ i chia̍h. Goá thiaⁿ-kìⁿ lín tiong-kan ū lâng bô hoat-tō͘, bô choan-bū ka-tī ê gia̍p thâu-lō͘, pàng-sak ka-tī ê keng-kí, khì chhap pa̍t lâng ê tāi-chì. Goá oá-khò Chú Iâ-so͘ Ki-tok khoán-khǹg hoan-hù i, eng-kai thiâm-chēng, kok lâng chò i-ê keng-kí, chia̍h i ka-tī ê chia̍h'. II Ka-3:10-12. Thang chai hoān sio̍k kàu-hoē-tiong ê lâng, put-lūn sū, lông, kong, siong, kok lâng eng-kai chīn-le̍k keng-êng.
In-khîn chò keng-kí thâu-lō͘ che m̄-nā bô hoān-choē, sī lán lâng eng-kai tio̍h án-ni. Lán lâng choáⁿ-iūⁿ ài tit-tio̍h châi-lī? M̄-nā ài ka-tī bô khiàm-khoeh, koh khah ài lîn-bín lâi hō͘ pa̍t lâng. Pó-lô kóng, ‘Lēng-khó͘ tio̍h-boâ chò-kang ē-tit-thang chín-chè sàn-hiong-lâng'. Hu̍t 4:28.
(āu-tiuⁿ beh koh chiap.)
