Lia̍h-hong lia̍h-iáⁿ
1892.07 87 koàn p.53-55
(Phoaⁿ Bûn-bêng chò--ê.)
Tāi-seng lâi lūn-khí hong kap iáⁿ , chiū chai lia̍h-hong lia̍h-iáⁿ sī khang-khang. Lūn chit-ê hong sī ū thang thiaⁿ i-ê siaⁿ , bô thang khoàⁿ i-ê hêng ; chit-ê hong sī oa̍h-khì . Lâng bô thang chai chit-ê hong tiāⁿ-tio̍h tiàm tī tah-lo̍h chi̍t só͘-chāi , iā m̄-chai chhoe khì hioh tī tó-uī ; put-kò lâng khoàⁿ i só͘ chhoe ê chháu-ba̍k , thang chai sī tah-lo̍h lâi , iā tah-lo̍h khì . Hong teh chhoe chiū-sī tuì hit-ê oa̍h-khì teh-cháu ; hit-ê oa̍h-khì nā toā-ē cháu , hong chiū toā , iā chin-kín , liâm-piⁿ chhoe lâi, liâm-piⁿ koè khì , nā-sī khoaⁿ-khoaⁿ cháu chiū pêng-hô . Chit-ê hong sī toā lī-ek lâng , kap ta̍k-hāng mi̍h ; nā bô chit-ê hong , lâng kap bān-mi̍h bē tit-tio̍h oa̍h .
Lūn iáⁿ ia̍h-sī bô mi̍h tī hit lāi-bīn , put-kò sī tuì ū-hêng chiah ū--ê . Nā-sī ài khoàⁿ-tio̍h hit-ê iáⁿ , tio̍h ū saⁿ-hāng chiâu-chn̂g ; chiū-sī ,－1. Tio̍h ū kng . 2. Tio̍h ū hêng . 3. Tio̍h ū thô͘-kha á-sī piah . Siat-sú nā kan-ta ū kng bô hêng chiū bô iáⁿ thang khoàⁿ ; nā ū hêng bô kng , ia̍h bô thang khoàⁿ iáⁿ; kiám-chhái nā ū kng ū hêng, nā bô thô͘-kha á-sī piah thang chiò--tio̍h , ia̍h bē-ē khoàⁿ tio̍h iáⁿ . Phì-jū lâng nā khiā tī lîm-kîⁿ ê só͘-chāi, i-ê iáⁿ nā siā tuì khàm-té lo̍h-khì , chiū lóng bô thang khoàⁿ--tio̍h i-ê iáⁿ . Téng-bīn só͘ kóng-khí hit nn̄g-hāng mi̍h ; chi̍t-hō sī ba̍k-chiu khoàⁿ ē-kìⁿ , chiū-sī iáⁿ , koh chi̍t-hō chiū-sī hī-khang thiaⁿ ē-tio̍h , chiū-sī hong . Chit nn̄g-hāng sui-sī thiaⁿ ē-tio̍h , khoàⁿ ē-kìⁿ , m̄-kú bē-tit thang ēng chhiú lâi lia̍h--i .
Kì-jiân sī án-ni , cháiⁿ-iūⁿ kóng lia̍h hong lia̍h iáⁿ ? Chiū-sī lâng ê só͘ chò chē-chē sī án-ni , chhin-chhiūⁿ hù-kuì , pîn-chiān , í-ki̍p lâng kap sè-kan lóng-sī chhin-chhiūⁿ hong chhin-chhiūⁿ iáⁿ . Phì-jū lâng ài kè-bô͘ lâi tit-tio̍h kong-bêng , á-sī ài tit-tio̍h hù-kuì ,chit-hō lâng ê só͘ chò sī chhin-chhiūⁿ lia̍h-hong lia̍h-iáⁿ,in-uī m̄ eng-kai tit-tio̍h kong-béng, i ia̍h-sī mê-ji̍t lâi siūⁿ , ū-sî kan-ta huì i-ê sim-la̍t kàu boé sī khang-khang ; ū-sî ū hō͘ i tit-tio̍h , m̄-kú lâng bô sím-mi̍h o-ló hit-hō ê lâng . Khoàⁿ Thoân-tō 4 : 16. Chhin-chhiūⁿ chit-ê lâng sī tú-tú chiâⁿ gû-gōng . ài tit-tio̍h hó-gia̍h ê lâng iû-goân sī án-ni , sui-jiân hit-ê chîⁿ-châi tī hit-ê hó͘-chhuì ê lāi-bīn , iā m̄ kiaⁿ ; kan-ta tit-tio̍h chîⁿ, bô iàu-kín ka-tī ê sìⁿ-miā,chiū sit-lo̍h sìⁿ-miā i iā kam-goān . Hāiⁿ ah！lâng kiám thang khoàⁿ-khin i-ê sìⁿ-miā , lâi tuì-tiōng chhin-chhiūⁿ hong chhin-chhiūⁿ iáⁿ mah?
Tuì án-ni lâi khoàⁿ , m̄-nā sī hù-kuì pîn-chiān , sī chhin-chhiūⁿ hong chhin-chhiūⁿ iáⁿ : chiū-sī chin toā chin khoah ê mi̍h iā ē án-ni , chiū-sī chit-ê thiⁿ-tē. Khoàⁿ Má-thài 24 : 35 . Kóng , " Thiⁿ-tē thang hoè-bô " , chit-kù oē m̄-sī pa̍t-lâng kóng--ê , chiū-sī lán ê Chú Iâ-so͘ chhin-chhuì kóng--ê . Koh khoàⁿ tī I-sài-a 51: 6 . Kóng , " Lín siáⁿ-sū m̄ kia̍h-thâu khoàⁿ thiⁿ, àⁿ-lo̍h khoàⁿ tē?thiⁿ tek-khak soà chhin-chhiūⁿ ian , thiⁿ-ē tek-khak phoà chhin-chhiūⁿ saⁿ ". Tī Hi-pek-lâi ê phoe , kap tī Pí-tek tē-jī tiuⁿ ê phoe , ia̍h lóng ū kóng-khí thiⁿ-tē beh pang-tó .
Chiàu sè-kan ū miâ-siaⁿ ê kok lâi lūn , ia̍h-sī bô kú-tn̂g ; ū-ê kok chá-sî chin chhut-miâ , iā chin kiông-béng , kàu taⁿ sī loán-jio̍k koà soe-bî , iā soà hong-hoè--khì ; chhin-chhiūⁿ Pa-pí-lûn-siâⁿ pún sī ke̍k kian-kò͘ , ia̍h put-chí ióng-béng , khì kau-chiàn bô-m̄ khah-iâⁿ, chhin-chhiūⁿ Kiù-chú boē kàng-seng gō͘ la̍k pah nî ê tiong-kan , liân Iâ-lō͘-sat-léng ia̍h hō͘ i kong-phoà ; tī sì-piⁿ ê kok bô-m̄ hâng-ho̍k--i; kàu chit-tia̍p hiám-hiám chhoē bô i-ê chong-chek . M̄-nā Pa-pí-lûn-kok án-ni , chiū pa̍t-kok ia̍h-sī án-ni ; chhin-chhiūⁿ kî-û , Bí-thài , Pa-se, Hi-lī-nî , Lô-má , chiah-ê kok , chêng hit-tia̍p sī chin chhut-miâ ê kok , Sèng-keng pí-phēng in sī kim gîn tâng thih . Khoàⁿ Tān-í-lí jī chiuⁿ , thong chiuⁿ só͘-kì chiū chai . Kàu chit-chūn bô sím-mi̍h thiaⁿ tio̍h in ê miâ-siaⁿ lah ! Chit-hō kiám m̄-sī chhin-chhiūⁿ hong chhin-chhiūⁿ iáⁿ mah?
Chiū án-ni lâi khoàⁿ , lâng toà tī sè-kan kiám ē pí thiⁿ-tē khah kú-tn̂g mah？ in-uī sè-kan siōng-chhiáⁿ ē hoè-bô , hô-hòng lán sè-kan lâng . Lâng chhut-sì toà tī chit sè-kan , put-kò sī kuí-cha̍p nî nā-tiāⁿ , chiū kui thó͘ . Nā khoàⁿ Pí-tek tē-it tiuⁿ ê phoe 1 : 17 só͘ kóng--ê chiū chai , kóng , " Lâng chiū-sī kià-siⁿ tī chit sè-kan " .Koh khoàⁿ tī Hi-pek-lâi 13 : 14 . Kóng , " Tī sè-kan lán bô kú-tn̂g ê siâⁿ lâi khiā-khí" . Tuì án-ni thang chai lâng iû-goân chhin-chhiūⁿ hong kap iáⁿ , bô tiāⁿ-tio̍h tiàm chit sè-kan ; chhin-chhiūⁿ lâng kin-á-ji̍t tī sè-kan , bîn-á-ji̍t á-sī koè kuí-nā-ji̍t sí--khì , kiám-chhái kin-nî tī sè-kan , kàu mê-nî seng-khu ê bah í-keng noā-liáu lah . Lâng sī tú-tú chhin-chhiūⁿ hong chhoe--lâi liâm-piⁿ koè--khì , lâng nā-sī phah-sǹg i beh tiàm sè-kan kú-kú , hit-hō lâng sī lia̍h-hong lia̍h-iáⁿ--ê , thang kóng sī gong-gōng ; só͘ phah-sǹg sī khang-khang. In-uī sè-kan sī chioh lâng toà , chiū sè-kan só͘ ū ta̍k-hāng mi̍h ia̍h-sī chioh lâng ēng; bē-tit thang chiong i tī siⁿ-chêng só͘ kè-bô͘ só͘ chek-chū hiah-ê miâ-siaⁿ hù-kuì saⁿ-kap chòng tī tē-hia̍t . Nā-sī án-ni beh cháiⁿ-iūⁿ? Kiám thang êng-êng koè ji̍t lâi thèng-hāu sí mah? Si̍t-chāi bô chit-hō ê ì-sù , in-uī lâng ū sù-chi , tek-khak tio̍h chīn i-ê khuì-la̍t lâi chò-kang , tek-khak bē-tit thang êng-êng koè-ji̍t lâi thèng-hāu sí . Chhin-chhiūⁿ Pó-lô kià phoe hō͘ Thiap-sat-lô-nî-ka ê lâng kóng , " Lâng nā bô beh chò-kang chiū m̄-thang hō͘ i chia̍h " . Khoàⁿ Hō͘-su 3 : 10 . Put-kò tī chò-kang ê lāi-bīn tio̍h siūⁿ , chiū-sī m̄-thang lia̍h chò-kang khah koè-thâu tī ho̍k-sāi Siōng-tè ; iû-goân tio̍h chûn chi̍t-tiám kèng-khiân ho̍k-sāi ê sim . Khoàⁿ Thê-mô͘-thài Chiân-su 4 : 8 . Kóng , " Tiāu-ióng seng-khu--ê hit-ê lī-ek sī sió-khoá , kèng-khiân ho̍k-sāi Chú hit-ê lī-ek sī toā " . Lâng siông-siông uī-tio̍h chò-kang tì-kàu chiâⁿ lia̍h-hong lia̍h-iáⁿ ê só͘ chò ;sī siūⁿ i só͘ chò ê kang , só͘ tit-tio̍h--ê sī chhut tuì i pún-sin ê pún-sū , chiū m̄ chai hit-ê ē hō͘ i chò-kang--ê sī chī-chuī . M̄-nā án-ni nā-tiāⁿ , soà ū-sî in-uī tī chò-kang ài tit-tio̍h hù-kuì , lâi sit-lo̍h sìⁿ-miā . Lâng tek-khak m̄-thang ū chit-hō ê pē-pēng ; tio̍h chhin-chhiūⁿ Lô-má 6 : 13 , só͘ kóng--ê , " Bo̍h-tit thòng-chhiòng sù-thé chò put-gī ê khì-khū , lâi hoān-choē , tek-khak tio̍h chhin-chhiūⁿ koh-oa̍h ê lâng , hiàn pún-sin hō͘ Siōng-tè , hō͘ sù-thé chò gī ê khì-khū lâi ho̍k-sāi Siōng-tè".
Taⁿ hoān sio̍k Chú ê lâng , tio̍h kap chit ê lia̍h-hong lia̍h-iáⁿ bô kan-sia̍p ; in-uī sìn Chú ê lâng só͘ kè-bô͘--ê , chiū-sī chin--ê ū-hêng--ê , kú-tn̂g éng-éng tī-teh ê kok , bô piàn-oāⁿ ê só͘-chāi , chin ê chun-kuì êng-kng , chiū-sī thian-tông ê hok-khì . Sèng-keng kóng sī " Eńg-oa̍h Siōng-tè ê siâⁿ , thiⁿ-téng ê Iâ-lō͘-sat-léng " , khoàⁿ Hi-pek-lâi 12 : 22 . Lūn chit ê siâⁿ sī êng-kng koà pó-poè , tī Be̍k-sī-lio̍k 21 : 21 . Kóng , " ēng kim pho͘ ke-lō͘ , ēng chin-chu chò siâⁿ-mn̂g " . iā-sī bē hoè-bô ê chun-kuì . Pó-lô kóng tit-tio̍h bē pāi-hoāi ê bián-liû , khoàⁿ I Ko-lîm-to 9 : 25 . Lūn tī-hia ê ke-gia̍p , sù-tô͘ Pí-tek kóng , "Tit--tio̍h bô pāi-hoāi , bô lâ-sâm , bô hoè-bô ê ke-gia̍p , thè-lán pī-pān tī thiⁿ-ni̍h " , I 1 : 4 . M̄-nā chit kuí-chat ū kan-chèng , lán ê Chú Iâ-so͘ ia̍h bat kóng , " Tio̍h chek chîⁿ-châi tī thiⁿ--ni̍h , tī hia thâng bē chia̍h , sian bē phah-pháiⁿ , chha̍t bē thau-the̍h ê só͘-chāi ", khoàⁿ Má-thài 6 : 21 . Chit-hō hok-khì kiám-thang bô kè-bô͘ lâi tit-tio̍h i mah？ In-uī tī sè-kan--ê ē hoè-bô , chhin-chhiūⁿ hong kap iáⁿ ê hok-khì , lâng siōng-chhiáⁿ kam-goān phoe-miā lâi tit-tio̍h , lâi kè-bô͘ , nā-sī āu-lâi ê hok-khì koh khah tio̍h ke-thiⁿ chhut-la̍t , lâi keng-êng--i . Nā-sī ē-hiáu siūⁿ án-ni , āu-lâi ia̍h ē-hiáu thang lâi chhoē chit-hō ê hok-khì , chiū bē chhin-chhiūⁿ lia̍h-hong lia̍h-iáⁿ ê lâng ê só͘-chò , in-uī lia̍h-hong lia̍h-iáⁿ sī kan-ta khang-khang tio̍h-boâ bô lī-ek .
