Gô͘ Bûn-suí
1893.08 100 koàn p.79
(Kam Bo̍k-su kì--ê.)
Tī Tâi-oân thâu-chi̍t-ê pún-tē lâng tng thoân-tō kap tiúⁿ-ló ê chit chiū-sī Gô͘ Bûn-suí. I sui-jiân koè-sin í-keng kú, chē-chē hiaⁿ-tī iáu teh siàu-liām i, só͘-í tī Kàu-hoē-pò lio̍h-á lâi kóng-khí i-ê tāi-chì ún-tàng ē hō͘ lán siū bián-lē soà thang kám-siā Siōng-tè.
Bûn-peh pún-jiân toà Chiang-chiu, tī hia tng niû-chhe; boē thàn tō-lí ê tāi-seng iā sī gâu chia̍h a-phiàn. Goá ū thiaⁿ-kìⁿ lâng teh kóng, Saⁿ-cha̍p-goā nî chêng, Tn̂g-thâu-mn̂g-chha̍t kong-phoà siâⁿ ê sî, Bûn-peh cháu-khì Ē-mn̂g, āu-lâi thiaⁿ tō-lí ji̍p kàu-hoē.
Tông-tī sì nî, Má I-seng koè-lâi Tâi-oân, Bûn-peh iā kap i lâi. Khí-thâu nn̄g lâng ài toà Hú-siâⁿ, chóng-sī tú-tio̍h pháiⁿ-lâng ê chó͘-tòng, in chiah poaⁿ-khì Kî-āu tiàm hia chò Chú ê kang.
In-uī Bûn-peh bô loā-toā bat jī, nî-hoè iā chē, pún-sin m̄-káⁿ siūⁿ pa̍t-ji̍t ē tng thoân-tō ê chit; m̄-kú chi̍t-nn̄g nî ê tiong-kan Má I-seng khoàⁿ I jia̍t-sim koh chin-chiàⁿ ū hó bô͘-iūⁿ, chiū kah i chiām-sî khì toà Pi-thâu kóng tō-lí. Hit-sî chia ê koaⁿ put-chí m̄-ài goā-kok lâng lâi Tâi-oân chò seng-lí siat kàu, só͘-í Bûn-peh tī Pi-thâu thoân hok-im, peh-sìⁿ ê sim-koaⁿ toā iô-tāng tì-kàu siâⁿ-lāi ê huí-luī chū-chi̍p thiah lé-pài-tn̂g, koh lia̍h Tióng-hiaⁿ koaiⁿ-lo̍h kaⁿ, Bûn-peh iā hiám-hiám hō͘ in thâi.
Tông-tī peh nî, hiah-ê sū lóng pān kàu bêng-pe̍k, koaⁿ-hú chhut kò-sī chún lâng chhut-chāi i ji̍p-kàu, Má I-seng chiū tò-tńg-lâi Hú-siâⁿ, hō͘ Bûn-peh toà têng-á-kha ê pài-tn̂g thoân tō-lí. Kong-sū goân-nî, in-uī i sin-thé chin lám, soah-kang koè Tn̂g-soaⁿ, tī hia saⁿ-nî kú khah siông tó tī bîn-chhn̂g, liáu-āu chiū "tò-khì kap Ki-tok saⁿ-kap tī-teh".
Tuì goá lâi Tâi-oân ê sî kàu i tò-khì Tn̂g-soaⁿ, goá chha-put-to ta̍k ji̍t kap Bûn-peh kau-poê chiah ū siông-sè bat i. Lūn i-ê khoán-sit chit-tia̍p beh kóng-khí sì hāng nā-tiāⁿ: ----
1. I ta̍k-ji̍t káng-kiù Sèng-keng. Ì-sù sī m̄-nā chhoē sím-mi̍h tú-ha̍p ê tō-lí thang kóng-chhut tī lé-pài-tn̂g; in-uī Bûn-peh lia̍h-chò Siōng-tè ê tō-lí ná-chhin-chhiūⁿ ka-tī ê bí-niû, iā chai pún-sin tāi-seng tio̍h siū i-ê kám-hoà chiah ē-kham-tit pò-iông hō͘ pa̍t-lâng thiaⁿ. Khoàⁿ i án-ni lâi tuì-tiōng Sèng-keng sī hō͘ lán ē kì-tit Tāi-pi̍t-ông só͘ kì, "Lí-ê lu̍t-hoat, goá chīn-chāi thiàⁿ-sioh, siàu-liām kàu kui-ji̍t."
2. I ta̍k-ji̍t choan-bū kî-tó. Lūn chit-ê tāi-chì, Bûn-peh kó-jiân chò chèng hiaⁿ-tī ê hó bô͘-iūⁿ. Chē-chē lâng ê kî-tó sī ê-hng chá-khí liām kuí-kù chin pau-hâm ê oē chiah soah, hoán-tńg Bûn-peh bô lūn sím-mi̍h sî sím-mi̍h tāi-chì, i-ê sim tiāⁿ-tio̍h ǹg-hiòng tī téng-bīn; iā m̄-nā pek-chhiat thè pa̍t-lâng kî-tó in-uī i siông-siông hián-chhut kám-in ê sim uī-tio̍h chêng só͘ tit-tio̍h--ê.
3. I gâu liāu-lí kàu-hoē ê sū. Jī-cha̍p-goā nî chêng toà chia ê goā-kok sian-siⁿ kàu Tâi-oân kuí-nā goe̍h ji̍t nā-tiāⁿ; koh, ta̍k só͘-chāi ê kàu-hoē sī siat bô loā-kú, só͘-í hit-tia̍p chit-ê thò-tòng chai-iáⁿ ê pún-tē lâng lâi tàu pang-chān, chin-chiàⁿ ū ki-hoē thang chò toā lō͘-ēng. Bûn-peh he̍k-sī khó͘-khǹg lâng, he̍k-sī siat-hoat liāu-lí tāi-chì, tāi-kē lóng chai i m̄-sī uī-tio̍h miâ-siaⁿ á-sī sím-mi̍h su-khia ê ì-sù lâi kiâⁿ. Hiaⁿ-tī kap kàu-hoē-goā ê lâng hoaⁿ-hí chhoē i siū i-ê kà-sī.
4. I put-koán sî ài lâng tit-tio̍h kiù. Ji̍t-sî i siông-siông khì kap chhù-piⁿ sio-bat ê lâng kóng tō-lí, ta̍k mê-hng tī pài-tn̂g iā kap in chū-chi̍p khui-thiah Sèng-keng khó͘-khǹg lâng tio̍h hoán-hoé sìn-khò Iâ-so͘. Bó͘-ji̍t, i án-ni teh thoân, ū lâng ji̍p-lâi thiaⁿ tia̍p-á-kú, sim chiū siū kám-kek. Goān Thiⁿ-pē hō͘ hit-ê bó͘-lâng iáu kú-kú tī kàu-hoē-lāi chò Siōng-tè chīn-tiong ê lô͘-po̍k. I sìⁿ Lí miâ-kiò Pà, jī-cha̍p-goā nî chêng khai-lō͘ khì Po͘-siā pò-iông hok-im, chit-chūn i tī Gû-taⁿ-oan chò thoân-tō sian-siⁿ.
