青暝學
1893.08 100卷 p.77
(甘牧師記--ê.)
頂半年有5個囡仔逐日受教示。舊年尾一個學生略仔破病tò--去牛擔灣無koh來，m̄-kú tī-hia會做淡薄路用，就是去庄ni̍h讀聖經，講道理，亦teh教一個青瞑兄弟讀冊寫字。
近來有加設一項ê法度來利益chiah-ê 艱苦人。In kan-ta bat字是無夠額，要緊著有甚物工藝hō͘ in thang趁食；若無，本地青瞑人差不多攏總著去做乞食抑是學看命。
好佳哉！余先生娘tuì祖家tò轉來顯出真體貼ê心，請青瞑學生逐日到新樓，m̄ -nā佮in讀冊寫字算數，koh教in刺頷頸帶。今in已經熟手，會快快學刺別物，親像帽仔、手束、裌仔、衫、襪。論這個事誌，扑算koh無偌久有好ê消息thang報hō͘ lín 知。
近日我對泉州接著禮姑娘ê批略仔teh講起這個意思。現時hit間ê青瞑學有8個學生；in也teh學幾若項ê手藝，親像扑網、so 錢貫，hit號。
阮不止ài兄弟姊妹有時數念hiah-ê青瞑人。Tī 咱中間已經有二三十個，教會外是嶄然濟，因為逐所在有。咱無求上帝替in開一條路，驚了到路尾in-ê心真烏暗，境遇悽慘。耶穌無的確常常聽候艱苦人chhoē伊，較定著是伊先出頭引chhoā無thang向望ê人受安慰。
論到心內青瞑ê人以賽亞有講：「Hiah-ê青瞑--ê,我著牽--伊；m̄-bat路，我著chhoā--伊；hō͘ 暗做光，khiau做直。」 |
