盡忠到死
1894.02 106卷 p.4, 9
請大家看下底第9面ê尪仔圖
有君王若 beh 招兵勇就有報揚 in beh 得著甚物報賞，攏無講起 beh 抵著甚物艱苦。耶穌無án-ni-seⁿ。伊有明明kā 人講 in 若 beh toè 伊的確 beh hō͘ 對敵怨恨、誹謗，佮另外歹款待濟濟項 ê 款式。
光佮暗攏bē和，所以趁真理 ê 人常常 hō͘ 世俗人佮 in 做對敵。雖然是án-ni，iáu-kú thang 常常歡喜，因為心內 ê 平安是chám然大。這號 ê 平安魔鬼 ê 百姓無一點仔會曉得。
得著白米是因為有經過扑佮舂。濟濟號ê 種子若無研著就攏無出好味。án-ni-seⁿ，tuì 主ê 百姓受窘逐in-ê 聖德會較明顯--出來。耶穌 ê 教會第一大 ê 危險就是因為無抵著對敵才做冷淡。
幾若百年前tī 大英國有一個少年太子ài做一項事誌總是看本身是無夠額大漢。有一個差用看見 án-ni就緊緊提大本聖冊來下tī 塗腳請太子踏 tī 頂面才會做tit。太子m̄ 甘願，koh有嫌hit 個差用ê 不敬。伊知是上帝 ê 聖冊所以m̄-thang 濫糝用。亦知tī 前世代有濟濟人因為ài照顧聖冊有受窘逐到死。咱逐家著數念hit個太子 ê意思，常常著想聖冊是親像濟濟世代受死 ê 人流傳。
當耶穌 toà 世間 ê時萬國有拜偶像，敢是獨獨猶太國無。Tī hit時第一權柄 ê 國就是羅馬國。到耶穌 ê 真理有廣闊宣傳羅馬 ê 人較濟有大怨恨。有時皇帝本身愛佔權 hō͘ 百姓拜in 那準上帝一樣。可見趁耶穌 ê 道理是真險。有千萬人 hō͘ 官府掠續害死。雖然是án-ni，耶穌 ê 真理是那久那興旺。濟濟信主 ê 人大欣慕受窘逐到死。若無受著這號就有煩惱。逐家相勉勵。皇帝愈久愈殘忍，m̄-kú 無采工。窘逐 ê 方法是極濟極歹款。
從中聖徒所經過 ê苦難有ê bat hō͘ in-ê 對敵pû in tī 鐵sèⁿ，有ê hō͘ in抹油 tī 遍身軀就點火燒著，有ê hō͘ in拖 in-ê 骨頭 tuì 骨輪攏起來，有ê hō͘ in 關tī 戲場就pàng-làng 極猛佮枵餓 ê 野獸出來咬著，有ê hō͘ in thîn滾chhiâng-chhiâng ê 鉛入tī in-ê 嘴、目佮耳，亦有別項 ê jím法講bē了。
到耶穌上天了後三百年 ê 中間有十koè ê大窘逐。國家若抵著甚物災厄人攏有嫌是基督徒致到，亦有時對敵有將祭獻 ê 酒淋著人 tī 市ni̍h所賣 ê 貨物，意思就是beh 勉強 hiah-ê基督徒食祭偶像 ê 物抑是吞忍餓死。
Tī 下底ê 尪仔圖逐家thang看見一個少年婦人人已經hō͘ 仇人將鐵鏈縛 tī 一枝柱定著 beh 燒死。吩咐做這號事 ê 羅馬掌權 ê人參婦人人、朋友，以及兵丁 tuì 台頂teh 看見。亦tī 下底有奴僕抵仔teh 起火。女基督徒 ê 面貌是suí 亦是平安，正是大各樣tī 別人--ê。咱著感謝上帝因為有軟弱 ê 聖徒到hiah 好膽干證伊ê 道理，又koh 咱著求聖神贊咱時時來顯出極堅固ê 心，就到路尾咱thang享受永遠 ê 福氣。
(台灣府城教會報 第106卷，1894年2月) |
