Kà-sī cha-bó͘ gín-ná
1892.10 90 koàn p.79
Ta̍k-kok ê tiong-kan , ū boē siū kàu-hoà ê chhiⁿ-hoan ,cha-po͘--ê pîn-toāⁿ bô beh chò kang , lóng sī i-ê bó͘ teh chò . Hoān it-khài keng-choh í-ki̍p iúⁿ-chhī ke-lāi ê bí-niû , lóng-chóng sī chhe-kah hū-jîn-lâng khì chò , chhin-chhiūⁿ chhe-ēng lú-pī chi̍t-iūⁿ . Nā-sī cha-po͘--ê êng-êng chē teh chia̍h; che khiok m̄-bián lūn.
Chóng-sī ū siū kàu-hoà ê pang-kok , lú-jîn chai thang tha̍k-chheh bêng-pe̍k lí-gī ,kàu-gia̍h lâi pang-chān ke-lāi í-ki̍p pān-lí chú-chia̍h. Só͘-í lâm-jîn kèng--I thiaⁿ--i . Tuì án-ni khoàⁿ-khí-lâi ū tha̍k-chheh bêng lí-gī , kap bô tha̍k-chheh bô bêng lí-gī saⁿ-pí ,chiū-sī lâng kap khîm-siù ê hun-pia̍t lah！Chóng-sī chò pē-bú ê lâng m̄-chai thang kà-sī i-ê cha-bó͘-kiáⁿ, hō͘ i chāi-chhù chò hiân ê cha-bó͘ gín-ná , chhut-kè chò hiân ê hū-jîn , koh āu-lâi chò hiân ê lāu-bú . Nā bô án-ni kà-sī--i, beh thài ū khah koh-iūⁿ hō͘ i ta̍k-ji̍t kiâⁿ khîm-siù ê lō͘ ah！
Kiám-chhái ū lâng kóng , Cha-bó͘ gín-ná chiū nā ē thiaⁿ-thàn kà-sī , chai thang tha̍k-chheh , chai thang siá-jī , chóng-sī bē-ē chhut-mn̂g chò pa̍t-hāng sū , tàu-thàn chîⁿ-châi , kan-ta chò i chi̍t-sin ê hióng-hok ; án-ni chhin-chhiūⁿ bô lī-ek . Cháiⁿ-iūⁿ m̄-chai , kì-jiân ē tha̍k-chheh bêng lí-gī , sui-sī bē tit-tio̍h thàn chi̍t-ē chîⁿ , m̄-kú i-ê lī-ek si̍t-chāi bô hān-liōng ;sī cháiⁿ-iūⁿ mah? Chiū-sī chi̍t-ke ê tiong-kan , lāu-pē chhut-goā thàn-chia̍h ; chiū kà-sī kiáⁿ-jî ê koân , khah chē sī chāi tī lāu-bú . Siat-sú sè-hàn gín-ná siū só͘ eng-kai siū ê kà-sī , chò só͘ tio̍h chò ê tāi-chì , tī ta̍k-hāng ū chhù-sū ū kui-kí ; chò lāu-pē ê lâng khoàⁿ-kìⁿ kiám bô chin hoaⁿ-hí mah? Nā-sī chit-hō koân lóng-sī tuì lāu-bú teh kà-sī--ê , tī cha̍p-kháu-chàu ū la̍k chhit kháu-chàu .
Phì-jū chhiⁿ-mî-lâng beh thài-ē ín-chhoā chhiⁿ-mî-lâng ah？ Só͘-í chò lāu bú nā bô tha̍k-chheh bêng gī-lí,beh thài-ē kà-sī kiáⁿ-jî mah？Chiū chhong-bêng tì-huī ê tiōng-hu kap gû-chhún ê hū-jîn beh thài-ē saⁿ-hô ; sī cháiⁿ-iūⁿ mah? In-uī gû-chhún ê hū-jîn , i-ê sèng-chêng sī chhin-chhiūⁿ gín-ná ,i-ê kiàn-sek iā sī chhin-chhiūⁿ gín-ná ; kiù-chin bē-ē kap chhong-bêng tì-huī ê tiōng-hu chò phoāⁿ-tit . Kiám-chhái tiōng-hu iu-būn ê sî , chiū bē-ē saⁿ an-uì ; he̍k-sī tú-tio̍h khùn-khó͘ ê kéng-hóng , i bē-ē saⁿ khó͘-khǹg . In-uī i só͘ iàu-kín--ê , to̍k-to̍k ē hiáu-tit chhēng suí-saⁿ chhah kim-khì . Siat-sú khoàⁿ-kìⁿ ū sin-khoán ê chhiú-khoân , chiū kiû i-ê tiōng-hu tio̍h kín-kín kā I bé ; nā iáu-boē kā i bé , i chiū chá-àm kiáu-jiáu chô-chak ,kàu kā i bé--lâi chiàⁿ hō͘ i-ê sim ē an-chēng . Taⁿ chit-hō ê hū-jîn-lâng beh thài-ē pang-chān ke-lāi ah!
Koh ū lâng kóng , Lú-jîn kīn tī bûn-be̍k ,khióng kiaⁿ-liáu i loán-jio̍k bē tam-tng tāi-chì . M̄-chai í-keng siū kà-sī ,ē bêng-pe̍k gī-lí, chiū ke-lāi tek-khak ū chhù-sū ,lāi-thâu chheng-chēng,saⁿ-khò͘ iā phok-sò͘ , ta̍k-hāng an-pâi kàu chéng-chê, iā thang hoaⁿ-hí kap loān-cha̍p ê ke toā ū hun-pia̍t , kiám m̄ chin hó mah? Só͘-í, Siōng-tè khoàⁿ lâm-lú lóng bô koh-iūⁿ ; in-uī lú-jîn ê lêng-hûn kap lâm-jîn ê lêng-hûn sī saⁿ-tâng pó-poè , iā ài lâm-lú saⁿ-tâng bêng-pe̍k gī-lí . Taⁿ iúⁿ-chhī cha-bó͘-kiáⁿ nā bô kà-sī--i , hō͘ i ū tì-huī chhong-bêng ,chiām-chiām ke-thiⁿ châi-lêng ; nā bô án-ni , chiū i beh tuì tah-lo̍h tit-tio̍h éng-oa̍h ê lō͘ lâi kiâⁿ mah? Koh i siū lī-ek siū sún-hāi , kiám sī chi̍t-ke niā-tiāⁿ mah?Taⁿ goān khoàⁿ chit-phiⁿ--ê tio̍h chīn-la̍t kà-sī i-ê cha-bó͘ gín-ná , hō͘ i tuì sè-hàn ha̍k-si̍p gī-lí , kàu tióng-sêng chiū chiâⁿ-chò bêng-lí ê hū-jîn-lâng.